ರನ್ ನೀಡದೆ ಒಂದೇ ಓವರ್​ನಲ್ಲಿ 2 ವಿಕೆಟ್ ಉರುಳಿಸಿದ ಅಕ್ಷರ್ ಪಟೇಲ್

ಲಕ್ನೋದ ಭಾರತ ರತ್ನ ಶ್ರೀ ಅಟಲ್ ಬಿಹಾರಿ ವಾಜಪೇಯಿ ಏಕಾನಾ ಕ್ರಿಕೆಟ್ ಕ್ರೀಡಾಂಗಣದಲ್ಲಿ ಭಾರತ ಮತ್ತು ವೆಸ್ಟ್ ಇಂಡೀಸ್ ನಡುವೆ ಮೊದಲ ಟಿ20 ಪಂದ್ಯ ನಡೆಯಿತು. ಈ ಪಂದ್ಯದಲ್ಲಿ ಟಾಸ್ ಗೆದ್ದ ಭಾರತ ಮೊದಲು ಬೌಲಿಂಗ್ ಆಯ್ದುಕೊಂಡಿತು. ಹೀಗಾಗಿ ಮೊದಲು ಬ್ಯಾಟಿಂಗ್‌ ಆರಂಭಿಸಿದ ವೆಸ್ಟ್ ಇಂಡೀಸ್ ಮೊದಲ ಎರಡು ಓವರ್​ಗಳಲ್ಲಿ ಉತ್ತಮ ರನ್ ಕಲೆಹಾಕಿತು. ನಾಯಕ ಶಾಯ್ ಹೋಪ್ 2 ನೇ ಓವರ್​ನಲ್ಲಿ 4 ಬೌಂಡರಿಗಳನ್ನು ಬಾರಿಸುವ ಮೂಲಕ ಸ್ಫೋಟಕ ಆರಂಭ ಒದಗಿಸಿಕೊಡುವ ಕೆಲಸ ಮಾಡಿದರು. ಆದರೆ ಅದಾದ ಬಳಿಕ ದಾಳಿಗಿಳಿದ ಅಕ್ಷರ್ ಪಟೇಲ್ ತಮ್ಮ ಖೋಟಾದ ಎರಡನೇ ಓವರ್​ನಲ್ಲಿ ಯಾವುದೇ ರನ್ ನೀಡದೆ ಪ್ರಮುಖ 2 ವಿಕೆಟ್‌ಗಳನ್ನು ಉರುಳಿಸಿದರು.

2 ವಿಕೆಟ್ ಪಡೆದ ಅಕ್ಷರ್

ಇಂದಿನ ಪಂದ್ಯದಲ್ಲಿ ವಿಂಡೀಸ್ ಪರ ನಾಯಕ ಶಾಯ್ ಹೋಪ್ ಹಾಗೂ ಚೊಚ್ಚಲ ಅಂತರರಾಷ್ಟ್ರೀಯ ಟಿ20 ಪಂದ್ಯವನ್ನಾಡಿದ ಕಾಮಿಲ್ ಪೂರನ್ ಆರಂಭಿಕರಾಗಿ ಕಣಕ್ಕಿಳಿದರು. ಮೊದಲ ಓವರ್​ನಲ್ಲಿ ಕೇವಲ 1 ಬೌಂಡರಿ ಬಂದರೆ, ಮಯಾಂಕ್ ಯಾದವ್ ಬೌಲ್ ಮಾಡಿದ ಎರಡನೇ ಓವರ್​ನಲ್ಲಿ ಹೋಪ್ 4 ಬೌಂಡರಿಗಳನ್ನು ಬಾರಿಸಿದರು. ಹೀಗಾಗಿ ನಾಯಕ ಶ್ರೇಯಸ್ ಬೇಗನೇ ಸ್ಪಿನ್ನರ್​ಗಳನ್ನು ದಾಳಿಗಿಳಿಸಬೇಕಾಯಿತು. ಅದರಂತೆ ಬೌಲಿಂಗ್​ಗೆ ಬಂದ ಅಕ್ಷರ್ ತಮ್ಮ ಖೋಟಾದ ಮೊದಲ ಓವರ್​ನಲ್ಲಿ ಹೆಚ್ಚಿಗೆ ರನ್ ಬಿಟ್ಟುಕೊಡಲಿಲ್ಲ. ಆದರೆ ಎರಡನೇ ಓವರ್ ಬೌಲ್ ಮಾಡಲು ಬಂದ ಅಕ್ಷರ್, ಪ್ರಮುಖ 2 ವಿಕೆಟ್‌ಗಳನ್ನು ಉರುಳಿಸಿದರು.

ಕಾಮಿಲ್ ಪೂರನ್ ವಿಕೆಟ್ ಪತನದ ಬಳಿಕ ಬಂದ ಸ್ಫೋಟಕ ದಾಂಡಿಗ ಶಿಮ್ರಾನ್ ಹೆಟ್ಮೆಯರ್ ಅತ್ಯಂತ ನತದೃಷ್ಟಕರ ರೀತಿಯಲ್ಲಿ ರನೌಟ್​ಗೆ ಬಲಿಯಾಗಬೇಕಾಯಿತು. ಹೆಟ್ಮೆಯರ್ ವಿಕೆಟ್ ಬಳಿಕ ಬಂದ ರೋವ್‌ಮನ್ ಪೊವೆಲ್ ಕೂಡ ಯಾವುದೇ ರನ್ ಕಲೆಹಾಕದೆ ಅದೇ ಓವರ್​ನಲ್ಲಿ ಶೂನ್ಯಕ್ಕೆ ವಿಕೆಟ್ ಒಪ್ಪಿಸಿದರು. ಈ ಓವರ್​ನಲ್ಲಿ ಅಕ್ಷರ್ ಯಾವುದೇ ರನ್ ಬಿಟ್ಟುಕೊಡದೆ ಪ್ರಮುಖ 2 ವಿಕೆಟ್‌ಗಳನ್ನು ಕಬಳಿಸಿದರು.

ಟಾಸ್ ಗೆದ್ದ ಭಾರತ; ಟಿ20ಗೆ ನಮನ್ ಧೀರ್ ಪಾದಾರ್ಪಣೆ

10 ಓವರ್​ಗಳಲ್ಲಿ 83 ರನ್

ಪವರ್​ಪ್ಲೇನಲ್ಲೇ ವಿಂಡೀಸ್ ತಂಡ ಪ್ರಮುಖ 3 ವಿಕೆಟ್‌ಗಳನ್ನು ಕಳೆದುಕೊಂಡಿದ್ದರಿಂದ ರನ್ ಗಳಿಸುವ ವೇಗ ಕುಂಟಿತಗೊಂಡಿತು. ಹೀಗಾಗಿ ಮೊದಲ 10 ಓವರ್​ಗಳಲ್ಲಿ ತಂಡವು 3 ವಿಕೆಟ್‌ಗಳನ್ನು ಕಳೆದುಕೊಂಡು 83 ರನ್ ಕಲೆಹಾಕಿದೆ. ನಾಯಕ ಶಾಯ್ ಹೋಪ್ ತಂಡದ ಇನ್ನಿಂಗ್ಸ್ ನಿಭಾಯಿಸುತ್ತಿದ್ದಾರೆ.

ಮತ್ತಷ್ಟು ಕ್ರೀಡಾ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ