Vijayadashami 2025: ವಿಜಯದಶಮಿಯ ಮಹತ್ವ, ಫಲ ಹಾಗೂ ಶಮಿ ಪೂಜೆಯ ವಿಶೇಷತೆಗಳು

ಖ್ಯಾತ ಜ್ಯೋತಿಷಿ ಮತ್ತು ವಾಸ್ತು ಶಾಸ್ತ್ರಜ್ಞರಾದ ಡಾ. ಬಸವರಾಜ್ ಗುರೂಜಿಯವರು ತಮ್ಮ ನಿತ್ಯ ಭಕ್ತಿ ಕಾರ್ಯಕ್ರಮದಲ್ಲಿ ವಿಜಯದಶಮಿಯ ಮಹತ್ವ, ವಿಶೇಷತೆಗಳು ಮತ್ತು ಆಚರಣೆಗಳನ್ನು ವಿವರಿಸಿದ್ದಾರೆ. ವಿಜಯದ ದಶಮಿ ಅಂದರೆ ವಿಜಯದ ಹತ್ತನೇ ದಿನ. ಇದು ಶಮಿ ಪೂಜೆಯನ್ನು ಆಚರಿಸುವ ಪವಿತ್ರ ದಿನವಾಗಿದೆ. ಮಾನವ ದೇಹವು ಪಂಚಭೂತಗಳಿಂದ ಕೂಡಿದ್ದು, ಜಯ, ಅದೃಷ್ಟ ಮತ್ತು ಆಸೆಗಳ ಈಡೇರಿಕೆಗೆ ಈ ದಿನ ಸಹಕಾರಿಯಾಗಿದೆ.

ವಿಜಯದಶಮಿಯನ್ನು ಅನಾದಿ ಕಾಲದಿಂದಲೂ ಆಚರಿಸಿಕೊಂಡು ಬರಲಾಗುತ್ತಿದೆ. ಕೆಟ್ಟದ್ದರ ಮೇಲೆ ಒಳ್ಳೆಯದರ ಜಯ, ಅಧರ್ಮದ ಮೇಲೆ ಧರ್ಮದ ಜಯ, ಕತ್ತಲೆಯ ಮೇಲೆ ಬೆಳಕಿನ ಗೆಲುವು ಈ ಹಬ್ಬದ ಮುಖ್ಯ ಸಂಕೇತಗಳಾಗಿವೆ. ಅಕ್ಷಯ ತೃತೀಯ, ದೀಪಾವಳಿ, ಯುಗಾದಿಯಂತೆ ವಿಜಯದಶಮಿ ಕೂಡ ಸಂಪೂರ್ಣ ಶುಭಕಾಲವಾಗಿರುತ್ತೆ. ಈ ದಿನದ ಪ್ರತಿ ಕ್ಷಣವೂ ಶುಭ ಎಂದು ಶಾಸ್ತ್ರಗಳು ಹೇಳುತ್ತವೆ.

ವಿಜಯದಶಮಿಯ ಆಚರಣೆಗೆ ಎರಡು ಪ್ರಮುಖ ಘಟನೆಗಳು ಕಾರಣವಾಗಿವೆ. ಮಾರ್ಕಂಡೇಯ ಪುರಾಣದಲ್ಲಿ ಇದರ ಉಲ್ಲೇಖವಿದೆ. ಭಗವಾನ್ ಶ್ರೀರಾಮಚಂದ್ರನು ರಾವಣನನ್ನು ಯುದ್ಧದಲ್ಲಿ ಸೋಲಿಸಿ ಸೀತೆಯನ್ನು ರಕ್ಷಿಸಿ ಜಯ ಗಳಿಸಿದ್ದು ಈ ದಿನದಂದು. ಅದರ ಜೊತೆಗೆ, ದುರ್ಗಾದೇವಿಯು ದುಷ್ಟ ಮಹಿಷಾಸುರನನ್ನು ಸಂಹರಿಸಿ ಲೋಕಕ್ಕೆ ಶಾಂತಿ ತಂದ ದಿನವೂ ಇದೇ. ಪಾಂಡವರಿಗೆ ವನವಾಸದ ನಂತರ ಜಯ ಸಿಕ್ಕಿದ್ದು ಸಹ ವಿಜಯದಶಮಿಯಂದೇ. ಈ ದಿನವನ್ನು ರಾಮವಿಜಯ, ದುರ್ಗಾಪೂಜೆ ಮತ್ತು ಶಮಿಪೂಜೆಯಾಗಿ ಆಚರಿಸಲಾಗುತ್ತದೆ. ಪ್ರಸ್ತುತ ವಿಶ್ವಾಬಸ ನಾಮ ಸಂವತ್ಸರ ದಕ್ಷಿಣಾಯನ ಆಶ್ವೀಜ ಮಾಸದ ಶುಕ್ಲ ಪಕ್ಷದ ದಶಮಿ ತಿಥಿಯನ್ನು ವಿಜಯದಶಮಿ ಎಂದು ಕರೆಯಲಾಗುತ್ತದೆ.

ಈ ದಿನ ಮನೆಯಲ್ಲಿ ಇಷ್ಟದೇವರು, ಕುಲದೇವರು, ಮನೆದೇವರ ವಿಗ್ರಹಗಳನ್ನು ಶುಚಿರ್ಭೂತಗೊಳಿಸಿ ಪೂಜೆ ಮಾಡಲಾಗುತ್ತದೆ. ದುರ್ಗಾ ಸ್ತೋತ್ರ, ರಾಮ ಸ್ತೋತ್ರ, ದುರ್ಗಾ ಸಪ್ತಶತಿ ಮಂತ್ರಗಳನ್ನು ಪಠಿಸುವುದು ಶ್ರೇಷ್ಠ. ನಾನಾವಿಧ ಭಕ್ಷ್ಯಗಳನ್ನು, ಸಿಹಿ ಪದಾರ್ಥಗಳನ್ನು ನೈವೇದ್ಯ ರೂಪದಲ್ಲಿ ದೇವರಿಗೆ ಅರ್ಪಿಸಲಾಗುತ್ತದೆ. ಸಾಧ್ಯವಾದರೆ, ಕನಿಷ್ಠ ಮೂರು ಜನರಿಗೆ ಆಹಾರ ನೀಡುವುದು ಬಹಳಷ್ಟು ಶುಭಕರ.

ಶಮಿ ಪೂಜೆಯು ಈ ದಿನದ ಮತ್ತೊಂದು ಪ್ರಮುಖ ಆಚರಣೆಯಾಗಿದೆ. ಪಾಂಡವರು ವನವಾಸದಲ್ಲಿದ್ದಾಗ ತಮ್ಮ ಅಸ್ತ್ರಗಳನ್ನು ಶಮಿ ವೃಕ್ಷದಲ್ಲಿ ಅಡಗಿಸಿಟ್ಟು, ಜಯದ ನಂತರ ಅವುಗಳನ್ನು ಹಿಂದಕ್ಕೆ ಪಡೆದರು. ಶಮಿ ವೃಕ್ಷವನ್ನು “ಅಗ್ನಿಗರ್ಭ” ಎಂದು ಕರೆಯಲಾಗುತ್ತದೆ. ಶಮಿ ಪೂಜೆಯಿಂದ ಶನಿ ದೋಷ ನಿವಾರಣೆಯಾಗುತ್ತದೆ ಎಂದು ನಂಬಲಾಗಿದೆ. ಅರ್ಧಾಷ್ಟಮ, ಅಷ್ಟಮ, ಪಂಚಮ ಶನಿಯ ಪ್ರಭಾವವಿರುವವರಿಗೆ ಶಮಿ ಪೂಜೆಯಿಂದ ಉತ್ತಮ ಫಲ ದೊರೆಯುತ್ತದೆ. ಸಂಧ್ಯಾ ಕಾಲದಲ್ಲಿ ಶಮಿ ಪೂಜೆ ಮಾಡುವುದು ವಿಶೇಷ.

ಶಮಿ ಪೂಜೆಗೆ ಸಂಬಂಧಿಸಿದಂತೆ ಕೌತ್ಸ ಎಂಬ ವಿದ್ಯಾರ್ಥಿಯ ಕಥೆಯು ಇದೆ. ತನ್ನ ಗುರುಗಳಿಗೆ ದಕ್ಷಿಣೆಯಾಗಿ 10,000 ವರಹಗಳನ್ನು ನೀಡಲು ಸಾಧ್ಯವಾಗದಿದ್ದಾಗ, ಕೌತ್ಸನು ರಾಜ ರಘುವಿನ ಬಳಿ ಹೋದ. ರಘು ರಾಜನಲ್ಲಿ ಹಣವಿಲ್ಲದ ಕಾರಣ, ಕೌತ್ಸನು ಕುಬೇರನ ಬಳಿಗೆ ಹೋಗುವ ಮಾರ್ಗದಲ್ಲಿದ್ದಾಗ, ಕುಬೇರನು ಭಯಗೊಂಡು ಶಮಿ ವೃಕ್ಷದ ಎಲೆಗಳನ್ನು ಬಂಗಾರವಾಗಿ ಪರಿವರ್ತಿಸಿದ ಎಂಬ ಪ್ರತೀತಿಯಿದೆ. “ಶಮಿ ಶಮಿ ಅತೇ ಪಾಪಂ ಶಮಿ ಶತ್ರುವಿನಾಶಿನಿ. ಅರ್ಜುನಸ್ಯ ದೃನ್ವಾರೆ ರಾಮಸ್ಯ ಪ್ರಿಯದರ್ಶಿನಿ” ಎಂಬ ಶ್ಲೋಕವನ್ನು ಈ ದಿನ ಪಠಿಸಲಾಗುತ್ತದೆ. ಶಮಿ ಪತ್ರೆಯನ್ನು ಪುಸ್ತಕಗಳಲ್ಲಿ, ಬೀರುಗಳಲ್ಲಿ, ಪರ್ಸ್‌ನಲ್ಲಿ, ವಾಲೆಟ್‌ನಲ್ಲಿ ಅಥವಾ ವಾಹನಗಳಲ್ಲಿ ಇಟ್ಟುಕೊಳ್ಳುವುದರಿಂದ ಶನಿ ದೋಷ ನಿವಾರಣೆಯಾಗಿ ಶುಭ ಉಂಟಾಗುತ್ತದೆ. ಇಂದು ಮೈಸೂರಿನಲ್ಲಿ ಚಾಮುಂಡೇಶ್ವರಿಗೆ ಚಿನ್ನದ ಅಂಬಾರಿಯಲ್ಲಿ ಅದ್ಭುತ ಮೆರವಣಿಗೆ ನಡೆಯುತ್ತದೆ. ಶಮಿ ಎಲೆಗಳನ್ನು ಕನಿಷ್ಠ ಐದು ಜನರಿಗೆ ವಿನಿಮಯ ಮಾಡಿಕೊಳ್ಳುವುದು ಉತ್ತಮ.

ಇದನ್ನೂ ಓದಿ: ನವರಾತ್ರಿಯ ಸಮಯದಲ್ಲಿ ದುರ್ಗಾ ದೇವಿಗೆ ಎಂದಿಗೂ ಈ ಹಣ್ಣುಗಳನ್ನು ಅರ್ಪಿಸಬೇಡಿ

ವಿಜಯದಶಮಿಯ ಶುಭ ಮುಹೂರ್ತಗಳು:

ಮಧ್ಯಾಹ್ನ 2 ಗಂಟೆ 9 ನಿಮಿಷದಿಂದ 2 ಗಂಟೆ 57 ನಿಮಿಷದವರೆಗಿನ 48 ನಿಮಿಷಗಳ ಕಾಲ ವಿಶೇಷ ಮುಹೂರ್ತವಿರುತ್ತದೆ. ಬ್ರಾಹ್ಮಿ ಮುಹೂರ್ತ, ಅಭಿಜಿತ್ ಮುಹೂರ್ತ ಮತ್ತು ಗೋದೂಳಿ ಮುಹೂರ್ತಗಳಲ್ಲೂ ತ್ರಿಶಕ್ತಿಗಳಾದ ಮಹಾಲಕ್ಷ್ಮಿ, ಮಹಾಕಾಳಿ, ಮಹಾಸರಸ್ವತಿಯ ಆವಿರ್ಭಾವವಿರುತ್ತದೆ. ಒಂಬತ್ತು ದಿನ ದುರ್ಗಾ ಪೂಜೆ ಮಾಡದಿದ್ದರೂ, ವಿಜಯದಶಮಿಯಂದು ಇಷ್ಟದೇವರು, ಕುಲದೇವರು, ಮನೆದೇವರ ಪೂಜೆ ಮಾಡಿ ದುರ್ಗೆಯ ಆರಾಧನೆ ಮಾಡುವವರಿಗೆ ವರ್ಷಪೂರ್ತಿ ಕಂಟಕಗಳು ದೂರವಾಗಿ, ಅನಾರೋಗ್ಯ ಮತ್ತು ಅಕಾಲ ಮರಣದ ಭೀತಿ ನಿವಾರಣೆಯಾಗಿ ಶುಭ ಉಂಟಾಗುತ್ತದೆ ಎಂದು ಗುರೂಜಿಯವರು ಸಲಹೆ ನೀಡಿದ್ದಾರೆ.

ಮತ್ತಷ್ಟು ಆಧ್ಯಾತ್ಮಿಕ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ