ಮಗಳ ಜೊತೆ ಸಂಗೀತ ಕಚೇರಿಗೆ ಹೋಗಿ ತಲೆಕೆರೆದುಕೊಂಡ ಅಭಿಷೇಕ್ ಬಚ್ಚನ್

ಅಭಿಷೇಕ್ ಬಚ್ಚನ್ ಮಗಳು ಆರಾಧ್ಯಾ ಜೊತೆ ಅರಿಯಾನಾ ಗ್ರಾಂಡೆ ಮ್ಯೂಸಿಕ್ ಕಾನ್ಸರ್ಟ್​ಗೆ ತೆರಳಿದ್ದರು. ಈ ಅನುಭವವನ್ನು ಅವರು ಇತ್ತೀಚಿನ ಸಂದರ್ಶನವೊಂದರಲ್ಲಿ ಹಂಚಿಕೊಂಡಿದ್ದಾರೆ. ಅಲ್ಲಿನ ವಾತಾವರಣ ಅವರನ್ನು ಬೆರಗುಗೊಳಿಸಿದೆ. ಗಾಯಕಿ ಅರಿಯಾನಾ ಧ್ವನಿ ಹಾಗೂ ಅವರ ಗಾಯನ ಶೈಲಿಗೆ ಅಭಿಷೇಕ್ ಮಾರುಹೋಗಿದ್ದಾರೆ.

ತಮ್ಮ ಮಗಳ ಸಂಗೀತ ಪ್ರೀತಿಯ ಬಗ್ಗೆ ಅಭಿಷೇಕ್ ಮುಕ್ತವಾಗಿ ಮಾತನಾಡಿದ್ದಾರೆ. ‘ಆರಾಧ್ಯಾಗೆ ವಿವಿಧ ರೀತಿಯ ಹಾಡುಗಳನ್ನು ಕೇಳುವ ಅಭ್ಯಾಸವಿದೆ. ಟೇಲರ್ ಸ್ವಿಫ್ಟ್ ಮತ್ತು ಒಲಿವಿಯಾ ರೊಡ್ರಿಗೋ ಅವರ ಹಾಡುಗಳನ್ನು ಆಕೆ ಇಷ್ಟಪಡುತ್ತಾಳೆ. ಇದರ ಜೊತೆಗೆ 80ರ ದಶಕದ ಪ್ರಸಿದ್ಧ ಬ್ಯಾಂಡ್‌ಗಳ ಹಾಡುಗಳನ್ನೂ ಆಕೆ ಆಲಿಸುತ್ತಾಳೆ’ ಎಂದಿದ್ದಾರೆ ಅಭಿಷೇಕ್.

ಇತ್ತೀಚೆಗೆ ವಿದೇಶಿ ಪ್ರವಾಸದಲ್ಲಿದ್ದಾಗ ಆರಾಧ್ಯಾ ಪೋಷಕರನ್ನು ಲೈವ್ ಕಾನ್ಸರ್ಟ್‌ಗೆ ಕರೆದೊಯ್ದಿದ್ದರು. ಅಲ್ಲಿ ಅರಿಯಾನಾ ಗ್ರಾಂಡೆ ಅವರ ಅದ್ಭುತ ಗಾಯನ ಪ್ರದರ್ಶನ ನಡೆಯಿತು. ಅಭಿಷೇಕ್ ಅವರಿಗೆ ಅರಿಯಾನಾ ಹಾಡಿದ ಯಾವ ಹಾಡೂ ತಿಳಿದಿರಲಿಲ್ಲ. ಆದರೂ ಅವರ ಧ್ವನಿಯ ಗಾಂಭೀರ್ಯ ಮತ್ತು ಶಕ್ತಿ ಅಭಿಷೇಕ್ ಅವರಿಗೆ ಪ್ರಭಾವ ಬೀರಿದೆ.

ಅಭಿಷೇಕ್ ಅವರಿಗೆ ಭಾರತೀಯ ಹಳೆಯ ಚಲನಚಿತ್ರ ಸಂಗೀತದ ಮೇಲೆ ಹೆಚ್ಚಿನ ಒಲವಿದೆ. ಕಿಶೋರ್ ಕುಮಾರ್, ಆರ್‌ಡಿ ಬರ್ಮನ್ ಮತ್ತು ಲಕ್ಷ್ಮೀಕಾಂತ್ ಪ್ಯಾರೇಲಾಲ್ ಅವರ ಸಂಗೀತವನ್ನು ಅವರು ಸದಾ ಕೇಳುತ್ತಾರೆ. ಹೊಸ ತಲೆಮಾರಿನ ಗಾಯಕರೂ ಸಹ ಅತ್ಯುತ್ತಮ ಸಂಗೀತ ನೀಡುತ್ತಿದ್ದಾರೆ ಎಂದು ಅವರು ಮೆಚ್ಚುಗೆ ವ್ಯಕ್ತಪಡಿಸಿದ್ದಾರೆ.

ಇದನ್ನೂ ಓದಿ: ನಾನೇನು ಹೀರೋಯಿನ್​ ಆಗಿ ನಟಿಸ್ತಿದೀನಾ? ಕೆಣಕಲು ಬಂದವರಿಗೆ ಅಭಿಷೇಕ್ ಬಚ್ಚನ್ ಖಡಕ್ ತಿರುಗೇಟು

ಸಿನಿಮಾ ರಂಗದಲ್ಲಿ ಅಭಿಷೇಕ್ ಬಚ್ಚನ್ ಅವರು ಪ್ರಸ್ತುತ ಸಾಲು ಸಾಲು ಚಿತ್ರಗಳಲ್ಲಿ ಬ್ಯುಸಿಯಾಗಿದ್ದಾರೆ. ಶಾರುಖ್ ಖಾನ್ ನಟನೆಯ ‘ಕಿಂಗ್’ ಸಿನಿಮಾದಲ್ಲಿ ಅವರು ಖಳನಾಯಕನಾಗಿ ಕಾಣಿಸಿಕೊಳ್ಳಲಿದ್ದಾರೆ. ಸಿದ್ಧಾರ್ಥ್ ಆನಂದ್ ನಿರ್ದೇಶನದ ಈ ಚಿತ್ರವು ದೊಡ್ಡ ಮಟ್ಟದ ನಿರೀಕ್ಷೆ ಹುಟ್ಟುಹಾಕಿದೆ. ಈ ಸಿನಿಮಾ ಡಿಸೆಂಬರ್ 24ರಂದು ಬಿಡುಗಡೆಯಾಗಲಿದೆ.

ಇನ್ನಷ್ಟು ಸಿನಿಮಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್​ ಮಾಡಿ.