ಮಕ್ಕಳಲ್ಲಿ ಹೆಚ್ಚುತ್ತಿರುವ ಕೈ, ಕಾಲು, ಬಾಯಿ ಸೋಂಕಿನ ಲಕ್ಷಣಗಳು ಹೇಗಿರುತ್ತವೆ, ಇದನ್ನು ತಡೆಗಟ್ಟಲು ಏನು ಮಾಡಬೇಕು ತಿಳಿದುಕೊಳ್ಳಿ

ರಾಜ್ಯದಲ್ಲಿ ಹವಾಮಾನ ವೈಪರೀತ್ಯದ ಪರಿಣಾಮ ಸಾಂಕ್ರಾಮಿಕ ರೋಗಗಳು ಕಾಣಿಸಿಕೊಳ್ಳುತ್ತಿದೆ. ಅದರಲ್ಲಿಯೂ ಮಕ್ಕಳಲ್ಲಿ ತೀವ್ರವಾಗಿ ಹರಡುತ್ತಿರುವ ಕೈ, ಕಾಲು ಮತ್ತು ಬಾಯಿ ರೋಗದ ಬಗ್ಗೆ (Hand, Foot and Mouth Disease) ಪಾಲಕರು ಸರಿಯಾಗಿ ತಿಳಿದುಕೊಂಡು ಮಕ್ಕಳ ಆರೋಗ್ಯ ಕಾಪಾಡುವುದು ಬಹಳ ಮುಖ್ಯವಾಗಿದೆ. ಇದು ಕಾಕ್ಸಾಕಿ ವೈರಸ್ (Coxsackie virus) ಅಥವಾ ಇತರ ಎಂಟರೋವೈರಸ್‌ಗಳಿಂದ ಉಂಟಾಗುವ ಸಾಂಕ್ರಾಮಿಕ ರೋಗವಾಗಿದ್ದು, ಸಾಮಾನ್ಯವಾಗಿ 5 ವರ್ಷಕ್ಕಿಂತ ಕಡಿಮೆ ವಯಸ್ಸಿನ ಮಕ್ಕಳಲ್ಲಿ ಹೆಚ್ಚಾಗಿ ಕಂಡುಬರುತ್ತದೆ, ಆದರೆ ಕೆಲವೊಮ್ಮೆ ದೊಡ್ಡ ಮಕ್ಕಳಲ್ಲೂ ಹಾಗೂ ವಯಸ್ಕರಲ್ಲೂ ಕಾಣಿಸಬಹುದು. ಈ ಕುರಿತು ಹೆಚ್ಚಿನ ಮಾಹಿತಿಯನ್ನು ಬೆಂಗಳೂರು ಎಸ್.ಡಿ.ಎಂ. ಇನ್ಸ್ಟಿಟ್ಯೂಟ್ ಆಫ್ ಆಯುರ್ವೇದ ಮತ್ತು ಆಸ್ಪತ್ರೆಯ ಪ್ರಾಧ್ಯಾಪಕರು ಹಾಗೂ ವಿಭಾಗದ ಮುಖ್ಯಸ್ಥರಾದ ಡಾ. ರೀನಾ ಕುಲಕರ್ಣಿ ಮತ್ತು ಸಹ ಪ್ರಾಧ್ಯಾಪಕರಾಗಿರುವ ಡಾ. ಶ್ರೀಲಕ್ಷ್ಮಿ ಅವರು ಟಿವಿ9 ಕನ್ನಡಕ್ಕೆ ನೀಡಿದ್ದು ಈ ರೋಗ ಹೇಗೆ ಹರಡುತ್ತದೆ, ಇದರ ಲಕ್ಷಣಗಳೇನು, ತಡೆಗಟ್ಟಲು ಏನು ಮಾಡಬೇಕು ಎಂಬುದರ ಬಗ್ಗೆ ವಿವರವಾದ ಮಾಹಿತಿ ನೀಡಿದ್ದಾರೆ.

ರೋಗ ಹೇಗೆ ಹರಡುತ್ತದೆ?

ಡಾ. ರೀನಾ ಕುಲಕರ್ಣಿ ಮತ್ತು ಡಾ. ಶ್ರೀಲಕ್ಷ್ಮಿ ಅವರು ಹೇಳುವ ಪ್ರಕಾರ, ಈ ರೋಗವು ಸೋಂಕಿತ ಮಗುವಿನ ಉಗುಳು, ಮೂಗಿನ ಸ್ರಾವ, ಕೆಮ್ಮು-ಸೀನುವ ಹನಿಗಳು, ಬಾಯಿಯ ಅಥವಾ ಚರ್ಮದ ಗುಳ್ಳೆಗಳಲ್ಲಿರುವ ದ್ರವ ಹಾಗೂ ಮಲದ ಸಂಪರ್ಕದಿಂದ ಮತ್ತೊಬ್ಬರಿಗೆ ಹರಡುತ್ತದೆ. ಮಕ್ಕಳ ಆಟಿಕೆಗಳು, ಪಾತ್ರೆಗಳು ಹಾಗೂ ಆಗಾಗ ಸ್ಪರ್ಶಿಸುವ ವಸ್ತುಗಳ ಮೂಲಕವೂ ಸೋಂಕು ಹರಡಬಹುದು. ಇದು ಸಾಮಾನ್ಯವಾಗಿ ಗಂಭೀರವಾದ ಕಾಯಿಲೆಯಲ್ಲದಿದ್ದರೂ ಅತ್ಯಂತ ಸಾಂಕ್ರಾಮಿಕವಾಗಿದ್ದು, ಶಾಲೆ, ಅಂಗನವಾಡಿಗಳು, ಡೇ-ಕೇರ್ ಕೇಂದ್ರಗಳು ಹಾಗೂ ಆಟದ ಮೈದಾನಗಳಂತಹ ಮಕ್ಕಳ ಗುಂಪು ಸೇರುವ ಸ್ಥಳಗಳಲ್ಲಿ ವೇಗವಾಗಿ ಹರಡುತ್ತದೆ.

ಕೈ-ಕಾಲು-ಬಾಯಿ ರೋಗದ ಲಕ್ಷಣಗಳು:

• ಜ್ವರ (ಸಾಮಾನ್ಯವಾಗಿ ಆರಂಭಿಕ ಲಕ್ಷಣ)
• ಗಂಟಲು ನೋವು
• ಹಸಿವು ಕಡಿಮೆಯಾಗುವುದು
• ಆಯಾಸ ಮತ್ತು ಅಸ್ವಸ್ಥತೆ
• ಬಾಯಿಯ ಒಳಭಾಗ, ನಾಲಿಗೆ, ಒಸಡು ಮತ್ತು ಕೆನ್ನೆಯ ಒಳಭಾಗದಲ್ಲಿ ನೋವಿನ ಸಣ್ಣ ಗುಳ್ಳೆಗಳು ಅಥವಾ ಹುಣ್ಣುಗಳು
• ಕೈಗಳ ಅಂಗೈ, ಕಾಲಿನ ಅಡಿಭಾಗ ಹಾಗೂ ಕೆಲವೊಮ್ಮೆ ಸೊಂಟ, ಮೊಣಕಾಲು ಅಥವಾ ಬೆನ್ನು ಭಾಗದಲ್ಲಿ ಕೆಂಪು ಗುಳ್ಳೆಗಳು ಅಥವಾ ನೀರಿನ ಗುಳ್ಳೆಗಳು ಕಾಣಿಸಿಕೊಳ್ಳುತ್ತವೆ.
• ಚಿಕ್ಕ ಮಕ್ಕಳಲ್ಲಿ ಕಿರಿಕಿರಿ, ಅಳುವುದು ಮತ್ತು ಬಾಯಿನ ನೋವಿನಿಂದ ಆಹಾರ ಅಥವಾ ನೀರು ಕುಡಿಯಲು ನಿರಾಕರಿಸುವುದು
  ಕೆಲವೊಮ್ಮೆ ವಾಂತಿ ಅಥವಾ ಭೇದಿ

ಇದನ್ನೂ ಓದಿ: ಪಾಲಕರೇ ಗಮನಿಸಿ: ಮಕ್ಕಳಲ್ಲಿ ಹೆಚ್ಚುತ್ತಿದೆ ‘ಕೈ, ಕಾಲು, ಬಾಯಿ’ ಸೋಂಕು!

ಈ ರೋಗಕ್ಕೆ ವಿಶೇಷ ವೈರಸ್ ವಿರೋಧಿ ಔಷಧಿ ಇಲ್ಲ. ಹೆಚ್ಚಿನ ಮಕ್ಕಳು 7 ರಿಂದ 10 ದಿನಗಳಲ್ಲಿ ಸಂಪೂರ್ಣವಾಗಿ ಚೇತರಿಸಿಕೊಳ್ಳುತ್ತಾರೆ. ಜ್ವರ ಮತ್ತು ನೋವನ್ನು ಕಡಿಮೆ ಮಾಡುವ ಔಷಧಿಗಳನ್ನು ವೈದ್ಯರ ಸಲಹೆಯಂತೆ ನೀಡಬೇಕು. ಸಾಕಷ್ಟು ದ್ರವ ಆಹಾರ, ನೀರು, ತಂಪಾದ ಮೃದುವಾದ ಆಹಾರವನ್ನು ನೀಡುವುದು ಮುಖ್ಯ. ಮಗು ಸಂಪೂರ್ಣ ಗುಣಮುಖವಾಗುವವರೆಗೆ ಖಾರ, ಹುಳಿ ಹಾಗೂ ಮಸಾಲೆಯುಕ್ತ ಆಹಾರವನ್ನು ನೀಡಬಾರದು.

ತಡೆಗಟ್ಟುವ ಕ್ರಮಗಳು

• ಮಕ್ಕಳ ಕೈಗಳನ್ನು ಆಗಾಗ ಸಾಬೂನಿನಿಂದ ತೊಳೆಯಬೇಕು.
• ಆಟಿಕೆಗಳು ಮತ್ತು ಪದೇ ಪದೇ ಮುಟ್ಟುವ ವಸ್ತುಗಳನ್ನು ಸ್ವಚ್ಛವಾಗಿಡಬೇಕು.
• ಸೋಂಕಿತ ಮಗುವನ್ನು ಸಂಪೂರ್ಣ ಗುಣಮುಖವಾಗುವವರೆಗೆ ಇತರ ಮಕ್ಕಳಿಂದ ದೂರವಿಡಬೇಕು.
• ಆಹಾರ ಸೇವಿಸುವ ಮೊದಲು ಮತ್ತು ಶೌಚಾಲಯದ ನಂತರ ಕೈ ತೊಳೆಯುವ ಅಭ್ಯಾಸ ಬೆಳೆಸಬೇಕು.
• ವೈಯಕ್ತಿಕ ಬಟ್ಟೆ ಮತ್ತು ಟವೆಲ್‌ಗಳನ್ನು ಹಂಚಿಕೊಳ್ಳುವುದನ್ನು ತಪ್ಪಿಸಬೇಕು.

ಗಮನಿಸಿ: ಹೆಚ್ಚಿನ ಮಕ್ಕಳಲ್ಲಿ ಈ ರೋಗವು 7–10 ದಿನಗಳಲ್ಲಿ ವೈದ್ಯರು ನೀಡುವ ಔಷಧಿಗಳ ಮೂಲಕ ತಾನಾಗಿಯೇ ಗುಣವಾಗುತ್ತದೆ. ಆದರೆ ತೀವ್ರ ಜ್ವರ, ಅತಿಯಾದ ನಿದ್ರೆ, ತೀವ್ರ ಆಯಾಸ, ಉಸಿರಾಟದ ತೊಂದರೆ ಕಂಡುಬಂದರೆ ತಡಮಾಡದೆ ತಕ್ಷಣ ವೈದ್ಯರನ್ನು ಸಂಪರ್ಕಿಸಬೇಕು.

ಆರೋಗ್ಯ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ