New Year Resolution | ಕಾತರದಿಂದ ಹೊಸ ವರ್ಷಕ್ಕೆ ಕಾಲಿಟ್ಟಿದ್ದೇನೆ

2021ಕ್ಕೆ ಕಾಲಿಟ್ಟ ಮೊದಲ ದಿನ ಒಂದಿಡೀ ವರ್ಷದ ತಮ್ಮ ಪ್ಲಾನ್ ಹಂಚಿಕೊಂಡರು ಬಿಎಂಟಿಸಿ ಬಸ್ ಕಂಡಕ್ಟರ್ ಆನಂದ್ ಮಾಲಗತ್ತಿ. ವೈಯಕ್ತಿಕವಾಗಿ ಎಂಥ ಬದಲಾವಣೆಗಳನ್ನು ಬಯಸುತ್ತಿದ್ದಾರೆ? ಸಮಾಜದಲ್ಲಿ ಏನೆಲ್ಲಾ ಅಂಶಗಳು ಬದಲಾಗಬೇಕೆಂದು ನಿರೀಕ್ಷಿಸುತ್ತಾರೆ? ಅದಕ್ಕಾಗಿ ಅವರೇನು ಮಾಡಬೇಕೆಂದಿದ್ದಾರೆ ಎಂಬ ಪ್ರಶ್ನೆಗಳಿಗೆ ಈ ಯುವ ಕಂಡಕ್ಟರ್​ ಕೊಟ್ಟ ಉತ್ತರಗಳಿವು..

ಹಲವು ಕನಸುಗಳನ್ನು ಹೊತ್ತಿದ್ದ ನಾನು 2020ರಲ್ಲಿ ಅವುಗಳನ್ನು ಈಡೇರಿಕೊಳ್ಳಬೇಕೆಂಬ ಕಾತರದಲ್ಲಿದ್ದೆ. ಬಹು ಮುಖ್ಯವಾಗಿ ವಿದೇಶಗಳಿಗೆ ಪ್ರವಾಸ ಹೋಗಬೇಕೆಂಬ ಆಸೆಯಿತ್ತು. ಕೊರೊನಾ ಕಾರಣದಿಂದ ಅದು ಈಡೇರಲಿಲ್ಲ. 2020ರ ವರ್ಷ ಪೂರ್ತಿ ನಿರೀಕ್ಷೆ ಮಾಡದ ಸ್ಥಿತಿಯಲ್ಲಿ ಅತ್ಯಂತ ಹೀನಾಯವಾಗಿ ಕಳೆದಿದೆ. ಕೊರೊನಾ ಮಹಾಮಾರಿಯು ಆಸೆ ಆಕಾಂಕ್ಷೆಗಳಿಗೆ ತಣ್ಣೀರು ಎರಚಿತ್ತು. ಸಾಧ್ಯವಾದಷ್ಟು ಮಟ್ಟಿಗೆ ನನ್ನ ಗುರಿ ಮತ್ತು ಕನಸುಗಳನ್ನು ನನಸಾಗಿಸುವ ನಿಟ್ಟಿನಲ್ಲಿ 2021ರ ಹೊಸ ವರ್ಷಕ್ಕೆ ಕಾತರದಿಂದ ಕಾಲಿಡುತ್ತಿದ್ದೇನೆ.

ರಕ್ಕಸ ಸೋಂಕು ಇಷ್ಟರ ಮಟ್ಟಿಗೆ ಆಟವಾಡಿಸುತ್ತದೆ ಎಂದು ಯಾರೊಬ್ಬರು ಊಹಿಸಿರಲಿಲ್ಲ. ಆದರೂ ಜೀವನ ಹಾಗೂ ಸಂಬಂಧದ ಮೌಲ್ಯಗಳ ಬೆಲೆ ಸೇರಿದಂತೆ ಹಲವು ಪಾಠಗಳನ್ನು ಕೊರೊನಾ ಸೋಂಕು ಕಲಿಸಿದೆ.

ಸಮಾಜ ಬದಲಾಗಬೇಕಾದರೆ ಮೊದಲು ಭ್ರಷ್ಟಾಚಾರ ಸಂಪೂರ್ಣವಾಗಿ ಮಣ್ಣು ಪಾಲಾಗಬೇಕು. ಸಾಮಾನ್ಯ ಜನರನ್ನು ತುಳಿಯುತ್ತಿರುವ ಭ್ರಷ್ಟಾಚಾರ ದೇಶದಿಂದ ಕಣ್ಮರೆಯಾದಾಗ ಮಾತ್ರ ದೇಶವು ಅಭಿವೃದ್ದಿ ಪಥದತ್ತ ಸಾಗಲು ಸಾಧ್ಯ. ರಾಜ್ಯ ಅಥವಾ ದೇಶವನ್ನಾಳುವ ಅಧಿಕಾರಿಗಳು ತಮ್ಮತಮ್ಮ ಆರ್ಥಿಕ ಸ್ಥಿತಿಯನ್ನು ಹೆಚ್ಚಿಸುವ ಮನಸ್ಥಿತಿಯನ್ನು ತೆಗೆದು ಸಮಾಜದ ಹಿತಕ್ಕಾಗಿ ದುಡಿದರೆ ಅಭಿವೃದ್ದಿ ಪಥದತ್ತ ಸಾಗಲು ಸಾಧ್ಯ. 2021 ರಲ್ಲಿ ನಿರ್ಗತಿಕರಿಗೆ ಅಥವಾ ಬಡವರಿಗೆ ನನ್ನ ಕೈಯಲಾದಷ್ಟು ಸಹಾಯ ಮಾಡಬೇಕೆಂದುಕೊಂಡಿದ್ದೇನೆ.