‘ಆವೇಶಂ’ ತೆಲುಗು ರೀಮೇಕ್​ಗೆ ಹೀರೋ ಬದಲು, ಸ್ಟಾರ್ ಹೀರೋ ಎಂಟ್ರಿ

ಮಲಯಾಳಂ ಚಿತ್ರರಂಗದ ಈ ವರ್ಷದ ಬ್ಲಾಕ್ ಬಸ್ಟರ್ ಸಿನಿಮಾಗಳಲ್ಲಿ ಒಂದು ‘ಆವೇಶಂ’. ಫಹಾದ್ ಫಾಸಿಲ್ ಮುಖ್ಯ ಪಾತ್ರದಲ್ಲಿ ನಟಿಸಿದ್ದ ಈ ಸಿನಿಮಾ ಕೇರಳದಲ್ಲಿ ಮಾತ್ರವಲ್ಲದೆ, ಬೆಂಗಳೂರು, ಮುಂಬೈಗಳಲ್ಲಿಯೂ ಭಾರಿ ಹಿಟ್ ಎನಿಸಿಕೊಂಡಿತ್ತು. ಈ ಸಿನಿಮಾ ಒಟಿಟಿಯಲ್ಲಿ ಬಿಡುಗಡೆ ಆದ ಬಳಿಕವೂ ಸಹ ಚಿತ್ರಮಂದಿರಗಳಲ್ಲಿ ಹೌಸ್ ಫುಲ್ ಪ್ರದರ್ಶನ ಕಂಡಿತ್ತು. ಬೆಂಗಳೂರಿನ ಒಬ್ಬ ರೌಡಿಯ ಕತೆಯನ್ನು ಒಳಗೊಂಡಿದ್ದ ಈ ಸಿನಿಮಾ ಕತೆ ಸರಳವಾಗಿದ್ದರು ನಟನೆ, ಕಾಮಿಡಿ ಮೂಲಕ ಜನರ ಮನಸ್ಸು ಗೆದ್ದಿತ್ತು. ಇದೀಗ ಈ ಸಿನಿಮಾ ತೆಲುಗಿಗೆ ರೀಮೇಕ್ ಆಗುತ್ತಿದೆ.

‘ಆವೇಶಂ’ ಸಿನಿಮಾ ತೆಲುಗಿಗೆ ರೀಮೇಕ್ ಆಗುತ್ತಿರುವ ಸುದ್ದಿ ಹೊಸದೇನಲ್ಲ. ಕಳೆದ ತಿಂಗಳೆ ಈ ಬಗ್ಗೆ ಸುದ್ದಿ ಹರಿದಾಡಿತ್ತು, ಆದರೆ ಹೊಸ ಸುದ್ದಿಯೆಂದರೆ ತೆಲುಗು ರೀಮೇಕ್​ನಲ್ಲಿ ನಟಿಸುತ್ತಿರುವ ನಾಯಕ ಬದಲಾಗಿದ್ದಾರೆ. ಈ ಮೊದಲು, ‘ಆವೇಶಂ’ ತೆಲುಗು ರೀಮೇಕ್​ನಲ್ಲಿ ‘ಟಿಲ್ಲು’ ಸಿನಿಮಾ ಖ್ಯಾತಿಯ ಸಿದ್ದು ಜೊನ್ನಲಗಡ್ಡ ನಟಿಸಲಿದ್ದಾರೆ ಎನ್ನಲಾಗಿತ್ತು. ಆದರೆ ಈಗ ಆ ಸ್ಥಾನಕ್ಕೆ ತೆಲುಗಿನ ಸ್ಟಾರ್ ನಟನ ಎಂಟ್ರಿ ಆಗಿದೆ.

ಇದನ್ನೂ ಓದಿ:‘ಆವೇಶಂ’ ರೀಮೇಕ್​ನಲ್ಲಿ ತೆಲುಗಿನ ಸ್ಟಾರ್ ನಟ, ಆದರೆ..;

‘ಆವೇಶಂ’ ಸಿನಿಮಾದ ತೆಲುಗು ರೀಮೇಕ್​ನಲ್ಲಿ ರವಿತೇಜ ಮುಖ್ಯ ಪಾತ್ರದಲ್ಲಿ ನಟಿಸಲಿದ್ದಾರೆ. ಫಹಾದ್ ಫಾಸಿಲ್ ನಟಿಸಿರುವ ರಂಗ ಪಾತ್ರದಲ್ಲಿ ರವಿತೇಜ ನಟಿಸಲಿದ್ದು, ಕತೆಯಲ್ಲಿ ಕೆಲವು ಬದಲಾವಣೆಗಳನ್ನು ಸಹ ಮಾಡಿಕೊಡಿಕೊಂಡಿದೆಯಂತೆ ಚಿತ್ರತಂಡ. ಅಸಲಿಗೆ ರವಿತೇಜಾಗೂ ಮುಂಚೆ ನಂದಮೂರಿ ಬಾಲಕೃಷ್ಣ ಅವರನ್ನು ಸಹ ಈ ಪಾತ್ರಕ್ಕೆ ಶಾರ್ಟ್ ಲಿಸ್ಟ್ ಮಾಡಲಾಗಿತ್ತು. ಆದರೆ ಬಾಲಕೃಷ್ಣ ಅವರು ನಟಿಸಲು ಒಲ್ಲೆ ಎಂದರಂತೆ. ಹಾಗಾಗಿ ಈ ಪಾತ್ರ ಈಗ ರವಿತೇಜ ಪಾಲಾಗಿದೆ.

ರವಿತೇಜ, ಔಟ್​ ಆಂಡ್ ಔಟ್ ಕಾಮಿಡಿ ಸಿನಿಮಾದಲ್ಲಿ ನಟಿಸಿ ಹೆಚ್ಚು ಸಮಯವಾಗಿದೆ. ಇತ್ತೀಚೆಗೆ ಅವರು ಆಕ್ಷನ್ ಸಿನಿಮಾಗಳಲ್ಲಿಯೇ ಹೆಚ್ಚಾಗಿ ಕಾಣಿಸಿಕೊಳ್ಳುತ್ತಿದ್ದಾರೆ. ಮಾತ್ರವಲ್ಲದೆ ಅವರ ಸಿನಿಮಾಗಳು ಸತತ ಸೋಲು ಕಾಣುತ್ತಿವೆ. ಈ ಹಿಂದೆ ನಟಿಸಿದ್ದ ‘ಈಗಲ್’, ‘ಟೈಗರ್ ನಾಗೇಶ್ವರರಾವ್’, ‘ಮಿಸ್ಟರ್ ಬಚ್ಚನ್’, ‘ರಾವಣಾಸುರ’ ಸಿನಿಮಾಗಳು ದೊಡ್ಡ ಯಶಸ್ಸನ್ನೇನೂ ಗಳಿಸಿಲ್ಲ. ಆದರೆ ಈ ಸಿನಿಮಾಗಳೆಲ್ಲವು ಆಕ್ಷನ್ ಸಿನಿಮಾಗಳಾಗಿದ್ದವು. ಅಸಲಿಗೆ ರವಿತೇಜ ತಮ್ಮ ಕಾಮಿಡಿ ಸಿನಿಮಾಗಳಿಂದಲೇ ಹೆಚ್ಚು ಜನಪ್ರಿಯರು, ಅವರಿಗೆ ಯಶಸ್ಸು, ಹೆಸರು ತಂದುಕೊಟ್ಟಿರುವುದು ಕಾಮಿಡಿ ಸಿನಿಮಾಗಳೇ. ಅದೇ ಕಾರಣಕ್ಕೆ ಈಗ ಮತ್ತೆ ಕಾಮಿಡಿ ಸಿನಿಮಾದತ್ತ ಮುಖ ಮಾಡಲು ರವಿತೇಜ ನಿರ್ಧರಿಸಿದಂತಿದೆ.

ಸಿನಿಮಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ