Big Rise: ಬೆಂಗಳೂರು, ಹೈದರಾಬಾದ್​ನ ಈ ಪುಟ್ಟ ಮೆಷೀನ್ ಟೂಲ್ ಕಂಪನಿಗೆ ಹಣ ಹಾಕಿದವರೇ ಸಿರಿವಂತರು; 3 ವರ್ಷದಲ್ಲಿ 7 ಪಟ್ಟು ಬೆಳೆದಿದೆ ಷೇರು

ಬೆಂಗಳೂರು: ಷೇರುಗಳ ಮೇಲೆ ಹಣ ಹಾಕುವುದೆಂದರೆ ಎಲ್ಲರಿಗೂ ಮೊದಲು ನೆನಪಾಗುವುದು ದೊಡ್ಡ ದೊಡ್ಡ ಕಂಪನಿಗಳ ಹೆಸರೇ. ಆದರೆ, ಷೇರುಪೇಟೆಯಲ್ಲಿ ಕೆಲವೊಮ್ಮೆ ಬಹುತೇಕರು ಅಂದಾಜು ಕೂಡ ಮಾಡದಿದ್ದ ಲೋ ಪ್ರೊಫೈಲ್ ಕಂಪನಿಯ ಷೇರುಗಳು ಯದ್ವಾತದ್ವ ಬೆಳೆದಿರುತ್ತವೆ. ಅಯ್ಯೋ, ಈ ಷೇರಿಗೆ ನಾನು ಹಣ ಹಾಕಲಿಲ್ಲವಲ್ಲ ಎಂದು ಅವಡುಗಚ್ಚುವಂತಾಗುತ್ತದೆ. ಷೇರುಪೇಟೆಯಲ್ಲಿ ಧೂಳೆಬ್ಬಿಸಿರುವ ಇಂತಹ ಕೆಲ ಕಂಪನಿಗಳಲ್ಲಿ ಲೋಕೇಶ್ ಮೆಷೀನ್ಸ್ ಲಿ (Lokesh Machines Ltd) ಕೂಡ ಒಂದು. ಕಳೆದ 3 ವರ್ಷದಲ್ಲಿ ಈ ಸಂಸ್ಥೆಯ ಷೇರು ಬೆಲೆ 7ಪಟ್ಟಿಗೂ ಹೆಚ್ಚು ಬೆಳೆದುಹೋಗಿದೆ. 2020 ಏಪ್ರಿಲ್ 24ರಂದು ಬಾಂಬೆ ಸ್ಟಾಕ್ ಎಕ್ಸ್​ಚೇಂಜ್​ನಲ್ಲಿ (BSE) ಲೋಕೇಶ್ ಮೆಷಿನ್ಸ್ ಸಂಸ್ಥೆಯ ಒಂದು ಷೇರಿನ ಬೆಲೆ 15.45 ರುಪಾಯಿ ಇತ್ತು. 3 ವರ್ಷಗಳ ನಂತರ, 2023 ಏಪ್ರಿಲ್ 24ಕ್ಕೆ ಇದರ ಷೇರು ಬೆಲೆ 130 ರೂಗಿಂತ ಮೇಲೇರಿ ಹೋಗಿತ್ತು. ಇವತ್ತು ಏಪ್ರಿಲ್ 26ರಂದು ಇದರ ಷೇರು ಬೆಲೆ ಒಂದು ಹಂತದಲ್ಲಿ 133.75ಕ್ಕೆ ಉಬ್ಬಿತ್ತು. ಅಂದರೆ 3 ವರ್ಷದಲ್ಲಿ 7 ಪಟ್ಟು ಹೆಚ್ಚು ಬೆಲೆ ಹೆಚ್ಚಿಸಿಕೊಂಡಿದೆ ಈ ಷೇರು. ಇದೇ ಅವಧಿಯಲ್ಲಿ ಷೇರು ಮಾರುಕಟ್ಟೆ ಶೇ. 92.15ರಷ್ಟು ಬೆಳೆದರೆ, ಲೋಕೇಶ್ ಮೆಷೀನ್ಸ್ ಸಂಸ್ಥೆಯ ಷೇರು ಶೇ. 740ರಷ್ಟು ಬೆಳೆದಿದೆ. ಈ ಮೂಲಕ ಮಲ್ಟಿಬ್ಯಾಗರ್ ಹಣೆಪಟ್ಟಿ ಪಡೆದಿದೆ.

3 ವರ್ಷದಲ್ಲಿ 1 ಲಕ್ಷ ಹಣ ಹಾಕಿದವರಿಗೆ ಎಷ್ಟು ರಿಟರ್ನ್ ಕೊಟ್ಟಿದೆ ಲೋಕೇಶ್ ಮೆಷೀನ್ಸ್ ಷೇರು?

ಲೋಕೇಶ್ ಮೆಷೀನ್ಸ್ ಸಂಸ್ಥೆಯ ಷೇರು 3 ವರ್ಷದಲ್ಲಿ ಶೇ. 740ರಷ್ಟು ಬೆಲೆ ಹೆಚ್ಚಿಸಿಕೊಂಡಿದೆ. 3 ವರ್ಷದ ಹಿಂದೆ ಯಾರಾದರೂ 1 ಲಕ್ಷ ರೂ ಮೌಲ್ಯದ ಷೇರುಗಳನ್ನು ಖರೀದಿಸಿದ್ದರೆ ಇವತ್ತು ಅವರ ಹೂಡಿಕೆಯ ಮೊತ್ತ 8.65 ಲಕ್ಷ ರೂ ಆಗಿರುತ್ತಿತ್ತು. ಅಷ್ಟರ ಮಟ್ಟಿಗೆ ಲೋಕೇಶ್ ಮೆಷೀನ್ಸ್ ಬೆಳವಣಿಗೆ ಸಾಧಿಸಿ, ಹೂಡಿಕೆದಾರರ ಮೊಗದಲ್ಲಿ ಹರ್ಷ ಮೂಡಿಸಿದೆ.

ಇದನ್ನೂ ಓದಿ: Investments: ಕೆವಿಪಿ, ಪಿಪಿಎಫ್, ಎಸ್​ಎಸ್​ವೈ ಇತ್ಯಾದಿ ಇತ್ಯಾದಿ… ಯಾವ ಸರ್ಕಾರಿ ಸ್ಕೀಮ್ ನಿಮ್ಮ ಹೂಡಿಕೆಗೆ ಬೆಸ್ಟ್? ಇಲ್ಲಿದೆ ಒಂದು ಹೋಲಿಕೆ

ತಾಂತ್ರಿಕವಾಗಿ ಭರವಸೆ ಮೂಡಿಸುತ್ತದೆ ಲೋಕೇಶ್ ಮೆಷೀನ್ಸ್

ಷೇರುಪೇಟೆಯಲ್ಲಿ ಒಂದು ಕಂಪನಿಯ ಷೇರುಗಳ ತಾಂತ್ರಿಕ ಸಂಗತಿಗಳನ್ನು ಕೆಲವರು ಲೆಕ್ಕ ಹಾಕುತ್ತಾರೆ. ಅದರಂತೆ ಲೋಕೇಶ್ ಮೆಷೀನ್ಸ್​ನ ರಿಲೇಟಿವ್ ಸ್ಟ್ರೆಂತ್ ಇಂಡೆಕ್ಸ್ (ಆರ್​ಎಸ್​ಐ) 59.4 ಇದೆ. ಅಂದರೆ ಇದರ ಬೆಲೆ ಅನಗತ್ಯವಾಗಿ ಏರಿಳಿಕೆ ಕಂಡಿಲ್ಲ ಎಂಬುದನ್ನು ಇದು ಸೂಚಿಸುತ್ತದೆ. ಇನ್ನು ಇದರ ಬೀಟಾ 0.9 ಇದೆ. ಇದೂ ಕೂಡ ಒಂದು ವರ್ಷದಲ್ಲಿ ಈ ಷೇರು ಅಂತಹ ಕುಸಿತ ಕಾಣುವುದಿಲ್ಲ ಎಂಬುದನ್ನು ಸೂಚಿಸುತ್ತದೆ.

ಬೆಂಗಳೂರಿನಲ್ಲಿ ಟೆಕ್ ಆಫೀಸ್ ಹೊಂದಿರುವ ಲೋಕೇಶ್ ಮೆಷೀನ್ಸ್

1983ರಲ್ಲಿ ಆರಂಭವಾದ ಲೋಕೇಶ್ ಮೆಷೀನ್ಸ್ ಸಂಸ್ಥೆ ಹೈದರಾಬಾದ್​ನಲ್ಲಿ ಕಾರ್ಪೊರೇಟ್ ಆಫೀಸ್ ಹೊಂದಿದೆ. ಬೆಂಗಳೂರಿನ ಪೀಣ್ಯದಲ್ಲಿ ಇದರ ಮಾರ್ಕೆಟಿಂಗ್ ಮತ್ತು ಟೆಕ್ ಕಚೇರಿ ಇದೆ. ಜಪಾನ್, ಜರ್ಮನಿ, ನೆದರ್​ಲೆಂಡ್ಸ್, ಇಟಲಿ, ಟರ್ಕಿ, ರಷ್ಯಾ. ಚೀನಾ ಹಾಗೂ ಮಧ್ಯಪ್ರಾಚ್ಯ ದೇಶಗಳಿಗೆ ಇದು ಸಿಎನ್​ಸಿ ಮೆಷಿನ್​ಗಳನ್ನು ರಫ್ತು ಮಾಡುತ್ತದೆ. ಕ್ಯಾಮ್ ಬೋರರ್, ಕ್ರ್ಯಾಂಕ್ ಬೋರರ್, ಫೈನ್ ಬೋರರ್, ಫಿನಿಶ್ ಮಿಲಿಂಗ್ ಮೆಷೀನ್ ಇತ್ಯಾದಿ ಮೆಷೀನ್ ಟೂಲ್​ಗಳನ್ನು ಇದು ತಯಾರಿಸುತ್ತದೆ. ಭಾರತದ ಅಗ್ರಮಾನ್ಯ ಮೆಷೀನ್ ಟೂಲ್ ತಯಾರಕ ಕಂಪನಿಗಳಲ್ಲಿ ಇದೂ ಒಂದು.

ಇದನ್ನೂ ಓದಿ: High Returns: ಸುಳ್ಳಲ್ಲ; 2-4 ವರ್ಷಕ್ಕೆ ಹಣ ಡಬಲ್ ಮಾಡುತ್ತಿರುವ ಮ್ಯೂಚುವಲ್ ಫಂಡ್ ಸ್ಕೀಮ್​ಗಳಿವು; ಶುರುವಾದಾಗಿನಿಂದ ಇವುಗಳ ರಿಟರ್ನ್ಸ್ ಶೇ. 20ಕ್ಕಿಂತ ಕೆಳಗಿಳಿದೇ ಇಲ್ಲ

ಲೋಕೇಶ್ ಮೆಷೀನ್ಸ್ ಸಂಸ್ಥೆಯಲ್ಲಿ 750 ಮಂದಿ ಉದ್ಯೋಗಿಗಳಿದ್ದಾರೆ. ಪರೋಕ್ಷವಾಗಿ 2000 ಮಂದಿಗೆ ಇದು ಉದ್ಯೋಗ ನೀಡಿದೆ. 2007ರಲ್ಲಿ ಬಿಎಸ್​ಇ ಮತ್ತು ಎನ್​ಎಸ್​ಇನಲ್ಲಿ ಲಿಸ್ಟ್ ಆಗಿರುವ ಲೋಕೇಶ್ ಮೆಷೀನ್ಸ್ ಲಿ ಸಂಸ್ಥೆ ಇತ್ತೀಚಿನ ಕೆಲ ವರ್ಷಗಳಿಂದ ಗಮನಾರ್ಹವಾಗಿ ಪ್ರಗತಿ ಸಾಧಿಸಿದೆ. ಬಿಎಸ್​ಇ ಷೇರುಪೇಟೆಯಲ್ಲಿ ಈ ಕಂಪನಿಯ ಮೌಲ್ಯ ತೀರಾ ದೊಡ್ಡದಿಲ್ಲ. ಇದರ ಮಾರ್ಕೆಟ್ ಕ್ಯಾಪ್ 232.39 ಕೋಟಿ ರೂ ಮಾತ್ರ. ಸಾಮಾನ್ಯ ನಾಗರಿಕರ ಕೈಯಲ್ಲಿ ಸುಮಾರು 56 ಲಕ್ಷ ಷೇರುಗಳಿವೆ. ಅರ್ಧಕ್ಕಿಂತ ಹೆಚ್ಚು ಷೇರುಗಳು ಕಂಪನಿಯ ಸ್ಥಾಪಕರ ಕುಟುಂಬಸದಸ್ಯರು ಮತ್ತು ಪ್ರೊಮೋಟರ್​ಗಳ ಕೈಯಲ್ಲಿದೆ.

ಇನ್ನಷ್ಟು ಪರ್ಸನಲ್ ಫೈನಾನ್ಸ್ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ