‘ಅಮೆರಿಕ ಗ್ರೇಟ್​ ಗ್ರೇಟ್​ ಆಗಿತ್ತು, ಆದ್ರೆ ಚೀನಾದ ಕೊರೊನಾ ಬಂದಿದ್ದೇ ತಡ ಎಲ್ಲಾ ಬರಬಾದ್​ ಆಗೋಯ್ತು’

ಕೊರೊನಾ ಮಹಾಮಾರಿಯ ಆರ್ಭಟಕ್ಕೆ ಜಗತ್ತಿನಾದ್ಯಂತ ಸಾಕಷ್ಟು ಸಾವು ನೋವುಗಳು ಸಂಭವಿಸಿದೆ. ಅದರಲ್ಲೂ ದೊಡ್ಡಣ್ಣ ಅಮೆರಿಕ ಪಡುತ್ತಿರುವ ಪಾಡು ಅಷ್ಟಿಷ್ಟಲ್ಲ. ದಿನೇ ದಿನೆ ಹೆಚ್ಚುತ್ತಿರುವ ಸೋಂಕಿತರು ಮತ್ತು ಸಾವಿನ ಸಂಖ್ಯೆಯಿಂದ ಅಮೆರಿಕ ನಲುಗಿಹೋಗಿದೆ.

ಈ ಮಧ್ಯೆ ತನ್ನ ದೇಶದ ಈ ಅವಸ್ಥೆಗೆ ಚೀನಾ ನೇರ ಹೊಣೆ ಎಂದು ಅಮೆರಿಕ ಅಧ್ಯಕ್ಷ ಡೊನಾಲ್ಡ್​ ಟ್ರಂಪ್​ ಪದೇಪದೇ ಹೇಳುತ್ತಲೇ ಬಂದಿದ್ದಾರೆ. ಇದೀಗ ಅಮೆರಿಕದ 244ನೇ ಸ್ವಾತಂತ್ರ್ಯೋತ್ಸವದ ಅಂಗವಾಗಿ ದೇಶದ ರಾಜಧಾನಿ ವಾಶಿಂಗ್ಟನ್​ನಲ್ಲಿ ಮಾಡಿದ ತಮ್ಮ ಭಾಷಣದಲ್ಲಿ ಚೀನಾದ ವಿರುದ್ಧ ಮತ್ತೊಮ್ಮೆ ಹರಿಹಾಯ್ದಿದ್ದಾರೆ.

ಈ ಹಿಂದೆ ಅಮೆರಿಕ ಬಹಳ ಅದ್ಭುತವಾಗಿ ಅಭಿವೃದ್ಧಿ ಕಾಣುತ್ತಾ  ಏಳಿಗೆಯ ಪಥದಲ್ಲಿ ಸಾಗುತ್ತಿತ್ತು. ಆದರೆ, ಚೀನಾದಿಂದ ಆ ವೈರಸ್​ ಬಂದಿದ್ದೇ ತಡ ಎಲ್ಲವೂ ಹಾಳಾಗಿ ಹೋಯ್ತು ಎಂದು ಚೀನಾದ ವಿರುದ್ಧ ಆಕ್ರೋಶ ವ್ಯಕ್ತಪಡಿಸಿದ್ದಾರೆ. ಆದರೆ, ಇದೀಗ ಚೀನಾಗೆ ಸೆಡ್ಡುಹೊಡೆಯುವಂತೆ ನಾವೇ ಕೊರೊನಾ ವಿರುದ್ಧ ಹೋರಾಡಲು ಬೇಕಾದ ಮಾಸ್ಕ್​, ಗೌನ್​ ಮತ್ತು ಇತರೆ ವೈದ್ಯಕೀಯ ಪರಿಕರಗಳನ್ನು ತಯಾರಿಸುತ್ತಿದ್ದೇವೆ ಎಂದು ಸಹ ಹೇಳಿಕೊಂಡಿದ್ದಾರೆ.

ಜೊತೆಗೆ, ಕೊರೊನಾ ಬಗ್ಗೆ ಇದ್ದ ಮಾಹಿತಿಯನ್ನು ಚೀನಾ ಎಲ್ಲೂ ಬಹಿರಂಗಪಡಿಸದೆ ಗೌಪ್ಯವಾಗಿ ಇಟ್ಟ ಕಾರಣ ಈ ಮಹಾಮಾರಿ ವಿಶ್ವದೆಲ್ಲೆಡೆ ವ್ಯಾಪಿಸಿದೆ. ಹೀಗಾಗಿ ಈ ಮಹಾಮಾರಿ ಹರುಡುವಿಕೆಗೆ ಚೀನಾ ನೇರ ಹೊಣೆ ಎಂದು ಸಹ ಹೇಳಿದ್ದಾರೆ.