ಭಾರತದ ಫಾರೆಕ್ಸ್ ರಿಸರ್ವ್ಸ್ 657 ಬಿಲಿಯನ್ ಡಾಲರ್​ಗೆ ಏರಿಕೆ; ಹೊಸ ದಾಖಲೆ ಬರೆದ ವಿದೇಶೀ ವಿನಿಮಯ ಮೀಸಲು ನಿಧಿ

ನವದೆಹಲಿ, ಜುಲೈ 14: ಭಾರತದ ಫಾರೆಕ್ಸ್ ರಿಸರ್ವ್ಸ್ ಜುಲೈ 5ಕ್ಕೆ ಅಂತ್ಯಗೊಂಡ ವಾರದಲ್ಲಿ 5.16 ಬಿಲಿಯನ್ ಡಾಲರ್​ನಷ್ಟು ಏರಿಕೆ ಆಗಿ 657.16 ಬಿಲಿಯನ್ ಡಾಲರ್ ತಲುಪಿದೆ. ಇದುವರೆಗೆ ಭಾರತದ ಫಾರೆಕ್ಸ್ ರಿಸರ್ವ್ಸ್​ನಲ್ಲಿ ಕಂಡಿರುವ ಅತಿಹೆಚ್ಚು ಸಂಗ್ರಹವಾಗಿದೆ. ಆರ್​ಬಿಐ ಜುಲೈ 10ರಂದು ಈ ದತ್ತಾಂಶವನ್ನು ಬಿಡುಗಡೆ ಮಾಡಿದೆ. ಹಿಂದಿನ ವಾರದಲ್ಲಿ, ಅಂದರೆ ಜೂನ್ 28ರಂದು ವಿದೇಶೀ ವಿನಿಮಯ ಮೀಸಲು ನಿಧಿ 1.71 ಬಿಲಿಯನ್ ಡಾಲರ್​ನಷ್ಟು ಇಳಿಕೆ ಆಗಿತ್ತು.

ಜುಲೈ 5ರಂದು ಹೆಚ್ಚಳವಾದ 5.16 ಬಿಲಿಯನ್ ಡಾಲರ್ ಫಾರೆಕ್ಸ್ ರಿಸರ್ವ್ಸ್ ಪೈಕಿ ಫಾರೀನ್ ಕರೆನ್ಸಿ ಆಸ್ತಿ ಹೆಚ್ಚ 42.29 ಮಿಲಿಯನ್ ಡಾಲರ್​ನಷ್ಟಿದೆ. ಫಾರೆಕ್ಸ್ ನಿಧಿಯಲ್ಲಿ ಈ ವಿದೇಶೀ ಕರೆನ್ಸಿ ಪ್ರಮಾಣ ಅತ್ಯಧಿಕ ಇರುತ್ತದೆ. ಇನ್ನು, ಗೋಲ್ಡ್ ರಿಸರ್ವ್ಸ್​ನಲ್ಲಿ 904 ಮಿಲಿಯನ್ ಡಾಲರ್​ನಷ್ಟು ಹೆಚ್ಚಳವಾಗಿದೆ. ಎಸ್​ಡಿಆರ್​ಗಳ ಪ್ರಮಾಣ 21 ಮಿಲಿಯನ್ ಡಾಲರ್, ಐಎಂಎಫ್​ನೊಂದಿಗಿನ ರಿಸರ್ವ್ಸ್ 4 ಮಿಲಿಯನ್ ಡಾಲರ್​ನಷ್ಟು ಹೆಚ್ಚಾಗಿದೆ.

2024ರ ಜುಲೈ 4ಕ್ಕೆ ಭಾರತದ ಫಾರೆಕ್ಸ್ ರಿಸರ್ವ್ಸ್ ಮೊತ್ತ

ಒಟ್ಟು ಫಾರೆಕ್ಸ್ ರಿಸರ್ವ್ಸ್: 657.16 ಬಿಲಿಯನ್ ಡಾಲರ್

• ವಿದೇಶೀ ಕರೆನ್ಸಿ ಆಸ್ತಿ: 577.11 ಬಿಲಿಯನ್ ಡಾಲರ್
• ಗೋಲ್ಡ್ ರಿಸರ್ವ್ಸ್: 57.43 ಬಿಲಿಯನ್ ಡಾಲರ್
• ಸ್ಪೆಷಲ್ ಡ್ರಾಯಿಂಗ್ ರೈಟ್ಸ್: 18.04 ಬಿಲಿಯನ್ ಡಾಲರ್
• ಐಎಂಎಫ್​ನೊಂದಿಗಿನ ರಿಸರ್ವ್ ಮಟ್ಟ: 4.58 ಬಿಲಿಯನ್ ಡಾಲರ್.

ಇದನ್ನೂ ಓದಿ: ಜೂನ್ ತಿಂಗಳಲ್ಲಿ ಹಣದುಬ್ಬರ ಶೇ. 5.08; ತರಕಾರಿ ಬೆಲೆ ಏರಿಕೆ ಪ್ರಮುಖ ಕಾರಣ

ಚೀನಾದಲ್ಲಿ ಅತಿಹೆಚ್ಚು ಫಾರೆಕ್ಸ್ ರಿಸರ್ವ್ಸ್

ಒಂದು ದೇಶದ ಕರೆನ್ಸಿ ಮೌಲ್ಯ ರಕ್ಷಣೆ ಮತ್ತು ಅಂತಾರಾಷ್ಟ್ರೀಯ ವ್ಯವಹಾರಕ್ಕೆ ಅನುಕೂಲವಾಗಲು ಸೆಂಟ್ರಲ್ ಬ್ಯಾಂಕುಗಳು ವಿದೇಶೀ ಆಸ್ತಿಗಳ ಸಂಗ್ರಹ ಮಾಡುತ್ತವೆ. ಅದುವೇ ಫಾರೆಕ್ಸ್ ರಿಸರ್ವ್ಸ್ ಆಗಿರುತ್ತದೆ. ಚೀನಾದಲ್ಲಿ ಅತಿಹೆಚ್ಚು ಫಾರೆಕ್ಸ್ ರಿಸರ್ವ್ಸ್ ಇದೆ. 3.58 ಟ್ರಿಲಿಯನ್ ಡಾಲರ್ ಮೌಲ್ಯದ ಫಾರೆಕ್ಸ್ ರಿಸರ್ವ್ಸ್ ಚೀನಾ ಬಳಿ ಇದೆ. ಅತಿಹೆಚ್ಚು ಫಾರೆಕ್ಸ್ ರಿಸರ್ವ್ಸ್ ಇರುವ ದೇಶಗಳ ಪಟ್ಟಿ ಇಲ್ಲಿದೆ:

1. ಚೀನಾ: 3.58 ಟ್ರಿಲಿಯನ್ ಡಾಲರ್
2. ಜಪಾನ್: 1.83 ಟ್ರಿಲಿಯನ್ ಡಾಲರ್
3. ಸ್ವಿಟ್ಜರ್​ಲ್ಯಾಂಡ್: 1.29 ಟ್ರಿಲಿಯನ್ ಡಾಲರ್
4. ಭಾರತ: 657.16 ಬಿಲಿಯನ್ ಡಾಲರ್
5. ರಷ್ಯಾ: 572 ಬಿಲಿಯನ್ ಡಾಲರ್

ಇನ್ನಷ್ಟು ವಾಣಿಜ್ಯ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ

ಬಿಸಿನೆಸ್ ವೆಬ್ ಸ್ಟೋರಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ