Kavyashree Gowda: ಹತ್ತನೇ ವಾರಕ್ಕೆ ಆಟ ಮುಗಿಸಿ ಬಿಗ್​ ಬಾಸ್​ ಮನೆಯಿಂದ ಹೊರ ನಡೆದ ಕಿರುತೆರೆ ನಟಿ ಕಾವ್ಯಶ್ರೀ ಗೌಡ

ಕಲರ್ಸ್​​​ ಕನ್ನಡ ವಾಹಿನಿಯ ಅತೀ ದೊಡ್ಡ ಜನಪ್ರಿಯ ರಿಯಾಲಿಟಿ ಶೋ ‘ಬಿಗ್​ ಬಾಸ್​ ಸೀಸನ್ 9’ (Bigg Boss Kannada Season 9) ಸದ್ಯ ಒಂಭತ್ತು ವಾರಗಳನ್ನು ಪೂರೈಸಿ ಹತ್ತನೇ ವಾರಕ್ಕೆ ಕಾಲಿಟ್ಟಿದೆ. ಈ ಬಾರಿಯ ‘ಬಿಗ್​ ಬಾಸ್​ ಸೀಸನ್ 9’ ಹಲವು ವಿಶೇಷತೆಗಳಿಂದ ಕೂಡಿದೆ. ನಮಗೆ ತಿಳಿದಿರುವ ಹಾಗೆ ದೊಡ್ಮನೆಗೆ ಪ್ರತಿ ಸೀಸನ್​ನಲ್ಲಿ ಹೊಸ ಸ್ಪರ್ಧಿಗಳು ಕಾಣಸಿಗುತ್ತಾರೆ. ಆದರೆ ಈ ಬಾರಿಯ ಸೀಸನ್​ನಲ್ಲಿ ಅದು ಉಲ್ಟಾ ಆಗಿದೆ. ಪ್ರವೀಣರು ಮತ್ತು ನವೀನರು ಎಂಬ ಕಾನ್ಸೆಪ್ಟ್​​ ಮೂಲಕ ಜನರೆದುರು ಬಂದಿದೆ. ಅಷ್ಟೇ ಅಲ್ಲದೇ ಓಟಿಟಿಗೂ ಬಿಗ್​ ಬಾಸ್ ಶೋ ಕಾಲಿಟ್ಟು ಎಲ್ಲರ ಗಮನ ಸೆಳೆದಿತ್ತು. ಸದ್ಯ ಹತ್ತನೇ ವಾರಕ್ಕೆ ಕಾಲಿಟ್ಟಿರುವ ಬಿಗ್​ ಬಾಸ್​ ಮನೆಯಿಂದ ಯಾರು ಹೊರ ನಡೆಯಲಿದ್ದಾರೆ ಎಂಬ ಕುತೂಹಲ ಉಂಟಾಗಿದೆ. ಕಳೆದ ವಾರ ದೊಡ್ಮನೆಯಿಂದ ಗಿಚ್ಚಿ ಗಿಲಿಗಿಲಿ ಖ್ಯಾತಿಯ ವಿನೋದ್ ಗೊಬ್ಬರಗಾಲ ಮನೆಯಿಂದ ಔಟ್​ ಆಗಿದ್ದರು. ಈ ವಾರ ಬಿಗ್​ ಬಾಸ್ ಮನೆಯಿಂದ ಕಿರುತೆರೆ ನಟಿ ಕಾವ್ಯಶ್ರೀ ಗೌಡ​ ಎಲಿಮಿನೇಟ್​ ಆಗಿದ್ದಾರೆ.

ಇದನ್ನೂ ಓದಿ: ‘ನೀವು ಶಿವನ ಕತ್ತಿನಲ್ಲಿರುವ ನಾಗರಹಾವು’; ಆರ್ಯವರ್ಧನ್ ಸ್ಪಷ್ಟನೆ ಕೇಳಿ ದಂಗಾದ ರೂಪೇಶ್ ರಾಜಣ್ಣ

ನಟ ಕಿಚ್ಚ ಸುದೀಪ್ ಅವರು ಪ್ರತಿ ವೀಕೆಂಡ್​ನಲ್ಲಿ ಬಂದು ರಾಜಿ ಪಂಚಾಯಿತಿ ಮಾಡುತ್ತಾರೆ. ಈ ವೇಳೆ ಅವರು ಅನೇಕರ ಕಾಲೆಳೆಯುತ್ತಾರೆ. ಜೊತೆಗೆ ಕೆಲವರಿಗೆ ಕ್ಲಾಸ್ ತೆಗೆದುಕೊಳ್ಳುತ್ತಾರೆ. ಅದು ಈ ವಾರವೂ ಮುಂದುವರೆದಿದೆ. ‘ಬಿಗ್ ಬಾಸ್​ ಮನೆಯಲ್ಲಿ ಏನಾದರೂ ಒಂದು ನಡೆಯಬೇಕು ಎಂದರೆ ಅದು ಏನು?’ ಎಂದು ಪ್ರಶ್ನೆ ಮಾಡಿದ್ದಾರೆ ಸುದೀಪ್. ಇದಕ್ಕೆ ಉತ್ತರಿಸಿದ ಕವ್ಯಾಶ್ರೀ ಗೌಡ ಅವರು ‘ಇಲ್ಲಿ ಲವ್​ ಸ್ಟೋರಿ ಕೇಳಿ ಬೇಸರವಾಗಿದೆ. ವೈಲ್ಡ್ ಕಾರ್ಡ್​ನಲ್ಲಿ ಒಂದು ಹ್ಯಾಂಡ್ಸಮ್ ಹುಡುಗನ ಕಳುಹಿಸಿ’ ಎಂದಿದ್ದರು. ‘ನನ್ನನ್ನ ಯಾವ ವ್ಯಾಪಾರಕ್ಕೆ ಇಳಿಸ್ತಾ ಇದೀರಾ’ ಎಂದು ಸುದೀಪ್ ನಕ್ಕರು. ಕಾವ್ಯಶ್ರೀ ಗೌಡ ಅವರು ಬಿಗ್ ಬಾಸ್​ನಲ್ಲಿ ಅಷ್ಟಾಗಿ ಗಮನ ಸೆಳೆಯುತ್ತಿಲ್ಲ. ಆದರೂ ಅವರು ಪ್ರತಿ ವಾರ ಸೇವ್ ಆಗುತ್ತ ಬಂದಿದ್ದರು.

ಇದನ್ನೂ ಓದಿ: ಮನೆ ಮಂದಿಯನ್ನೆಲ್ಲ ಸೋಂಬೇರಿ ಎಂದು ಜರಿಯುವ ಆರ್ಯವರ್ಧನ್​ಗೆ ಸುದೀಪ್ ಸಖತ್ ಕ್ಲಾಸ್

‘ಮಂಗಳಗೌರಿ’ ಧಾರಾವಾಹಿಯ ಮೂಲಕ ಕಾವ್ಯಶ್ರೀ ಗೌಡ ಕಿರುತೆರೆಗೆ ಎಂಟ್ರಿ ನೀಡಿದ್ದರು. ಕೆಲವೆ ದಿನಗಳಲ್ಲಿ ತಮ್ಮ ನಟನೆಯಿಂದ ಮನೆಮಾತಾದರು. ಬಳಿಕ ‘ಬಿಗ್​ ಬಾಸ್​ ಸೀಸನ್ 9’ಗೆ ನವೀನರ ಪೈಕಿ ಹೋದವರಲ್ಲಿ ಇವರು ಒಬ್ಬರು. ಮೊದಮೊದಲು ಸ್ಟ್ರಾಂಗ್ ಕಂಟೆಸ್ಟಂಟ್ ಎಂದೆನಿಸಿಕೊಂಡ ಕಾವ್ಯಶ್ರೀ ಬಳಿಕ ಡಲ್​ ಹೊಡೆದರು. ಟಾಸ್ಕ್​​ಗಳಲ್ಲಿಯೂ ಅವರ ಪಾತ್ರ ಅಷ್ಟೇನು ಕಾಣಿಸಲಿಲ್ಲ. ಹೀಗಾಗಿ ಜನರ ವೋಟ್​ ಕೂಡ ಕಡಿಮೆ ಬಂದಿದೆ ಎನ್ನಲಾಗುತ್ತಿದೆ. ಇವೆಲ್ಲ ಕಾರಣಗಳಿಂದಾಗಿ ಕಾವ್ಯಶ್ರೀ ಗೌಡ ‘ಬಿಗ್​ ಬಾಸ್ ಸೀಸನ್ 9’ನಿಂದ ಹೊರ ನಡೆದಿದ್ದಾರೆ.

ಮತ್ತಷ್ಟು ಬಿಗ್​ ಬಾಸ್​ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ.​​