ಫೇಸ್​ಬುಕ್​ ವಿರುದ್ಧ ಅಮೆರಿಕ​ ಸರ್ಕಾರದಿಂದ ಮೊಕದ್ದಮೆ; ಪ್ರತಿಸ್ಪರ್ಧಿಗಳನ್ನು ಹತ್ತಿಕ್ಕುತ್ತಿದೆ ಎಂಬ ಆರೋಪ

ವಾಷಿಂಗ್ಟನ್​: ಅಮೆರಿಕ ಸರ್ಕಾರ ಮತ್ತು 48 ರಾಜ್ಯಗಳು ಫೇಸ್​ಬುಕ್​ ವಿರುದ್ಧ ಸಮಾನಾಂತರ ನಂಬಿಕೆ ದ್ರೋಹದ ಮೊಕದ್ದಮೆ ಹೂಡಿವೆ. ಸಾಮಾಜಿಕ ಮಾಧ್ಯಮ ದೈತ್ಯ ಎನಿಸಿಕೊಂಡಿರುವ ಫೇಸ್​ಬುಕ್​, ತನ್ನ ಮಾರುಕಟ್ಟೆ ಶಕ್ತಿಯನ್ನು ದುರುಪಯೋಗಪಡಿಸಿಕೊಳ್ಳುವ ಮೂಲಕ ಸ್ಪರ್ಧಾತ್ಮಕ ವ್ಯವಸ್ಥೆಗೆ ವಿರೋಧಿಯಾಗಿ ನಡೆದುಕೊಳ್ಳುತ್ತಿದೆ. ಈ ಮೂಲಕ ಏಕಸ್ವಾಮ್ಯತ್ವ ಸೃಷ್ಟಿಸಿಕೊಂಡು, ಸಣ್ಣ ಮಟ್ಟದ ಸ್ಪರ್ಧಿಗಳನ್ನು ತುಳಿಯುತ್ತಿದೆ ಎಂದು ಆರೋಪಿಸಿವೆ.

ಷೇರುಗಳು ಕುಸಿತ
ಅಮೆರಿಕ​ ಸರ್ಕಾರದ ಸ್ವಾಯುತ್ತ ಸಂಸ್ಥೆಯಾದ ಫೆಡರಲ್​ ಟ್ರೇಡ್​ ಕಮಿಷನ್ ಮತ್ತು 48 ರಾಜ್ಯಗಳ ಅಟಾರ್ನಿ ಜನರಲ್​ಗಳು ಬುಧವಾರ ಮೊಕದ್ದಮೆ ಹೂಡಿದ ಬೆನ್ನಲ್ಲೇ, ಫೇಸ್​ಬುಕ್​ನ ಶೇರುಗಳ ಮೌಲ್ಯ ಗಣನೀಯ ಪ್ರಮಾಣದಲ್ಲಿ ಕುಸಿದಿವೆ. ಫೇಸ್​ಬುಕ್​ ತನ್ನ ಏಕಸ್ವಾಮ್ಯಕ್ಕಿರುವ ಅಪಾಯವನ್ನು ತೊಡೆದುಹಾಕಲು, ವ್ಯವಸ್ಥಿತ ಕಾರ್ಯತಂತ್ರ ಹೆಣೆಯುತ್ತಿದೆ. ಅದಕ್ಕೆ ಉದಾಹರಣೆಯೆಂಬಂತೆ ಮುಂದೊಂದು ದಿನ ತನಗೆ ತೀವ್ರ ಪ್ರತಿಸ್ಪರ್ಧಿಯಾಗಬಲ್ಲ ಇನ್​ಸ್ಟಾಗ್ರಾಮ್​ ಅನ್ನು 2012ರಲ್ಲಿ ಸ್ವಾಧೀನ ಪಡಿಸಿಕೊಂಡಿತು..ಹಾಗೇ 2014ರಲ್ಲಿ ಮೊಬೈಲ್​ ಮೆಸೇಜಿಂಗ್​ ಆ್ಯಪ್​ ವಾಟ್ಸ್​ಆ್ಯಪ್​ನ್ನು ತನ್ನ ವಶಕ್ಕೆ ತೆಗೆದುಕೊಂಡಿತು. ಹಾಗೇ, ಸಾಫ್ಟ್​ವೇರ್​​ ಡೆವಲಪರ್​​ಗಳ ಮೇಲೆ ಸ್ಪರ್ಧಾತ್ಮಕ ವಿರೋಧಿ ಷರತ್ತುಗಳನ್ನು ಹೇರುತ್ತಿದೆ ಎಂದು ನ್ಯೂಯಾರ್ಕ್​ನ ಅಟಾರ್ನಿ ಜನರಲ್​ ಲೆಟಿಟಾ ಜೇಮ್ಸ್​ ನೇತೃತ್ವದ ಉಭಯ ಪಕ್ಷೀಯ ಒಕ್ಕೂಟ ಮೊಕದ್ದಮೆಯಲ್ಲಿ ಆರೋಪ ಮಾಡಿದೆ.

ಫೇಸ್​ಬುಕ್​ನ ಇಂಥ ನಡೆ ಸ್ಪರ್ಧೆಗೆ ಮಾರಕ .ಗ್ರಾಹಕರಿಗೆ ವೈಯಕ್ತಿಕ ಸಾಮಾಜಿಕ ನೆಟ್​ವರ್ಕ್​ಗಳ ಆಯ್ಕೆ ಸೀಮಿತವಾಗುತ್ತದೆ ಮತ್ತು ಜಾಹೀರಾತುದಾರರಿಗೆ ಸ್ಪರ್ಧೆಯಿಂದ ಸಿಗುವ ಅನುಕೂಲವನ್ನು ಕಸಿಯುತ್ತದೆ. ಕಳೆದ ಒಂದು ದಶಕಗಳಿಂದಲೂ ಫೇಸ್​ಬುಕ್​ ತನ್ನ ಸಣ್ಣ ಪ್ರತಿಸ್ಪರ್ಧಿಗಳ ಮೇಲೆ ಪ್ರಾಬಲ್ಯ ಸ್ಥಾಪಿಸುತ್ತಿದೆ. ಏಕಸ್ವಾಮ್ಯದಿಂದ ಹತ್ತಿಕ್ಕುತ್ತಿದೆ ಎಂದೂ ಹೇಳಿದೆ.

ಫೇಸ್​ಬುಕ್​ ಜಗತ್ತಿನ ಅತ್ಯಂತ ದೊಡ್ಡ ಸಾಮಾಜಿಕ ನೆಟ್​ವರ್ಕ್ ಎನ್ನುವುದರಲ್ಲಿ ಸಂಶಯವಿಲ್ಲ. ಕಳೆದ ಒಂದೇ ವರ್ಷ 70 ಶತಕೋಟಿ ಡಾಲರ್​ಗೂ ಹೆಚ್ಚು ಆದಾಯ, 18.5 ಶತಕೋಟಿ ಡಾಲರ್ ನಿವ್ವಳ ಲಾಭ ಗಳಿಸಿತ್ತು. ಆದರೆ ತನ್ನೊಂದಿಗೆ ಇನ್ನ್ಯಾವುದೇ ಸಣ್ಣ ಪ್ರತಿಸ್ಪರ್ಧಿಗಳನ್ನು ಬೆಳೆಯಲು ಕೊಡುವುದಿಲ್ಲ ಎಂಬುದೇ ಮೊಕದ್ದಮೆಯ ಸಾರಾಂಶ.