ENG vs SA: ಆಫ್ರಿಕಾ ವಿರುದ್ಧ ಸಿಡಿಲಬ್ಬರದ ಶತಕ ಬಾರಿಸಿದ ಆರ್ಸಿಬಿ ಸ್ಟಾರ್ ಜಾಕೋಬ್ ಬೆಥೆಲ್
Jacob Bethell's Maiden ODI Century: ದಕ್ಷಿಣ ಆಫ್ರಿಕಾ ವಿರುದ್ಧದ ಏಕದಿನ ಪಂದ್ಯದಲ್ಲಿ ಇಂಗ್ಲೆಂಡ್ನ ಜಾಕೋಬ್ ಬೆಥೆಲ್ ಅವರು ಅದ್ಭುತವಾದ 110 ರನ್ಗಳ ಸ್ಫೋಟಕ ಶತಕ ಗಳಿಸಿದರು. ಇದು ಅವರ ಏಕದಿನ ಮತ್ತು ವೃತ್ತಿಪರ ಕ್ರಿಕೆಟ್ನ ಮೊದಲ ಶತಕ. 76 ಎಸೆತಗಳಲ್ಲಿ ಈ ಶತಕ ಗಳಿಸಿದ ಬೆಥೆಲ್, 48 ಎಸೆತಗಳಲ್ಲಿ ಅರ್ಧಶತಕ ಪೂರ್ಣಗೊಳಿಸಿ ನಂತರ ಬೌಂಡರಿ ಮತ್ತು ಸಿಕ್ಸರ್ಗಳ ಮೂಲಕ ಶತಕದ ಗಡಿ ದಾಟಿದರು.
ದಕ್ಷಿಣ ಆಫ್ರಿಕಾ ವಿರುದ್ಧದ ಮೂರನೇ ಏಕದಿನ ಪಂದ್ಯದಲ್ಲಿ ಇಂಗ್ಲೆಂಡ್ನ ಜಾಕೋಬ್ ಬೆಥೆಲ್ ಸ್ಫೋಟಕ ಶತಕ ಸಿಡಿಸಿ ಮಿಂಚಿದ್ದಾರೆ. ಇದು ಅವರ ಏಕದಿನ ವೃತ್ತಿಜೀವನದ ಮೊದಲ ಶತಕವಾಗಿದೆ. ಈ ಪಂದ್ಯದಲ್ಲಿ ನಾಲ್ಕನೇ ಕ್ರಮಾಂಕದಲ್ಲಿ ಬ್ಯಾಟಿಂಗ್ಗೆ ಬಂದ ಬೆಥೆಲ್ ಕೇವಲ 76 ಎಸೆತಗಳಲ್ಲಿ ಅದ್ಭುತ ಶತಕ ಬಾರಿಸಿದರು. ಇದು ಅಂತರರಾಷ್ಟ್ರೀಯ ಕ್ರಿಕೆಟ್ನಲ್ಲಿ ಮಾತ್ರವಲ್ಲದೆ ವೃತ್ತಿಪರ ಕ್ರಿಕೆಟ್ನಲ್ಲಿಯೂ ಬೆಥೆಲ್ ಅವರ ಮೊದಲ ಶತಕವಾಗಿದೆ.
ಇನ್ನಿಂಗ್ಸ್ನ 17 ನೇ ಓವರ್ನಲ್ಲಿ ಬ್ಯಾಟಿಂಗ್ಗೆ ಬಂದ ಜಾಕೋಬ್ ಬೆಥೆಲ್, ಜೋ ರೂಟ್ ಅವರೊಂದಿಗೆ ಉತ್ತಮ ಪಾಲುದಾರಿಕೆಯನ್ನು ಮಾಡಿ ಈ ಸರಣಿಯಲ್ಲಿ ಸತತ ಎರಡನೇ ಬಾರಿಗೆ 50 ರನ್ಗಳ ಗಡಿ ದಾಟಿದರು. 48 ಎಸೆತಗಳಲ್ಲಿ ಅರ್ಧಶತಕ ಪೂರ್ಣಗೊಳಿಸಿದ ಬೆಥೆಲ್ ಮುಂದಿನ 28 ಎಸೆತಗಳಲ್ಲಿ ಸಿಕ್ಸರ್ ಮತ್ತು ಬೌಂಡರಿಗಳನ್ನು ಮಳೆಗರೆಸುವ ಮೂಲಕ ಶತಕ ಪೂರೈಸಿದರು. ಅಂತಿಮವಾಗಿ ಬೆಥೆಲ್ 82 ಎಸೆತಗಳಲ್ಲಿ 110 ರನ್ (13 ಬೌಂಡರಿಗಳು, 3 ಸಿಕ್ಸರ್ಗಳು) ಬಾರಿಸಿ ಔಟಾದರು.
ಐಪಿಎಲ್ 2025 ರಲ್ಲಿ ರಾಯಲ್ ಚಾಲೆಂಜರ್ಸ್ ಬೆಂಗಳೂರು ಪರ ಕೆಲವು ಪ್ರಮುಖ ಇನ್ನಿಂಗ್ಸ್ಗಳನ್ನು ಆಡಿದ ಬೆಥೆಲ್ಗೆ ಈ ಶತಕ ಹಲವು ವಿಧಗಳಲ್ಲಿ ವಿಶೇಷವಾಗಿತ್ತು. ಇದಕ್ಕೂ ಮೊದಲು, ಅಂತರರಾಷ್ಟ್ರೀಯ ಕ್ರಿಕೆಟ್ ಅನ್ನು ಬಿಟ್ಟು, ದೇಶೀಯ ಕ್ರಿಕೆಟ್ನಲ್ಲಿಯೂ ಸಹ ಅವರು ಶತಕ ಗಳಿಸಲು ಸಾಧ್ಯವಾಗಿರಲಿಲ್ಲ. ಪ್ರಥಮ ದರ್ಜೆ (ಟೆಸ್ಟ್ ಸೇರಿದಂತೆ), ಲಿಸ್ಟ್-ಎ (ODI ಸೇರಿದಂತೆ) ಮತ್ತು ಟಿ20 (T20I ಸೇರಿದಂತೆ) ವೃತ್ತಿಜೀವನದಲ್ಲಿ, ಬೆಥೆಲ್ 134 ಪಂದ್ಯಗಳನ್ನು ಆಡಿದರಾದರೂ ಒಮ್ಮೆಯೂ ಶತಕ ಗಳಿಸಲು ಸಾಧ್ಯವಾಗಿರಲಿಲ್ಲ. ಆದರೀಗ ಅವರ 135 ನೇ ಪಂದ್ಯದಲ್ಲಿ ಶತಕದ ಬರ ನೀಗಿಸಿಕೊಂಡಿದ್ದಾರೆ.