James Webb Space Telescope Launch: ವಿಶ್ವದ ಅತ್ಯಂತ ದೊಡ್ಡ, ಪ್ರಭಾವಶಾಲಿ ದೂರದರ್ಶಕ ಜೇಮ್ಸ್ ವೆಬ್ನ್ನು ಯಶಸ್ವಿಯಾಗಿ ಉಡಾವಣೆ ಮಾಡಿದ ನಾಸಾ
ಜೇಮ್ಸ್ ವೆಬ್ ಟೆಲಿಸ್ಕೋಪ್ನ ದರ್ಪಣದ ವ್ಯಾಸ 6.5 ಮೀಟರ್ ಇದೆ. ವೈಜ್ಞಾನಿಕ ಕಾರಣಕ್ಕಾಗಿ ತೆಳುವಾಗಿ ಚಿನ್ನದ ಲೇಪನ ಮಾಡಲಾಗಿದೆ. ಹಾಗೇ, ಈ ದರ್ಪಣವನ್ನು 18 ಚಿಕ್ಕ ಷಡ್ಭುಜೀಯ ದರ್ಪಣಗಳಿಂದ ತಯಾರಿಸಲಾಗಿದೆ ಎಂದು ನಾಸಾ ಮಾಹಿತಿ ನೀಡಿದೆ.
ಅಮೆರಿಕದ ಬಾಹ್ಯಾಕಾಶ ಸಂಸ್ಥೆ ನಾಸಾ ಇಂದು ಸಂಜೆ 5.50ರ ಹೊತ್ತಿಗೆ ಜೇಮ್ಸ್ ವೆಬ್ ಬಾಹ್ಯಾಕಾಶ ದೂರದರ್ಶಕ (JWST-James Webb Space Telescope)ವನ್ನು ಫ್ರಾನ್ಸ್ನ ಫ್ರೆಂಚ್ ಗಯಾನಾದಿಂದ ಉಡಾವಣೆ ಮಾಡಿದೆ. ನಾಸಾ ಇದುವರೆಗೆ ನಿರ್ಮಿಸಿದ ಅತ್ಯಂತ ದೊಡ್ಡ ಟೆಲಿಸ್ಕೋಮ್ ಇದಾಗಿದ್ದು, ಕ್ರಿಸ್ಮಸ್ ದಿನವೇ ಉಡಾವಣೆಗೊಳಿಸಲಾಗಿದೆ. ವಿಶ್ವದ ಅತ್ಯಂತ ಶಕ್ತಿಶಾಲಿ ಟೆಲಿಸ್ಕೋಪ್ ಇದಾಗಿದ್ದು, 1990ರ ಏಪ್ರಿಲ್ನಲ್ಲಿ ಉಡಾವಣೆಯಾಗಿ ಈಗಾಗಲೇ ಕಾರ್ಯಾಚರಣೆ ನಡೆಸುತ್ತಿರುವ ಹಬಲ್ ಸ್ಪೇಸ್ ಟೆಲಿಸ್ಕೋಪ್ನ ತರುವಾಯದ ದೂರದರ್ಶಕವೆನಿಸಿದ್ದು, ಅದಕ್ಕಿಂತಲೂ ಪ್ರಬಲವಾಗಿದೆ. ಅಂದಹಾಗೆ, ಜೇಮ್ಸ್ ಬೆಬ್ ಬಾಹ್ಯಾಕಾಶ ಟೆಲಿಸ್ಕೋಪ್ನ್ನು ಭೂಮಿಯಿಂದ 15 ಮಿಲಿಯನ್ ಕಿಲೋಮೀಟರ್(930,000 ಮೈಲುಗಳು)ದೂರದಲ್ಲಿ ಸ್ಥಿರಗೊಳಿಸಲಾಗುವುದು. ಅಲ್ಲಿಂದ ವಿಶ್ವವನ್ನು ಇದು ಅವಲೋಕಿಸಲಿದೆ ಎಂದು ನಾಸಾ ತಿಳಿಸಿದೆ.
ಜೇಮ್ಸ್ ವೆಬ್ ಬಾಹ್ಯಾಕಾಶ ಟೆಲಿಸ್ಕೋಪ್, ಉಡಾವಣೆ ಬೆನ್ನಲ್ಲೇ ಟ್ವೀಟ್ ಮಾಡಿರುವ ನಾಸಾ ವೆಬ್ ಟೆಲಿಸ್ಕೋಪ್, ಜೇಮ್ಸ್ ವೆಬ್ ದೂರದರ್ಶಕವನ್ನು ಹೊತ್ತೊಯ್ದ ಏರಿಯನ್ 5 ರಾಕೆಟ್ನಿಂದ ಎರಡು ಸಾಲಿಡ್ ರಾಕೆಟ್ ಬೂಸ್ಟರ್ಗಳು ಪ್ರತ್ಯೇಕಿಸಲ್ಪಡಿಲಿವೆ ಮತ್ತು ಅವು ಸಾಗರದಲ್ಲಿ ಸುರಕ್ಷಿತವಾಗಿ ಲ್ಯಾಂಡ್ ಆಗುವ ಮೂಲಕ ಭೂಮಿ ತಲುಪಲಿವೆ ಎಂದು ತಿಳಿಸಿದೆ. ಹಾಗೇ, ಇನ್ನೊಂದು ಟ್ವೀಟ್ ನಲ್ಲಿ, ಅಂದರೆ, ಜೇಮ್ಸ್ ವೆಬ್ ಬಾಹ್ಯಾಕಾಶ ಟೆಲಿಸ್ಕೋಪ್ ಉಡಾವಣೆಗೊಂಡ 11 ನಿಮಿಷಕ್ಕೆ ಟ್ವೀಟ್ ಮಾಡಿ, ವೆಬ್ನ್ನು ಹೊತ್ತೊಯ್ದ ಮುಖ್ಯ ರಾಕೆಟ್ ಏರಿಯನ್ 5ನ ಮುಖ್ಯ ಎಂಜಿನ್ಗಳು ಕಡಿತಗೊಂಡಿವೆ. ಮುಖ್ಯ ಭಾಗ ಪ್ರತ್ಯೇಕಗೊಂಡಿದ್ದು, ಹೊತ್ತಿ ಉರಿದಿದೆ. ಇದು ಸುಮಾರು 16 ನಿಮಿಷಗಳ ಕಾಲ ಹೊತ್ತಿ ಉರಿಯುತ್ತದೆ. ಇನ್ನು ವೆಬ್ ಗಂಟೆಗೆ 25 ಸಾವಿರ ಮೈಲುಗಳಷ್ಟು ವೇಗದಲ್ಲಿ ಚಲಿಸುತ್ತದೆ ಎಂದು ತಿಳಿಸಿದೆ.
ಈ ಜೇಮ್ಸ್ ವೆಬ್ ಬಾಹ್ಯಾಕಾಶ ಟೆಲಿಸ್ಕೋಪ್ ಒಟ್ಟು ನಾಲ್ಕು ಪ್ರಮುಖ ವೈಜ್ಞಾನಿಕ ಉಪಕರಣಗಳನ್ನು ಕೊಂಡೊಯ್ದಿದೆ. ನಿಯರ್ ಇನ್ಫ್ರಾರೆಡ್ ಕ್ಯಾಮರಾ (ಸಮೀಪ-ಅತಿಗೆಂಪು ಕ್ಯಾಮರಾ), ನಿಯರ್ ಇನ್ಫ್ರಾರೆಡ್ ಸ್ಪೆಕ್ಟೋಗ್ರಾಫ್, ಮಿಡ್ ಇನ್ಫ್ರಾರೆಡ್ ಉಪಕರಣ ಮತ್ತು ನಿಯರ್ ಇನ್ಫ್ರಾರೆಡ್ ಇಮೇಜರ್ ಮತ್ತು ಸ್ಲಿಟ್‌ಲೆಸ್ ಸ್ಪೆಕ್ಟ್ರೋಗ್ರಾಪ್ಗಳು ಈ ಉಪಕರಣಗಳಾಗಿವೆ. ಬ್ರಹ್ಮಾಂಡದ ಮೊದಲ ಗೆಲಾಕ್ಸಿಯಲ್ಲಿ ಇದುವರೆಗೂ ಪತ್ತೆಯಾಗದೆ ಉಳಿದ ರಚನೆಗಳನ್ನು ಈ ಉಪಕರಣಗಳ ಸಹಾಯದಿಂದ ಜೇಮ್ಸ್ ವೆಬ್ ಟೆಲಿಸ್ಕೋಪ್ ಪತ್ತೆ ಹಚ್ಚಲಿದೆ. ಅಷ್ಟೇ ಅಲ್ಲ, ನಕ್ಷತ್ರ ಮತ್ತು ಗ್ರಹ ವ್ಯವಸ್ಥೆಗಳು ರೂಪುಗೊಳ್ಳುವ ಧೂಳುಮೋಡದ ಒಳಗೆ ಇದು ಗಮನಹರಿಸಲಿದೆ.
ಈ ಹಿಂದೆ ಬ್ರಹ್ಮಾಂಡದ ಅಧ್ಯಯನಕ್ಕಾಗಿ ಕಳಿಸಲಾದ ಹಬಲ್ ಟೆಲಿಸ್ಕೋಪ್ನ ಬದಲಿಸಲೆಂದು ಜೇಮ್ಸ್ ವೆಬ್ ಟೆಲಿಸ್ಕೋಪ್ ಉಡಾವಣೆ ಮಾಡಿದ್ದಲ್ಲ. ಜೇಮ್ಸ್ ವೆಬ್ ಟೆಲಿಸ್ಕೋಪ್ನ ದರ್ಪಣದ ವ್ಯಾಸ 6.5 ಮೀಟರ್ ಇದೆ. ವೈಜ್ಞಾನಿಕ ಕಾರಣಕ್ಕಾಗಿ ತೆಳುವಾಗಿ ಚಿನ್ನದ ಲೇಪನ ಮಾಡಲಾಗಿದೆ. ಹಾಗೇ, ಈ ದರ್ಪಣವನ್ನು 18 ಚಿಕ್ಕ ಷಡ್ಭುಜೀಯ ದರ್ಪಣಗಳಿಂದ ತಯಾರಿಸಲಾಗಿದೆ. ಅಂದಹಾಗೆ, ಹಬಲ್ ಟೆಲಿಸ್ಕೋಪ್ನ ದರ್ಪಣದ ವ್ಯಾಸ 2.4 ಮೀಟರ್ಗಳು ಎಂದು ನಾಸಾ ತಿಳಿಸಿದೆ. ಹಾಗೇ, 1990ರಲ್ಲಿ ಉಡಾವಣೆಯಾದ ಹಬಲ್ ಟೆಲಿಸ್ಕೋಪ್ ನೇರಳಾತೀತ ತರಂಗದಿಂದ ಬ್ರಹ್ಮಾಂಡ ಅಧ್ಯಯನ ಮಾಡುತ್ತಿದ್ದು, ಭೂಮಿಯ ಹತ್ತಿರವೇ ಇದೆ. ಆದರೆ ಜೇಮ್ಸ್ ವೆಬ್ ಟೆಲಿಸ್ಕೋಪ್ ಅತಿಗೆಂಪು ತರಂಗಗಳ ಮೂಲಕ ಅಧ್ಯಯನ ಮಾಡುತ್ತದೆ ಎಂದೂ ನಾಸಾ ಮಾಹಿತಿ ನೀಡಿದೆ.
ಇದನ್ನೂ ಓದಿ: ಬಿಗಿ ಭದ್ರತೆಯಿದ್ದ ತಿಹಾರ್ ಜೈಲಿನೊಳಗೆ ಎಂಟೇ ದಿನದಲ್ಲಿ ಐವರು ಕೈದಿಗಳ ಸಾವು; ತನಿಖೆಗೆ ಆದೇಶ
Published On - 6:55 pm, Sat, 25 December 21