ವಿಶ್ವದಾದ್ಯಂತ 74ಕ್ಕೂ ಹೆಚ್ಚು ದೇಶಗಳಲ್ಲಿ ಸ್ಥಗಿತಗೊಂಡ ಮೈಕ್ರೋಸಾಫ್ಟ್ 365 ಸೇವೆಗಳು: ತಾಂತ್ರಿಕ ದೋಷಕ್ಕೆ ಕಾರಣ ಇತ್ಯಾದಿ ವಿವ

ನವದೆಹಲಿ, ನವೆಂಬರ್ 13: ವಿಶ್ವಾದ್ಯಂತ ಮೈಕ್ರೋಸಾಫ್ಟ್ 365 ಸೇವೆಗಳಲ್ಲಿ ಹಠಾತ್ ತಾಂತ್ರಿಕ ದೋಷ ಉಂಟಾಗಿದ್ದು, ಭಾರತ ಸೇರಿದಂತೆ 74ಕ್ಕೂ ಹೆಚ್ಚು ದೇಶಗಳಲ್ಲಿ ಬಳಕೆದಾರರು ಬಾಧಿತರಾಗಿದ್ದಾರೆ. ಮೈಕ್ರೋಸಾಫ್ಟ್ 365 ಆಫೀಸ್ ಸ್ಯೂಟ್​ನ ಔಟ್ಲುಕ್ (Outlook), ಟೀಮ್ಸ್ (Teams) ಮತ್ತು ವರ್ಡ್/ಎಕ್ಸೆಲ್ ಸೇರಿದಂತೆ ಪ್ರಮುಖ ಕ್ಲೌಡ್ ಆಧಾರಿತ ಅಪ್ಲಿಕೇಶನ್‌ಗಳನ್ನು ಬಳಸುವಾಗ ಬಳಕೆದಾರರು ತೊಂದರೆ ಅನುಭವಿಸಿದ್ದಾರೆ.

ಮೈಕ್ರೋಸಾಫ್ಟ್ ಸ್ಥಗಿತವು ಗುರುವಾರ ಸಂಜೆ 6 ಗಂಟೆಗೆ (ಜಿಎಂಟಿ ಸಮಯ) ಆರಂಭವಾಗಿದ್ದು. ಭಾರತೀಯ ಕಾಲಮಾನದಲ್ಲಿ ಗುರುವಾರ ರಾತ್ರಿ 11:30ಕ್ಕೆ ಮೈಕ್ರೋಸಾಫ್ಟ್ ಔಟೇಜ್ ಶುರುವಾಗಿದೆ. 22 ಗಂಟೆಗಳಾದರೂ ಮೈಕ್ರೋಸಾಫ್ಟ್​ಗೆ ಈ ತಾಂತ್ರಿಕ ದೋಷಗಳನ್ನು ಸರಿಪಡಿಸಲು ಸಾಧ್ಯವಾಗಿಲ್ಲ. ಕೆಲ ವರದಿಗಳ ಪ್ರಕಾರ, ಮೈಕ್ರೋಸಾಫ್ಟ್ ಈ ಸಮಸ್ಯೆ ಸರಿಪಡಿಸಲು 48 ಗಂಟೆ ಕಾಲಾವಕಾಶ ಕೋರಿದೆ ಎನ್ನಲಾಗಿದೆ.

ಇದನ್ನೂ ಓದಿ: ಎನ್​ವಿಡಿಯಾ ಸಿಇಒ ಸ್ಥಾನಕ್ಕೆ ಹಲವರ ಹೆಸರು ಪರಿಗಣನೆಯಲ್ಲಿ; ಭಾರತ ಮೂಲದ ಮೂವರ ಹೆಸರೂ ಪಟ್ಟಿಯಲ್ಲಿ

ಮೈಕ್ರೋಸಾಫ್ಟ್ 365 ಸಮಸ್ಯೆಗೆ ಕಾರಣವೇನು?

ಸರ್ವರ್​ನಲ್ಲಿ ಉಂಟಾದ ಏರಿಳಿತ ಮತ್ತು ನೆಟ್ವರ್ಕ್ ಸಮಸ್ಯೆಯು ಮೈಕ್ರೋಸಾಫ್ಟ್ 365 ಆಫೀಸ್ ಸ್ಯೂಟ್​ನ ಕಾರ್ಯನಿರ್ವಹಣೆಯ ಮೇಲೆ ಪರಿಣಾಮ ಬೀರಿದೆ ಎಂಬುದು ಪ್ರಾಥಮಿಕ ವರದಿಗಳಿಂದ ತಿಳಿದುಬಂದಿದೆ. ಒಂದು ಕಾನ್ಫಿಗರೇಶನ್ ಅಪ್​ಡೇಟ್​ನಿಂದಾಗಿ ಈ ವ್ಯತ್ಯಯ ಆಗಿರಬಹುದು ಎನ್ನಲಾಗಿದೆ.

ಯಾವುದೇ ಹ್ಯಾಕಿಂಗ್, ಅಥವಾ ವೈರಸ್ ಸ್ಥಾಪನೆಯು ಈ ಸಮಸ್ಯೆ ಹಿಂದೆ ಇಲ್ಲ ಎಂಬುದನ್ನು ಸ್ಪಷ್ಟಪಡಿಸಲಾಗಿದೆ.

ಮೈಕ್ರೋಸಾಫ್ಟ್ ಸಂಸ್ಥೆಯು ತಕ್ಷಣವೇ ಕಾರ್ಯಪ್ರವೃತ್ತರಾಗಿ ತಾಂತ್ರಿಕ ದೋಷವನ್ನು ಸರಿಪಡಿಸುವ ಕೆಲಸದಲ್ಲಿ ನಿರತರಾಗಿದ್ದು, ಹಂತ ಹಂತವಾಗಿ ಸೇವೆಗಳನ್ನು ಮರುಸ್ಥಾಪಿಸಲಾಗುತ್ತಿದೆ ಎಂದು ಕಂಪನಿ ತಿಳಿಸಿದೆ. ಟೀಮ್ಸ್ ಮೀಟಿಂಗ್ಸ್, ಚಾಟ್ಸ್ ಸರ್ವಿಸ್​ಗಳು ಸರಿಗೊಂಡಿವೆ. ಔಟ್​ಲುಕ್ ಇಮೇಲ್ ಸರ್ವಿಸ್​ನ ಸಮಸ್ಯೆ ಉಳಿದುಕೊಂಡಿದೆ ಎಂದು ಹೇಳಲಾಗುತ್ತಿದೆ.

ಇದನ್ನೂ ಓದಿ: ಟಾಟಾ ಗ್ರೂಪ್​ನ ಆರು ಕಂಪನಿಗಳ ನಾಯಕತ್ವ ತ್ಯಜಿಸಿದ ನೋಯೆಲ್; ಗ್ರೂಪ್​ನಲ್ಲಿ ಅವರ ಹಿಡಿತಕ್ಕೇನು ಆಗಿಲ್ಲ ಧಕ್ಕೆ

ಸರ್ಕಾರಿ ಚಟುವಟಿಕೆಗಳ ಮೇಲೂ ಪರಿಣಾಮ

ಮೈಕ್ರೋಸಾಫ್ಟ್ 365 ಸ್ಯೂಟ್ ಹಾಕಿಸಿಕೊಂಡಿರುವ ಪ್ರತಿಯೊಬ್ಬರೂ ಕೂಡ ಬಾಧಿತರಾಗಿದ್ದಾರೆ. ಆಸ್ಟ್ರೇಲಿಯಾ, ಬ್ರಿಟನ್ ಮೊದಲಾದ ಹಲವು ದೇಶಗಳ ಸರಕಾರಿ ಕಚೇರಿಗಳು, ಶಾಲಾ ಕಾಲೇಜುಗಳು ಮೊದಲಾದವು ಈ ಆಫೀಸ್ ಸ್ಯೂಟ್ ಹೊಂದಿವೆ. ಇಮೇಲ್ ಸೇರಿದಂತೆ ಸಂವಹನ ಸೇವೆಗಳು ಸ್ಥಗಿತಗೊಂಡು ಸಮಸ್ಯೆಯಾಗಿದೆ.

ಭಾರತದ ಇಂಡಿಗೋ, ಆಕಾಶ ಏರ್​ಲೈನ್ಸ್ ಸಂಸ್ಥೆಗಳ ಇಮೇಲ್ ಸಪೋರ್ಟ್ ಸರ್ವಿಸ್​ಗಳಿಗೆ ತೊಂದರೆಯಾಗಿದೆ.

ಇನ್ನಷ್ಟು ವಾಣಿಜ್ಯ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ