Lakshadweep: ಲಕ್ಷದ್ವೀಪಕ್ಕೆ ಇದೇ ಮೊದಲ ಬಾರಿಗೆ ಸಬ್ಮರೀನ್ ಆಪ್ಟಿಕ್ ಫೈಬರ್ ಕೇಬಲ್ ಸಂಪರ್ಕ; ಪ್ರವಾಸೋದ್ಯಮಕ್ಕೆ ಸಿಗಲಿದೆ ಇನ್ನಷ್ಟು ಪುಷ್ಟಿ
KLI- SOFC Project For Lakshadweep: ಲಕ್ಷದ್ವೀಪಕ್ಕೆ ಇದೇ ಮೊದಲ ಬಾರಿಗೆ ಸಬ್ಮರೀನ್ ಆಪ್ಟಿಕ್ ಫೈಬರ್ ಕೇಬಲ್ ಅಳವಡಿಕೆಯಾಗಲಿದೆ. 10 ದಿನದಿಂದ ಹಿಂದೆ ಪಿಎಂ ಮೋದಿ ಈ ಯೋಜನೆಗೆ ಚಾಲನೆ ನೀಡಿದ್ದಾರೆ. ಅರೇಬಿಯಾ ಕಡಲಿನಲ್ಲಿರುವ ಲಕ್ಷದ್ವೀಪಗಳ ವಿವಿಧ ಪ್ರದೇಶಗಳ ಡಿಜಿಟಲ್ ಇನ್ಫ್ರಾಸ್ಟ್ರಕ್ಚರ್ಗೆ ಈ ಪ್ರಾಜೆಕ್ಟ್ ಪುಷ್ಟಿ ಕೊಡಲಿದೆ. ಸೆಟಿಲೈಟ್ ಇಂಟರ್ನೆಟ್ ಇರುವ ಲಕ್ಷದ್ವೀಪಕ್ಕೆ ಫೈಬರ್ ಇಂಟರ್ನೆಟ್ ಭಾಗ್ಯ ಸಿಗುತ್ತದೆ. ಇಂಟರ್ನೆಟ್ ವೇಗ ಹೆಚ್ಚುತ್ತದೆ.
ನವದೆಹಲಿ, ಜನವರಿ 14: ಹತ್ತು ದಿನಗಳ ಹಿಂದೆ ಪ್ರಧಾನಿ ನರೇಂದ್ರ ಮೋದಿ ಅವರ ಲಕ್ಷದ್ವೀಪಕ್ಕೆ (Lakshadweep) ಹೋಗಿ ಕೇವಲ ಫೋಟೋ ಶೂಟ್, ಜಲ ಚಟುವಟಿಕೆಗಳನ್ನು ಮಾತ್ರ ಮಾಡಲಿಲ್ಲ. ಸಾವಿರ ಕೋಟಿ ರೂಗೂ ಹೆಚ್ಚು ಮೌಲ್ಯದ ಕೆಲವಿಷ್ಟು ಯೋಜನೆಗಳನ್ನು ಆರಂಭಿಸಿದ್ದರು. ಅದರಲ್ಲಿ ಆ ದ್ವೀಪಗಳ ನಾಡಿಗೆ ಆಪ್ಟಿಕಲ್ ಫೈಬರ್ ಕೇಬಲ್ ಅಳವಡಿಸುವ ಯೋಜನೆಯೂ ಒಂದು. ಕೊಚ್ಚಿ ಲಕ್ಷದ್ವೀಪ್ ಐಲ್ಯಾಂಡ್ಸ್ ಸಬ್ಮರೀನ್ ಆಪ್ಟಿಕಲ್ ಫೈಬರ್ ಕನೆಕ್ಷನ್ (KLI- SOFC Project) ಪ್ರಾಜೆಕ್ಟ್ಗೆ ನರೇಂದ್ರ ಮೋದಿ ಜನವರಿ 3ರಂದು ಚಾಲನೆ ನೀಡಿದ್ದಾರೆ.
ಆಪ್ಟಿಕಲ್ ಫೈಬರ್ ಕೇಬಲ್ನಿಂದ ಲಕ್ಷದ್ವೀಪಕ್ಕೆ ಪುಷ್ಟಿ ಸಿಗುವ ಸಾಧ್ಯತೆ…
ಲಕ್ಷದ್ವೀಪಕ್ಕೆ ಇದೇ ಮೊದಲ ಬಾರಿಗೆ ಸಬ್ಮರೀನ್ ಆಪ್ಟಿಕ್ ಫೈಬರ್ ಕೇಬಲ್ ಅಳವಡಿಸಲಾಗುತ್ತಿದೆ. ಇದರಿಂದ ಲಕ್ಷದ್ವೀಪದ ವಿವಿಧ ಪ್ರದೇಶಗಳಲ್ಲಿ ಇಂಟರ್ನೆಟ್ ಸಂಪರ್ಕ ವೇಗ ಹೆಚ್ಚುತ್ತದೆ. ಸದ್ಯ ಸೆಟಿಲೈಟ್ ಮೂಲಕ ಮಾತ್ರ ಇಲ್ಲಿ ಇಂಟರ್ನೆಟ್ ಸಂಪರ್ಕ ಇರುವುದು. ಇದರ ಬ್ಯಾಂಡ್ವಿಡ್ತ್ ಬಹಳ ಸೀಮಿತವಾದುದು. ಫೈಬರ್ ಕೇಬಲ್ ಮೂಲಕ ಸಿಗುವ ಇಂಟರ್ನೆಟ್ ಬಹಳ ವಿಸ್ತೃತವಾಗಿರುತ್ತದೆ. ಇದರಿಂದ ಲಕ್ಷದ್ವೀಪದಲ್ಲಿ ಡಿಜಿಟಲ್ ಇನ್ಫ್ರಾಸ್ಟ್ರಕ್ಚರ್ಗೆ ಭರ್ಜರಿ ಪುಷ್ಟಿ ಸಿಗುವ ನಿರೀಕ್ಷೆ ಇದೆ.
ಇದನ್ನೂ ಓದಿ: Forex: ಭಾರತದ ವಿದೇಶೀ ವಿನಿಮಯ ಮೀಸಲು ನಿಧಿ ಕಳೆದ ಐದು ವಾರದಲ್ಲಿ ಮೊದಲ ಬಾರಿಗೆ ಇಳಿಕೆ
ಸರ್ಕಾರಿ ಸೇವೆಗಳು, ವೈದ್ಯಕೀಯ ಚಿಕಿತ್ಸೆ, ಶಿಕ್ಷಣ, ಡಿಜಿಟಲ್ ಬ್ಯಾಂಕಿಂಗ್ ಇತ್ಯಾದಿ ಸೌಲಭ್ಯಗಳು ಹೆಚ್ಚುತ್ತೆ. ಲಾಜಿಸ್ಟಿಕ್ಸ್ ಹಬ್ ಅಗಿ ಲಕ್ಷದ್ವೀಪವನ್ನು ಅಭಿವೃದ್ದಿಪಡಿಸಲು ಇದು ಸಹಕಾರಿ ಆಗುತ್ತದೆ ಎಂದು ಪ್ರಧಾನಿ ನರೇಂದ್ರ ಮೋದಿ ಜನವರಿ 3ರಂದು ಹೇಳಿದ್ದರು.
ಕೊಚ್ಚಿ ಲಕ್ಷದ್ವೀಪ್ ಐಲ್ಯಾಂಡ್ಸ್ ಸಬ್ಮರೀನ್ ಕೇಬಲ್ ಯೋಜನೆಯ ಅಡಿಯಲ್ಲಿ ಕೊಚ್ಚಿಯಿಂದ ಲಕ್ಷದ್ವೀಪದ 11 ದ್ವೀಪಗಳಿಗೆ ಫೈಬರ್ ಕೇಬಲ್ ಸಂಪರ್ಕ ಮಾಡಲಾಗುತ್ತದೆ. ಕರವಟ್ಟಿ, ಅಗಟ್ಟಿ, ಕಡಮತ್, ಚೆಟ್ಲೆಟ್, ಕಲ್ಪೇನಿ, ಮಿನಿಕಾಯ್, ಆಂಡ್ರೋದ್, ಕಿಲ್ಟನ್, ಬಂಗಾರಮ್ ಮತ್ತು ಬಿಟ್ರಾಗೆ ಕೇಬಲ್ ಕನೆಕ್ಟಿವಿಟಿ ಸಿಗುತ್ತದೆ.
ದೂರಸಂಪರ್ಕ ಇಲಾಖೆಗೆ ಸೇರಿದ ಯೂನಿವರ್ಸಲ್ ಸರ್ವಿಸಸ್ ಒಬ್ಲಿಗೇಶನ್ ಫಂಡ್ (ಯುಎಸ್ಒಎಫ್) ಈ ಪ್ರಾಜೆಕ್ಟ್ಗೆ ಫಂಡಿಂಗ್ ಮಾಡುತ್ತಿದೆ. ಸಾಗರ ಮಾರ್ಗ ಸರ್ವೇಕ್ಷಣೆ, ಸಬ್ಮರೀನ್ ಕೇಬಲ್ ಅಳವಡಿಕೆ, ಸಿಎಲ್ಎಸ್ ಸ್ಟೆಷನ್ಗಳ ನಿರ್ಮಾಣ, ಸ್ಥಾಪನೆ, ಟೆಸ್ಟಿಂಗ್ ಚಟುವಟಿಕೆಗಳನ್ನು ಕೈಗೊಳ್ಳಲಾಗುತ್ತದೆ.
ಇದನ್ನೂ ಓದಿ: Inflation: ರೀಟೇಲ್ ಹಣದುಬ್ಬರ ಡಿಸೆಂಬರ್ನಲ್ಲಿ ಶೇ. 5.69; ಸರ್ಕಾರದಿಂದ ಅಧಿಕೃತ ಮಾಹಿತಿ ಬಿಡುಗಡೆ
2020ರಲ್ಲಿ ಇದೇ ರೀತಿ ಚೆನ್ನೈ ಮತ್ತು ಅಂಡಮಾನ್ ನಿಕೋಬಾರ್ ದ್ವೀಪಗಳ ಮಧ್ಯೆ ಆಪ್ಟಿಕಲ್ ಸಬ್ಮರೀನ್ ಕೇಬಲ್ ಸಿಸ್ಟಂ ಅನ್ನು ಅಳವಡಿಸಲಾಗಿತ್ತು. ಎನ್ಇಸಿ ಕಾರ್ಪೊರೇಶನ್ ಸಂಸ್ಥೆ ಆ ಕಾರ್ಯವನ್ನು ಯಶಸ್ವಿಯಾಗಿ ಮಾಡಿತ್ತು. ಈಗ ಲಕ್ಷದ್ವೀಪಕ್ಕೂ ಕೇಬಲ್ ಅಳವಡಿಕೆ ಕಾರ್ಯವನ್ನು ಎನ್ಇಸಿಯೇ ಮಾಡುತ್ತಿದೆ.
ಇನ್ನಷ್ಟು ವಾಣಿಜ್ಯ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ
ಬಿಸಿನೆಸ್ ವೆಬ್ ಸ್ಟೋರಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ