ತನ್ನ ಜೀವ ಉಳಿಸಿದವರಿಗೆ ಸ್ಮರಣೀಯ ಉಡುಗೊರೆ ನೀಡಿದ ರಿಷಬ್ ಪಂತ್..! ಈ ವಿಡಿಯೋ ನೋಡಿ
Rishabh Pant Car Accident: ರಿಷಬ್ ಪಂತ್ 2 ವರ್ಷಗಳ ಹಿಂದೆ ರಸ್ತೆ ಅಪಘಾತದಲ್ಲಿ ಗಾಯಗೊಂಡಿದ್ದರು. ಅಪಘಾತವು ಎಷ್ಟು ಗಂಭೀರವಾಗಿತ್ತೆಂದರೆ, ಪಂತ್ ಈ ಅವಘಡದಲ್ಲಿ ಬದುಕುಳಿದಿದ್ದೆ ಹೆಚ್ಚು. ಗಂಭೀರ ಗಾಯಗಳಿಂದ ನರಳುತ್ತಿದ್ದ ಪಂತ್ ಅವರನ್ನು ಇಬ್ಬರು ಯುವಕರು ರಕ್ಷಿಸಿದ್ದರು. ಅಪಘಾತದಿಂದ ಬದುಕುಳಿದ ರಿಷಬ್ ಪಂತ್, ಆ ಬಳಿಕ ಈ ಇಬ್ಬರಿಗೂ ವಿಶೇಷ ಉಡುಗೊರೆಯನ್ನು ನೀಡಿದ್ದಾರೆ.
ಡಿಸೆಂಬರ್ 30, 2022… ಭಾರತದ ಯಾವ ಕ್ರಿಕೆಟ್ ಅಭಿಮಾನಿಯೂ ಈ ದಿನಾಂಕವನ್ನು ಮರೆಯಲು ಸಾಧ್ಯವಿಲ್ಲ. ಟೀಂ ಇಂಡಿಯಾದ ವಿಕೆಟ್ಕೀಪರ್ ಬ್ಯಾಟ್ಸ್‌ಮನ್ ರಿಷಬ್ ಪಂತ್ ಭೀಕರ ರಸ್ತೆ ಅಪಘಾತಕ್ಕೆ ತುತ್ತಾದ ಕರಾಳ ದಿನವಿದು. ದೆಹಲಿ-ಡೆಹ್ರಾಡೂನ್ ಹೆದ್ದಾರಿಯಲ್ಲಿ ಡಿವೈಡರ್‌ಗೆ ಡಿಕ್ಕಿ ಹೊಡೆದಿದ್ದ ರಿಷಬ್ ಪಂತ್ ಚಲಾಯಿಸುತ್ತಿದ್ದ ಕಾರು, ರಸ್ತೆಯಲ್ಲಿ ಪಲ್ಟಿ ಹೊಡೆದು ಬೆಂಕಿಗೆ ಆಹುತಿಯಾಗುತ್ತಿತ್ತು. ಆದರೆ ಅಂತಹ ಭೀಕರ ಅಪಘಾತದ ನಡುವೆಯೂ ಸಾವನ್ನು ಗೆದ್ದು ಬಂದಿದ್ದ ರಿಷಬ್ ಪಂತ್ಗೆ ಮರು ಹುಟ್ಟು ಸಿಗಲು ಕಾರಣರಾಗಿದ್ದವರು ಸಕ್ಕರೆ ಕಾರ್ಖಾನೆಯಲ್ಲಿ ಕೆಲಸ ಮಾಡುವ ಇಬ್ಬರು ಯುವಕರು.
ಗಂಭೀರ ಗಾಯಗಳಿಂದ ನರಳುತ್ತಿದ್ದ ಪಂತ್ ಅವರನ್ನು ಕಾರಿನಿಂದ ಹೊರತಂದು, ಆಂಬ್ಯುಲೆನ್ಸ್‌ನಲ್ಲಿ ಆಸ್ಪತ್ರೆಗೆ ಕರೆದೊಯ್ದಿದ್ದ ಆ ಇಬ್ಬರು ಯುವಕರ ಹೆಸರು ರಜತ್ ಮತ್ತು ನಿಶು. ಈ ಇಬ್ಬರನ್ನು ರಿಷಬ್ ಪಂತ್ ಎಷ್ಟು ಸ್ಮರಿಸಿದರೂ ಅದು ಕಡಿಮೆಯೇ. ಆದಾಗ್ಯೂ ಅಪಘಾತದಿಂದ ಬದುಕುಳಿದ ರಿಷಬ್ ಪಂತ್, ಆ ಬಳಿಕ ಈ ಇಬ್ಬರಿಗೂ ವಿಶೇಷ ಉಡುಗೊರೆಯನ್ನು ನೀಡಿದ್ದಾರೆ ಎಂಬುದು ಇದೀಗ ಬಹಿರಂಗವಾಗಿದ್ದು, ಈ ಬಗ್ಗೆ ಆಸ್ಟ್ರೇಲಿಯಾದ ಮಾಧ್ಯಮಗಳು ವಿಶೇಷ ವರದಿ ಮಾಡಿವೆ.
ವಿಶೇಷ ಉಡುಗೊರೆ ನೀಡಿದ ಪಂತ್
ಕಾರು ಅಪಘಾತದಿಂದ ಸಂಪೂರ್ಣ ಚೇತರಿಸಿಕೊಂಡ ಬಳಿಕ, ತನ್ನನ್ನು ರಕ್ಷಿಸಿ ಆಸ್ಪತ್ರೆಗೆ ದಾಖಲಿಸಿದ್ದ ರಜತ್ ಮತ್ತು ನಿಶು ಅವರನ್ನು ಭೇಟಿಯಾಗಿದ್ದ ಪಂತ್, ಅವರಿಬ್ಬರಿಗೂ ಸ್ಕೂಟರ್ ಅನ್ನು ಉಡುಗೊರೆಯಾಗಿ ನೀಡಿದ್ದಾರೆ. ಪಂತ್ ನೀಡಿದ ಈ ಪ್ರೀತಿಯ ಉಡುಗೊರೆಯನ್ನು ಸ್ಮರಣೀಯಗೊಳಿಸಿರುವ ಈ ಇಬ್ಬರು ತಮ್ಮ ತಮ್ಮ ಸ್ಕೂಟರ್ ಮೇಲೆ ರಿಷಬ್ ಪಂತ್ ಹೆಸರನ್ನು ಬರೆಸಿಕೊಂಡಿದ್ದಾರೆ. ಇದೀಗ ಈ ವಿಡಿಯೋ ಸಾಮಾಜಿಕ ಜಾಲತಾಣದಲ್ಲಿ ವೈರಲ್ ಆಗುತ್ತಿದ್ದು, ಪಂತ್ ಅವರ ಜೀವ ಕಾಪಾಡಿದ ರಜತ್ ಮತ್ತು ನೀಶು ಅವರಿಗೆ, ಪಂತ್ ಅವರ ಅಭಿಮಾನಿಗಳು ಸಲ್ಯೂಟ್ ಹೊಡೆದಿದ್ದಾರೆ.
ಮತ್ತಷ್ಟು ಕ್ರೀಡಾ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ