44 ವರ್ಷಗಳ ಕಾಯುವಿಕೆ ಅಂತ್ಯ: ಹೊಸ ಬರೆದ ಸಾವನ್ ಬರ್ವಾಲ್

ಜಪಾನ್‌ನ ಐಚಿ-ನಗೋಯಾದಲ್ಲಿ ನಡೆಯುತ್ತಿರುವ 2026ರ ಏಷ್ಯನ್ ಗೇಮ್ಸ್ ಕ್ರೀಡಾಕೂಟದಲ್ಲಿ ಭಾರತದ ಅಥ್ಲೆಟಿಕ್ಸ್ ತಂಡದ ಪದಕದ ಬೇಟೆ ಮುಂದುವರಿದಿದೆ. ಶನಿವಾರ ಮುಂಜಾನೆ ನಡೆದ ಪುರುಷರ ಮ್ಯಾರಥಾನ್ ಸ್ಪರ್ಧೆಯಲ್ಲಿ ಭಾರತದ ಹೆಮ್ಮೆಯ ಅಥ್ಲಿಟ್ ಸಾವನ್ ಬರ್ವಾಲ್ ಅವರು ಬೆಳ್ಳಿ ಪದಕ ಮುಡಿಗೇರಿಸಿಕೊಳ್ಳುವ ಮೂಲಕ ಐತಿಹಾಸಿಕ ಸಾಧನೆ ಮಾಡಿದ್ದಾರೆ. ಈ ಮೂಲಕ ಏಷ್ಯನ್ ಗೇಮ್ಸ್ ಮ್ಯಾರಥಾನ್ ಇತಿಹಾಸದಲ್ಲಿ ಭಾರತದ 44 ವರ್ಷಗಳ ಸುದೀರ್ಘ ಪದಕದ ಕಾಯುವಿಕೆಗೆ ಅವರು ಅಂತ್ಯ ಹಾಡಿದ್ದಾರೆ.

ರಾಷ್ಟ್ರೀಯ ದಾಖಲೆಯೊಂದಿಗೆ ಬೆಳ್ಳಿಯ ಓಟ:

ಹಿಮಾಚಲ ಪ್ರದೇಶ ಮೂಲದ ಹಾಗೂ ಭಾರತೀಯ ಸೇನೆಯ ಹವಿಲ್ದಾರ್ ಆಗಿರುವ ಸಾವನ್ ಬರ್ವಾಲ್, ನಿಗದಿತ 42.195 ಕಿಲೋಮೀಟರ್ ದೂರವನ್ನು ಕೇವಲ 2 ಗಂಟೆ 11 ನಿಮಿಷ 37 ಸೆಕೆಂಡುಗಳಲ್ಲಿ ತಲುಪಿ ಎರಡನೇ ಸ್ಥಾನ ಪಡೆದರು. ಈ ಓಟದ ಮೂಲಕ ಅವರು ತಮ್ಮದೇ ಹೆಸರಿನಲ್ಲಿದ್ದ ವೈಯಕ್ತಿಕ ಅತ್ಯುತ್ತಮ ಸಮಯವನ್ನು ಉತ್ತಮಪಡಿಸಿಕೊಂಡಿದ್ದಲ್ಲದೆ, ಹೊಸ ರಾಷ್ಟ್ರೀಯ ದಾಖಲೆಯನ್ನು ನಿರ್ಮಿಸಿದರು.

ರೇಸ್‌ನ ಆರಂಭದಿಂದಲೂ ಮುಂಚೂಣಿಯಲ್ಲಿದ್ದ ಸಾವನ್, ಅರ್ಧ ಹಾದಿ ಮುಗಿಯುವ ಹೊತ್ತಿಗೆ (1:05:54 ಸಮಯದೊಂದಿಗೆ) ಎರಡನೇ ಸ್ಥಾನವನ್ನು ಖಚಿತಪಡಿಸಿಕೊಂಡಿದ್ದರು. ಕೊನೆಯ 7 ಕಿಲೋಮೀಟರ್‌ಗಳಿರುವಾಗ ಚಿನ್ನದ ಪದಕಕ್ಕಾಗಿ ಜಪಾನ್ ಓಟಗಾರನಿಗೆ ತೀವ್ರ ಪೈಪೋಟಿ ನೀಡಿದ ಅವರು, ಅಂತಿಮವಾಗಿ ದೇಶಕ್ಕೆ ಬೆಳ್ಳಿ ಪದಕ ತಂದುಕೊಟ್ಟರು. ಜಪಾನ್‌ನ ಇಚಿಟಾಕಾ ಯಮಶಿತಾ (2:10:49) ಚಿನ್ನ ಗೆದ್ದರೆ, ಚೀನಾದ ಪೈಯೌ ಫೆಂಗ್ (2:12:13) ಕಂಚಿನ ಪದಕಕ್ಕೆ ತೃಪ್ತಿಪಟ್ಟರು.

44 ವರ್ಷಗಳ ಕಾಯುವಿಕೆ ಅಂತ್ಯ:

ಏಷ್ಯನ್ ಗೇಮ್ಸ್‌ನ ಮ್ಯಾರಥಾನ್ ವಿಭಾಗದಲ್ಲಿ ಭಾರತಕ್ಕೆ ಸುದೀರ್ಘ ಇತಿಹಾಸವಿದ್ದರೂ, ಪದಕ ಗೆದ್ದು ದಶಕಗಳೇ ಕಳೆದಿದ್ದವು. ಕೊನೆಯ ಬಾರಿಗೆ 1982ರ ದೆಹಲಿ ಏಷ್ಯನ್ ಗೇಮ್ಸ್‌ನಲ್ಲಿ ಭಾರತದ ಎಚ್. ಕೆ. ಸೀತಾರಾಮ್ ಅವರು ಕಂಚಿನ ಪದಕ ಗೆದ್ದಿದ್ದರು. ಅದಾದ ಬಳಿಕ ಯಾವುದೇ ಭಾರತೀಯ ಅಥ್ಲಿಟ್‌ಗೆ ಈ ವಿಭಾಗದಲ್ಲಿ ವೇದಿಕೆ ಏರಲು ಸಾಧ್ಯವಾಗಿರಲಿಲ್ಲ. ಇದೀಗ ಸಾವನ್ ಬರ್ವಾಲ್ ಗೆದ್ದಿರುವ ಈ ಬೆಳ್ಳಿಯು, ವಿದೇಶಿ ನೆಲದಲ್ಲಿ ನಡೆದ ಏಷ್ಯನ್ ಗೇಮ್ಸ್ ಮ್ಯಾರಥಾನ್‌ನಲ್ಲಿ ಭಾರತಕ್ಕೆ ಸಿಕ್ಕ ಮೊದಲ ಪದಕ ಎಂಬ ಐತಿಹಾಸಿಕ ಹಿರಿಮೆಗೂ ಪಾತ್ರವಾಗಿದೆ.

ಏಷ್ಯನ್ ಗೇಮ್ಸ್ ಮ್ಯಾರಥಾನ್‌ನಲ್ಲಿ ಭಾರತದ ಪದಕದ ಇತಿಹಾಸ:

• 1951 (ದೆಹಲಿ): ಚೋಟಾ ಸಿಂಗ್ — ಚಿನ್ನದ ಪದಕ
• 1951 (ದೆಹಲಿ): ಸೂರತ್ ಸಿಂಗ್ ಮಾಥುರ್ — ಕಂಚಿನ ಪದಕ
• 1982 (ದೆಹಲಿ): ಹೊಸೂರು ಕುಕ್ಕಪ್ಪ ಸೀತಾರಾಮ್ — ಕಂಚಿನ ಪದಕ
• 2026 (ನಗೋಯಾ): ಸಾವನ್ ಬರ್ವಾಲ್ — ಬೆಳ್ಳಿ ಪದಕ

ಇದನ್ನೂ ಓದಿ: ಏಷ್ಯನ್ ಗೇಮ್ಸ್​: ಚಿನ್ನದ ಪದಕ ಗೆದ್ದ ಟೀಮ್ ಇಂಡಿಯಾ

ಭಾರತದ ಪದಕಗಳ ಸಂಖ್ಯೆ 24 ಕ್ಕೆ ಏರಿಕೆ:

ಸಾವನ್ ಬರ್ವಾಲ್ ಅವರ ಈ ಬೆಳ್ಳಿ ಪದಕದ ನೆರವಿನಿಂದ 2026ರ ಏಷ್ಯನ್ ಕ್ರೀಡಾಕೂಟದಲ್ಲಿ ಭಾರತದ ಒಟ್ಟು ಪದಕಗಳ ಸಂಖ್ಯೆ 24ಕ್ಕೆ ಏರಿಕೆಯಾಗಿದೆ. ಅಥ್ಲೆಟಿಕ್ಸ್ ವಿಭಾಗದಲ್ಲಿ ಈಗಾಗಲೇ ಭಾರತದ ಮಿಕ್ಸ್ಡ್ 4×400 ಮೀಟರ್ ರಿಲೇ ತಂಡ ಬೆಳ್ಳಿ ಗೆದ್ದು ಬೀಗಿದ್ದರೆ, ವೇಟ್‌ಲಿಫ್ಟಿಂಗ್‌ನಲ್ಲಿ ಮೀರಾಬಾಯಿ ಚಾನು ಹಾಗೂ ಶೂಟಿಂಗ್‌ನಲ್ಲಿ ಭಾರತದ ಶೂಟರ್‌ಗಳು ಬೆಳ್ಳಿಯ ಸಾಧನೆ ಮಾಡಿದ್ದಾರೆ. ಸಾವನ್ ಅವರ ಈ ಐತಿಹಾಸಿಕ ಓಟವು ಮುಂಬರುವ ದಿನಗಳಲ್ಲಿ ಕಣಕ್ಕಿಳಿಯಲಿರುವ ಇತರ ಭಾರತೀಯ ಅಥ್ಲಿಟ್‌ಗಳಿಗೆ ಮತ್ತಷ್ಟು ಸ್ಫೂರ್ತಿ ತುಂಬಲಿದೆ.