ಕೆ-ಪಾಪ್ ಕ್ರೇಜ್‌ನಿಂದ ಬಿಲಿಯನ್ ಡಾಲರ್ ಹೂಡಿಕೆ: ಕನ್ನಡಿಗರಿಗೆ ಕಾಯುತ್ತಿದೆ ಉದ್ಯೋಗಾವಕಾಶಗಳ ಸುರಿಮಳೆ!

ಬೆಂಗಳೂರು, ಅಕ್ಟೋಬರ್ 04: ಯುವ ಪೀಳಿಗೆಯಲ್ಲಿ ಕೆ-ಪಾಪ್ , ಕೊರಿಯನ್ ಆಹಾರ, ಕಾಸ್ಮೆಟಿಕ್ಸ್​ ಮತ್ತು ಕೆ ಡ್ರಾಮಾ ಪ್ರೀತಿ ದಿನೇ ದಿನೇ ಜನಪ್ರಿಯತೆ ಪಡೆಯುತ್ತಿದೆ. ಈ ಸಾಂಸ್ಕೃತಿಕ ಆಸಕ್ತಿಯನ್ನೇ ಬಂಡವಾಳ ಮಾಡಿಕೊಂಡು ದಕ್ಷಿಣ ಕೊರಿಯಾದಿಂದ ಬಿಲಿಯನ್‌ಗಟ್ಟಲೆ ಡಾಲರ್ ಹೂಡಿಕೆಯನ್ನು ಆಕರ್ಷಿಸಲು ಕರ್ನಾಟಕ ಸರ್ಕಾರ ಮುಂದಾಗಿದೆ.

ಉನ್ನತ ಮಟ್ಟದ ನಿಯೋಗದೊಂದಿಗೆ ಸಭೆ

ದಕ್ಷಿಣ ಕೊರಿಯಾದ ಉನ್ನತ ಮಟ್ಟದ ಉದ್ಯಮಿಗಳು, ವೆಂಚರ್ ಕ್ಯಾಪಿಟಲಿಸ್ಟ್‌ಗಳು ಮತ್ತು ಉದ್ಯಮ ನಾಯಕರ ನಿಯೋಗವು ಬೆಂಗಳೂರಿನ ವಿಧಾನಸೌಧದಲ್ಲಿ ಗ್ರಾಮೀಣಾಭಿವೃದ್ಧಿ, ಐಟಿ-ಬಿಟಿ ಸಚಿವ ಪ್ರಿಯಾಂಕ್ ಖರ್ಗೆ ಅವರನ್ನು ಭೇಟಿಯಾಗಿ ಮಹತ್ವದ ಚರ್ಚೆ ನಡೆಸಿದೆ.

ಈ ನಿಯೋಗದಲ್ಲಿ ಡಿಎಸ್‌ಸಿ ಇನ್ವೆಸ್ಟ್‌ಮೆಂಟ್, ಜಿಎಸ್ ವೆಂಚರ್ಸ್ , ಸಿಜೆ ಚೇಲ್ ಜೇಡಂಗ್ , ಕ್ಯಾಪ್‌ಸ್ಟೋನ್ ಪಾರ್ಟ್‌ನರ್ಸ್ ಮತ್ತು ಗೋಪಿಜ್ಜಾ ಕಾರ್ಯಾಚರಣೆ ನಡೆಸುವ ಜಿಟಿಜಿಒ ಕಂಪನಿಗಳ ಪ್ರತಿನಿಧಿಗಳು ಭಾಗವಹಿಸಿದ್ದರು.

ಯಾವೆಲ್ಲಾ ಕ್ಷೇತ್ರಗಳಲ್ಲಿ ಹೂಡಿಕೆ ಸಾಧ್ಯತೆ?

ಕೃತಕ ಬುದ್ಧಿಮತ್ತೆ , ಸೆಮಿಕಂಡಕ್ಟರ್, ಕೃಷಿ-ತಂತ್ರಜ್ಞಾನ , ಬಾಹ್ಯಾಕಾಶ ಮತ್ತು ರೊಬೊಟಿಕ್ಸ್‌ನಂತಹ ಉನ್ನತ ತಂತ್ರಜ್ಞಾನ ಕ್ಷೇತ್ರಗಳ ಮೇಲೆ ಕೇಂದ್ರೀಕೃತವಾಗಿತ್ತು. ಇದರೊಂದಿಗೆ ಆಹಾರ, ಪಾನೀಯ , ಚಿಲ್ಲರೆ ವ್ಯಾಪಾರ ಹಾಗೂ ನವೋದ್ಯಮ ಕ್ಷೇತ್ರಗಳಲ್ಲಿ ಕೊರಿಯನ್ ಕಂಪನಿಗಳು ಭಾರತೀಯ ಮಾರುಕಟ್ಟೆಗೆ ಪ್ರವೇಶಿಸಲು ಕರ್ನಾಟಕ ಸೂಕ್ತ ವೇದಿಕೆಯಾಗಲಿದೆ ಎಂದು ಹೇಳಲಾಗಿದೆ.

ದಕ್ಷಿಣ ಕೊರಿಯಾದಲ್ಲಿ ಆಂತರಿಕ ಮಾರುಕಟ್ಟೆಯ ಬೆಳವಣಿಗೆ ಸೀಮಿತವಾಗುತ್ತಿರುವ ಹಿನ್ನೆಲೆಯಲ್ಲಿ, ಅಲ್ಲಿನ ಹೂಡಿಕೆದಾರರು ಭಾರತದತ್ತ ಗಮನ ಹರಿಸುತ್ತಿದ್ದಾರೆ. ಸಚಿವ ಪ್ರಿಯಾಂಕ್ ಖರ್ಗೆ ಮಾತನಾಡಿ, “ಕರ್ನಾಟಕದಲ್ಲಿ ಅದ್ಭುತ ಪ್ರತಿಭೆ, ಸಂಶೋಧನಾ ಸಾಮರ್ಥ್ಯ ಮತ್ತು ನಾವೀನ್ಯತೆಯ ಪರಿಸರ ವ್ಯವಸ್ಥೆಯಿದೆ. ಕೊರಿಯನ್ ಕಂಪನಿಗಳಿಗೆ ರಾಜ್ಯ ಸರ್ಕಾರ ಸಂಪೂರ್ಣ ಸಹಕಾರ ನೀಡಲಿದೆ,” ಎಂದು ಭರವಸೆ ನೀಡಿದ್ದಾರೆ. ಕೊರಿಯನ್ ಸಂಸ್ಕೃತಿಯ ಜನಪ್ರಿಯತೆಯನ್ನು ತಾಂತ್ರಿಕ ಮತ್ತು ಆರ್ಥಿಕ ಸಹಭಾಗಿತ್ವವಾಗಿ ಪರಿವರ್ತಿಸುವುದು ಈ ಸಭೆಯ ಮುಖ್ಯ ಉದ್ದೇಶವಾಗಿದೆ.

ಕರ್ನಾಟಕದ ಇನ್ನಷ್ಟು ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ