ಪೇರಲೆಹಣ್ಣು ಮಾರುತ್ತಿದ್ದ ವಯೋವೃದ್ಧೆಗೆ ಸಹಾಯ ಮಾಡಿದ ಪೊಲೀಸ್ ಅಧಿಕಾರಿ; ನೆಟ್ಟಿಗರ ಮಿಶ್ರ ಪ್ರತಿಕ್ರಿಯೆ

Viral Video : ಒಂದು ಹೊತ್ತಿನ ತುತ್ತಿಗಾಗಿ ಹೀಗೆ ರಸ್ತೆ ಬದಿ, ಇಡೀದಿನ ರಣಬಿಸಿಲಲ್ಲಿ ಏನನ್ನೋ ಮಾರುತ್ತ ಕುಳಿತಿರುವ ಮುಪ್ಪಾನು ಮುದುಕರನ್ನು ನೋಡಿದಾಗ ಕರುಳು ಚುರುಗುಡುತ್ತದೆ. ಈಗ ವೈರಲ್ ಆಗುತ್ತಿರುವ ಈ ವಿಡಿಯೋ ನೋಡಿ, ವಯೋವೃದ್ಧೆ ಮುಖ್ಯರಸ್ತೆಯೊಂದರ ಬಳಿ ಪೇರಲೆಹಣ್ಣನ್ನು ಮಾರುತ್ತ ಕುಳಿತಿದ್ದಾಳೆ. ರಸ್ತೆಯಲ್ಲಿ ಸಂಚರಿಸುತ್ತಿದ್ದ ಪೊಲೀಸ್​ ಅಧಿಕಾರಿ ಕಾರು ನಿಲ್ಲಿಸುತ್ತಾರೆ. ಇಂಥಾ ಬಿಸಿಲಲ್ಲಿ ಯಾಕೆ ಹೀಗೆ ಮಾರುತ್ತ ಕುಳಿತಿದ್ದೀರಿ? ಈ ನಾಯಿಯೂ ನಿಮ್ಮದೆ? ಎಂದು ಮಾತು ಶುರುಮಾಡುತ್ತಾರೆ ಪೊಲೀಸ್ ಅಧಿಕಾರಿ.

ಬುಂದೇಲಿ ಬೌಚ್ಚಾರ್​ ಎಂಬ ಟ್ವಿಟರ್​ ಖಾತೆಯಲ್ಲಿ ಈ ವಿಡಿಯೋ ಹಂಚಿಕೊಳ್ಳಲಾಗಿದೆ. ಮಧ್ಯಪ್ರದೇಶದ ದಮೋಹ್​ನಲ್ಲಿ ಈ ವಿಡಿಯೋ ಚಿತ್ರೀಕರಿಸಲಾಗಿದೆ. ಪೊಲೀಸ್ ಅಧಿಕಾರಿಯ ಹೆಸರು ಅವದೇಶ್​ ಕುಮಾರ ದುಬೇ. 3,66,700 ಕ್ಕೂ ಹೆಚ್ಚು ಜನರು ಈ ವಿಡಿಯೋ ನೋಡಿದ್ದಾರೆ. 8,000ಕ್ಕೂ ಹೆಚ್ಚು ಜನ ಈ ವಿಡಿಯೋ ಇಷ್ಟಪಟ್ಟಿದ್ದಾರೆ. ಅನೇಕರು ರೀಟ್ವೀಟ್ ಮಾಡಿದ್ದಾರೆ. ಅನೇಕರು ಪ್ರತಿಕ್ರಿಯಿಸಿದ್ದಾರೆ.

ಸಹಾಯ ಮಾಡಿದವರು ತಮ್ಮ ಮುಖವನ್ನು ತೋರಿಲ್ಲ, ಇದೇ ಅವರ ಘನತೆಯನ್ನು ಸಾರುತ್ತದೆ. ಎಂದಿದ್ದಾರೆ ಒಬ್ಬರು. ಉಚಿತವಾಗಿ ಹಣ ಕೊಡಬಾರದು, ಹಣ್ಣುಗಳನ್ನು ಖರೀದಿಸಿ ಅವರನ್ನು ಗೌರವಿಸಬೇಕಿತ್ತು ಎಂದಿದ್ದಾರೆ ಇನ್ನೊಬ್ಬರು. ಸಹಾಯ ಮಾಡಿದ ಬಗ್ಗೆ ಯಾರಿಗೂ ಹೇಳಬಾರದು ನಿಜ. ಆದರೆ ಪಾತ್ರರಿಗೆ ಸಹಾಯ ಮಾಡಬೇಕು ಎನ್ನುವುದನ್ನು ಹೇಳಲಾದರೂ ವಿಡಿಯೋ ಮಾಡಲೇಬೇಕಾಗುತ್ತದೆ ಎಂದಿದ್ದಾರೆ ಮತ್ತೊಬ್ಬರು.

ಈ ವಿಡಿಯೋ ನೋಡಿದ ನಿಮ್ಮ ಅಭಿಪ್ರಾಯವೇನು?

ಮತ್ತಷ್ಟು ವೈರಲ್ ವಿಡಿಯೋಗಾಗಿ ಕ್ಲಿಕ್ ಮಾಡಿ