ಭಾರತ- ಪಾಕ್ ಪಂದ್ಯ ನಡೆಯುತ್ತಿರುವ ಮೋದಿ ಸ್ಟೇಡಿಯಂ ವಿಶೇಷತೆಗಳೇನು ಗೊತ್ತಾ?
India vs Pakistan, World Cup 2023, Narendra Modi Stadium: ಭಾರತ ಹಾಗೂ ಪಾಕಿಸ್ತಾನ ನಡುವಿನ ವಿಶ್ವಕಪ್ ಕದನಕ್ಕೆ ಆತಿಥ್ಯವಹಿಸುತ್ತಿರುವ ನರೇಂದ್ರ ಮೋದಿ ಕ್ರೀಡಾಂಗಣದ ಬಗ್ಗೆಗಿನ 10 ಕುತೂಹಲಕರ ಸಂಗತಿಗಳು ಹೀಗಿವೆ.
ಭಾರತ ಹಾಗೂ ಪಾಕಿಸ್ತಾನ ನಡುವಿನ ವಿಶ್ವಕಪ್ ಕದನಕ್ಕೆ ಆತಿಥ್ಯವಹಿಸುತ್ತಿರುವ ನರೇಂದ್ರ ಮೋದಿ ಕ್ರೀಡಾಂಗಣದ ಬಗ್ಗೆಗಿನ 10 ಕುತೂಹಲಕರ ಸಂಗತಿಗಳು ಹೀಗಿವೆ...
ವಿಶ್ವದ ಅತಿ ದೊಡ್ಡ ಕ್ರಿಕೆಟ್ ಸ್ಟೇಡಿಯಂ: ಅಹಮದಾಬಾದ್ನಲ್ಲಿ ನಿರ್ಮಾಣವಾಗಿರುವ ನರೇಂದ್ರ ಮೋದಿ ಸ್ಟೇಡಿಯಂ 1.32 ಲಕ್ಷ ಆಸನಗಳ ಸಾಮರ್ಥ್ಯದ ಹೊಂದಿದ್ದು, ವಿಶ್ವದ ಅತಿದೊಡ್ಡ ಕ್ರಿಕೆಟ್ ಕ್ರೀಡಾಂಗಣ ಎನಿಸಿಕೊಂಡಿದೆ. ಇದಕ್ಕೂ ಮೊದಲು 1,00,024 ಆಸನಗಳ ಸಾಮರ್ಥ್ಯವನ್ನು ಹೊಂದಿದ್ದ ಆಸ್ಟ್ರೇಲಿಯಾದ ಮೆಲ್ಬೋರ್ನ್ ಕ್ರಿಕೆಟ್ ಗ್ರೌಂಡ್ ಈ ದಾಖಲೆ ಹೊಂದಿತ್ತು.
ಅಪರೂಪದ ಸಾಧನೆಗೆ ಸಾಕ್ಷಿ: ಈ ಮೊದಲು ಗುಜರಾತ್‌ನ ಸರ್ದಾರ್ ಪಟೇಲ್ ಕ್ರಿಕೆಟ್ ಸ್ಟೇಡಿಯಂ (ಮೊಟೆರಾ ಕ್ರೀಡಾಂಗಣ) ಎಂದು ಕರೆಯಲ್ಪಡುತ್ತಿದ್ದ ನರೇಂದ್ರ ಮೋದಿ ಕ್ರೀಡಾಂಗಣ ಹಲವು ಇತಿಹಾಸಕ್ಕೆ ಸಾಕ್ಷಿಯಾಗಿದೆ. ಇಲ್ಲಿ 1986-87 ರಲ್ಲಿ ಸುನಿಲ್ ಗವಾಸ್ಕರ್ ಟೆಸ್ಟ್ ಕ್ರಿಕೆಟ್‌ನಲ್ಲಿ 10,000 ರನ್ ಪೂರೈಸಿದರು. ಕಪಿಲ್ ದೇವ್ 1994 ರಲ್ಲಿ ತಮ್ಮ 432 ನೇ ಟೆಸ್ಟ್ ವಿಕೆಟ್ ಪಡೆದಿದ್ದರು. ಎಬಿ ಡಿವಿಲಿಯರ್ಸ್ 2008 ರಲ್ಲಿ ಟೆಸ್ಟ್ ದ್ವಿಶತಕವನ್ನು ಸಿಡಿಸಿದ್ದರು. 2011 ರ ಏಕದಿನ ವಿಶ್ವಕಪ್ ಕ್ವಾರ್ಟರ್ ಫೈನಲ್‌ನಲ್ಲಿ ಭಾರತವು ಆಸ್ಟ್ರೇಲಿಯಾವನ್ನು ಸೋಲಿಸಿತ್ತು. ಇದೇ ಮೈದಾನದಲ್ಲಿ ಸಚಿನ್ ತೆಂಡೂಲ್ಕರ್ 30,000 ಅಂತರಾಷ್ಟ್ರೀಯ ರನ್ ಗಳಿಸಿದ ಮೊದಲ ಬ್ಯಾಟ್ಸ್‌ಮನ್ ಎನಿಸಿಕೊಂಡರು.
800 ಕೋಟಿ ರೂ ವೆಚ್ಚ: ಈ ಮೈದಾನದ ನವೀಕರಣವನ್ನು ಸ್ಟ್ಯಾಚ್ಯೂ ಆಫ್ ಯೂನಿಟಿಯ ನಿರ್ಮಾಣದಲ್ಲಿ ಕೆಲಸ ಮಾಡಿದ ಅದೇ ತಂಡ ಮಾಡಿತ್ತು. ಈ ನವೀಕರಣಕ್ಕೆ ತಗುಲಿದ ವೆಚ್ಚ ಸುಮಾರು 800 ಕೋಟಿ ರೂ. ಎಂದು ವರದಿಯಾಗಿತ್ತು.
ಬೃಹತ್ ಪಾರ್ಕಿಂಗ್ ಸ್ಥಳ: ಈ ಕ್ರೀಡಾಂಗಣ ಬೃಹತ್ ಪಾರ್ಕಿಂಗ್ ವ್ಯವಸ್ಥೆ ಹೊಂದಿದ್ದು, ಇಲ್ಲಿ ಏಕಕಾಲಕ್ಕೆ 3,000 ಕಾರುಗಳು ಮತ್ತು 10,000 ದ್ವಿಚಕ್ರ ವಾಹನಗನ್ನು ಪಾರ್ಕ್ ಮಾಡಬಹುದಾಗಿದೆ.
76 ಕಾರ್ಪೊರೇಟ್ ಪೆಟ್ಟಿಗೆಗಳು: ನರೇಂದ್ರ ಮೋದಿ ಸ್ಟೇಡಿಯಂನಲ್ಲಿ ಪಂದ್ಯವನ್ನು ವೀಕ್ಷಿಸಲು ಬರುವ ಗಣ್ಯರಿಗೆ ವಿಶೇಷವಾಗಿ 76 ಕಾರ್ಪೊರೇಟ್ ಬಾಕ್ಸ್‌ಗಳನ್ನು ನಿರ್ಮಿಸಲಾಗಿದೆ. ಈ ಎಲ್ಲಾ ಬಾಕ್ಸ್ಗಳು ಹವಾನಿಯಂತ್ರಿತವಾಗಿದ್ದು, ಪ್ರತಿಯೊಂದರಲ್ಲೂ 25 ಜನರು ಕುಳಿತುಕೊಳ್ಳಬಹುದಾಗಿದೆ.
9 ಪಿಚ್ಗಳು: ನರೇಂದ್ರ ಮೋದಿ ಸ್ಟೇಡಿಯಂ 9 ಪಿಚ್‌ಗಳನ್ನು ಹೊಂದಿದೆ. ಅಲ್ಲದೆ ಎರಡು ಪ್ರತ್ಯೇಕ ಅಭ್ಯಾಸ ಮೈದಾನಗಳನ್ನು ನಿರ್ಮಿಸಲಾಗಿದೆ. ಆಟಗಾರರು ಒಟ್ಟಾಗಿ ಅಭ್ಯಾಸ ಮಾಡಲು ಸಾಕಷ್ಟು ನೆಟ್‌ಗಳನ್ನು ಹೊಂದಿದ್ದಾರೆ.
ಬಹುಪಯೋಗಿ ಕ್ರೀಡಾಂಗಣ: ಮೋದಿ ಕ್ರೀಡಾಂಗಣ ವಿಶ್ವದ ಅತಿ ದೊಡ್ಡ ಕ್ರಿಕೆಟ್ ಸ್ಟೇಡಿಯಂ ಅಲ್ಲದೆ, ಇದು ಪೂರ್ಣ ಪ್ರಮಾಣದ ಕ್ರಿಕೆಟ್ ಅಕಾಡೆಮಿ, ಹಲವಾರು ಒಳಾಂಗಣ ಪಿಚ್ಗಳು ಮತ್ತು ಫುಟ್‌ಬಾಲ್, ಹಾಕಿ, ಬಾಸ್ಕೆಟ್‌ಬಾಲ್ ಮುಂತಾದ ಇತರ ಕ್ರೀಡೆಗಳಿಗೆ ಹಲವಾರು ಸೌಲಭ್ಯಗಳನ್ನು ಹೊಂದಿದೆ.
63 ಎಕರೆಯಲ್ಲಿ ಹರಡಿದೆ: ಬೃಹತ್ ಪಾರ್ಕಿಂಗ್ ಸ್ಥಳಗಳು, ಕ್ರಿಕೆಟ್ ಮೈದಾನ, ಸ್ಟ್ಯಾಂಡ್‌ಗಳು ಮತ್ತು ಅಭ್ಯಾಸ ಮೈದಾನಗಳು ಸೇರಿದಂತೆ, ಕ್ರೀಡಾಂಗಣದ ಪ್ರದೇಶವು ವಿಶಾಲವಾದ 63 ಎಕರೆಗಳಲ್ಲಿ ವ್ಯಾಪಿಸಿದೆ.
ಮೈದಾನದಲ್ಲಿ ಎಲ್ಇಡಿ ಬಲ್ಬ್: ನರೇಂದ್ರ ಮೋದಿ ಸ್ಟೇಡಿಯಂ, ಮೈದಾನದಲ್ಲಿ ಎಲ್ಇಡಿ ಬಲ್ಬ್ಗಳನ್ನು ಅಳವಡಿಸಿದ ಭಾರತದ ಮೊದಲ ಕ್ರೀಡಾಂಗಣವಾಗಿದೆ.
ಪ್ರತಿ ಸ್ಟ್ಯಾಂಡ್‌ನಲ್ಲಿಯೂ ವಿಶೇಷ ಸೌಲಭ್ಯ: ನರೇಂದ್ರ ಮೋದಿ ಕ್ರೀಡಾಂಗಣದ ಪ್ರತಿಯೊಂದು ಸ್ಟ್ಯಾಂಡ್‌ನಲ್ಲಿಯೂ ಫುಡ್ ಕೋರ್ಟ್ ಹೊಂದಿದೆ. ಅಲ್ಲದೆ ಎರಡೂ ತಂಡಗಳ ಆಟಗಾರರಿಗೆ ಉತ್ತಮ ದರ್ಜೆಯ ಜಿಮಿಂಗ್ ಸೌಲಭ್ಯಗಳೊಂದಿಗೆ ಕ್ಲಬ್‌ಹೌಸ್ ಅನ್ನು ಸಹ ಒಳಗೊಂಡಿದೆ.