Covid-19: ಉಲ್ಬಣಗೊಂಡ ಕೊರೋನಾ, ಯಾವ ಆಹಾರ ಸೇವಿಸಬೇಕು, ಸೇವಿಸಬಾರದು; ಸರ್ಕಾರದ ಮಾರ್ಗಸೂಚಿ ಇಲ್ಲಿದೆ

ಬೆಂಗಳೂರು: ಬೇಸಿಗೆಯ ಆರಂಭದಲ್ಲಿಯೇ ಜ್ವರ, ಗಂಭೀರವಾದ ಉಸಿರಾಟದ ಕಾಯಿಲೆ ಮತ್ತು ಕೋವಿಡ್ -19 (Covid-19 Cases In Karnataka) ನಂತಹ ಸಾಂಕ್ರಾಮಿಕ ರೋಗಗಳು ಉಲ್ಬಣಗೊಂಡ ಹಿನ್ನೆಲೆ ಕರ್ನಾಟಕ ಆರೋಗ್ಯ ಮತ್ತು ಕುಟುಂಬ ಕಲ್ಯಾಣ ಇಲಾಖೆಯು (Health And Family welfare Department) ಸಾರ್ವಜನಿಕರಿಗೆ ಪೌಷ್ಠಿಕಾಂಶದ ಸೇವನೆ ಸೇರಿದಂತೆ ಇತರೆ ಮಾರ್ಗಸೂಚಿಗಳನ್ನು (Covid Guidelines) ಶನಿವಾರ ಬಿಡುಗಡೆ ಮಾಡಿದೆ. ಆರೋಗ್ಯಕರ ಆಹಾರ ಮತ್ತು ಜೀವನಶೈಲಿ ಅಭ್ಯಾಸಗಳ ಮೂಲಕ ವೈರಸ್ ವಿರುದ್ಧ ಹೋರಾಡಲು ಮತ್ತು ನಿರ್ವಹಿಸಲು ಸೋಂಕಿತ ವ್ಯಕ್ತಿಗೆ ಸೂಚಿಸಲಾಗಿದೆ ಎಂದು ರಾಜ್ಯ ಆರೋಗ್ಯ ಆಯುಕ್ತರ ಕಚೇರಿ ಪೌಷ್ಟಿಕಾಂಶದ ಸಲಹೆಯನ್ನು ನೀಡಿದೆ. ಕೋವಿಡ್ -19 ವಿರುದ್ಧದ ಹೋರಾಟದಲ್ಲಿ ಸೂಕ್ತವಾದ ಪೋಷಣೆ ಅವಶ್ಯವಾಗಿದೆ. ರೋಗನಿರೋಧಕ ಶಕ್ತಿಯನ್ನು ಹೆಚ್ಚಿಸಲು ಮತ್ತು ದೀರ್ಘಕಾಲದ ಕಾಯಿಲೆಗಳು ಹಾಗೂ ಸಾಂಕ್ರಾಮಿಕ ರೋಗಗಳ ಅಪಾಯವನ್ನು ಕಡಿಮೆ ಮಾಡಲು ಜನರು ಸಮತೋಲಿತ ಆಹಾರವನ್ನು ಸೇವಿಸಬೇಕು ಎಂದು ಆರೋಗ್ಯ ಇಲಾಖೆ ಸಲಹೆ ಸೂಚನೆ ನೀಡಿದೆ.

ದೇಹಕ್ಕೆ ಜೀವಸತ್ವಗಳು, ಖನಿಜಗಳು, ಆಹಾರದ ಫೈಬರ್, ಪ್ರೋಟೀನ್ ಮತ್ತು ಉತ್ಕರ್ಷಣ ನಿರೋಧಕಗಳನ್ನು ಪಡೆಯಲು ಪ್ರತಿದಿನ ವಿವಿಧ ತಾಜಾ ಮತ್ತು ಸಂಸ್ಕರಿಸದ ಆಹಾರಗಳನ್ನು ಸೇವಿಸುವುದು ಕಡ್ಡಾಯವಾಗಿದೆ. ದೇಹವನ್ನು ಹೈಡ್ರೇಟ್ ಮಾಡಲು ನೀರಿನ ಸೇವನೆಯು ಸಾಕಷ್ಟು ಇರಬೇಕು. ಅಧಿಕ ತೂಕ, ಸ್ಥೂಲಕಾಯತೆ, ಹೃದ್ರೋಗ, ಪಾರ್ಶ್ವವಾಯು, ಮಧುಮೇಹ ಮತ್ತು ಕೆಲವು ರೀತಿಯ ಕ್ಯಾನ್ಸರ್ ಅಪಾಯವನ್ನು ಗಮನಾರ್ಹವಾಗಿ ಕಡಿಮೆ ಮಾಡಲು ಸಕ್ಕರೆ, ಕೊಬ್ಬು ಮತ್ತು ಉಪ್ಪನ್ನು ತಪ್ಪಿಸಬೇಕು ಎಂದು ಮಾರ್ಗಸೂಚಿಯಲ್ಲಿ ತಿಳಿಸಿದೆ.

ತಾಜಾ ಹಣ್ಣುಗಳು ಮತ್ತು ತರಕಾರಿಗಳು, ದ್ವಿದಳ ಧಾನ್ಯಗಳು (ಉದಾಹರಣೆಗೆ: ಬೀನ್ಸ್), ಬೀಜಗಳು ಮತ್ತು ಧಾನ್ಯಗಳು (ಉದಾ: ಮೆಕ್ಕೆಜೋಳ, ರಾಗಿ, ಓಟ್ಸ್, ಕಂದು ಅಕ್ಕಿ, ಅಥವಾ ಆಲೂಗೆಡ್ಡೆ, ಗೆಣಸು) ಮತ್ತು ಮಾಂಸ ಆಹಾರಗಳು (ಮೀನು, ಮೊಟ್ಟೆ) ಹಾಲು ಸೇವಿಸಬಹುದು ಎಂದು ಇಲಾಖೆ ಹೊರಡಿಸಿದ ಮಾರ್ಗಸೂಚಿಯಲ್ಲಿ ತಿಳಿಸಿದೆ.

ಇದನ್ನೂ ಓದಿ: Covid-19 Guidelines: ಹೊಸ ಮಾರ್ಗಸೂಚಿ ಬಿಡುಗಡೆ ಮಾಡಿದ ಕೇಂದ್ರ ಸರ್ಕಾರ

ಸಲಹೆಯ ಪ್ರಕಾರ, ಮಾಂಸ, ಮೀನು, ಮೊಟ್ಟೆ ಮತ್ತು ಹಾಲನ್ನು ಕುಟುಂಬದ ಅಭ್ಯಾಸದ ಪ್ರಕಾರ ಮಿತವಾಗಿ ಸೇವಿಸಬಹುದು. ತಾಜಾ ಹಣ್ಣಿನ ರಸವು ಪಾನೀಯಕ್ಕೆ ಅತ್ಯುತ್ತಮ ಆಯ್ಕೆಯಾಗಿದೆ, ಆದರೆ ತಾಜಾ ಹಣ್ಣುಗಳು ಮತ್ತು ಕಚ್ಚಾ ತರಕಾರಿಗಳ ಸೇವನೆ ಸಕ್ಕರೆ, ಕೊಬ್ಬು ಅಥವಾ ಉಪ್ಪು ಅಧಿಕವಾಗಿರುವ ಆಹಾರಕ್ಕಿಂತ ಉತ್ತಮವಾಗಿದೆ.

ಪ್ರತಿದಿನ ಮಧ್ಯಮ ಪ್ರಮಾಣದ ಕೊಬ್ಬು ಮತ್ತು ಎಣ್ಣೆಯನ್ನು ಸೇವಿಸಿ. ಸ್ಯಾಚುರೇಟೆಡ್ ಕೊಬ್ಬಿನ ಬದಲಿಗೆ (ಕೊಬ್ಬಿನ ಮಾಂಸ, ಬೆಣ್ಣೆ, ತೆಂಗಿನ ಎಣ್ಣೆ, ಕೆನೆ, ಚೀಸ್, ತುಪ್ಪ ಮತ್ತು ಕೊಬ್ಬಿನಲ್ಲಿ ಕಂಡುಬರುತ್ತದೆ) ಅಪರ್ಯಾಪ್ತ ಕೊಬ್ಬನ್ನು (ಮೀನು, ಆವಕಾಡೊಗಳು, ಬೀಜಗಳು, ಆಲಿವ್ ಎಣ್ಣೆ, ಸೋಯಾ ಮತ್ತು ಸೂರ್ಯಕಾಂತಿ ಎಣ್ಣೆಯಲ್ಲಿ ಕಂಡುಬರುತ್ತದೆ) ಸೇವಿಸಬಹುದು ಎಂದು ಮಾರ್ಗಸೂಚಿಯಲ್ಲಿ ಸಲಹೆ ನೀಡಲಾಗಿದೆ.

ಮತ್ತೊಂದು ಸಲಹೆಯೆಂದರೆ, ಕೆಂಪು ಮಾಂಸಕ್ಕಿಂತ ಬಿಳಿ ಮಾಂಸ ಮತ್ತು ಮೀನುಗಳನ್ನು ಆರಿಸುವುದು. ಸಂಸ್ಕರಿಸಿದ ಮಾಂಸವನ್ನು ತಪ್ಪಿಸಿ. ಕಡಿಮೆ ಕೊಬ್ಬಿನ ಹಾಲು ಮತ್ತು ಡೈರಿ ಉತ್ಪನ್ನಗಳನ್ನು ಆಯ್ಕೆಮಾಡಿ. ಸಂಸ್ಕರಿಸಿದ ಆಹಾರ, ಫಾಸ್ಟ್ ಫುಡ್, ಲಘು ಆಹಾರ, ಕರಿದ ಆಹಾರ, ಹೆಪ್ಪುಗಟ್ಟಿದ ಪಿಜ್ಜಾ, ಕುಕೀಸ್, ಮಾರ್ಗರೀನ್, ಕೈಗಾರಿಕವಾಗಿ ಉತ್ಪತ್ತಿಯಾಗುವ ಟ್ರಾನ್ಸ್ ಕೊಬ್ಬನ್ನು ತಪ್ಪಿಸಿ ಮತ್ತು ಮನೆಯಲ್ಲಿ ಮಾಡಿದ ಉತ್ತಮ ಆಹಾರವನ್ನೇ ಸೇವನೆ ಮಾಡುವಂತೆ ಸಲಹೆ ನೀಡಲಾಗಿದೆ.

ರಾಜ್ಯದ ಮತ್ತಷ್ಟು ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ