ಅಪಘಾತಗಳ ರಾಜಧಾನಿಯಾದ ಬೆಂಗಳೂರು: 5 ವರ್ಷಗಳಲ್ಲಿ ಆ್ಯಕ್ಸಿಡೆಂಟ್ ಪ್ರಮಾಣ ಶೇ 70ರಷ್ಟು ಹೆಚ್ಚಳ

ಬೆಂಗಳೂರು, ಅಕ್ಟೋಬರ್ 26: ಬೆಂಗಳೂರಿನಲ್ಲಿ ರಸ್ತೆ ಅಪಘಾತಗಳ ಸಂಖ್ಯೆ ಆತಂಕಕಾರಿಯಾಗಿ ಹೆಚ್ಚುತ್ತಿರುವುದು ಬೆಂಗಳೂರು ಟ್ರಾಫಿಕ್ ಪೊಲೀಸರ ಅಂಕಿಅಂಶಗಳಿಂದ ತಿಳಿದುಬಂದಿದೆ. ಕಳೆದ ಐದು ವರ್ಷಗಳಲ್ಲಿ ನಗರದಲ್ಲಿ ರಸ್ತೆ ಅಪಘಾತಗಳ ಸಂಖ್ಯೆ ಸುಮಾರು ಶೇ 70ರಷ್ಟು ಏರಿಕೆಯಾಗಿದೆ. 2021ರಲ್ಲಿ 3,213 ಅಪಘಾತಗಳು ಸಂಭವಿಸಿದ್ದರೆ, 2025ರಲ್ಲಿ ಈ ಸಂಖ್ಯೆ 5,459ಕ್ಕೆ ತಲುಪಿದೆ. ಇದೇ ಅವಧಿಯಲ್ಲಿ ರಸ್ತೆ ಅಪಘಾತಗಳಿಂದ ಸಂಭವಿಸಿದ ಸಾವುಗಳ ಸಂಖ್ಯೆಯೂ ಸುಮಾರು ಶೇ 53ರಷ್ಟು ಹೆಚ್ಚಾಗಿದೆ.

5 ವರ್ಷಗಳಲ್ಲಿ ಅಪಘಾತಗಳ ಸಂಖ್ಯೆ ಗಣನೀಯ ಏರಿಕೆ

ಬೆಂಗಳೂರು ಸಂಚಾರ ಪೊಲೀಸರ ಅಂಕಿಅಂಶಗಳ ಪ್ರಕಾರ, 2021ರಲ್ಲಿ ನಗರದಲ್ಲಿ 3,213 ರಸ್ತೆ ಅಪಘಾತಗಳು ದಾಖಲಾಗಿದ್ದವು. 2022ರಲ್ಲಿ ಈ ಸಂಖ್ಯೆ ಶೇ 19ರಷ್ಟು ಹೆಚ್ಚಾಗಿ 3,822ಕ್ಕೆ ಏರಿಕೆಯಾಯಿತು. 2023ರಲ್ಲಿ ಅಪಘಾತಗಳ ಸಂಖ್ಯೆ 4,974ಕ್ಕೆ ತಲುಪಿತು. 2024ರಲ್ಲಿ ಸ್ವಲ್ಪ ಇಳಿಕೆಯಾಗಿ 4,769 ಅಪಘಾತಗಳು ಸಂಭವಿಸಿದ್ದರೆ, 2025ರಲ್ಲಿ ಮತ್ತೆ ಏರಿಕೆಯಾಗಿ 5,459ಕ್ಕೆ ತಲುಪಿವೆ.

ಅಪಘಾತಗಳ ಸಂಖ್ಯೆಯಲ್ಲಿನ ಏರಿಕೆಯ ಜತೆಗೆ ಸಾವಿನ ಸಂಖ್ಯೆಯೂ ಹೆಚ್ಚಾಗಿದೆ. 2021ರಲ್ಲಿ ರಸ್ತೆ ಅಪಘಾತಗಳಿಂದ 654 ಮಂದಿ ಮೃತಪಟ್ಟಿದ್ದರು. 2022ರಲ್ಲಿ 772 ಮಂದಿ ಹಾಗೂ 2023ರಲ್ಲಿ 915 ಮಂದಿ ಸಾವಿಗೀಡಾಗಿದ್ದರು. 2024ರಲ್ಲಿ ಸಾವಿನ ಸಂಖ್ಯೆ 894ಕ್ಕೆ ಇಳಿದಿದ್ದರೂ, 2025ರಲ್ಲಿ ಸುಮಾರು ಶೇ 12ರಷ್ಟು ಏರಿಕೆಯಾಗಿ 999 ಮಂದಿ ಮೃತಪಟ್ಟಿದ್ದಾರೆ.

2026ರ ಮೊದಲ 9 ತಿಂಗಳಲ್ಲಿ 836 ಸಾವು

2026ರ ಜನವರಿಯಿಂದ ಸೆಪ್ಟೆಂಬರ್‌ವರೆಗಿನ ಅಂಕಿಅಂಶಗಳ ಪ್ರಕಾರ, ಬೆಂಗಳೂರಿನಲ್ಲಿ 4,702 ರಸ್ತೆ ಅಪಘಾತಗಳು ಸಂಭವಿಸಿವೆ. ಇವುಗಳಲ್ಲಿ 808 ಅಪಘಾತಗಳು ಪ್ರಾಣಾಪಾಯಕ್ಕೆ ಕಾರಣವಾಗಿವೆ. ಒಟ್ಟು 836 ಮಂದಿ ಮೃತಪಟ್ಟಿದ್ದು, 4,111 ಮಂದಿ ಗಾಯಗೊಂಡಿದ್ದಾರೆ. ಕಳೆದ ಐದು ವರ್ಷಗಳ ಅಂಕಿಅಂಶಗಳನ್ನು ಗಮನಿಸಿದರೆ, ಅಪಘಾತಗಳ ಸಂಖ್ಯೆ ಮತ್ತು ಸಾವಿನ ಪ್ರಮಾಣ ಎರಡರಲ್ಲೂ ಏರಿಕೆ ಕಂಡುಬಂದಿದೆ.

ಅತಿವೇಗ, ತಪ್ಪು ದಿಕ್ಕಿನಲ್ಲಿ ಚಾಲನೆ ಪ್ರಮುಖ ಕಾರಣ

ಅತಿವೇಗದ ಚಾಲನೆ, ಅಪಾಯಕಾರಿ ರೀತಿಯಲ್ಲಿ ಲೇನ್ ಬದಲಿಸುವುದು, ವಿರುದ್ಧ ದಿಕ್ಕಿನಲ್ಲಿ ವಾಹನ ಚಲಾಯಿಸುವುದು ಮತ್ತು ದ್ವಿಚಕ್ರ ವಾಹನಗಳ ಅಪಘಾತಗಳು ರಸ್ತೆ ಅಪಘಾತಗಳ ಹೆಚ್ಚಳಕ್ಕೆ ಪ್ರಮುಖ ಕಾರಣಗಳಾಗಿವೆ ಎಂದು ಪೊಲೀಸ್ ಮಹಾನಿರ್ದೇಶಕ ಎಂ.ಎ. ಸಲೀಂ ತಿಳಿಸಿದ್ದಾರೆ. ಬೆಂಗಳೂರಿನ ವಿಸ್ತಾರವಾದ ರಸ್ತೆ ಜಾಲ, ಮೋಟಾರ್‌ಸೈಕಲ್‌ಗಳ ಹೆಚ್ಚಿನ ಬಳಕೆ, ಹೊರವಲಯಗಳಲ್ಲಿ ಹೆಚ್ಚುತ್ತಿರುವ ಅಭಿವೃದ್ಧಿ ಹಾಗೂ ವೇಗವಾಗಿ ಸಂಚರಿಸುವ ವಾಹನಗಳು ಮತ್ತು ಪಾದಚಾರಿಗಳ ನಡುವಿನ ಸಂಘರ್ಷವೂ ಅಪಘಾತಗಳಿಗೆ ಕಾರಣವಾಗುತ್ತಿವೆ ಎಂದು ಅವರು ವಿವರಿಸಿದ್ದಾರೆ.

2025 ಮತ್ತು 2026ರಲ್ಲಿ ಅಪಘಾತಗಳ ಸಂಖ್ಯೆ ಹೆಚ್ಚಾಗಿರುವುದಕ್ಕೆ ಬೆಂಗಳೂರು ನಗರ ಪೊಲೀಸ್ ವ್ಯಾಪ್ತಿಯ ವಿಸ್ತರಣೆಯೂ ಭಾಗಶಃ ಕಾರಣವಾಗಿರಬಹುದು ಎಂದು ಅವರು ತಿಳಿಸಿದ್ದಾರೆ. ಈ ಹಿಂದೆ ಬೆಂಗಳೂರು ಗ್ರಾಮಾಂತರ ಪೊಲೀಸರ ವ್ಯಾಪ್ತಿಯಲ್ಲಿದ್ದ ಹೆಬ್ಬಗೋಡಿ, ಕುಂಬಳಗೋಡು, ಅವಲಹಳ್ಳಿ, ರಾಜಾನುಕುಂಟೆ ಮತ್ತು ಮಡನಾಯಕನಹಳ್ಳಿ ಪೊಲೀಸ್ ಠಾಣೆಗಳ ವ್ಯಾಪ್ತಿಯನ್ನು ಬೆಂಗಳೂರು ನಗರ ಪೊಲೀಸ್ ವ್ಯಾಪ್ತಿಗೆ ಸೇರಿಸಲಾಗಿದೆ.

ಶೇ 30.6ರಷ್ಟು ವಾಹನಗಳು ಅತಿವೇಗದಲ್ಲಿ ಸಂಚಾರ

ನಿಮ್ಹಾನ್ಸ್, ಜಾನ್ಸ್ ಹಾಪ್ಕಿನ್ಸ್ ವಿಶ್ವವಿದ್ಯಾಲಯದ ಇಂಜುರಿ ರಿಸರ್ಚ್ ಯುನಿಟ್ ಮತ್ತು ಬೆಂಗಳೂರು ಸಂಚಾರ ಪೊಲೀಸರು ನಡೆಸಿದ ಅಧ್ಯಯನದಲ್ಲಿ ನಗರದ 25 ಸ್ಥಳಗಳಲ್ಲಿ ವಾಹನಗಳ ವೇಗವನ್ನು ಪರಿಶೀಲಿಸಲಾಗಿತ್ತು. ಈ ಅಧ್ಯಯನದಲ್ಲಿ ಗಮನಿಸಿದ ವಾಹನಗಳ ಪೈಕಿ ಶೇ 30.6ರಷ್ಟು ವಾಹನಗಳು ನಿಗದಿತ ಸುರಕ್ಷಿತ ವೇಗವನ್ನು ಮೀರಿಸಿ ಸಂಚರಿಸುತ್ತಿದ್ದವು ಎಂದು ಸಲೀಂ ತಿಳಿಸಿರುವುದಾಗಿ ‘ಡೆಕ್ಕನ್ ಹೆರಾಲ್ಡ್’ ವರದಿ ಮಾಡಿದೆ.

ರಾಷ್ಟ್ರೀಯ ಹೆದ್ದಾರಿಗಳು, ಗ್ರಾಮೀಣ ಪ್ರದೇಶಗಳು ಹಾಗೂ ತಡರಾತ್ರಿ ಮತ್ತು ಮುಂಜಾನೆಯ ಸಮಯದಲ್ಲಿ ವಾಹನಗಳ ವೇಗ ಹೆಚ್ಚಿರುವುದು ಅಧ್ಯಯನದಲ್ಲಿ ಕಂಡುಬಂದಿದೆ. ಅತಿವೇಗದ ಜತೆಗೆ ಹೆಲ್ಮೆಟ್ ಮತ್ತು ಸೀಟ್‌ಬೆಲ್ಟ್ ಬಳಸದಿರುವುದು, ಅಪಾಯಕಾರಿ ಚಾಲನೆ, ಸುರಕ್ಷಿತವಲ್ಲದ ರಸ್ತೆ ಮೂಲಸೌಕರ್ಯ ಹಾಗೂ ಅಪಘಾತದ ಬಳಿಕ ತುರ್ತು ಚಿಕಿತ್ಸೆಯಲ್ಲಿ ಆಗುವ ವಿಳಂಬವೂ ಸಾವಿನ ಪ್ರಮಾಣ ಹೆಚ್ಚಲು ಕಾರಣವಾಗಬಹುದು ಎಂದು ಸಲೀಂ ಹೇಳಿದ್ದಾರೆ.

ಸಂಚಾರ ಪೊಲೀಸರಿಂದ ಕಟ್ಟುನಿಟ್ಟಿನ ಕ್ರಮ

ಕುಡಿದು ವಾಹನ ಚಲಾಯಿಸುವುದು, ಹೆಲ್ಮೆಟ್ ಇಲ್ಲದೆ ಸವಾರಿ ಮಾಡುವುದು, ಅತಿವೇಗ, ಚಾಲನೆ ವೇಳೆ ಮೊಬೈಲ್ ಬಳಕೆ ಮತ್ತು ಸಿಗ್ನಲ್ ಉಲ್ಲಂಘನೆ ವಿರುದ್ಧ ಪೊಲೀಸರು ಇತ್ತೀಚೆಗೆ ಕ್ರಮ ತೀವ್ರಗೊಳಿಸಿದ್ದಾರೆ. ನಿಯಮ ಉಲ್ಲಂಘಿಸುವವರ ಚಾಲನಾ ಪರವಾನಗಿಗಳನ್ನು ಅಮಾನತುಗೊಳಿಸುವ ಕ್ರಮಕ್ಕಾಗಿ ಪ್ರಾದೇಶಿಕ ಸಾರಿಗೆ ಕಚೇರಿಗಳಿಗೆ (RTO) ಕಳುಹಿಸಲಾಗುತ್ತಿದೆ. ಅಪಘಾತಗಳನ್ನು ತಡೆಗಟ್ಟಲು ಸಂಚಾರ ಪೊಲೀಸರು ಈ ಕ್ರಮ ಕೈಗೊಳ್ಳುತ್ತಿದ್ದಾರೆ.

ಫುಟ್‌ಪಾತ್‌ಗಳಲ್ಲಿ ಅಕ್ರಮವಾಗಿ ವಾಹನ ನಿಲುಗಡೆ ಮಾಡುವವರ ವಿರುದ್ಧವೂ ಕ್ರಮ ಕೈಗೊಳ್ಳಲಾಗುತ್ತಿದೆ. ಹೊರ ವರ್ತುಲ ರಸ್ತೆಯ (ORR) ಕೆಲವು ಸಂಚಾರ ಪೊಲೀಸ್ ಠಾಣೆಗಳ ವ್ಯಾಪ್ತಿಯಲ್ಲಿ ವೇಗ ಪತ್ತೆಹಚ್ಚುವ ರಾಡಾರ್ ಕ್ಯಾಮೆರಾಗಳನ್ನೂ ಅಳವಡಿಸಲಾಗಿದೆ.

ಬೆಂಗಳೂರಿನ ಆ್ಯಕ್ಸಿಡೆಂಟ್ ಹಾಟ್​​ಸ್ಪಾಟ್​​ಗಳು

ಸಂಚಾರ ಪೊಲೀಸ್ ಅಂಕಿಅಂಶಗಳಲ್ಲಿ ಗುರುತಿಸಲಾದ ಪ್ರಮುಖ ಅಪಘಾತ ಸ್ಥಳಗಳು ಈ ಕೆಳಗಿನಂತಿವೆ;s

• 8ನೇ ಮೈಲಿ ಜಂಕ್ಷನ್‌ನಿಂದ ನವಯುಗ ಟೋಲ್‌ವರೆಗೆ, ತುಮಕೂರು ರಸ್ತೆ
• ಕಣ್ಣಮಂಗಲ ಪಾಳ್ಯ ಗೇಟ್, ಬಳ್ಳಾರಿ ರಸ್ತೆ
• ಜಕ್ಕೂರು ಫ್ಲೈಓವರ್, ಬಳ್ಳಾರಿ ರಸ್ತೆ
• ಮೀನಕುಂಟೆ ಹೊಸೂರು, ಬಳ್ಳಾರಿ ರಸ್ತೆ
• ನಾಯಂಡಹಳ್ಳಿ ಜಂಕ್ಷನ್‌ನಿಂದ ಬಜಾಜ್ ಶೋರೂಂ–ಪಂತರಪಾಳ್ಯ ಜಂಕ್ಷನ್‌ವರೆಗೆ
• ಹುಣಸಮಾರನಹಳ್ಳಿ, ಬಳ್ಳಾರಿ ರಸ್ತೆ
• ಸದಹಳ್ಳಿ ಗೇಟ್, ಬಳ್ಳಾರಿ ರಸ್ತೆ
• ವೀರಸಂದ್ರ ಜಂಕ್ಷನ್, ಎಲೆಕ್ಟ್ರಾನಿಕ್ ಸಿಟಿ
• ಅವಲಹಳ್ಳಿ, ಟೊಯೋಟಾ ಶೋರೂಂ ಎದುರು
• ನವೀಕರಿಸಬಹುದಾದ ಇಂಧನ ಕಚೇರಿ ಸಮೀಪ, ನಾಗರಭಾವಿ ರಿಂಗ್ ರಸ್ತೆ

ಒಟ್ಟಿನಲ್ಲಿ, ಬೆಂಗಳೂರಿನಲ್ಲಿ ರಸ್ತೆ ಅಪಘಾತಗಳ ಸಂಖ್ಯೆ ಮತ್ತು ಸಾವಿನ ಪ್ರಮಾಣ ಹೆಚ್ಚುತ್ತಿರುವುದು ಆತಂಕಕಾರಿ ಬೆಳವಣಿಗೆಯಾಗಿದೆ. ಸಂಚಾರ ನಿಯಮಗಳ ಕಟ್ಟುನಿಟ್ಟಿನ ಜಾರಿ, ಸುರಕ್ಷಿತ ರಸ್ತೆ ವಿನ್ಯಾಸ, ವೇಗ ನಿಯಂತ್ರಣ ಮತ್ತು ತುರ್ತು ಚಿಕಿತ್ಸಾ ವ್ಯವಸ್ಥೆಗಳ ಸುಧಾರಣೆ ಅಪಘಾತಗಳಿಂದಾಗುವ ಸಾವುಗಳನ್ನು ತಗ್ಗಿಸಲು ಮಹತ್ವದ್ದಾಗಿವೆ.

ಕರ್ನಾಟಕದ ಮತ್ತಷ್ಟು ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ