ಪ್ರಯೋಗಾಲಯದಲ್ಲಿ ಚಿನ್ನದ ಉತ್ಪಾದನೆ; ಬೆಲೆ ಗಗನಕ್ಕೇರುತ್ತಿರುವ ಬೆನ್ನಲ್ಲೇ ರೋಚಕ ಸಂಶೋಧನೆ!

ಚಿನ್ನದ ಬೆಲೆ ನಿರಂತರವಾಗಿ ಗಗನಕ್ಕೇರುತ್ತಿರುವ ಪ್ರಸ್ತುತ ದಿನಗಳಲ್ಲಿ ವಿಜ್ಞಾನ ಲೋಕದಿಂದ ಅತ್ಯಂತ ಆಸಕ್ತಿಕರ ಸುದ್ದಿಯೊಂದು ಹೊರಬಿದ್ದಿದೆ. ಅದೇನೆಂದರೆ, ಈಗ ಪ್ರಯೋಗಾಲಯದಲ್ಲೂ (Lab) ಚಿನ್ನವನ್ನು ಯಶಸ್ವಿಯಾಗಿ ಉತ್ಪಾದಿಸಬಹುದು. ಅಮೆರಿಕದ ಸ್ಯಾನ್ ಫ್ರಾನ್ಸಿಸ್ಕೋ ಮೂಲದ ಮ್ಯಾರಥಾನ್ ಫ್ಯೂಷನ್ ಲ್ಯಾಬ್ (Marathon Fusion Lab) ಕಂಪನಿಯು ತಾನು ಪರಮಾಣು ಸಮ್ಮಿಳನ ತಂತ್ರಜ್ಞಾನವನ್ನು (Nuclear Fusion Technology) ಬಳಸಿಕೊಂಡು ಪಾದರಸವನ್ನು ಶುದ್ಧ ಚಿನ್ನವಾಗಿ ಪರಿವರ್ತಿಸಿರುವುದಾಗಿ ಹೇಳಿಕೊಂಡಿದೆ. ಈ ಕಂಪನಿಯ ಚಿನ್ನದ ಉತ್ಪಾದನಾ ದರವು 2025 ರಲ್ಲಿ ಐರೋಪ್ಯ ವೈಜ್ಞಾನಿಕ ಸಂಸ್ಥೆಯಾದ CERN ಸ್ಥಾಪಿಸಿದ್ದ ದಾಖಲೆಗಿಂತ ಬರೋಬ್ಬರಿ 10 ಪಟ್ಟು ಹೆಚ್ಚಾಗಿದೆ ಎನ್ನಲಾಗಿದೆ.

ಪ್ರಯೋಗಾಲಯದಲ್ಲಿ ಚಿನ್ನ ತಯಾರಿಸುವ ತಂತ್ರವೇನು?

ವಿಜ್ಞಾನಿಗಳು ಪಾದರಸವನ್ನು ಚಿನ್ನವಾಗಿ ಪರಿವರ್ತಿಸಲು ‘ಪರಮಾಣು ಪರಿವರ್ತನೆ’ (Nuclear Transmutation) ಎಂಬ ಸಂಕೀರ್ಣ ಪ್ರಕ್ರಿಯೆಯನ್ನು ಬಳಸಿಕೊಂಡಿದ್ದಾರೆ. ಈ ಪ್ರಕ್ರಿಯೆಯಲ್ಲಿ ಲೋಹದ ಪರಮಾಣುವಿನ ನ್ಯೂಕ್ಲಿಯಸ್‌ನಲ್ಲಿ ಬದಲಾವಣೆ ತರುವ ಮೂಲಕ, ಒಂದು ರಾಸಾಯನಿಕ ಅಂಶವನ್ನು ಮತ್ತೊಂದಾಗಿ ರೂಪಾಂತರಗೊಳಿಸಲಾಗುತ್ತದೆ. ಸಂಶೋಧಕರು ಪಾದರಸ-198 (Mercury-198) ಅನ್ನು ಸಮ್ಮಿಳನ ಪ್ರಕ್ರಿಯೆಯ ಸಮಯದಲ್ಲಿ ಉತ್ಪತ್ತಿಯಾಗುವ ಹೆಚ್ಚಿನ ಶಕ್ತಿಯ ನ್ಯೂಟ್ರಾನ್‌ಗಳಿಗೆ ಒಡ್ಡಿದರು. ಇದರಿಂದಾಗಿ ಪಾದರಸ-197 ರಚನೆಯಾಯಿತು. ಇದು ವಿಕಿರಣಶೀಲ ಐಸೊಟೋಪ್ ಆಗಿದ್ದು, ಅಂತಿಮವಾಗಿ ಸ್ಥಿರವಾದ ಚಿನ್ನ-197 (Gold-197) ಆಗಿ ರೂಪಾಂತರಗೊಳ್ಳುತ್ತದೆ.

ಇದು ಸಾಮಾನ್ಯ ಪ್ರಕ್ರಿಯೆಯೇ?

ಖಂಡಿತ ಇಲ್ಲ. ಇದು ಮನೆಯಲ್ಲಿ ಅಥವಾ ಸಣ್ಣ ಪ್ರಯೋಗಾಲಯದಲ್ಲಿ ಸರಳವಾಗಿ ಮಾಡಬಹುದಾದ ಸಾಮಾನ್ಯ ರಾಸಾಯನಿಕ ಪ್ರಕ್ರಿಯೆಯಲ್ಲ. ಯುರೋಪಿಯನ್ ಆರ್ಗನೈಸೇಶನ್ ಫಾರ್ ನ್ಯೂಕ್ಲಿಯರ್ ರಿಸರ್ಚ್ (CERN) ಹಿಂದೆ ನಡೆಸಿದ ಪ್ರಯೋಗಗಳಲ್ಲಿ ಅತ್ಯಂತ ಕನಿಷ್ಠ ಪ್ರಮಾಣದ ಚಿನ್ನವನ್ನು ಉತ್ಪಾದಿಸಲಾಗಿತ್ತು. ಪ್ರಸ್ತುತ ಮ್ಯಾರಥಾನ್ ಫ್ಯೂಷನ್ ಕಂಪನಿಯು CERN ಗಿಂತ 10 ಪಟ್ಟು ಹೆಚ್ಚು ಉತ್ಪಾದನಾ ದರ ಹೊಂದಿದೆ ಎಂದು ಹೇಳಿಕೊಂಡಿದೆಯಾದರೂ, ತಾನು ತಯಾರಿಸಿದ ಚಿನ್ನದ ಒಟ್ಟು ಪ್ರಮಾಣ ಮತ್ತು ಅದರ ಶುದ್ಧತೆಯ ಕುರಿತು ಯಾವುದೇ ಮಾಹಿತಿಯನ್ನು ಅಧಿಕೃತವಾಗಿ ಬಹಿರಂಗಪಡಿಸಿಲ್ಲ.

ಪ್ರಯೋಗಾಲಯದ ಚಿನ್ನ ನೈಸರ್ಗಿಕ ಚಿನ್ನದಷ್ಟೇ ಶುದ್ಧವೇ?

ರಾಸಾಯನಿಕ ಹೋಲಿಕೆ:

ನೈಸರ್ಗಿಕ ಚಿನ್ನದಲ್ಲಿ Au-197 ಎಂಬ ಒಂದೇ ಒಂದು ಸ್ಥಿರ ಐಸೊಟೋಪ್ ಇರುತ್ತದೆ. ಪ್ರಯೋಗಾಲಯದಲ್ಲಿ ಯಶಸ್ವಿಯಾಗಿ ಈ ಐಸೊಟೋಪ್ ಅನ್ನು ಉತ್ಪಾದಿಸಿದರೆ, ಅದು ಗಣಿಗಾರಿಕೆ ಮಾಡಿದ ಚಿನ್ನದಂತೆಯೇ ರಾಸಾಯನಿಕವಾಗಿ ಒಂದೇ ರೀತಿಯಾಗಿರುತ್ತದೆ.

ವಿಕಿರಣಶೀಲತೆಯ ಸವಾಲು:

ಹೆಚ್ಚಿನ ಪ್ರಯೋಗಗಳಲ್ಲಿ ಚಿನ್ನದ ಇತರ ಐಸೊಟೋಪ್‌ಗಳು (Au-190 ರಿಂದ Au-199) ಸಹ ಉತ್ಪತ್ತಿಯಾಗುತ್ತವೆ. ಬ್ರಿಸ್ಟಲ್ ವಿಶ್ವವಿದ್ಯಾಲಯದ ರಸಾಯನಶಾಸ್ತ್ರ ವಿಭಾಗದ ಪ್ರಕಾರ, ರಿಯಾಕ್ಟರ್‌ನಲ್ಲಿ ಉತ್ಪತ್ತಿಯಾಗುವ ಚಿನ್ನವು ಇತರ ರೇಡಿಯೊಐಸೋಟೋಪ್‌ಗಳಿಂದ ಕಲುಷಿತಗೊಳ್ಳುತ್ತದೆ. ಇಂತಹ ಚಿನ್ನವು ವಿಕಿರಣವನ್ನು (Radiation) ಹೊರಸೂಸುವುದರಿಂದ ಇದನ್ನು ಆಭರಣ ತಯಾರಿಕೆಗಾಗಲಿ ಅಥವಾ ಹೂಡಿಕೆಯ ಉದ್ದೇಶಕ್ಕಾಗಲಿ ಬಳಸಲು ಸಾಧ್ಯವಿಲ್ಲ. ಹೀಗಾಗಿ, ಪ್ರಯೋಗಾಲಯದ ಚಿನ್ನವು ವಿಕಿರಣಶೀಲ ಕಲ್ಮಶಗಳಿಂದ ಮುಕ್ತವಾಗಿದೆಯೇ ಎಂದು ದೃಢೀಕರಿಸುವುದು ದೊಡ್ಡ ಸವಾಲಾಗಿದೆ.

ಇದನ್ನೂ ಓದಿ: ಈ ವಾಚ್ ಬೆಲೆ ಬರೋಬ್ಬರಿ 4.25 ಕೋಟಿ ರೂ.! ಇದರೊಳಗಿದೆ ಶ್ರೀರಾಮ, ಹನುಮಂತನ ಸುಂದರ ಶಿಲ್ಪ

ಪ್ರಯೋಗಾಲಯದ ಚಿನ್ನ ಮಾರುಕಟ್ಟೆಯ ಪ್ರವೃತ್ತಿ ಬದಲಾಯಿಸುತ್ತದೆಯೇ?

ಪ್ರಸ್ತುತ ಪರಿಸ್ಥಿತಿಯಲ್ಲಿ ಇದು ಮಾರುಕಟ್ಟೆಯ ಮೇಲೆ ತಕ್ಷಣಕ್ಕೆ ಯಾವುದೇ ಪರಿಣಾಮ ಬೀರಲಾರದು. ಇದಕ್ಕೆ ಎರಡು ಪ್ರಮುಖ ಕಾರಣಗಳಿವೆ:

• ಅಧಿಕ ವೆಚ್ಚ: ಪ್ರಯೋಗಾಲಯದಲ್ಲಿ ಚಿನ್ನವನ್ನು ಸೃಷ್ಟಿಸುವ ಸಂಪೂರ್ಣ ಪ್ರಕ್ರಿಯೆಯು ಅತ್ಯಂತ ದುಬಾರಿಯಾಗಿದೆ. ಅಪಾರ ವೆಚ್ಚ ಮಾಡಿ ಸಣ್ಣ ಪ್ರಮಾಣದ ಚಿನ್ನ ಉತ್ಪಾದಿಸುವುದರಿಂದ ಮಾರುಕಟ್ಟೆ ಬೆಲೆಯಲ್ಲಿ ಯಾವುದೇ ವ್ಯತ್ಯಾಸವಾಗುವುದಿಲ್ಲ.
• ವಾಣಿಜ್ಯಿಕ ಉತ್ಪಾದನೆ: ಈ ತಂತ್ರಜ್ಞಾನ ಸಂಪೂರ್ಣ ಯಶಸ್ವಿಯಾಗಿ, ಬೃಹತ್ ಪ್ರಮಾಣದಲ್ಲಿ ಉತ್ಪಾದನೆ ಸಾಧ್ಯವಾಗಿ, ನೈಸರ್ಗಿಕ ಚಿನ್ನಕ್ಕಿಂತ ಕಡಿಮೆ ವೆಚ್ಚದಲ್ಲಿ ಸಿಗುವಂತಾದರೆ ಮಾತ್ರ ಮಾರುಕಟ್ಟೆಯಲ್ಲಿ ಬದಲಾವಣೆ ತರಲು ಸಾಧ್ಯ.

ಆದ್ದರಿಂದ, ಈ ಪ್ರಸ್ತುತ ಪ್ರಯೋಗದ ಆಧಾರದ ಮೇಲೆಯೇ ಚಿನ್ನದ ಬೆಲೆ ತಕ್ಷಣಕ್ಕೆ ಇಳಿಕೆಯಾಗುತ್ತದೆ ಅಥವಾ ಜನರ ಖರೀದಿ ಶಕ್ತಿ ಹೆಚ್ಚಾಗುತ್ತದೆ ಎಂದು ತೀರ್ಮಾನಿಸುವುದು ಧಾವಂತದ ನಿರ್ಧಾರವಾಗುತ್ತದೆ.

ಇನ್ನಷ್ಟು ವಾಣಿಜ್ಯ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ