Green Card: ಅಮೆರಿಕದ ಗ್ರೀನ್ ಕಾರ್ಡ್ ಪಡೆಯಲು ದಶಕದಿಂದ ಕಾಯುತ್ತಿರುವ ಭಾರತೀಯರು; ಯಾಕಿಷ್ಟು ವಿಳಂಬ? ಬಯಲಾಯ್ತು ಕಾರಣ
Why Green Cards Delayed For Indians: ಅಮೆರಿಕದಲ್ಲಿ ದಶಕಗಳಿಂದ ಕೆಲಸ ಮಾಡುತ್ತಿರುವ ಹಲವು ಭಾರತೀಯರು ಈಗಲೂ ಖಾಯಂ ನಿವಾಸಿ ಪತ್ರ ಸಿಕ್ಕದೇ ಅತಂತ್ರ ಸ್ಥಿತಿಯಲ್ಲಿ ವಾಸಿಸುತ್ತಿದ್ದಾರೆ. ಭಾರತೀಯರಿಗೆ ಗ್ರೀನ್ ಕಾರ್ಡ್ ಸಿಗಲು ಯಾಕಿಷ್ಟು ತಡವಾಗುತ್ತಿದೆ, ಇಲ್ಲಿದೆ ನೋಡಿ ಕಾರಣ....
ವಾಷಿಂಗ್ಟನ್: ಅಮೆರಿಕದ ಗ್ರೀನ್ ಕಾರ್ಡ್ ಅಥವಾ ಖಾಯಂ ನಿವಾಸಿ ಪತ್ರ (Permanent Resident Card) ಪಡೆಯಲು ಭಾರತೀಯರು ಹರಸಾಹಸ ನಡೆಸುವಂತಾಗಿದೆ. ದಶಕದ ಹಿಂದೆ ಗ್ರೀನ್ ಕಾರ್ಡ್ಗೆ (US Green Card) ಅರ್ಜಿ ಹಾಕಿದವರು ಈಗಲೂ ಕಾಯುತ್ತಾ ಕೂತಿರುವುದುಂಟು. ಭಾರತ ಮಾತ್ರವಲ್ಲ ಇದು ಚೀನಾ, ಮೆಕ್ಸಿಕೋ ಮತ್ತು ಫಿಲಿಪ್ಪೈನ್ಸ್ ದೇಶದ ಜನರಿಗೂ ಇದೇ ಕಥೆ ಮತ್ತು ವ್ಯಥೆ. ಇದಕ್ಕೇನು ಕಾರಣ ಎಂಬುದನ್ನು ಅಮೆರಿಕದ ಅಧಿಕಾರಿಯೊಬ್ಬರು ಬಹಿರಂಗಪಡಿಸಿದ್ದಾರೆ. ಅಮೆರಿಕ ಪೌರತ್ವ ಮತ್ತು ವಲಸೆ ಸೇವೆ (USCIS) ನಿರ್ದೇಶಕರಿಗೆ ಹಿರಿಯ ಸಲಹೆಗಾರರಾದ ಡೌಗ್ಲಸ್ ರಾಂಡ್ ಎಂಬುವವರು ಹೇಳಿದ ಪ್ರಕಾರ ಗ್ರೀನ್ ಕಾರ್ಡ್ ಪಡೆಯಲು ಪ್ರತಿಯೊಂದು ದೇಶಕ್ಕೂ ಇರುವ ಮಿತಿಯೇ ಈ ವಿಳಂಬಕ್ಕೆ ಕಾರಣವಾಗಿದೆ. ಈ ಮಿತಿಯನ್ನು ಅಮೆರಿಕದ ಸಂಸತ್ತಿನಲ್ಲಿ ಕಾನೂನು ತಿದ್ದುಪಡಿ ಮಾಡುವ ಮೂಲಕ ಮಾತ್ರ ಬದಲಾಯಿಸಲು ಸಾಧ್ಯ ಎಂಬುದನ್ನು ಡಗ್ಲಸ್ ರಾಂಡ್ ತಿಳಿಸಿದ್ದಾರೆ.
ಎಷ್ಟು ಮಂದಿ ವಿದೇಶೀಯರು ಅಮೆರಿಕದ ಗ್ರೀನ್ ಕಾರ್ಡ್ ಪಡೆಯಬಹುದು?
ಅಮೆರಿಕದಲ್ಲಿ ಖಾಯಂ ನಿವಾಸಿ ಪತ್ರ ಅಥವಾ ಗ್ರೀನ್ ಕಾರ್ಡ್ ಅನ್ನು ವಿದೇಶೀಯರಿಗೆ ನೀಡಲು ಮಿತಿ ಹಾಕಲಾಗಿದೆ. ಒಂದು ವರ್ಷದಲ್ಲಿ 3,36,000 ಮಂದಿಗೆ ಮಾತ್ರ ಗ್ರೀನ್ ಕಾರ್ಡ್ ನೀಡಬಹುದು. ಅದರಲ್ಲಿ ಕುಟುಂಬ ಕಾರಣಕ್ಕೆ ನೀಡಲಾಗುವ ಗ್ರೀನ್ ಕಾರ್ಡ್ ಮಿತಿ 2,26,000 ಆದರೆ, ಉದ್ಯೋಗ ಕಾರಣಕ್ಕೆ ಗ್ರೀನ್ ಕಾರ್ಡ್ ಮಿತಿ 1,40,000 ಇದೆ.
ಇದನ್ನೂ ಓದಿ: Flying Taxis: ಹಾರುವ ಕಾರು, ಡ್ರೋನ್ಗಳ ನಿರ್ಮಾಣಕ್ಕೆ ಮೈಸೂರು, ಬೆಂಗಳೂರಿನ ಟೆಕ್ ಕಂಪನಿಗಳ ಒಪ್ಪಂದ
ಇದು ಒಟ್ಟಾರೆ ವಿಶ್ವದ ಎಲ್ಲಾ ದೇಶಗಳಿಗೂ ಸೇರಿಸಿ ಇಡಲಾಗಿರುವ ಮಿತಿ. ಇನ್ನು, ಈ ಒಟ್ಟಾರೆ ಗ್ರೀನ್ ಕಾರ್ಡ್ ಅವಕಾಶದಲ್ಲಿ ಪ್ರತಿಯೊಂದು ದೇಶಕ್ಕೂ ಶೇ. 7ರಷ್ಟು ಪಾಲು ಕೊಡಲಾಗಿದೆ. ಅಂದರೆ 3,36,000 ಗ್ರೀನ್ ಕಾರ್ಡ್ನಲ್ಲಿ ಶೇ. 7 ಎಂದರೆ 25,620 ಗ್ರೀನ್ ಕಾರ್ಡ್ಗಳನ್ನಷ್ಟೇ ಭಾರತೀಯರು ಒಂದು ವರ್ಷದಲ್ಲಿ ಪಡೆಯಲು ಸಾಧ್ಯವಿದೆ.
ಭಾರತ, ಚೀನಾ, ಫಿಲಿಪ್ಪೈನ್ಸ್ ಮತ್ತು ಮೆಕ್ಸಿಕೋ ದೇಶಗಳಿಂದ ಹೆಚ್ಚಿನ ಜನರು ಅಮೆರಿಕದ ಗ್ರೀನ್ ಕಾರ್ಡ್ಗೆ ಪ್ರತೀ ವರ್ಷವೂ ಅರ್ಜಿ ಹಾಕುತ್ತಲೇ ಇರುತ್ತಾರೆ. ಗ್ರೀನ್ ಕಾರ್ಡ್ ಬಯಸುವ ಭಾರತೀಯರ ಸಂಖ್ಯೆ ಒಂದು ವರ್ಷದಲ್ಲಿ 1 ಲಕ್ಷದವರೆಗೂ ಹೋಗುತ್ತದೆ ಎಂದು ಹೇಳಲಾಗುತ್ತದೆ. ಹೀಗಾಗಿ, ಭಾರತೀಯರು ಗ್ರೀನ್ ಕಾರ್ಡ್ ಪಡೆಯಲು ಹೆಚ್ಚಿನ ಕಾಲ ಕಾಯುತ್ತಾ ಕೂರಬೇಕಾದ ಪರಿಸ್ಥಿತಿ ಇದೆ. ಅಮೆರಿಕದಲ್ಲಿ ದಶಕಗಳಿಂದ ಕೆಲಸ ಮಾಡುತ್ತಿರುವ ಅನೇಕ ಭಾರತೀಯರಿಗೆ ಈಗಲೂ ಕೂಡ ಗ್ರೀನ್ ಕಾರ್ಡ್ ಸಿಕ್ಕದೇ ಅತಂತ್ರ ಸ್ಥಿತಿಯಲ್ಲಿ ವಾಸಿಸುತ್ತಿದ್ದಾರೆ.
ಇದನ್ನೂ ಓದಿ: TCS Confusion: ಕ್ರೆಡಿಟ್ ಕಾರ್ಡ್ ವೆಚ್ಚಕ್ಕೆ ಶೇ. 20 ತೆರಿಗೆ; ಫಾರೀನ್ ಟ್ರಿಪ್ ಗಲಿಬಿಲಿ; ತಿಳಿದಿರಬೇಕಾದ ಕೆಲ ಸಂಗತಿಗಳು
ಈ ಪರಿಪಾಟಲು ನೀಗಿಸಬೇಕಾದರೆ ಗ್ರೀನ್ ಕಾರ್ಡ್ ಮಿತಿಯಲ್ಲಿರುವ ನಿಯಮಗಳನ್ನು ಬದಲಾಯಿಸಬೇಕು. ಅದಾಗಬೇಕಾದರೆ ಅಮೆರಿಕದ ಸಂಸತ್ತಿನಲ್ಲೇ ನಿಯಮ ತಿದ್ದುಪಡಿ ಆಗಬೇಕಂತೆ. ಜೋ ಬೈಡನ್ ನೇತೃತ್ವದ ಸರ್ಕಾರ ಈ ಕೆಲಸ ಮಾಡುತ್ತಾ, ಕಾದುನೋಡಬೇಕು.