Bengaluru Air Quality: ಮಂಗಳೂರು, ಹಾಸನ ಸೇರಿದಂತೆ ಬೆಂಗಳೂರಿನ ವಾಯು ಗುಣಮಟ್ಟ ಉತ್ತಮ

ಬೆಂಗಳೂರು, ಆಗಸ್ಟ್ 19: ಇಂದು ಕರ್ನಾಟಕದಾದ್ಯಂತ ವಾಯು ಗುಣಮಟ್ಟ ಸೂಚ್ಯಂಕ (AQI) ಸಾಧಾರಣದಿಂದ ಉತ್ತಮ ಮಟ್ಟದಲ್ಲಿ ದಾಖಲಾಗಿದೆ. ಮಾನ್ಸೂನ್ ಮಳೆ ಹಾಗೂ ಗಾಳಿಯ ಸಂಚಾರ ಉತ್ತಮವಾಗಿರುವುದರಿಂದ ರಾಜ್ಯದ ಪ್ರಮುಖ ನಗರಗಳಲ್ಲಿ ವಾಯು ಮಾಲಿನ್ಯದ ಪ್ರಮಾಣ ನಿಯಂತ್ರಣದಲ್ಲಿದೆ. ಬೆಂಗಳೂರಿನಲ್ಲಿ ಇಂದು ಸರಾಸರಿ AQI 60 ರಿಂದ 70 ರ ವ್ಯಾಪ್ತಿಯಲ್ಲಿದ್ದು, ‘ಸಾಧಾರಣ’ (Moderate) ವಿಭಾಗಕ್ಕೆ ಸೇರಿದೆ.

ಸೂಕ್ಷ್ಮ ಕಣಗಳ ಪ್ರಮಾಣದಲ್ಲೂ ಸುಧಾರಣೆ

PM2.5 ಮತ್ತು PM10 ಕಣಗಳ ಮಟ್ಟ ನಿಯಂತ್ರಣದಲ್ಲಿದ್ದು, ವಾಹನ ದಟ್ಟಣೆ ಹೆಚ್ಚಿರುವ ರಸ್ತೆಗಳಲ್ಲಿ ಸಲ್ಪ ಮಟ್ಟದ ವ್ಯತ್ಯಾಸ ಕಂಡುಬಂದಿದೆ. ಸಿಲ್ಕ್ ಬೋರ್ಡ್, ವೈಟ್‌ಫೀಲ್ಡ್ ಮತ್ತು ಬಿಟಿಎಂ ಲೇಔಟ್‌ ಪ್ರಮುಖ ಸಂಚಾರ ವಲಯಗಳಲ್ಲಿ AQI 65 ರಿಂದ 75 ರಷ್ಟಿದ್ದರೆ, ಲಾಲ್‌ಬಾಗ್ ಮತ್ತು ಕಬ್ಬನ್ ಪಾರ್ಕ್ ಪರಿಸರದಲ್ಲಿ 50 ಕ್ಕಿಂತ ಕಡಿಮೆಯಿದ್ದು ಉತ್ತಮ ಗಾಳಿಯ ಮಟ್ಟ ದಾಖಲಾಗಿದೆ. ಆಸ್ತಮಾ ಹಾಗೂ ಶ್ವಾಸಕೋಶದ ಸೂಕ್ಷ್ಮ ಸಮಸ್ಯೆ ಇರುವವರು ಹೆಚ್ಚು ವಾಹನ ಸಂಚಾರವಿರುವ ಅವಧಿಯಲ್ಲಿ ಹೊರಾಂಗಣ ಚಟುವಟಿಕೆಗಳ ಬಗ್ಗೆ ಎಚ್ಚರ ವಹಿಸುವುದು ಸೂಕ್ತ.

ರಾಜ್ಯದ ಪ್ರಮುಖ ನಗರಗಳ ಸ್ಥಿತಿಗತಿ

• ಮಂಗಳೂರು ಹಾಗೂ ಕರಾವಳಿ ಭಾಗ: ಸಮುದ್ರದ ಗಾಳಿಯ ಪ್ರಭಾವದಿಂದಾಗಿ ಮಂಗಳೂರಿನಲ್ಲಿ AQI 80 ರ ಆಜುಪಾಜಿನಲ್ಲಿದ್ದು ‘ಸಾಧಾರಣ’ ಮಟ್ಟದಲ್ಲಿದೆ.
• ಮೈಸೂರು ಹಾಗೂ ಹಾಸನ: ಸಾಂಸ್ಕೃತಿಕ ನಗರಿ ಮೈಸೂರಿನಲ್ಲಿ ವಾಯು ಗುಣಮಟ್ಟ 45 ರಿಂದ 55 ದಾಖಲಾಗಿದೆ.
• ಹುಬ್ಬಳ್ಳಿ-ಧಾರವಾಡ ಮತ್ತು ಬೆಳಗಾವಿ: ಉತ್ತರ ಕರ್ನಾಟಕದ ಪ್ರಮುಖ ನಗರಗಳಲ್ಲಿ AQI 55 ರಿಂದ 65ರ ನಡುವೆ ದಾಖಲಾಗಿದ್ದು, ಪರಿಸರ ತಿಳಿಯಾಗಿದೆ.

ಸಾಮಾನ್ಯವಾಗಿ AQI 0-50 ರಷ್ಟಿದ್ದರೆ ‘ಉತ್ತಮ’ ಹಾಗೂ 51-100 ರಷ್ಟಿದ್ದರೆ ‘ಸಾಧಾರಣ’ ಎಂದು ಪರಿಗಣಿಸಲಾಗುತ್ತದೆ. ಪ್ರಸ್ತುತ ಮಳೆಯ ವಾತಾವರಣವಿರುವುದರಿಂದ ರಾಜ್ಯದ ಬಹುತೇಕ ಭಾಗಗಳಲ್ಲಿ ಗಾಳಿಯ ಶುದ್ಧತೆ ಕಾಯ್ದುಕೊಂಡಿದೆ.

ಕರ್ನಾಟಕದ ಇನ್ನಷ್ಟು ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ