Angel Tax: 21 ದೇಶಗಳಿಗೆ ಏಂಜೆಲ್ ಟ್ಯಾಕ್ಸ್ನಿಂದ ವಿನಾಯಿತಿ ಕೊಟ್ಟ ಭಾರತ; ಏನಿದು ಏಂಜೆಲ್ ತೆರಿಗೆ? ಇಲ್ಲಿದೆ ಡೀಟೇಲ್ಸ್
21 Nations Exempted From Angel Tax In India: ಭಾರತಕ್ಕೆ ಅತಿಹೆಚ್ಚು ವಿದೇಶೀ ನೇರ ಹೂಡಿಕೆ ಬರುವ ದೇಶಗಳೆನಿಸಿದ ಸಿಂಗಾಪುರ, ಐರ್ಲೆಂಡ್, ಮಾರಿಷಸ್ ಮೊದಲಾದವಕ್ಕೆ ಏಂಜೆಲ್ ಟ್ಯಾಕ್ಸ್ ವಿನಾಯಿತಿ ಪಟ್ಟಿಯಲ್ಲಿ ಸ್ಥಾನ ಇಲ್ಲದಿರುವುದು ಕೆಲವರಿಗೆ ಅಚ್ಚರಿ ಮೂಡಿಸಿದೆ.
ನವದೆಹಲಿ: ಅಮೆರಿಕ, ಬ್ರಿಟನ್ ಸೇರಿದಂತೆ 21 ದೇಶಗಳಿಂದ ಬರುವ ಹೂಡಿಕೆಗಳಿಗೆ ಏಂಜೆಲ್ ಟ್ಯಾಕ್ಸ್ನಿಂದ (Angel Tax) ಭಾರತ ವಿನಾಯಿತಿ ನೀಡಿದೆ. ಈ ಸಂಬಂಧ ಮೇ 24ರಂದು ಕೇಂದ್ರೀಯ ನೇರ ತೆರಿಗೆಗಳ ಮಂಡಳಿ (CBDT) ಅಧಿಸೂಚನೆ ಹೊರಡಿಸಿದೆ. ಷೇರುಪೇಟೆಯಲ್ಲಿ ಲಿಸ್ಟ್ ಆಗದ ಭಾರತೀಯ ಕಂಪನಿಗಳಲ್ಲಿ ಬೇರೆ ದೇಶಗಳ ಸಂಸ್ಥೆಗಳು ಮಾಡುವ ಹೂಡಿಕೆಗಳಿಗೆ ಏಂಜೆಲ್ ಟ್ಯಾಕ್ಸ್ ವಿಧಿಸಲಾಗುತ್ತದೆ. ಈಗ 21 ದೇಶಗಳ ಹೂಡಿಕೆಗಳಿಗೆ ಏಂಜೆಲ್ ಟ್ಯಾಕ್ಸ್ ಅನ್ವಯ ಆಗುವುದಿಲ್ಲ. ಭಾರತಕ್ಕೆ ಅತಿಹೆಚ್ಚು ವಿದೇಶೀ ನೇರ ಹೂಡಿಕೆ ಬರುವ ದೇಶಗಳೆನಿಸಿದ ಸಿಂಗಾಪುರ, ಐರ್ಲೆಂಡ್, ಮಾರಿಷಸ್ ಮೊದಲಾದವಕ್ಕೆ ಏಂಜೆಲ್ ಟ್ಯಾಕ್ಸ್ ವಿನಾಯಿತಿ ಪಟ್ಟಿಯಲ್ಲಿ ಸ್ಥಾನ ಇಲ್ಲದಿರುವುದು ಕೆಲವರಿಗೆ ಅಚ್ಚರಿ ಮೂಡಿಸಿದೆ.
ಏಂಜೆಲ್ ಟ್ಯಾಕ್ಸ್ ಎಂದರೇನು?
ಇದು ಆದಾಯ ತೆರಿಗೆ ಕಾಯ್ದೆಯ ಸೆಕ್ಷನ್ 56(2) (7ಬಿ) ವ್ಯಾಪ್ತಿಗೆ ಬರುತ್ತದೆ. ಷೇರುಪೇಟೆಯಲ್ಲಿ ಲಿಸ್ಟ್ ಆಗದ, ಅಂದರೆ ಸಂಪೂರ್ಣ ಖಾಸಗಿ ಒಡೆತನದಲ್ಲಿರುವ ಕಂಪನಿಯ ಷೇರುಗಳನ್ನು ಮಾರುಕಟ್ಟೆ ಮೌಲ್ಯಕ್ಕಿಂತ ಹೆಚ್ಚಿನ ದರಕ್ಕೆ ನೀಡಿದರೆ ಈ ತೆರಿಗೆ ವಿಧಿಸಲಾಗುತ್ತದೆ. ಈ ಹೆಚ್ಚುವರಿ ಮೊತ್ತದ ಮೇಲೆ ಶೇ. 30.9ರಷ್ಟು ಟ್ಯಾಕ್ಸ್ ಹಾಕಲಾಗುತ್ತದೆ. ಸ್ಟಾರ್ಟಪ್ಗಳೇ ಈ ತೆರಿಗೆ ಪಾವತಿಸಬೇಕು.
ಇದನ್ನೂ ಓದಿ: Rs 2,000 Bank Rules: ಎರಡು ಸಾವಿರ ರೂ ನೋಟು ಬದಲಾವಣೆಗೆ ಯಾವ್ಯಾವ ಬ್ಯಾಂಕಲ್ಲಿ ಹೇಗಿದೆ ನಿಯಮ?
ಭಾರತದಲ್ಲಿ ಏಂಜೆಲ್ ಟ್ಯಾಕ್ನಿಂದ ವಿನಾಯಿತಿ ಪಡೆದಿರುವ ದೇಶಗಳು
- ಅಮೆರಿಕಕ್ಕೆ
- ಬ್ರಿಟನ್
- ಫ್ರಾನ್ಸ್
- ಜರ್ಮನಿ
- ಆಸ್ಟ್ರೇಲಿಯಾ
- ಸ್ಪೇನ್
- ಆಸ್ಟ್ರಿಯಾ
- ಕೆನಡಾ
- ಚೆಕ್ ರಿಪಬ್ಲಿಕ್
- ಬೆಲ್ಜಿಯಂ
- ಡೆನ್ಮಾರ್ಕ್
- ಫಿನ್ಲೆಂಡ್
- ಇಸ್ರೇಲ್
- ಇಟೆಲಿ
- ಐಸ್ಲೆಂಡ್
- ಜಪಾನ್
- ಕೊರಿಯಾ
- ರಷ್ಯಾ
- ನಾರ್ವೆ
- ನ್ಯೂಜಿಲೆಂಡ್
- ಸ್ವೀಡನ್
ಇದನ್ನೂ ಓದಿ: US Indians: ಅಮೆರಿಕದಲ್ಲಿ ಕೆಲಸ ಕಳೆದುಕೊಂಡ ಭಾರತೀಯರು ಎಷ್ಟು? 2 ತಿಂಗಳೊಳಗೆ ಬೇರೆ ಕೆಲಸ ಗಿಟ್ಟಿಸಿಕೊಳ್ಳದಿದ್ದರೆ ಗತಿ ಏನು?
2012ರಲ್ಲಿ ಭಾರತದಲ್ಲಿ ಏಂಜೆಲ್ ತೆರಿಗೆ ಜಾರಿಗೆ ಬಂದಿತ್ತು. ಈಗ 21 ದೇಶಗಳ ಹೂಡಿಕೆಗಳಿಗೆ ವಿನಾಯಿತಿ ನೀಡಲಾಗಿದೆ ಎಂದರೆ ಈ ಮೇಲಿನ ದೇಶಗಳಿಂದ ಅನ್ಲಿಸ್ಟೆಡ್ ಸ್ಟಾರ್ಟಪ್ಗಳಿಗೆ ಬರುವ ಹೂಡಿಕೆಗಳಿಗೆ ಏಂಜೆಲ್ ತೆರಿಗೆ ಇರುವುದಿಲ್ಲ.
ಪಟ್ಟಿಯಲ್ಲಿ ಯುಎಇ, ಸಿಂಗಾಪುರ್, ನೆದರ್ಲೆಂಡ್ಸ್, ಮಾರಿಷಸ್ ಇತ್ಯಾದಿ ದೇಶಗಳು ಇಲ್ಲದಿರುವುದು ಅಚ್ಚರಿ ತಂದಿರುವುದು ಹೌದು. ಯಾಕೆಂದರೆ, ಭಾರತಕ್ಕೆ ಬರುವ ಒಟ್ಟು ಎಫ್ಡಿಐನಲ್ಲಿ ಅರ್ಧಕ್ಕಿಂತ ಹೆಚ್ಚು ಭಾಗ ಸಿಂಗಾಪುರ, ಮಾರಿಷಸ್ ಮತ್ತು ಯುಎಇಯಿಂದ ಬರುತ್ತದೆ. ಈ ದೇಶಗಳಿಂದ ಹೂಡಿಕೆ ಪಡೆಯುವ ಭಾರತೀಯ ಸ್ಟಾರ್ಟಪ್ಗಳಿಗೆ ಈಗ ಆತಂಕ ಶುರುವಾಗಿದೆ. ಈ ಸಂಬಂಧ ಅಧಿಕೃತ ಸ್ಪಷ್ಟೀಕರಣಕ್ಕಾಗಿ ಉದ್ಯಮ ವಲಯ ಕಾಯುತ್ತಿದೆ.