ರಿಲಾಯನ್ಸ್​ನ ಜೆಎಫ್​ಎಸ್ ಷೇರುಬೆಲೆ ಕುಸಿಯುತ್ತಿದ್ದುದು ಯಾಕೆ? ಷೇರುಸೂಚಿಗಳಿಂದ ಹೊರಬೀಳುವುದು ಜಿಯೋಗೆ ಅನುಕೂಲವಾ? ಪ್ರೈಸ್​ಬ್ಯಾಂಡ್ ಬದಲಿಸಿದ್ದು ಯಾಕೆ? ಇಲ್ಲಿದೆ ಡೀಟೇಲ್ಸ್

ನವದೆಹಲಿ, ಸೆಪ್ಟೆಂಬರ್ 4: ರಿಲಾಯನ್ಸ್ ಇಂಡಸ್ಟ್ರೀಸ್ ಸಂಸ್ಥೆಯಿಂದ ಪ್ರತ್ಯೇಕಗೊಂಡಿರುವ ಜಿಯೋ ಫೈನಾನ್ಷಿಯಲ್ ಸರ್ವಿಸಸ್ (JFS- Jio Financial Services) ಷೇರುಗಳ ಮೇಲೆ ಎಲ್ಲರ ಗಮನ ನೆಟ್ಟಿದೆ. ಬಿಎಸ್​ಇ ಮತ್ತು ಎನ್​ಎಸ್​ಇಯ ಸೆನ್ಸೆಕ್ಸ್, ನಿಫ್ಟಿ ಇತ್ಯಾದಿ ಎಲ್ಲಾ ಸೂಚ್ಯಂಕಗಳಿಂದ ಜೆಎಫ್​ಎಸ್ ಷೇರನ್ನು ಹೊರತೆಗೆಯಲಾಗುತ್ತಿರುವುದು ಕುತೂಹಲ ಹೆಚ್ಚಿಸಿದೆ. ಇದೀಗ ಎರಡೂ ಷೇರುವಿನಿಮಯ ಕೇಂದ್ರಗಳಲ್ಲಿ ಜಿಯೋ ಷೇರಿಗೆ ವಹಿವಾಟು ಮಿತಿ (Circuit Limit) ಬದಲಿಸಲಾಗಿದೆ. ನ್ಯಾಷನಲ್ ಸ್ಟಾಕ್ ಎಕ್ಸ್​ಚೇಂಜ್ (NSE) ಜೆಎಫ್​ಎಸ್​ನ ಪ್ರೈಸ್ ಬ್ಯಾಂಡ್ ಅನ್ನು ಶೇ. 5ರಿಂದ ಶೇ. 20ಕ್ಕೆ ಹೆಚ್ಚಿಸಿದೆ. ಹಾಗೆಯೇ, ಬಾಂಬೆ ಸ್ಟಾಕ್ ಎಕ್ಸ್​​ಚೇಂಜ್ (BSE) ಕೂಡ ಜೆಎಫ್​ಎಸ್​ನ ಪ್ರೈಸ್ ಬ್ಯಾಂಡ್ ಅನ್ನು ಶೇ. 20ಕ್ಕೆ ಹೆಚ್ಚಿಸಿದೆ. ಜೆಎಫ್​ಎಸ್ ಸೇರಿದಂತೆ 10 ಕಂಪನಿಗಳ ಷೇರುಗಳ ಸರ್ಕ್ಯುಟ್ ಲಿಮಿಟ್ ಅನ್ನು ಬಿಎಸ್​ಇ ಬದಲಾಯಿಸಿದೆ.

ಏನಿದು ಸರ್ಕ್ಯುಟ್ ಲಿಮಿಟ್ ಅಥವಾ ಪ್ರೈಸ್ ಬ್ಯಾಂಡ್?

ಒಂದು ಷೇರು ಒಮ್ಮೆಗೇ ದೊಡ್ಡ ಮಟ್ಟದಲ್ಲಿ ಏರಿಳಿತ ಕಾಣುವುದನ್ನು ತಪ್ಪಿಸಲು ಸ್ಟಾಕ್ ಎಕ್ಸ್​ಚೇಂಜ್​ಗಳು ಕೈಗೊಳ್ಳುವ ಕ್ರಮ. ಈಗ ಒಂದು ಷೇರಿನ ಸರ್ಕ್ಯುಟ್ ಲಿಮಿಟ್ ಶೇ. 5 ಎಂದು ನಿಗದಿ ಮಾಡಲಾಗಿದೆ ಎಂದಿಟ್ಟುಕೊಳ್ಳಿ. ಈ ಷೇರುಬೆಲೆ ಒಂದು ದಿನದಲ್ಲಿ ಶೇ. 5ಕ್ಕಿಂತ ಹೆಚ್ಚಾಗುವಂತಿಲ್ಲ, ಅಥವಾ ಇಳಿಕೆಯಾಗುವಂತಿಲ್ಲ.

ಇದನ್ನೂ ಓದಿ: ಅಮೆರಿಕದ ಏವಾ ಫಾರ್ಮಾ ಕಂಪನಿಯ ಮಾತ್ರೆ ತಯಾರಕಾ ಘಟಕ ಖರೀದಿಸಿದ ಬೆಂಗಳೂರಿನ ಬಯೋಕಾನ್

ಹೂಡಿಕೆದಾರರ ಹಿತ ಕಾಪಾಡಲು ಇಂಥ ಕ್ರಮಗಳನ್ನು ಅನುಸರಿಸಲಾಗುತ್ತದೆ. ಒಂದು ಷೇರು ಸರ್ಕ್ಯುಟ್ ಲಿಮಿಟ್​ನ ಹತ್ತಿರಕ್ಕೆ ಹೋದರೆ ಹೂಡಿಕೆದಾರರು ತಮ್ಮಲಿರುವ ಷೇರುಗಳನ್ನು ಮಾರಲೋ ಅಥವಾ ಹೊಸ ಷೇರುಗಳನ್ನು ಖರೀದಿಸಲೋ ಮುಂದಾಗಬಹುದು.

ಜೆಎಫ್​ಎಸ್ ಷೇರುಬೆಲೆ ಯಾಕೆ ಕಡಿಮೆ ಆಗುತ್ತಿತ್ತು?

ಜಿಯೋ ಫೈನಾನ್ಷಿಯಲ್ ಸರ್ವಿಸಸ್​ನ ಷೇರುಬೆಲೆ ಎನ್​ಎಸ್​ಇ ಮತ್ತು ಬಿಎಸ್​ಇಗಳಲ್ಲಿ ಕುಸಿಯುತ್ತಿರುವುದು ಕೆಲವರಿಗೆ ಅಚ್ಚರಿ ಮೂಡಿಸಿರಬಹುದು. ರಿಲಾಯನ್ಸ್ ಇಂಡಸ್ಟ್ರೀಸ್​ನ ಅಂಗ ಸಂಸ್ಥೆಯಾದ್ದರಿಂದ ಜೆಎಫ್​ಎಸ್ ಅನ್ನು ಸ್ಟಾಕ್ ಎಕ್ಸ್​ಚೇಂಜ್​ಗಳ ವಿವಿಧ ಸೂಚ್ಯಂಕಗಳಲ್ಲಿ ಒಳಗೊಳ್ಳಲಾಗಿತ್ತು. ಇದರಿಂದಾಗಿ ಎಲ್ಲಾ ಇಂಡೆಕ್ಸ್ ಫಂಡ್​ಗಳೂ ಜೆಎಫ್​ಎಸ್ ಮೇಲೆ ಹೂಡಿಕೆ ಮಾಡಿದವು. ಆದರೆ, ಯಾವಾಗ ಜೆಎಫ್​ಎಸ್ ಅನ್ನು ವಿವಿಧ ಇಂಡೆಕ್ಸ್​ಗಳಿಂದ ಹೊರತೆಗೆಯಬೇಕೆಂದು ನಿರ್ಧರಿಸಲಾಯಿತೋ ಆಗ ಇಂಡೆಕ್ಸ್ ಫಂಡ್​ಗಳು ಜೆಎಫ್​ಎಸ್ ಮೇಲಿನ ಹೂಡಿಕೆಯನ್ನು ಹಿಂಪಡೆಯುವುದು ಅನಿವಾರ್ಯವಾಯಿತು.

ಇದರಿಂದಾಗಿ ಜೆಎಫ್​ಎಸ್ ಷೇರುಬೆಲೆ ಪ್ರತೀ ದಿನ ಶೇ. 5ರಷ್ಟು ಇಳಿಕೆಯಾಯಿತು. ಶೇ. 5ರಷ್ಟು ಇಳಿಕೆ ಯಾಕೆಂದರೆ ಬಿಎಸ್​ಇ ಮತ್ತು ಎನ್​ಎಸ್​ಇನಲ್ಲಿ ಇದರ ಸರ್ಕ್ಯುಟ್ ಲಿಮಿಟ್ ಅನ್ನು ಶೇ. 5ಕ್ಕೆ ನಿಗದಿ ಮಾಡಲಾಗಿತ್ತು.

ಇದನ್ನೂ ಓದಿ: ಸಿಂಗಾಪುರದ ನೂತನ ಅಧ್ಯಕ್ಷ ಧರ್ಮನ್ ಷಣ್ಮುಗರತ್ನಂ ಭಾರತದ ಆರ್ಥಿಕ ಬಲಾಬಲದ ಬಗ್ಗೆ ಹೇಳಿದ ಕುತೂಹಲಕಾರಿ ಸಂಗತಿಗಳು

ಬಿಎಸ್​ಇನ ಇಂಡೆಕ್ಸ್ ಫಂಡ್​ಗಳು ಈಗಾಗಲೇ ಎಲ್ಲಾ ಜೆಎಫ್​ಎಸ್ ಷೇರುಗಳನ್ನು ಬಿಕರಿ ಮಾಡಿವೆ. ಎನ್​ಎಸ್​ಇನಲ್ಲಿ 10 ಕೋಟಿ ಷೇರುಗಳನ್ನು ಇವತ್ತು ಅಥವಾ ನಾಳೆಯೊಳಗೆ ಮಾರುವ ಸಾಧ್ಯತೆ ಇದೆ.

ಜಿಯೋ ಫೈನಾನ್ಷಿಯಲ್ ಸರ್ವಿಸಸ್ ಸಂಸ್ಥೆ ಆಗಸ್ಟ್ 21ರಂದು 265 ರೂ ಬೆಲೆಯೊಂದಿಗೆ ಷೇರುಪೇಟೆಗಳಲ್ಲಿ ಲಿಸ್ಟ್ ಆಗಿತ್ತು. ಆಗಸ್ಟ್ 25ರಷ್ಟರಲ್ಲಿ ಅದರ ಷೇರುಬೆಲೆ 214.50 ರುಪಾಯಿಗೆ ಕುಸಿದಿತು. ಆ ಬಳಿಕ ಎನ್​ಎಸ್​ಇ ಮತ್ತು ಬಿಎಸ್​ಇ ಎರಡೂ ಕಡೆ ಜೆಎಫ್​ಎಸ್ ಷೇರಿಗೆ ಬೇಡಿಕೆ ಬಂದಿದೆ. ಈಗ ಸರ್ಕ್ಯುಟ್ ಲಿಮಿಟ್ ಅನ್ನು ಶೇ. 20ರಷ್ಟು ಹೆಚ್ಚಿಸಿರುವುದು ಜೆಎಫ್​ಎಸ್ ಷೇರು ಖರೀದಿಸುವವರಿಗೆ ಒಳ್ಳೆಯ ಅನುಕೂಲ ಮಾಡಿಕೊಟ್ಟಂತಾಗಿದೆ.

ಇನ್ನಷ್ಟು ವಾಣಿಜ್ಯ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ