Ayudha Puja 2025: ಆಯುಧ ಪೂಜೆಗೆ ಅತ್ಯಂತ ಶುಭಕರ ಮುಹೂರ್ತವನ್ನು ಇಲ್ಲಿ ತಿಳಿದುಕೊಳ್ಳಿ

ಖ್ಯಾತ ಜ್ಯೋತಿಷಿ ಮತ್ತು ವಾಸ್ತು ಶಾಸ್ತ್ರಜ್ಞರಾದ ಡಾ. ಬಸವರಾಜ್ ಗುರೂಜಿಯವರು ತಮ್ಮ ನಿತ್ಯ ಭಕ್ತಿ ಕಾರ್ಯಕ್ರಮದಲ್ಲಿ ಆಯುಧ ಪೂಜೆಯ ಮಹತ್ವವನ್ನು ವಿವರಿಸಿದ್ದಾರೆ. ಮಹಾನವಮಿಯ ದಿನದಂದು ಆಯುಧ ಪೂಜೆಯನ್ನು ಕೂಡ ವಿಶೇಷವಾಗಿ ಆಚರಿಸಲಾಗುತ್ತದೆ. ಆಯುಧ ಪೂಜೆ ಎಂದರೆ ಅಸ್ತ್ರ ಪೂಜೆ ಅಥವಾ ಶಾಸ್ತ್ರ ಪೂಜೆ. ನಮ್ಮ ಜೀವನ ನಿರ್ವಹಣೆಗೆ ಕಾರಣವಾಗುವ ಪ್ರತಿಯೊಂದು ಸಾಧನವನ್ನೂ ಈ ದಿನ ಪೂಜಿಸಲಾಗುತ್ತದೆ. ಶಿಕ್ಷಕರಿಗೆ ಪೆನ್, ರೈತರಿಗೆ ನೇಗಿಲು, ಕಾರ್ಖಾನೆಯವರಿಗೆ ಯಂತ್ರೋಪಕರಣಗಳು ಹೀಗೆ ಪ್ರತಿಯೊಬ್ಬರ ವೃತ್ತಿಯ ಆಯುಧಗಳನ್ನು ಪೂಜಿಸಲಾಗುತ್ತದೆ. ಈ ಆಯುಧಗಳು ವರ್ಷಪೂರ್ತಿ ನಮ್ಮ ಜೀವನದಲ್ಲಿ ಮಹತ್ವದ ಪಾತ್ರ ವಹಿಸುತ್ತವೆ. ಈ ಆಯುಧಗಳಲ್ಲಿ ಜೀವಶಕ್ತಿ ಇರುತ್ತದೆ ಎಂದು ನಂಬಲಾಗಿದೆ. ವಾಹನ ಚಾಲನೆ ಮಾಡುವಾಗ ಅನಿರೀಕ್ಷಿತವಾಗಿ ಸಂಭವಿಸುವ ಅಪಾಯಗಳಿಂದ ಆಯುಧಗಳೇ ನಮ್ಮನ್ನು ಕಾಪಾಡುತ್ತವೆ ಎಂದು ಗುರೂಜಿ ವಿವರಿಸಿದ್ದಾರೆ.

ಈ ವಿಡಿಯೋ ಇಲ್ಲಿದೆ ನೋಡಿ:

ದುರ್ಗಾದೇವಿಯು ಮಹಿಷಾಸುರನನ್ನು ಸಂಹರಿಸಲು ಆಯುಧಗಳೇ ಕಾರಣೀಭೂತವಾಗಿದ್ದವು. ಪಾಂಡವರು ತಮ್ಮ ಆಯುಧಗಳನ್ನು ಶಮಿ ವೃಕ್ಷದಲ್ಲಿ ಇಟ್ಟು ಪೂಜಿಸಿದ್ದರು. ಶ್ರೀರಾಮನು ರಾವಣನನ್ನು ಜಯಿಸಲು ಆಯುಧಗಳನ್ನು ಬಳಸಿದ್ದನು. ಇಂತಹ ಐತಿಹಾಸಿಕ ನಿದರ್ಶನಗಳು ಆಯುಧಗಳ ಶಕ್ತಿಯನ್ನು ಎತ್ತಿಹಿಡಿಯುತ್ತವೆ. ಈ ದಿನ ಎಲ್ಲಾ ಆಯುಧಗಳಿಗೆ, ವಾದ್ಯಗಳಿಗೆ ಗಂಧ, ವಿಭೂತಿ, ಕುಂಕುಮ ಅರ್ಪಿಸಿ, ವಿಧಿವಿಧಾನಗಳಿಂದ ಪೂಜಿಸಿ ಪುಷ್ಪಗಳಿಂದ ಅಲಂಕರಿಸಲಾಗುತ್ತದೆ.

ಇದನ್ನೂ ಓದಿ: ನವರಾತ್ರಿಯ ಸಮಯದಲ್ಲಿ ದುರ್ಗಾ ದೇವಿಗೆ ಎಂದಿಗೂ ಈ ಹಣ್ಣುಗಳನ್ನು ಅರ್ಪಿಸಬೇಡಿ

ಪೂಜೆಯ ಶುಭ ಸಮಯ ಮತ್ತು ವಿಧಾನ:

ಮಹಾನವಮಿಯ ತಿಥಿಯು ಹಿಂದಿನ ದಿನದ ಸಂಜೆ 6:06ಕ್ಕೆ ಪ್ರಾರಂಭವಾಗಿ, ಇಂದು ರಾತ್ರಿ 7:01ರ ತನಕ ಇರುತ್ತದೆ. ಆಯುಧ ಪೂಜೆಗೆ ವಿಶೇಷವಾಗಿ ಮಧ್ಯಾಹ್ನ 2:28 ರಿಂದ 3:16 ರವರೆಗಿನ ಸಮಯವು ಅತ್ಯಂತ ಶುಭಕರವಾಗಿದೆ. ಈ ಸಮಯದಲ್ಲಿ ಪೂಜೆ ಸಲ್ಲಿಸುವುದರಿಂದ ವಿಶೇಷ ಶುಭ ಫಲಗಳು ದೊರೆಯುತ್ತವೆ. ಬೂದುಗುಂಬಳಕಾಯಿ, ನಿಂಬೆಹಣ್ಣು, ತೆಂಗಿನಕಾಯಿಯನ್ನು ಆಯುಧಗಳಿಗೆ ಅರ್ಪಿಸಿ, ತೆಂಗಿನಕಾಯಿ ಮೇಲೆ ಕರ್ಪೂರ ಇಟ್ಟು ದೃಷ್ಟಿ ತೆಗೆದು ಒಡೆಯುವುದು, ನಿಂಬೆಹಣ್ಣು ಒಡೆಯುವುದು ಮುಂತಾದ ಆಚರಣೆಗಳಿವೆ. ದುಷ್ಟ ಶಕ್ತಿಗಳನ್ನು ದಮನ ಮಾಡಿ, ಶುಭ ಶಕ್ತಿಗಳನ್ನು ಪ್ರಸಾದಿಸಲು ಆಯುಧಗಳು ಸಹಾಯ ಮಾಡುತ್ತವೆ. ಚಿಕ್ಕ ಪುಟ್ಟ ವ್ಯಾಪಾರ ಮಾಡುವವರು ಅರಿಶಿನ ಕುಂಕುಮ ಇಟ್ಟು, ಊದಬತ್ತಿ ಬೆಳಗಿ ಆರತಿ ಮಾಡಿದರೂ ಸಾಕು. ನಂಬಿಕೆ ಮತ್ತು ಅನುಭವಪೂರ್ವಕವಾಗಿ ಆಚರಿಸಲಾಗುವ ಈ ಪೂಜೆಗಳು ಎಲ್ಲರ ಬಾಳಲ್ಲಿ ಸುಖ, ಸಮೃದ್ಧಿ ಮತ್ತು ಮಂಗಳವನ್ನು ತರಲಿ ಎಂದು ಗುರೂಜಿ ಹಾರೈಸಿದ್ದಾರೆ.

ಮತ್ತಷ್ಟು ಆಧ್ಯಾತ್ಮಿಕ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ