ಸೂಪರ್-ಮಾಡೆಲ್ ಮಿಲಿಂದ ಸೋಮನ್ ತಲೆಗೂದಲು ಅಷ್ಟೇ ನೆರೆಯುತ್ತಿದೆ, ದೇಹಕ್ಕೆ ಮಾತ್ರ ವಯಸ್ಸಾಗುತ್ತಿಲ್ಲ!

ಮಿಲಿಂದ ಸೋಮನ್ ಬಗ್ಗೆ ಭಾರತದಲ್ಲಿ ಗೊತ್ತಿರದವರು ಬಹಳ ಕಡಿಮೆಯೇ. ಒಬ್ಬ ನಟನಾಗಿ, ಸೂಪರ್ ಮಾಡೆಲ್ ಅಗಿ, ಫಿಟ್ನೆಸ್ ಫ್ರೀಕ್ ಆಗಿ ನಮ್ಮ ದೇಶ ಮಾತ್ರವಲ್ಲ ಬೇರೆ ದೇಶಗಳಲ್ಲೂ ಚಿರಪರಿಚಿತರು. ಫಿಟ್ನೆಸ್ ಬಗ್ಗೆ ಮಿಲಿಂದ ಅವರಿಗಿರುವ ವ್ಯಾಮೋಹ, ಕಾಳಜಿ ಮತ್ತು ಬದ್ಧತೆ ಪ್ರಾಯಶಃ ಬೇರೆ ಯಾರಲ್ಲೂ ಕಾಣಸಿಗದು. ಅವರಿಗೀಗ 56 ವರ್ಷ ಮಾರಾಯ್ರೇ. ಅವರ ಫಿಸಿಕ್ 25ರ ತರುಣರನ್ನೂ ನಾಚಿಸುವಂತಿದೆ. ಮಿಲಿಂದ ಪಕ್ಕಾ ಮಹಾರಾಷ್ಟ್ರಿಯನ್ ಆದರೂ ಹುಟ್ಟಿದ್ದು ಮಾತ್ರ ಸ್ಕಾಟ್ಲೆಂಡಿನ ಗ್ಲಾಸ್ಗೋನಲ್ಲಿ. ಮಿಲಿಂದ 7 ವರ್ಷದವರಾಗಿದ್ದಾಗ ಅವರ ಕುಟುಂಬ ಸ್ವದೇಶಕ್ಕೆ ವಾಪಸ್ಸಾಯಿತು. ಮುಂಬೈನಲ್ಲಿ ಎಲೆಕ್ಟ್ರಿಕ್ ಇಂಜಿನೀಯರಿಂಗ್ ನಲ್ಲಿ ಡಿಪ್ಲೊಮಾ ಪಡೆದ ನಂತರ ಅವರು ಮಾಡೆಲಿಂಗ್ ಲೋಕ ಪ್ರವೇಶಿಸಿದರು. ಒಂದೆರಡು ಇಂಗ್ಲಿಷ್, ತೆಲುಗು, ಮರಾಠಿ ಮತ್ತು ಒಂದು ಸ್ವೀಡಿಶ್ ಚಿತ್ರವಲ್ಲದೆ, ಸುಮಾರು 30 ಹಿಂದಿ ಚಿತ್ರಗಳಲ್ಲಿ ಮಿಲಿಂದ ನಟಿಸಿದ್ದಾರೆ.

ಮಿಲಿಂದ ಅವರ ಮಾಡೆಲಿಂಗ್ ದಿನಗಳಲ್ಲಿ 1992ರ ಫೆಮಿನಾ ಮಿಸ್ ಇಂಡಿಯಾ ಮಧು ಸಪ್ರೆ ಜೊತೆಗಿನ ಸ್ನೇಹ ಬಹಳ ಚರ್ಚೆಯಾಗಿತ್ತು. ಯಾವುದೋ ಒಂದು ಜಾಹಿರಾತಿನಲ್ಲಿ ಇವರಿಬ್ಬರು ಹುಟ್ಟುಡುಗೆಯಲ್ಲಿ ಕಾಣಿಸಿಕೊಂಡಿದ್ದರು. ಒಂದು ದಶಕಕ್ಕೂ ಹೆಚ್ಚಿನ ಆವಧಿಯವರೆಗೆ ಜೊತೆಗಿದ್ದ ಅವರು ಕಳೆದ ಶತಮಾನದ ಅಂತಿಮ ದಿನಗಳಲ್ಲಿ ಬೇರೆಯಾದರು. ಮಧು ಒಬ್ಬ ಇಟಾಲಿಯನ್ ಬಿಸಿನೆಸ್​ಮನ್​ರನ್ನು ಮದುವೆಯಾಗಿ ಅದೇ ದೇಶದಲ್ಲಿ ನೆಲೆಸಿದ್ದಾರೆ.

ಮಿಲಿಂದ, 2006 ರಲ್ಲಿ ‘ವ್ಯಾಲಿ ಆಫ್ ಪ್ಲಾವರ್ಸ್’ ಸಿನಿಮಾನಲ್ಲಿ ತಮ್ಮೊಂದಿಗೆ ನಟಿಸಿದ್ದ ಮೈಲೀನ್ ಜಂಪನೋಯಿ ಅವರನ್ನು ಮದುವೆಯಾದರು, ಅದರೆ 2009 ರಲ್ಲಿ ಅವರ ವಿಚ್ಛೇದನವಾಯಿತು. ಅದಾದ ಮೇಲೆ 2018 ರಲ್ಲಿ ಮಿಲಿಂದ ವಯಸ್ಸಿನಲ್ಲಿ ತನಗಿಂತ 26 ವರ್ಷ ಚಿಕ್ಕವರಾಗಿರುವ ಗಗನಸಖಿ ಅಂಕಿತಾ ಕೊನ್ವರ್ ಅವರನ್ನು ಮದುವೆಯಾದರು.

ಸಾಮಾಜಿಕ ಜಾಲತಾಣದಲ್ಲಿ ಇತ್ತೀಚಿಗೆ ಮಿಲಿಂದ ಅವರು ತನ್ನ ಹಳೆಯ ಪೋಟೋಗಳನ್ನು ಪೋಸ್ಟ್ ಮಾಡಿರುವುದರಿಂದ ಇದನ್ನೆಲ್ಲ ನೆನಪಿಸಿಕೊಳ್ಳಬೇಕಾಯಿತು ಮಾರಾಯ್ರೇ.

ಇದನ್ನೂ ಓದಿ:  ಅಮಲು ಪದಾರ್ಥ ಏರಿಸಿ ರಸ್ತೆಯಲ್ಲಿ ಚೆನ್ನೈ ಮೂಲದ ಮೆಡಿಕಲ್ ವಿದ್ಯಾರ್ಥಿಗಳು-ವಿದ್ಯಾರ್ಥಿನಿಯ ನಡುವೆ ಹೊಡೆದಾಟ: ವಿಡಿಯೋ