ಅಕ್ಟೋಬರ್​ನಲ್ಲಿ ದ್ವಿಚಕ್ರ ವಾಹನಗಳ ಭರ್ಜರಿ ಮಾರಾಟ; ಹಬ್ಬದ ಸೀಸನ್​ನಲ್ಲಿ ಭಾರೀ ಬಿಸಿನೆಸ್

ನವದೆಹಲಿ, ನವೆಂಬರ್ 6: ಅಕ್ಟೋಬರ್ ತಿಂಗಳಲ್ಲಿ ಭಾರತದ ಪ್ರಮುಖ ದ್ವಿಚಕ್ರ ವಾಹನ ತಯಾರಕರು ಒಳ್ಳೆಯ ಬಿಸಿನೆಸ್ ಕಂಡಿದ್ದಾರೆ. ಟಿವಿಎಸ್ ಮೋಟಾರ್, ಹೀರೋ ಮೋಟೋಕಾರ್ಪ್, ರಾಯಲ್ ಎನ್​ಫೀಲ್ಡ್ ಇತ್ಯಾದಿ ಪ್ರಮುಖ ಸಂಸ್ಥೆಗಳ ದ್ವಿಚಕ್ರ ವಾಹನಗಳ ಮಾರಾಟದಲ್ಲಿ ಶೇ. 13ರಿಂದ 26ರ ಶ್ರೇಣಿಯಲ್ಲಿ ಹೆಚ್ಚಳವಾಗಿದೆ. ಆದರೆ, ಬಜಾಜ್ ಆಟೊ ಸಂಸ್ಥೆ ಮಾತ್ರ ಕಡಿಮೆ ಮಾರಾಟ ಕಂಡಿದೆ.

ಟಿವಿಎಸ್ ಮೋಟಾರ್ ಸಂಸ್ಥೆ ಕಳೆದ ವರ್ಷದ ಅಕ್ಟೋಬರ್​ಗೆ ಹೋಲಿಸಿದರೆ ಈ ಬಾರಿ ಶೇ. 13ರಷ್ಟು ಹೆಚ್ಚು ಮಾರಾಟ ಮಾಡಿದೆ. 2023ರ ಅಕ್ಟೋಬರ್​ನಲ್ಲಿ ಅದು 3,44,957 ದ್ವಿಚಕ್ರ ವಾಹನಗಳನ್ನು ಮಾರಿತ್ತು. ಈ ಅಕ್ಟೋಬರ್​ನಲ್ಲಿ ಆ ಸಂಖ್ಯೆ 3,90,489 ಯುನಿಟ್​ಗೆ ಏರಿದೆ. ಅದರ ಎಲೆಕ್ಟ್ರಿಕ್ ವಾಹನಗಳ ಮಾರಾಟದಲ್ಲಿ ಶೇ. 45ರಷ್ಟು ಹೆಚ್ಚಳವಾಗಿರುವುದು ಗಮನಾರ್ಹ.

ವಿಶ್ವದ ಎರಡನೇ ಅತಿದೊಡ್ಡ ದ್ವಿಚಕ್ರ ತಯಾರಕ ಸಂಸ್ಥೆಯಾದ ಹೀರೋ ಮೋಟೋಕಾರ್ಪ್ ಈ ಅಕ್ಟೋಬರ್​ನಲ್ಲಿ ಶೇ 17.4ರಷ್ಟು ಮಾರಾಟ ಹೆಚ್ಚಳ ಕಂಡಿದೆ. ಅಕ್ಟೋಬರ್​ನಲ್ಲಿ ಅದು ಬರೋಬ್ಬರಿ 6,57,403 ಟೂ ವ್ಹೀಲರ್​ಗಳನ್ನು ಮಾರಿದೆ. ಅದರ 100 ಸಿಸಿ ಮತ್ತು 125ಸಿಸಿ ಬೈಕ್​ಗಳು ಬಹಳ ಜನಪ್ರಿಯವಾಗಿವೆ.

ಇದನ್ನೂ ಓದಿ: ಗಾರ್ಮೆಂಟ್ಸ್ ರಫ್ತು: ಭಾರತ ಬಿಟ್ಟು ಮಾಲ್ಡೀವ್ಸ್ ಮಾರ್ಗ ಹಿಡಿದ ಬಾಂಗ್ಲಾದೇಶ; ಭಾರತಕ್ಕೇನು ಹಾನಿ?

ರಾಯಲ್ ಎನ್​ಫೀಲ್ಡ್ ಬೈಕ್ ಎಲ್ಲರಿಗಿಂತ ಹೆಚ್ಚು ಹೈಜಂಪ್ ಮಾಡಿದೆ. ಕಳೆದ ವರ್ಷದ ಅಕ್ಟೋಬರ್​ನಲ್ಲಿ 80,958 ರಾಯಲ್ ಎನ್​ಫೀಲ್ಡ್ ಬೈಕ್​ಗಳು ಮಾರಾಟವಾಗಿದ್ದವು. ಈ ಬಾರಿ ಆ ಸಂಖ್ಯೆ 1,01,886 ಯೂನಿಟ್​ಗೆ ಏರಿದೆ. ಇದು ಆ ಸಂಸ್ಥೆ ಯಾವುದೆ ತಿಂಗಳೊಂದರಲ್ಲಿ ದಾಖಲಿಸಿದ ಅತಿಹೆಚ್ಚು ಸೇಲ್ಸ್ ಆಗಿದೆ.

ಬಜಾಜ್ ಆಟೊ ಸಂಸ್ಥೆ ಮಾತ್ರ ಮಾರಾಟದಲ್ಲಿ ಇಳಿಮುಖ ಕಂಡಿದೆ. ಅದರ 2,55,909 ದ್ವಿಚಕ್ರ ವಾಹನಗಳು ಅಕ್ಟೋಬರ್​ನಲ್ಲಿ ಮಾರಾಟವಾಗಿವೆ. ಕಳೆದ ವರ್ಷದಕ್ಕೆ ಹೋಲಿಸಿದರೆ ಮಾರಾಟ ಸಂಖ್ಯೆಯಲ್ಲಿ ಶೇ. 8ರಷ್ಟು ಕಡಿಮೆ ಆಗಿದೆ.

ದ್ವಿಚಕ್ರ ವಾಹನಗಳ ರಫ್ತಿನಲ್ಲೂ ಹೆಚ್ಚಳ

ಭಾರತದ ದ್ವಿಚಕ್ರ ವಾಹನ ತಯಾರಕ ಸಂಸ್ಥೆಗಳು ಅಕ್ಟೋಬರ್​ನಲ್ಲಿ ಭಾರತದ ಮಾರುಕಟ್ಟೆಯಲ್ಲಿ ಒಳ್ಳೆಯ ಸೇಲ್ಸ್ ಕಂಡಿರುವುದರ ಜೊತೆಗೆ ವಿದೇಶಗಳಿಗೂ ಸಾಕಷ್ಟು ರಫ್ತು ಮಾಡಿವೆ. ಭಾರತದಲ್ಲಿ ಅಕ್ಟೋಬರ್​ನಲ್ಲಿ ಮಾರಾಟ ಇಳಿಮುಖ ಕಂಡಿದ್ದ ಬಜಾಜ್ ಆಟೊ ಸಂಸ್ಥೆ ರಫ್ತಿನಲ್ಲಿ ಶೇ. 24ರಷ್ಟು ಬೆಳವಣಿಗೆ ಕಂಡಿದೆ. ಅದು 1,58,463 ಯುನಿಟ್​​ಗಳನ್ನು ಮಾರಿದೆ.

ಇದನ್ನೂ ಓದಿ: ಭಾರತ್ ಬ್ರ್ಯಾಂಡ್ ಎರಡನೇ ಹಂತದ ಸೇಲ್ಸ್ ಆರಂಭ; ಸಬ್ಸಿಡಿ ದರದಲ್ಲಿ ಗೋಧಿಹಿಟ್ಟು ಮತ್ತು ಅಕ್ಕಿ ಮಾರಾಟ

ಟಿವಿಎಸ್ ಮೋಟಾರ್ ಶೇ. 16ರಷ್ಟು ರಫ್ತು ಹೆಚ್ಚಳ ಕಂಡರೆ, ಹಿರೋ ಮೋಟೋಕಾರ್ಪ್ ಶೇ. 43ರಷ್ಟು ಹೆಚ್ಚು ಬೈಕ್, ಸ್ಕೂಟರ್​ಗಳನ್ನು ವಿದೇಶಗಳಿಗೆ ಸರಬರಾಜು ಮಾಡಿದೆ. ಆದರೆ, ಎಲ್ಲರಿಗಿಂತ ಹೆಚ್ಚು ರಫ್ತು ಹೆಚ್ಚಳ ಸಾಧಿಸಿದ್ದು ರಾಯಲ್ ಎನ್​ಫೀಲ್ಡ್. ಅದರ ರಫ್ತು ಬರೋಬ್ಬರಿ ಶೇ. 150ರಷ್ಟು ಹೆಚ್ಚಾಗಿದೆ. ದಕ್ಷಿಣ ಏಷ್ಯಾದ ಇತರ ಮಾರುಕಟ್ಟೆಗಳು ಹಾಗು ಲ್ಯಾಟಿನ್ ಅಮೆರಿಕನ್ ದೇಶಗಳಿಗೆ ರಾಯಲ್ ಎನ್​ಫೀಲ್ಡ್ ಬೈಕ್​ಗಳು ರಫ್ತಾಗಿವೆ.

ಇನ್ನಷ್ಟು ವಾಣಿಜ್ಯ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ

ಬಿಸಿನೆಸ್ ವೆಬ್ ಸ್ಟೋರಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ