IPO 2022: ಮೂರು ಐಪಿಒಗಳು ಸಾರ್ವಜನಿಕರ ಎದುರು ಬರಲಿದೆ; ಸೆಬಿ ಹಸಿರು ನಿಶಾನೆ ಯಾವ್ಯಾವುದಕ್ಕೆ ಮಾಹಿತಿ ಇಲ್ಲಿದೆ

ಆರಂಭಿಕ ಸಾರ್ವಜನಿಕ ಕೊಡುಗೆ (IPO) ವಿಚಾರಕ್ಕೆ ಬಂದಲ್ಲಿ 2021ನೇ ಇಸವಿಯು ಮಹತ್ವದ ವರ್ಷವಾಗಿದೆ. ಆದರೆ 2022ನೇ ಇಸವಿಯು ಅಷ್ಟೇನೂ ಉತ್ತಮವಾಗಿ ಆರಂಭವಾಗಿಲ್ಲ. ಕಳೆದ ಕೆಲವು ವಾರಗಳಿಂದ ಭಾರತೀಯ ಷೇರು ಮಾರುಕಟ್ಟೆ ಇಳಿಕೆ ಹಾದಿಯಲ್ಲಿ ಸಾಗಿದೆ. ಭೌಗೋಳಿಕ ರಾಜಕೀಯ ಉದ್ವಿಗ್ನತೆ, ಅಮೆರಿಕದ ಫೆಡ್‌ನಿಂದ ಬಡ್ಡಿದರ ಹೆಚ್ಚಳದ ಸುಳಿವು, ಹೆಚ್ಚಿನ ಹಣದುಬ್ಬರ, ಪೂರೈಕೆ ಜಾಲದಲ್ಲಿನ ಅಡೆತಡೆ, ಲಿಕ್ವಿಡಿಟಿ ಬಿಕ್ಕಟ್ಟು ಮತ್ತು ಗರಿಷ್ಠ ಮೌಲ್ಯಮಾಪನಗಳಂಥ ಸವಾಲುಗಳನ್ನು ಹೂಡಿಕೆದಾರರು ಎದುರಿಸುತ್ತಿದ್ದಾರೆ. ಇದು ಪ್ರಾಥಮಿಕ ಮತ್ತು ಸೆಕೆಂಡರಿ ಮಾರುಕಟ್ಟೆಗಳ ಮೇಲೆ ಪ್ರತಿಕೂಲ ಪರಿಣಾಮ ಬೀರುತ್ತಿದೆ. ಮಾರುಕಟ್ಟೆಗಳು ಸ್ವಲ್ಪ ಸಮಯದವರೆಗೆ ಅಸ್ಥಿರವಾಗಿ ಇರಬಹುದು, ಸಾಲುಸಾಲಾಗಿ ಆಕರ್ಷಕವಾದ ಐಪಿಒಗಳ ಸರಣಿಯನ್ನು ಈಗಾಗಲೇ ಘೋಷಣೆ ಮಾಡಲಾಗಿದೆ.

ಮಾಧ್ಯಮ ವರದಿಗಳ ಪ್ರಕಾರ, 2022ರಲ್ಲಿ 35ರಿಂದ 40 ಕಂಪೆನಿಗಳು ಮಾರುಕಟ್ಟೆಗೆ ಪದಾರ್ಪಣೆ ಮಾಡಲು ಮುಂದಾಗಿವೆ. ಸರ್ಕಾರಿ ಸ್ವಾಮ್ಯದ ಜೀವ ವಿಮಾ ಕಂಪೆನಿಯ ಐಪಿಒ 15 ಲಕ್ಷ ಕೋಟಿ ರೂಪಾಯಿ ಮೌಲ್ಯದೊಂದಿಗೆ ಅತಿ ದೊಡ್ಡದಾಗಿದೆ. ಅಲ್ಲದೆ, ಭಾರತದ ಐಪಿಒ ಮಾರುಕಟ್ಟೆಯಲ್ಲಿನ ಬಲವಾದ ವೇಗವು ಮಾರುಕಟ್ಟೆ ನಿಯಂತ್ರಕದಿಂದ ಮೂರು ಐಪಿಒಗಳ ಅನುಮೋದನೆಯೊಂದಿಗೆ ಮುಂದುವರಿಯಲು ಸಿದ್ಧವಾಗಿದೆ. ಅವುಗಳ ಬಗ್ಗೆ ವಿವರ ಇಲ್ಲಿದೆ: ಎಪಿಐ ಹೋಲ್ಡಿಂಗ್ಸ್ – ಆನ್‌ಲೈನ್ ಫಾರ್ಮಸಿ ಫಾರ್ಮ್​ಈಸಿ – ವೆಲ್‌ನೆಸ್ ಫಾರೆವರ್ ಮೆಡಿಕೇರ್‌ನ ಮೂಲ ಕಂಪೆನಿ ಮತ್ತು ಸಿಎಂಆರ್ ಗ್ರೀನ್ ಟೆಕ್ನಾಲಜೀಸ್ ಅನುಮೋದನೆಯನ್ನು ಪಡೆದ ಸಂಸ್ಥೆಗಳಲ್ಲಿ ಸೇರಿವೆ. ಈ ಮೂರು ಐಪಿಒ ಕಂಪೆನಿಗಳ ಬಗ್ಗೆ ತಿಳಿದುಕೊಳ್ಳೋಣ.

1. ಎಪಿಐ ಹೋಲ್ಡಿಂಗ್ಸ್ (ಫಾರ್ಮ್ಈಸಿ)

ಐಪಿಒ ಮೂಲಕ 6250 ಕೋಟಿ ರೂಪಾಯಿ ಸಂಗ್ರಹಿಸಲು ಮಾರುಕಟ್ಟೆ ನಿಯಂತ್ರಕರಿಂದ ಅನುಮೋದನೆ ಪಡೆದಿರುವುದಾಗಿ ಇ-ಫಾರ್ಮಸಿ ಸಂಸ್ಥೆ ಫಾರ್ಮ್‌ಈಸಿಯ ಮಾತೃಸಂಸ್ಥೆಯಾದ ಎಪಿಐ ಹೋಲ್ಡಿಂಗ್ಸ್ ಸೋಮವಾರ ತಿಳಿಸಿದೆ. ಈ ಆಫರ್ ಈಕ್ವಿಟಿ ಷೇರುಗಳ ಪ್ರಾಥಮಿಕ ವಿತರಣೆಯಾಗಲಿದೆ ಮತ್ತು ಆಫರ್ ಫಾರ್ ಸೇಲ್ (OFS) ಹೊಂದಿಲ್ಲ. ಇದರರ್ಥ API ಹೋಲ್ಡಿಂಗ್ಸ್‌ನ ಅಸ್ತಿತ್ವದಲ್ಲಿರುವ ಷೇರುದಾರರು ತಮ್ಮ ಪಾಲನ್ನು ಮಾರಾಟ ಮಾಡುವುದಿಲ್ಲ. ಕಂಪೆನಿಯು ಐಪಿಒ ಆದಾಯದಿಂದ ಬರುವ 1930 ಕೋಟಿಯನ್ನು ಮರುಪಾವತಿ ಮಾಡಲು ಅಥವಾ ಸಾಲಗಳನ್ನು ಪೂರ್ವ-ಪಾವತಿಸಲು ಮತ್ತು 1260 ಕೋಟಿಯನ್ನು ಸಾವಯವ ಬೆಳವಣಿಗೆ ಉಪಕ್ರಮಗಳಿಗೆ ಧನಸಹಾಯ ಮಾಡಲು ಬಳಸುತ್ತದೆ. ಇದು ಸ್ವಾಧೀನಗಳು ಮತ್ತು ಇತರ ಕಾರ್ಯತಂತ್ರದ ಉಪಕ್ರಮಗಳ ಮೂಲಕ ಅಜೈವಿಕ ಬೆಳವಣಿಗೆಯ ಅವಕಾಶಗಳ ಮೇಲೆ 1500 ಕೋಟಿ ರೂಪಾಯಿಯನ್ನು ನಿಯೋಜಿಸುತ್ತದೆ.

ಫಾರ್ಮ್​ಈಸಿ ದೇಶದ ಅತಿದೊಡ್ಡ ಇ-ಫಾರ್ಮಸಿ ಸಂಸ್ಥೆಗಳಲ್ಲಿ ಒಂದಾಗಿದೆ. ಇದು ಇತ್ತೀಚೆಗೆ ಥೈರೋಕೇರ್ ಟೆಕ್ನಾಲಜೀಸ್‌ನಲ್ಲಿ ಹೆಚ್ಚಿನ ಪಾಲನ್ನು ಪಡೆದುಕೊಂಡಿದೆ. ಈ ಒಪ್ಪಂದವನ್ನು ಭಾರತದಲ್ಲಿ ಯುನಿಕಾರ್ನ್ ಸ್ಟಾರ್ಟ್‌ಅಪ್‌ನಿಂದ ಸಾರ್ವಜನಿಕವಾಗಿ ಲಿಸ್ಟ್ ಮಾಡಲಾದ ಸಂಸ್ಥೆಯ ಮೊದಲ ಸ್ವಾಧೀನ ಎಂದು ಪರಿಗಣಿಸಲಾಗಿದೆ. ಮಾರುಕಟ್ಟೆಯ ಏರಿಳಿತದ ಕಾರಣದಿಂದಾಗಿ ಫಾರ್ಮ್​ಈಸಿ ತನ್ನ ಐಪಿಒ ಅನ್ನು ಮುಂದೂಡಬಹುದು ಎಂಬ ಊಹಾಪೋಹಗಳ ಮಧ್ಯೆ ಅನುಮೋದನೆ ಬಂದಿದೆ. 2015ರಲ್ಲಿ ಧರ್ಮಿಲ್ ಶೇಠ್ ಮತ್ತು ಧವಲ್ ಶಾ ಸ್ಥಾಪಿಸಿದ ಫಾರ್ಮ್​ಈಸಿ, ದೇಶಾದ್ಯಂತ 16,000 ಪಿನ್ ಕೋಡ್‌ಗಳಲ್ಲಿ 60,000ಕ್ಕೂ ಹೆಚ್ಚು ಔಷಧಾಲಯಗಳು ಮತ್ತು 4,000 ವೈದ್ಯರನ್ನು ಜೋಡಣೆ ಮಾಡುವುದಾಗಿ ಹೇಳಿಕೊಂಡಿದೆ. 20 ಮಿಲಿಯನ್ ಗ್ರಾಹಕರಿಗೆ ಸೇವೆ ಸಲ್ಲಿಸಿದೆ ಎಂದು ಹೇಳಿಕೊಂಡಿದೆ. ಹಿಂದಿನ ವರ್ಷದಲ್ಲಿ 340 ಕೋಟಿ ನಷ್ಟದ ವಿರುದ್ಧ 2021ರ ಹಣಕಾಸು ವರ್ಷದಲ್ಲಿ 640 ಕೋಟಿ ನಿವ್ವಳ ನಷ್ಟವನ್ನು ವರದಿ ಮಾಡಿದೆ.

2. ವೆಲ್​ನೆಸ್ ಫಾರೆವರ್ ಮೆಡಿಕೇರ್

ವೆಲ್​ನೆಸ್ ಫಾರೆವರ್ ಮೆಡಿಕೇರ್ ಮತ್ತೊಂದು ಆರೋಗ್ಯ ಸಂಸ್ಥೆಯಾಗಿದ್ದು, ಅದರ ಐಪಿಒ ಕಾಗದಗಳನ್ನು ಮಾರುಕಟ್ಟೆ ನಿಯಂತ್ರಕರಿಂದ ಅಂಗೀಕರಿಸಲಾಗಿದೆ. ಅದಾರ್ ಪೂನಾವಾಲಾ ಬೆಂಬಲಿತ ಫಾರ್ಮಸಿ ಜಾಲವು 1500ರಿಂದ 1600 ಕೋಟಿ ರೂಪಾಯಿ ಸಂಗ್ರಹಿಸಲು ಯೋಜಿಸುತ್ತಿದೆ. ಇದು ಕಳೆದ ವರ್ಷ ಅಕ್ಟೋಬರ್ 1ರಂದು ನಿಯಂತ್ರಕರಿಗೆ ಕರಡು ಪತ್ರಗಳನ್ನು ಸಲ್ಲಿಸಿತು. ಕರಡು ರೆಡ್ ಹೆರಿಂಗ್ ಪ್ರಾಸ್ಪೆಕ್ಟಸ್ (ಡಿಆರ್‌ಎಚ್‌ಪಿ) ಪ್ರಕಾರ ಐಪಿಒ 400 ಕೋಟಿಗೆ ಒಟ್ಟುಗೂಡಿಸಲಾದ ಈಕ್ವಿಟಿ ಷೇರುಗಳ ಹೊಸ ಇಶ್ಯೂ ಮತ್ತು 16 ಮಿಲಿಯನ್ ಈಕ್ವಿಟಿ ಷೇರುಗಳವರೆಗೆ ಮಾರಾಟಕ್ಕೆ ಆಫರ್ (ಎಫ್‌ಎಸ್) ಒಳಗೊಂಡಿದೆ.

ಆಫರ್​ ಫಾರ್​ ಸೇಲ್​ನ ಭಾಗವಾಗಿ, 7.2 ಲಕ್ಷದವರೆಗಿನ ಈಕ್ವಿಟಿ ಷೇರುಗಳನ್ನು ಅಶ್ರಫ್ ಮೊಹಮ್ಮದ್ ಬಿರಾನ್, 7.2 ಲಕ್ಷ ಈಕ್ವಿಟಿ ಷೇರುಗಳನ್ನು ಗುಲ್ಶನ್ ಹರೇಶ್ ಭಹ್ತಿಯಾನಿ, 1.2 ಲಕ್ಷದವರೆಗಿನ ಈಕ್ವಿಟಿ ಷೇರುಗಳನ್ನು ಮೋಹನ್ ಗಣಪತ್ ಚವಾಣ್ ಮತ್ತು 14.5 ಲಕ್ಷದವರೆಗೆ ಇತರ ಈಕ್ವಿಟಿ ಷೇರುಗಳನ್ನು ಅಸ್ತಿತ್ವದಲ್ಲಿರುವ ಷೇರುದಾರರು ಆಫ್‌ಲೋಡ್ ಮಾಡುತ್ತಾರೆ. ಕಂಪೆನಿಯು ಹೊಸ ಔಟ್‌ಲೆಟ್‌ಗಳನ್ನು ಸ್ಥಾಪಿಸಲು, ಮರುಪಾವತಿ ಅಥವಾ ಪೂರ್ವಪಾವತಿಗಾಗಿ ಹೊಸ ಇಶ್ಯೂಯಿಂದ ರೂ. 702 ಮಿಲಿಯನ್ ನಿವ್ವಳ ಆದಾಯವನ್ನು ಬಳಸಲು ಪ್ರಸ್ತಾಪಿಸುತ್ತದೆ. ಸಾಮಾನ್ಯ ಕಾರ್ಪೊರೇಟ್ ಉದ್ದೇಶಗಳ ಜೊತೆಗೆ ಅದರ ವರ್ಕಿಂಗ್ ಕ್ಯಾಪಿಟಲ್ ಅಗತ್ಯಗಳಿಗೆ ನಿಧಿ 120 ಕೋಟಿಯನ್ನು ನೀಡುತ್ತದೆ.

ವೆಲ್‌ನೆಸ್ ಫಾರೆವರ್ ಮೆಡಿಕೇರ್ ಭಾರತದ ಮೂರನೇ ಅತಿದೊಡ್ಡ ರೀಟೇಲ್ ಫಾರ್ಮಸಿ ಮತ್ತು ಮಳಿಗೆಗಳ ಸಂಖ್ಯೆಯಿಂದ ಸ್ವಾಸ್ಥ್ಯ ಜಾಲವಾಗಿದ್ದು, ಆದಾಯದಲ್ಲಿ ಪಶ್ಚಿಮ ಭಾರತದಲ್ಲಿ ಪ್ರಮುಖ ಸ್ಥಾನವನ್ನು ಹೊಂದಿದೆ. ಅವರು ತಮ್ಮ ‘ವೆಲ್​ನೆಸ್ ಫಾರೆವರ್’ ಬ್ರಾಂಡ್‌ನ ಅಡಿಯಲ್ಲಿ ದೊಡ್ಡ ಓಮ್ನಿಚಾನಲ್, ಹೈಪರ್‌ಲೋಕಲ್ ರಿಟೇಲ್ ನೆಟ್‌ವರ್ಕ್ ಅನ್ನು ನಿರ್ವಹಿಸುತ್ತಾರೆ. ಅವರ ಹೆಚ್ಚಿನ ಅಂಗಡಿಗಳು 24×7 ಕಾರ್ಯ ನಿರ್ವಹಿಸುವುದರೊಂದಿಗೆ ತಮ್ಮ ಗ್ರಾಹಕರ ಕ್ಷೇಮ ಅಗತ್ಯಗಳಿಗೆ ಒನ್​-ಸ್ಟಾಪ್ ಸಲ್ಯೂಷನ್ ಆಗಿ ಸೇವೆ ಸಲ್ಲಿಸುತ್ತಾರೆ.

30 ಜೂನ್ 2021ರಂತೆ ಇದು 67 ಲಕ್ಷ ಗ್ರಾಹಕರ ನೋಂದಾಯಿತ ಗ್ರಾಹಕರ ನೆಲೆಯನ್ನು ಒದಗಿಸುತ್ತದೆ. ಇದು ಈಗ ಶ್ರೇಣಿ 2 ಮತ್ತು 3 ಮಾರುಕಟ್ಟೆಗಳಲ್ಲಿ ತನ್ನ ಇರುವಿಕೆಯನ್ನು ಆಳಗೊಳಿಸಲು ಉದ್ದೇಶಿಸಿದೆ. ಇದು ಶೇ 45ರಷ್ಟು ಸಂಯುಕ್ತ ವಾರ್ಷಿಕ ಬೆಳವಣಿಗೆ ದರದಲ್ಲಿ (CAGR) ಬೆಳೆಯುವ ನಿರೀಕ್ಷೆಯಿರುವ, ಬೆಳೆಯುತ್ತಿರುವ ಇ-ಕಾಮರ್ಸ್ ಫಾರ್ಮಸಿ ವಿಭಾಗದಲ್ಲಿ ಭಾಗವಹಿಸುತ್ತದೆ.

3. CMR ಗ್ರೀನ್ ಟೆಕ್ನಾಲಜೀಸ್

ಮಾರುಕಟ್ಟೆ ನಿಯಂತ್ರಕ ಸೆಬಿ ಸಿಎಂಆರ್ ಗ್ರೀನ್ ಟೆಕ್ನಾಲಜೀಸ್‌ಗೆ ಕೂಡ ಐಪಿಒಗೆ ಹಸಿರು ನಿಶಾನೆ ತೋರಿಸಿದೆ. DRHP ಪ್ರಕಾರ, ಲೋಹದ ಮರುಬಳಕೆ ಕಂಪೆನಿ ಸಿಎಂಆರ್ ಗ್ರೀನ್ ಟೆಕ್ನಾಲಜೀಸ್ 300 ಕೋಟಿ ಮೌಲ್ಯದ ಈಕ್ವಿಟಿ ಷೇರುಗಳ ತಾಜಾ ವಿತರಣೆಯ ಆರಂಭಿಕ ಷೇರು ಮಾರಾಟದ ಮೂಲಕ ಮತ್ತು ಪ್ರವರ್ತಕರು ಮತ್ತು ಹೂಡಿಕೆದಾರರಿಂದ 3,34,14,138 ಈಕ್ವಿಟಿ ಷೇರುಗಳ OFS ಮೂಲಕ ಹಣವನ್ನು ಸಂಗ್ರಹಿಸಲು ಮುಂದಾಗಿದೆ. ಹೊಸ ಇಶ್ಯೂದಿಂದ ಬರುವ ಆದಾಯವನ್ನು ಸಾಲದ ಪಾವತಿ ಮತ್ತು ಸಾಮಾನ್ಯ ಕಾರ್ಪೊರೇಟ್ ಉದ್ದೇಶಗಳಿಗಾಗಿ ಬಳಸಲಾಗುತ್ತದೆ. ಕಂಪೆನಿಯು 2021ರ ಸೆಪ್ಟೆಂಬರ್​ನಲ್ಲಿ ಬಂಡವಾಳ ಮಾರುಕಟ್ಟೆ ನಿಯಂತ್ರಕಕ್ಕೆ ಪ್ರಾಥಮಿಕ ದಾಖಲೆಗಳನ್ನು ಸಲ್ಲಿಸಿತು.

ಎಚ್ಚರಿಕೆ: ಈ ಲೇಖನವು ಮಾಹಿತಿ ಉದ್ದೇಶಗಳಿಗಾಗಿ ಮಾತ್ರ. ಇದು ಸ್ಟಾಕ್ ಶಿಫಾರಸು ಅಲ್ಲ ಮತ್ತು ಆ ರೀತಿ ಪರಿಗಣಿಸಬಾರದು.

ಇದನ್ನೂ ಓದಿ: LIC IPO: ಐಪಿಒದಲ್ಲಿ ಭಾಗವಹಿಸಲು ಎಲ್​ಐಸಿ ಪಾಲಿಸಿದಾರರು ಫೆಬ್ರವರಿ 28ರೊಳಗೆ ಪ್ಯಾನ್ ವಿವರ ಅಪ್​ಡೇಟ್​ ಮಾಡಬೇಕು