ಬರೋಬ್ಬರಿ 200 ರನ್: ರಶೀದ್ ಖಾನ್ನ ಹಣ್ಣುಗಾಯಿ ನೀರುಗಾಯಿ ಮಾಡಿದ ಲಿವಿಂಗ್ಸ್ಟೋನ್
Rashid khan vs Liam livingstoneಟಿ20 ಕ್ರಿಕೆಟ್ನಲ್ಲಿ ಅತೀ ಹೆಚ್ಚು ವಿಕೆಟ್ ಕಬಳಿಸಿದ ದಾಖಲೆ ರಶೀದ್ ಖಾನ್ ಹೆಸರಿನಲ್ಲಿದೆ. ಈವರೆಗೆ 480 ಇನಿಂಗ್ಸ್ ಆಡಿರುವ ರಶೀದ್ ಒಟ್ಟು 654 ವಿಕೆಟ್ ಕಬಳಿಸಿ ಇತಿಹಾಸ ನಿರ್ಮಿಸಿದ್ದಾರೆ ಅಫ್ಘಾನ್ ಸ್ಪಿನ್ನರ್ನ ಈ ಪರಾಕ್ರಮದ ನಡುವೆ ಅಬ್ಬರಿಸಿರುವುದು ಲಿಯಾಮ್ ಲಿವಿಂಗ್ಸ್ಟೋನ್ ಮಾತ್ರ ಎಂದರೆ ತಪ್ಪಾಗಲಾರದು. ಇದಕ್ಕೆ ಸಾಕ್ಷಿ ಈ ಕೆಳಗಿನ ಅಂಕಿ ಅಂಶಗಳು.
ಟಿ20 ಕ್ರಿಕೆಟ್ ಇತಿಹಾಸದಲ್ಲೇ ಅತ್ಯಧಿಕ ವಿಕೆಟ್ ಪಡೆದ ಬೌಲರ್… ಅಫ್ಘಾನಿಸ್ತಾನದ ಸ್ಪಿನ್ ಮಾಂತ್ರಿಕ ರಶೀದ್ ಖಾನ್ ಅವರ ಮುಂದೆ ಸೆಟೆದು ನಿಂತ ಕೆಲವೇ ಕೆಲವು ಬ್ಯಾಟರ್ಗಳಲ್ಲಿ ಇಂಗ್ಲೆಂಡ್ನ ಲಿಯಾಮ್ ಲಿವಿಂಗ್ಸ್ಟೋನ್ ಕೂಡ ಒಬ್ಬರು. ಅದು ಐಪಿಎಲ್ ಆಗಿರಲಿ, ಇಲ್ಲಾ ದಿ ಹಂಡ್ರೆಡ್ ಲೀಗ್ ಆಗಿರಲಿ.
ರಶೀದ್ ಖಾನ್ ಹಾಗೂ ಲಿಯಾಮ್ ಲಿವಿಂಗ್ಸ್ಟೋನ್ ನಡುವೆ ಜಿದ್ದಾಜಿದ್ದಿನ ಪೈಪೋಟಿಯಂತು ಕಂಡು ಬರುತ್ತಿರುತ್ತದೆ. ಇದೀಗ ಈ ಪೈಪೋಟಿ ದಿ ಹಂಡ್ರೆಡ್ ಲೀಗ್ ಸೀಸನ್-4 ನಲ್ಲೂ ಮುಂದುವರೆದಿದೆ. ಅದು ಕೂಡ ಒಂದೇ ಓವರ್ನಲ್ಲಿ ಬರೋಬ್ಬರಿ 26 ರನ್ ಚಚ್ಚುವ ಮೂಲಕ. ದಿ ಹಂಡ್ರೆಡ್ ಲೀಗ್ನ 10ನೇ ಪಂದ್ಯದಲ್ಲಿ ರಶೀದ್ ಖಾನ್ ಎಸೆದ 8 ಎಸೆತಗಳಲ್ಲಿ ಲಿವಿಂಗ್ಸ್ಟೋನ್ ಒಟ್ಟು 32 ರನ್ ಕಲೆಹಾಕಿದ್ದಾರೆ.
ಈ 32 ರನ್ಗಳೊಂದಿಗೆ ರಶೀದ್ ಖಾನ್ ವಿರುದ್ಧ 200 ರನ್ ಕಲೆಹಾಕಿದ ವಿಶ್ವದ ಏಕೈಕ ಬ್ಯಾಟರ್ ಎಂಬ ದಾಖಲೆಯನ್ನು ಲಿಯಾಮ್ ಲಿವಿಂಗ್ಸ್ಟೋನ್ ತಮ್ಮದಾಗಿಸಿಕೊಂಡಿದ್ದಾರೆ. ಇದಕ್ಕೂ ಮುನ್ನ ರಶೀದ್ ಖಾನ್ ವಿರುದ್ಧ ಅತ್ಯಧಿಕ ರನ್ ಕಲೆಹಾಕಿದ ದಾಖಲೆ ಕೀರನ್ ಪೊಲಾರ್ಡ್ ಹೆಸರಿನಲ್ಲಿತ್ತು. ಪೊಲಾರ್ಡ್ 25 ಇನಿಂಗ್ಸ್ಗಳಿಂದ 125 ರನ್ ಕಲೆಹಾಕಿದ್ದರು.
ಆದರೆ ಐಪಿಎಲ್ ಹಾಗೂ ದಿ ಹಂಡ್ರೆಡ್ ಲೀಗ್ಗಳಲ್ಲಿ ರಶೀದ್ ಖಾನ್ ಅವರನ್ನು ಹಣ್ಣುಗಾಯಿ ನೀರುಗಾಯಿ ಮಾಡಿರುವ ಲಿಯಾಮ್ ಲಿವಿಂಗ್ಸ್ಟೋನ್ ಕೇವಲ 16 ಇನಿಂಗ್ಸ್ಗಳ ಮೂಲಕ 200 ರನ್ ಕಲೆಹಾಕಿದ್ದಾರೆ. ಈ ಮೂಲಕ ಟಿ20 ಕ್ರಿಕೆಟ್ನಲ್ಲಿ ಅತ್ಯಧಿಕ ವಿಕೆಟ್ ಪಡೆದ ಬೌಲರ್ ವಿರುದ್ಧ ಅತೀ ಹೆಚ್ಚು ರನ್ ಗಳಿಸಿದ ಬ್ಯಾಟರ್ ಎನಿಸಿಕೊಂಡಿದ್ದಾರೆ.
ಅಷ್ಟೇ ಅಲ್ಲದೆ ರಶೀದ್ ಖಾನ್ ವಿರುದ್ಧ ಅತೀ ಹೆಚ್ಚು ಸಿಕ್ಸ್ ಸಿಡಿಸಿದ ಹೆಗ್ಗಳಿಕೆಯನ್ನು ಸಹ ಲಿಯಾಮ್ ಲಿವಿಂಗ್ಸ್ಟೋನ್ ತಮ್ಮದಾಗಿಸಿಕೊಂಡಿದ್ದಾರೆ. ಇದಕ್ಕೂ ಮುನ್ನ ಕ್ರಿಸ್ ಗೇಲ್ 12 ಸಿಕ್ಸ್ ಬಾರಿಸಿ ಅಗ್ರಸ್ಥಾನದಲ್ಲಿದ್ದರು. ಇದೀಗ ರಶೀದ್ ಖಾನ್ ಅವರ ವಿರುದ್ಧ 21 ಸಿಕ್ಸ್ ಸಿಡಿಸುವ ಮೂಲಕ ಲಿವಿಂಗ್ಸ್ಟೋನ್ ಮತ್ತೊಂದು ಹೆಜ್ಜೆ ಮುಂದೆ ಹೋಗಿದ್ದಾರೆ.
ಇನ್ನು ಲಿಯಾಮ್ ಲಿವಿಂಗ್ಸ್ಟೋನ್ ಜೊತೆಗಿನ ಪೈಪೋಟಿ ನಡುವೆ ರಶೀದ್ ಖಾನ್ ಕೇವಲ 4 ಬಾರಿ ಮಾತ್ರ ಯಶಸ್ಸು ಸಾಧಿಸಿದ್ದಾರೆ. ಅಂದರೆ 16 ಇನಿಂಗ್ಸ್ಗಳಲ್ಲಿ ಲಿವಿಂಗ್ಸ್ಟೋನ್ ಹಾಗೂ ರಶೀದ್ ಖಾನ್ ಮುಖಾಮುಖಿಯಾಗಿದ್ದು, ಈ ವೇಳೆ ಕೇವಲ 4 ಬಾರಿ ಮಾತ್ರ ಔಟ್ ಮಾಡಿದ್ದಾರೆ. ಈ ಅಂಕಿ ಅಂಶಗಳ ಪ್ರಕಾರ ರಶೀದ್ ಖಾನ್ ವಿರುದ್ಧ ಲಿಯಾಮ್ ಲಿವಿಂಗ್ಸ್ಟೋನ್ ಸಂಪೂರ್ಣ ಮೇಲುಗೈ ಸಾಧಿಸಿರುವುದು ಸ್ಪಷ್ಟ.