‘ಬಿಗ್ ಬಾಸ್ 20’ ಶೋನಲ್ಲಿ ಮಹಿಳಾ ಕ್ರೀಡಾಪಟುಗಳ ಕುರಿತು ಮೇರಿ ಕೋಮ್ ಹೇಳಿಕೆಗೆ ಆಕ್ರೋಶ
ಕಲರ್ಸ್ ಟಿವಿ ಹಾಗೂ ಜಿಯೋ ಹಾಟ್ಸ್ಟಾರ್ನಲ್ಲಿ ಪ್ರಸಾರವಾಗುತ್ತಿರುವ ‘ಬಿಗ್ ಬಾಸ್ 20’ ರಿಯಾಲಿಟಿ ಶೋನಲ್ಲಿ ಮೇರಿ ಕೋಮ್ ಪ್ರಮುಖ ಸ್ಪರ್ಧಿಯಾಗಿ ಭಾಗವಹಿಸುತ್ತಿದ್ದಾರೆ. ಈ ಶೋನಲ್ಲಿ ಅವರು ನೀಡಿದ ಒಂದು ಹೇಳಿಕೆ ಈಗ ಭಾರಿ ವಿವಾದಕ್ಕೆ ಕಾರಣ ಆಗಿದೆ. ವಿವಾದ ಹೆಚ್ಚಾದ ಬಳಿಕ ಕ್ಷಮೆ ಕೇಳಲಾಗಿದೆ.
Updated on: Sep 14, 2026 | 8:42 AM
ಭಾರತದ ದಿಗ್ಗಜ ಬಾಕ್ಸಿಂಗ್ ಪಟು, ಒಲಿಂಪಿಕ್ಸ್ ಪದಕ ವಿಜೇತೆ ಎಂ.ಸಿ. ಮೇರಿ ಕೋಮ್ ಅವರು ‘ಬಿಗ್ ಬಾಸ್ 20’ ರಿಯಾಲಿಟಿ ಶೋನಲ್ಲಿ ನೀಡಿದ ಹೇಳಿಕೆಯೊಂದು ಸಾಮಾಜಿಕ ಜಾಲತಾಣಗಳಲ್ಲಿ ತೀವ್ರ ಚರ್ಚೆಗೆ ಹಾಗೂ ಆಕ್ರೋಶಕ್ಕೆ ಕಾರಣವಾಗಿದೆ. ಸಹ ಸ್ಪರ್ಧಿ ಕಾಜಿ ತೌಕೀರ್ ಅವರೊಂದಿಗೆ ಮಾತನಾಡುತ್ತಿದ್ದಾಗ ಭಾರತೀಯ ಮಹಿಳಾ ಕ್ರೀಡಾಪಟುಗಳ ಕುರಿತು ಮೇರಿ ಕೋಮ್ ನೀಡಿದ ಹೇಳಿಕೆ ಪ್ರೇಕ್ಷಕರ ಕೆಂಗಣ್ಣಿಗೆ ಗುರಿಯಾಗಿತ್ತು. ವೀಕ್ಷಕರ ಆಕ್ರೋಶ ಹೆಚ್ಚಾಗುತ್ತಿದ್ದಂತೆಯೇ ಮೇರಿ ಕೋಮ್ ಅವರ ತಂಡವು ಸಾರ್ವಜನಿಕವಾಗಿ ಸ್ಪಷ್ಟನೆ ನೀಡಿ ಕ್ಷಮೆಯಾಚಿಸಿದೆ.
‘ಬಿಗ್ ಬಾಸ್ 20’ ರಿಯಾಲಿಟಿ ಶೋನಲ್ಲಿ ಸಹ ಸ್ಪರ್ಧಿ ಹಾಗೂ ಗಾಯಕ ಕಾಜಿ ತೌಕೀರ್ ಅವರು ಭಾರತಕ್ಕೆ ಕೀರ್ತಿ ತಂದ ಮಹಿಳಾ ಕ್ರೀಡಾಪಟುಗಳ ಬಗ್ಗೆ ಮಾತನಾಡುತ್ತಿದ್ದರು. ಟೆನ್ನಿಸ್ ತಾರೆ ಸಾನಿಯಾ ಮಿರ್ಜಾ ಮತ್ತು ಬ್ಯಾಡ್ಮಿಂಟನ್ ತಾರೆ ಸೈನಾ ನೆಹ್ವಾಲ್ ಅವರ ಹೆಸರುಗಳನ್ನು ಉಲ್ಲೇಖಿಸಿದ ಕಾಜಿ ತೌಕೀರ್, ‘ನಮ್ಮ ದೇಶದಲ್ಲಿ ಕ್ರೀಡಾ ಕ್ಷೇತ್ರದಲ್ಲಿ ಹಲವು ಮಹಿಳೆಯರು ಅದ್ಭುತ ಸಾಧನೆ ಮಾಡಿದ್ದಾರೆ. ಸಾನಿಯಾ ಮಿರ್ಜಾ ಉತ್ತಮ ಸಾಧನೆ ಮಾಡಿದರು, ಸೈನಾ ನೆಹ್ವಾಲ್ ಕೂಡ…’ ಎಂದು ಹೇಳಲು ತೊಡಗಿದ್ದರು.
ಆದರೆ ಕಾಜಿ ಅವರು ತಮ್ಮ ಮಾತನ್ನು ಮುಗಿಸುವಷ್ಟರಲ್ಲೇ ಮಧ್ಯಪ್ರವೇಶಿಸಿದ ಮೇರಿ ಕೋಮ್, ‘ಆದರೆ ನನ್ನಂತೆ ಯಾರೂ ಸಾಧನೆ ಮಾಡಿಲ್ಲ’ ಎಂದು ತಮ್ಮ ಬಾಕ್ಸಿಂಗ್ ಸಾಧನೆಯನ್ನು ಎತ್ತಿ ತೋರಿಸಿದರು. ಮೇರಿ ಕೋಮ್ ಅವರ ಕ್ರೀಡಾ ಸಾಧನೆ ನಿಜಕ್ಕೂ ಅಪಾರವಾದದ್ದು. ಅವರು 6 ಬಾರಿ ವಿಶ್ವ ಚಾಂಪಿಯನ್ ಆಗಿದ್ದಾರೆ, ಒಲಿಂಪಿಕ್ ಪದಕ ಗೆದ್ದ ಭಾರತದ ಮೊದಲ ಮಹಿಳಾ ಬಾಕ್ಸರ್ ಹಾಗೂ ವಿಶ್ವದಲ್ಲೇ 6 ಬಾರಿ ವಿಶ್ವ ಚಾಂಪಿಯನ್ಷಿಪ್ ಗೆದ್ದ ಏಕೈಕ ಬಾಕ್ಸರ್ ಎಂಬ ಹೆಗ್ಗಳಿಕೆಗೆ ಪಾತ್ರರಾಗಿದ್ದಾರೆ. ಆದಾಗ್ಯೂ, ಸಾನಿಯಾ ಮಿರ್ಜಾ ಮತ್ತು ಸೈನಾ ನೆಹ್ವಾಲ್ ಅವರಂತಹ ಸಹ ಕ್ರೀಡಾಪಟುಗಳನ್ನು ಕನಿಷ್ಠವಾಗಿ ಕಂಡಂತೆ ಆಡಿದ ಈ ಮಾತುಗಳು ವೀಕ್ಷಕರಿಗೆ ಇಷ್ಟವಾಗಲಿಲ್ಲ.
Wtf 😭 Qazi giving salute to mary kom #BiggBoss20 pic.twitter.com/ALtS8lNbNd
— 𝙁𝙧𝙤𝙯𝙚𝙣 🥶 (@Frozen_pratik) September 11, 2026
ಈ ವಿಡಿಯೋ ತುಣುಕು ಎಕ್ಸ್ (ಟ್ವಿಟರ್) ಹಾಗೂ ಇನ್ಸ್ಟಾಗ್ರಾಮ್ಗಳಲ್ಲಿ ವೈರಲ್ ಆಗುತ್ತಿದ್ದಂತೆಯೇ ವೀಕ್ಷಕರು ಮೇರಿ ಕೋಮ್ ಅವರ ನಡವಳಿಕೆಯನ್ನು ಖಂಡಿಸಿದರು. ಕಾಜಿ ತೌಕೀರ್ ಅವರು ದೇಶದ ಪ್ರಮುಖ ಮಹಿಳಾ ಕ್ರೀಡಾಪಟುಗಳನ್ನು ಗೌರವಿಸುತ್ತಿದ್ದಾಗ, ಮೇರಿ ಕೋಮ್ ಅನಗತ್ಯವಾಗಿ ಅದನ್ನು ತಮ್ಮ ಸಾಧನೆಯೊಂದಿಗೆ ಹೋಲಿಸಿಕೊಂಡು ಇತರರನ್ನು ಕೀಳಾಗಿ ಕಂಡಿದ್ದಾರೆ ಎಂದು ನೆಟ್ಟಿಗರು ಟೀಕಿಸಿದರು. ‘ಸ್ವಂತ ಸಾಧನೆಯ ಬಗ್ಗೆ ಹೆಮ್ಮೆ ಇರುವುದು ಸರಿ, ಆದರೆ ಇತರ ಸಾಧಕರನ್ನು ಕಡೆಗಣಿಸುವುದು ಸರಿಯಲ್ಲ’ ಎಂದು ಹಲವರು ಕಾಮೆಂಟ್ ಮಾಡಿದ್ದಾರೆ.
ಇದನ್ನೂ ಓದಿ: ಮೇರಿ ಕೋಮ್ ವೈಯಕ್ತಿಕ ಬದುಕಿನಲ್ಲಿ ಬಿರುಕು; ವಿಚ್ಛೇದನ ಖಚಿತಪಡಿಸಿದ ಬಾಕ್ಸರ್
ಕ್ಷಮೆಯಾಚಿಸಿದ ಮೇರಿ ಕೋಮ್ ತಂಡ:
ಸಾಮಾಜಿಕ ಜಾಲತಾಣಗಳಲ್ಲಿ ಟೀಕೆಗಳು ತೀವ್ರಗೊಳ್ಳುತ್ತಿದ್ದಂತೆಯೇ, ಮೇರಿ ಕೋಮ್ ಅವರ ಅಧಿಕೃತ ಸೋಷಿಯಲ್ ಮೀಡಿಯಾ ಖಾತೆಯ ಮೂಲಕ ಅವರ ತಂಡವು ಸ್ಪಷ್ಟನೆ ನೀಡಿದೆ. ‘ಮೇರಿ ಕೋಮ್ ಅವರ ಮಾತುಗಳನ್ನು ತಪ್ಪಾಗಿ ಅರ್ಥೈಸಲಾಗಿದ್ದರೆ ನಾವು ಕ್ಷಮೆಯಾಚಿಸುತ್ತೇವೆ. ಮತ್ತೊಬ್ಬ ಕ್ರೀಡಾಪಟುವಿನ ಸಾಧನೆಯನ್ನು ಕೀಳಾಗಿ ಕಾಣುವ ಅಥವಾ ಹೋಲಿಕೆ ಮಾಡುವ ಯಾವುದೇ ದುರುದ್ದೇಶ ಮೇರಿ ಅವರಿಗೆ ಇರಲಿಲ್ಲ. ಭಾರತವನ್ನು ಪ್ರತಿನಿಧಿಸುವ ಮತ್ತು ಕ್ರೀಡೆಗಾಗಿ ತಮ್ಮ ಶ್ರಮವನ್ನು ಮುಡಿಪಾಗಿಡುವ ಪ್ರತಿಯೊಬ್ಬ ಕ್ರೀಡಾಪಟುವಿನ ಮೇಲೆಯೂ ಮೇರಿ ಅವರಿಗೆ ಅಪಾರ ಗೌರವವಿದೆ’ ಎಂದು ಪ್ರಕಟಣೆಯಲ್ಲಿ ತಿಳಿಸಲಾಗಿದೆ.
‘ಪ್ರತಿಯೊಬ್ಬ ಕ್ರೀಡಾಪಟುವಿನ ಪಯಣವೂ ವಿಶಿಷ್ಟವಾದದ್ದು, ಪ್ರತಿಯೊಂದು ಸಾಧನೆಯೂ ಮುಖ್ಯವಾದದ್ದು ಮತ್ತು ಭಾರತಕ್ಕೆ ಬರುವ ಪ್ರತಿಯೊಂದು ಪದಕವೂ ದೇಶ ಹೆಮ್ಮೆಪಡುವಂತೆ ಮಾಡುತ್ತದೆ’ ಎಂದು ಮೇರಿ ಕೋಮ್ ಅವರ ತಂಡ ಹೇಳಿದೆ.
ಇನ್ನಷ್ಟು ಸಿನಿಮಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ.
