ಗೃಹಿಣಿಯರ ಗಮನಕ್ಕೆ: ನ. 1 ರಿಂದ ಎಲ್‌ಪಿಜಿ ಗ್ಯಾಸ್ ನಿಯಮಗಳಲ್ಲಿ ಬಿಗ್ ಚೇಂಜ್; ಈ ಕೆಲಸ ಮಾಡದಿದ್ದರೆ ಬಂದ್ ಆಗಲಿದೆ ಗ್ಯಾಸ್ ಸಬ್ಸಿಡಿ
ನವೆಂಬರ್ 1 ರಿಂದ LPG ಸಿಲಿಂಡರ್ ವಿತರಣೆ, ಬೆಲೆ ಹಾಗೂ ನಿಯಮಗಳಲ್ಲಿ ಪ್ರಮುಖ ಬದಲಾವಣೆಗಳು ಬರಲಿವೆ. e-KYC, OTP ಆಧಾರಿತ ವಿತರಣೆ ಕಡ್ಡಾಯವಾಗಿದ್ದು, ಸಿಲಿಂಡರ್ ಬುಕಿಂಗ್ ನಡುವೆ 15 ದಿನಗಳ ಅಂತರ ನಿಯಮ ಮತ್ತಷ್ಟು ಬಿಗಿಯಾಗಲಿದೆ. ಇದರ ನಡುವೆಯೇ, ಹೆಚ್ಚಿದ ಕೆಲಸದ ಒತ್ತಡ ಮತ್ತು ಕಡಿಮೆ ಕಮಿಷನ್‌ಗಾಗಿ ಗ್ಯಾಸ್ ವಿತರಕರು ಪ್ರತಿಭಟನೆಗೆ ಮುಂದಾಗಿದ್ದಾರೆ. ಈ ಹೊಸ ಬೆಳವಣಿಗೆಗಳು ಗ್ರಾಹಕರ ಮೇಲೆ ಪರಿಣಾಮ ಬೀರಲಿವೆ.
ಬೆಂಗಳೂರು, ಅ.28: ಮುಂದಿನ ತಿಂಗಳು ಅಂದರೆ ನವೆಂಬರ್ 1 ರಿಂದ ಗೃಹಬಳಕೆ ಹಾಗೂ ವಾಣಿಜ್ಯ ಬಳಕೆಯ ಎಲ್‌ಪಿಜಿ ಸಿಲಿಂಡರ್ ಪೂರೈಕೆ, ಬೆಲೆ ಪರಿಷ್ಕರಣೆ ಮತ್ತು ವಿತರಣಾ ವ್ಯವಸ್ಥೆಯಲ್ಲಿ ಪ್ರಮುಖ ಬದಲಾವಣೆಗಳು ಅನ್ವಯವಾಗಲಿದ್ದು, ಇಂಡೇನ್ (Indane), ಹೆಚ್‌ಪಿ ಗ್ಯಾಸ್ (HP Gas) ಹಾಗೂ ಭಾರತ್ ಗ್ಯಾಸ್ (Bharatgas) ಗ್ರಾಹಕರು ಈ ಹೊಸ ಬೆಳವಣಿಗೆಗಳ ಮೇಲೆ ಕಣ್ಣಿಟ್ಟಿದ್ದಾರೆ. ಮಾಸಿಕ ದರ ಪರಿಷ್ಕರಣೆಯ ಜೊತೆಗೆ, ಆಧಾರ್ ಆಧಾರಿತ ದೃಢೀಕರಣ (e-KYC), ಸಿಲಿಂಡರ್ ಬುಕಿಂಗ್ ನಡುವಿನ ಕಾಲಾವಕಾಶ, ಡೆಲಿವರಿ ದೃಢೀಕರಣ (OTP) ಹಾಗೂ ಪೈಪ್ಡ್ ನ್ಯಾಚುರಲ್ ಗ್ಯಾಸ್ (PNG) ಸಂಪರ್ಕಕ್ಕೆ ಬದಲಾಗುವ ಪ್ರಕ್ರಿಯೆಗಳು ನವೆಂಬರ್ ತಿಂಗಳಿನಿಂದ ಮತ್ತಷ್ಟು ಬಿಗಿಗೊಳ್ಳಲಿವೆ.
ಒಂದೆಡೆ ಹೊಸ ನಿಯಮಗಳ ಜಾರಿ ಜಾರಿಯಲ್ಲಿದ್ದರೆ, ಇನ್ನೊಂದೆಡೆ ದೇಶಾದ್ಯಂತ ಇರುವ ಎಲ್‌ಪಿಜಿ ಸಿಲಿಂಡರ್ ವಿತರಕರು ತೈಲ ಮಾರುಕಟ್ಟೆ ಕಂಪನಿಗಳ ವಿರುದ್ಧ ಪ್ರತಿಭಟನೆಗೆ ಮುಂದಾಗಿದ್ದಾರೆ. ಈ ವರ್ಷದ ಫೆಬ್ರವರಿ ಕೊನೆಯಲ್ಲಿ ಆರಂಭವಾದ ಯುಎಸ್-ಇರಾನ್ ಸಂಘರ್ಷದ ನಂತರ ಎಲ್‌ಪಿಜಿ ಸೇವೆಯಲ್ಲಿ ಹಲವು ಹೊಸ ನಿಯಮಗಳನ್ನು ಜಾರಿಗೆ ತರಲಾಗಿದೆ. ಇದರಿಂದಾಗಿ ತಮಗೆ ಕೆಲಸದ ಒತ್ತಡ ಹೆಚ್ಚಾಗಿದ್ದು, ಸಿಲಿಂಡರ್ ವಿತರಣಾ ಕಮಿಷನ್ ಅನ್ನು ತಕ್ಷಣವೇ ಹೆಚ್ಚಿಸಬೇಕೆಂದು ವಿತರಕರ ಒಕ್ಕೂಟಗಳು ಪಟ್ಟು ಹಿಡಿದಿವೆ.
ಅಕ್ಟೋಬರ್ 26, 2026 ರಂದು ದೆಹಲಿಯ ಸಿಬಿಡಿ ಮೈದಾನದಲ್ಲಿ ಧರಣಿ ನಡೆಸಲು ಯೋಜಿಸಿದ್ದ ಗ್ಯಾಸ್ ವಿತರಕರ ಪ್ರತಿಭಟನಾ ಮನವಿಯನ್ನು ದೆಹಲಿ ಪೊಲೀಸರು ತಿರಸ್ಕರಿಸಿದ್ದಾರೆ. ಜಂತರ್ ಮಂತರ್‌ನಲ್ಲಿ ಪ್ರತಿಭಟನೆಗೆ ನಿಷೇಧವಿದ್ದ ಹಿನ್ನೆಲೆಯಲ್ಲಿ ಸಿಬಿಡಿ ಗ್ರೌಂಡ್‌ನಲ್ಲಿ ಬೃಹತ್ ಸಮಾವೇಶಕ್ಕೆ ಕರೆ ನೀಡಲಾಗಿತ್ತು. ತಮ್ಮ ಬೇಡಿಕೆಗಳನ್ನು ಈಡೇರಿಸದಿದ್ದರೆ ಅನಿರ್ದಿಷ್ಟಾವಧಿ ಮುಷ್ಕರ ನಡೆಸುವುದಾಗಿ ವಿತರಕರ ಒಕ್ಕೂಟಗಳು ಹೆದರಿಸಿವೆ. ಆದರೆ, ಕೆಲವು ಪ್ರಮುಖ ವಿತರಕ ಮಹಾಸಂಸ್ಥೆಗಳು ಮುಷ್ಕರದಿಂದ ಹಿಂದೆ ಸರಿದು ನೇರವಾಗಿ ತೈಲ ಸಚಿವಾಲಯ ಹಾಗೂ ಒಎಂಸಿಗಳ ಜೊತೆ ಮಾತುಕತೆ ನಡೆಸಿ ಸಮಸ್ಯೆ ಬಗೆಹರಿಸಿಕೊಳ್ಳಲು ಮುಂದಾಗಿವೆ.
ಇದನ್ನೂ ಓದಿ: ಟೋಲ್ ಪ್ಲಾಜಾ ಸಮೀಪದ ನಿವಾಸಿಗಳ ಗಮನಕ್ಕೆ: ಬಿಗ್ ರಿಲೀಫ್‌ ನೀಡಿದ ಕೇಂದ್ರ ಸರ್ಕಾರ; ನ.1ರಿಂದ ಬರಲಿದೆ ಹೊಸ ನಿಯಮ
ನವೆಂಬರ್ 1 ರಿಂದ ಗ್ರಾಹಕರು ಗಮನಿಸಬೇಕಾದ ಪ್ರಮುಖ ನಿಯಮಗಳು:
ಆಧಾರ್ ಆಧರಿತ ದೃಢೀಕರಣ (e-KYC):
ಅಕ್ರಮ ಸಿಲಿಂಡರ್ ತಡೆಗಟ್ಟಲು ಇ-ಕೆವೈಸಿ (e-KYC) ಪ್ರಕ್ರಿಯೆಯನ್ನು ಕಡ್ಡಾಯಗೊಳಿಸಲಾಗುತ್ತಿದ್ದು, ಗ್ರಾಹಕರು ತಮ್ಮ ಅಡುಗೆ ಅನಿಲ ಸಂಪರ್ಕಕ್ಕೆ ಆಧಾರ್ ಸಂಖ್ಯೆ ಜೋಡಿಸುವುದು ಅತ್ಯಗತ್ಯವಾಗಿದೆ.
ಸಿಲಿಂಡರ್ ರಿಫಿಲ್ ಸಮಯದ ಅಂತರ:
ಒಂದು ಸಿಲಿಂಡರ್ ಬುಕ್ ಮಾಡಿದ ನಂತರ ಮುಂದಿನ ಸಿಲಿಂಡರ್ ಬುಕಿಂಗ್‌ಗೆ ಕನಿಷ್ಠ 15 ದಿನಗಳ ಕಾಲಾವಕಾಶದ ನಿಯಮವನ್ನು ಮತ್ತಷ್ಟು ಕಟ್ಟುನಿಟ್ಟಾಗಿ ಜಾರಿಗೆ ತರಲಾಗುತ್ತಿದೆ.
ಡೆಲಿವರಿ ಅಥೆಂಟಿಕೇಶನ್ ಕೋಡ್ (DAC/OTP):
ಸಿಲಿಂಡರ್ ಮನೆಗೆ ತಲುಪಿಸುವ ವೇಳೆ ಗ್ರಾಹಕರ ಮೊಬೈಲ್‌ಗೆ ಬರುವ ಒಟಿಪಿ (OTP) ನೀಡಿದರೆ ಮಾತ್ರ ಸಿಲಿಂಡರ್ ಹಸ್ತಾಂತರಿಸುವ ಪ್ರಕ್ರಿಯೆ ಮುಂದುವರಿಯಲಿದೆ.
ಪಿಎನ್‌ಜಿ (PNG)ಗೆ ಬದಲಾವಣೆ:
ನಗರ ಪ್ರದೇಶಗಳಲ್ಲಿ ಎಲ್‌ಪಿಜಿ ಸಿಲಿಂಡರ್‌ಗಳಿಂದ ನೇರ ಪೈಪ್ ಗ್ಯಾಸ್ (PNG) ಸಂಪರ್ಕಕ್ಕೆ ಗ್ರಾಹಕರನ್ನು ಉತ್ತೇಜಿಸುವ ಕಾರ್ಯಕ್ಷೇತ್ರ ವಿಸ್ತರಣೆಯಾಗಲಿದೆ.
ವಾಣಿಜ್ಯ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ