ಕುಗ್ಗದ ಅದಾನಿ; ವಾಯುಯಾನ ಕ್ಷೇತ್ರಕ್ಕೆ ಇನ್ನೊಂದು ಹೆಜ್ಜೆ; ಬೃಹತ್ ಸೂಪರ್ ವಿದ್ಯುತ್ ಸ್ಥಾವರ ಸ್ಥಾಪನೆಗೂ ಯೋಜನೆ

ನವದೆಹಲಿ, ಡಿಸೆಂಬರ್ 24: ದೊಡ್ಡ ವಿವಾದಗಳು, ರಾಷ್ಟ್ರ, ಅಂತಾರಾಷ್ಟ್ರೀಯ ಮಟ್ಟದಲ್ಲಿ ಟಾರ್ಗೆಟ್ ಮಾಡಲಾಗುತ್ತಿರುವುದು ಇವ್ಯಾವುದಕ್ಕೂ ಗೌತಮ್ ಅದಾನಿ ಜಗ್ಗುತ್ತಿರುವಂತೆ ಕಾಣುತ್ತಿಲ್ಲ, ಕುಗ್ಗುತ್ತಿರುವಂತೆ ತೋರುತ್ತಿಲ್ಲ. ಬಿಸಿನೆಸ್ ವಿಸ್ತರಣೆಗೊಳಿಸಲು ಮತ್ತು ಗಟ್ಟಿಗೊಳಿಸಲು ಅದಾನಿ ಗ್ರೂಪ್​ನ ಚಿತ್ತ ನೆಟ್ಟಂತಿದೆ. ಮಹತ್ವದ ಬೆಳವಣಿಗೆಗಳಲ್ಲಿ ಅದಾನಿ ಗ್ರೂಪ್ ವೈಮಾನಿಕ ಮತ್ತು ವಿದ್ಯುತ್ ಶಕ್ತಿ ಕ್ಷೇತ್ರಗಳಲ್ಲಿ ಪ್ರಬಲ ಹೆಜ್ಜೆಗಳನ್ನು ಇರಿಸಿದೆ. ದೇಶದ ಅತಿದೊಡ್ಡ ಖಾಸಗಿ ಎಂಆರ್​ಒ ಸರ್ವಿಸ್ ಕಂಪನಿ ಎನಿಸಿದ ಏರ್​ವರ್ಕ್ಸ್ ಅನ್ನು ಅದಾನಿ ಗ್ರೂಪ್ ಖರೀದಿಸಿದೆ. ಬಿಹಾರದಲ್ಲಿ ಅಲ್ಟ್ರಾ ಸೂಪರ್​ಕ್ರಿಟಿಕಲ್ ವಿದ್ಯುತ್ ಉತ್ಪಾದನಾ ಘಟಕವನ್ನು ಸ್ಥಾಪಿಸಲಿದೆ. ಇವೆರಡೂ ಕೂಡ ಮಹತ್ವದ ಹೆಜ್ಜೆಗಳಾಗಿವೆ.

400 ಕೋಟಿ ರೂಗೆ ಏರ್​ವರ್ಕ್ಸ್ ಖರೀದಿ…

ಅದಾನಿ ಗ್ರೂಪ್​ಗೆ ಸೇರಿದ ಅದಾನಿ ಡಿಫೆನ್ಸ್ ಸಿಸ್ಟಮ್ಸ್ ಅಂಡ್ ಟೆಕ್ನಾಲಜೀಸ್ ಸಂಸ್ಥೆಯು ಏರ್​ವರ್ಕ್ಸ್ ಅನ್ನು 400 ಕೋಟಿ ರೂಗೆ ಖರೀದಿಸಿರುವುದು ತಿಳಿದುಬಂದಿದೆ. ಈ ಕಂಪನಿಯಲ್ಲಿ ಎಡಿಎಸ್​ಟಿಎಲ್ ಶೇ. 85.8ರಷ್ಟು ಷೇರುದಾರಿಕೆ ಹೊಂದಿರಲಿದೆ. ಏರ್​ವರ್ಕ್ಸ್ ಸಂಸ್ಥೆ ದೇಶದ ಅತಿದೊಡ್ಡ ಖಾಸಗಿ ವಲಯದ ಏವಿಯೇಶನ್ ಎಂಆರ್​ಒ ಸರ್ವಿಸ್ ಕಂಪನಿ ಎನಿಸಿದೆ.

ಇದನ್ನೂ ಓದಿ: ಕೇಂದ್ರ ಸರ್ಕಾರಿ ಉದ್ದಿಮೆಗಳ ನಿವ್ವಳ ಲಾಭ, ಡಿವಿಡೆಂಡ್, ಮಾರ್ಕೆಟ್ ಕ್ಯಾಪ್​ಗಳಲ್ಲಿ ಸಖತ್ ಹೆಚ್ಚಳ

1,300ಕ್ಕೂ ಹೆಚ್ಚು ಪರಿಣಿತ ಉದ್ಯೋಗಿಗಳ ಬಳಗ ಹೊಂದಿರುವ ಏರ್​ವರ್ಕ್ಸ್ 35 ನಗರಗಳಲ್ಲಿ ಘಟಕಗಳನ್ನು ಹೊಂದಿದೆ. ವಿಮಾನದ ಫಿಕ್ಸೆಡ್ ವಿಂಗ್ ಮತ್ತು ರೋಟರಿ ವಿಂಗ್ ಅನ್ನು ಸರ್ವಿಸ್ ಮಾಡುವ ಕಾರ್ಯದಲ್ಲಿ ಈ ಕಂಪನಿ ಪರಿಣಿತಿಗೊಂಡಿದೆ. ಇದೀಗ ನಾಗರಿಕ ವಿಮಾನಯಾನ ಮತ್ತು ರಕ್ಷಣಾ ವಿಮಾನಯಾನ, ಈ ಎರಡರಲ್ಲೂ ಎಂಆರ್​ಒ ಸೇವೆ ನೀಡಲು ಅದಾನಿ ಗ್ರೂಪ್ ತಯಾರಾಗಿದೆ.

ಬಿಹಾರದಲ್ಲಿ ಸೂಪರ್ ಕ್ರಿಟಿಕಲ್ ಥರ್ಮಲ್ ಘಟಕ

ಅದಾನಿ ಗ್ರೂಪ್ ಬಿಹಾರದಲ್ಲಿ ಹಲವು ಮಹತ್ವದ ಯೋಜನೆಗಳನ್ನು ಹಮ್ಮಿಕೊಂಡಿದೆ. ಅದರಲ್ಲಿ ಪ್ರಮುಖವಾದುದು ಅಲ್ಟ್ರಾ ಸೂಪರ್​ಕ್ರಿಟಿಕಲ್ ಥರ್ಮಲ್ ಪವರ್ ಪ್ಲಾಂಟ್. ಅತ್ಯಾಧುನಿಕ ತಂತ್ರಜ್ಞಾನ ಬಳಸಿ ವಿದ್ಯುತ್ ತಯಾರಿಕೆ ಮಾಡಲಾಗುತ್ತದೆ. ಕಲ್ಲಿದ್ದಲು ಮೂಲಕ ಉತ್ಪಾದನೆ ಮಾಡಲಾದರೂ ಪರಿಸರಕ್ಕೆ ಹೆಚ್ಚಿನ ಹಾನಿಯಾಗದ ರೀತಿಯ ತಂತ್ರಜ್ಞಾನವನ್ನು ಇದರಲ್ಲಿ ಬಳಕೆ ಮಾಡಲಾಗುತ್ತದೆ. ಈ ಘಟಕ ಸ್ಥಾಪನೆಗೆ ಅದಾನಿ ಗ್ರೂಪ್ 20,000 ಕೋಟಿ ರೂ ಹೂಡಿಕೆ ಮಾಡುವ ನಿರೀಕ್ಷೆ ಇದೆ.

ಇದನ್ನೂ ಓದಿ: 2024ರಲ್ಲಿ ಜಾಗತಿಕ ಆರ್ಥಿಕ ಮತ್ತು ರಾಜಕೀಯ ತಳಮಳ ಮಧ್ಯೆಯೂ ಮಿಂಚಿನಂತೆ ಸಂಚರಿಸಿದ ಭಾರತದ ಆರ್ಥಿಕತೆ

ವಿದ್ಯುತ್ ಕೊರತೆ ಎದುರಿಸುತ್ತಿರುವ ಬಿಹಾರಕ್ಕೆ ಈ ಘಟಕ ಬಹಳ ಉಪಯುಕ್ತ ಎನಿಸಲಿದೆ. ಅಲ್ಟ್ರಾ ಸೂಪರ್ ಕ್ರಿಟಿಕಲ್ ಪವರ್ ಪ್ಲಾಂಟ್​ಗಳಲ್ಲಿ ಸುಮಾರು 2,000 ಮೆಗಾವ್ಯಾಟ್ ವಿದ್ಯುತ್ ಉತ್ಪಾದನೆ ಸಾಧ್ಯ. 1,600 ಮೆಗಾವ್ಯಾಟ್ ವಿದ್ಯುತ್ ಕೊರತೆ ಎದುರಿಸುತ್ತಿರುವ ಬಿಹಾರಕ್ಕೆ ಈ ಘಟಕದಿಂದ ಅಗತ್ಯ ವಿದ್ಯುತ್ ಸರಬರಾಜಾಗಬಹುದು.

ಬಿಹಾರದಲ್ಲಿ ಈ ಬೃಹತ್ ವಿದ್ಯುತ್ ಘಟಕ ಮಾತ್ರವಲ್ಲ, ಸಿಮೆಂಟ್ ಉತ್ಪಾದನೆ, ಆಹಾರ ಸಂಸ್ಕರಣೆ ಮತ್ತು ಲಾಜಿಸ್ಟಿಕ್ಸ್ ಬಿಸಿನೆಸ್​ಗಳನ್ನು ಅದಾನಿ ಗ್ರೂಪ್ ಹೆಚ್ಚಿಸಲಿದೆ.

ಇನ್ನಷ್ಟು ವಾಣಿಜ್ಯ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ

ಬಿಸಿನೆಸ್ ವೆಬ್ ಸ್ಟೋರಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ