ಬೆಂಗಳೂರಿನಲ್ಲಿ ನಡೆಯುತ್ತಿರುವ ನ್ಯೂಜಿಲೆಂಡ್ ವಿರುದ್ಧದ ಮೊದಲ ಟೆಸ್ಟ್ ಪಂದ್ಯದಲ್ಲಿ ಟೀಂ ಇಂಡಿಯಾದ ವಿಕೆಟ್ಕೀಪರ್ ಬ್ಯಾಟ್ಸ್ಮನ್ ರಿಷಬ್ ಪಂತ್ ಕೇವಲ ಒಂದೇ ಒಂದು ರನ್ನಿಂದ ತಮ್ಮ 7ನೇ ಟೆಸ್ಟ್ ಶತಕದಿಂದ ವಂಚಿತರಾಗಿದ್ದಾರೆ. ಆದಾಗ್ಯೂ ಕ್ರೀಸ್ನಲ್ಲಿ ಇದ್ದಷ್ಟು ಸಮಯ ಪಂತ್, ತಮ್ಮ ಹೊಡಿಬಡಿ ಆಟದ ಮೂಲಕ ನೆರೆದಿದ್ದ ಪ್ರೇಕ್ಷಕರಿಗೆ ಮನರಂಜನೆಯ ಮಹಾಪೂರವನ್ನೇ ಉಣಬಡಿಸಿದರು. ತಮ್ಮ ಇನ್ನಿಂಗ್ಸ್ನಲ್ಲಿ 105 ಎಸೆತಗಳನ್ನು ಎದುರಿಸಿದ ಪಂತ್, 9 ಬೌಂಡರಿ ಹಾಗೂ 5 ಭರ್ಜರಿ ಸಿಕ್ಸರ್ಗಳನ್ನು ಸಹ ಸಿಡಿಸಿದರು. ಇದರಲ್ಲಿ ಶತಕದಂಚಿನಲ್ಲಿ ಸಿಡಿಸಿದ ಅದೊಂದು ಸಿಕ್ಸರ್ ಮೈದಾನದಲ್ಲಿ ನೆರೆದಿದ್ದ ಅಭಿಮಾನಿಗಳನ್ನು ಹುಚ್ಚೆದ್ದು ಕುಣಿಯುವಂತೆ ಮಾಡಿತು.
ವಾಸ್ತವವಾಗಿ ರಿಷಬ್ ಪಂತ್ 99 ಎಸೆತಗಳಲ್ಲಿ 90 ರನ್ ಗಳಿಸಿ ಆಡುತ್ತಿದ್ದ ವೇಳೆ ಕಿವೀಸ್ ಅನುಭವಿ ವೇಗಿ ಟಿಮ್ ಸೌಥಿ ದಾಳಿಗಿಳಿದರು. ಈ ವೇಳೆ ಪಂತ್, ಓವರ್ನ ಮೂರನೇ ಎಸೆತವನ್ನು ಡೀಪ್ ಮಿಡ್ ವಿಕೆಟ್ಗೆ ಬರೋಬ್ಬರಿ 107 ಮೀಟರ್ ಉದ್ದದ ಸಿಕ್ಸರ್ ಬಾರಿಸಿದರು. ಪಂತ್ ಪವರ್ ಹೇಗಿತ್ತೆಂದರೆ ಚೆಂಡು ಚಿನ್ನಸ್ವಾಮಿ ಕ್ರೀಡಾಂಗಣದ ಮೇಲ್ಛಾವಣಿಗೆ ಬಿದ್ದಿತ್ತು. ಪಂತ್ ಅವರ ಈ ಶಾಟ್ ನೋಡಿದ ಅಭಿಮಾನಿಗಳು ಒಂದೆಡೆ ಖುಷಿ ಪಟ್ಟರೆ ಇನ್ನೊಂದೆಡೆ ಕಿವೀಸ್ ಆಟಗಾರರು ಕೂಡ ಆಶ್ಚರ್ಯಚಕಿತರಾಗಿ ಪಂತ್ ಸಿಡಿಸಿದ ಬಿಗ್ ಸಿಕ್ಸರ್ ಅನ್ನು ನೋಡುತ್ತಾ ನಿಂತರು.
ಮತ್ತಷ್ಟು ಕ್ರೀಡಾ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ
Published On - 4:36 pm, Sat, 19 October 24