
ಚಿಕ್ಕಮಗಳೂರು, ನವೆಂಬರ್ 19: ಜಿಲ್ಲೆಯ ಎನ್.ಆರ್.ಪುರ ತಾಲೂಕಿನ ಹೆನ್ನಂಗಿ ಗ್ರಾಮದಲ್ಲಿ ಕಾಡಾನೆ ದಾಳಿಗೆ ರೈತ ಸಾವನ್ನಪ್ಪಿದ್ದು, ಅರಣ್ಯ ಇಲಾಖೆ ವಿರುದ್ಧ ಸ್ಥಳೀಯರ ಆಕ್ರೋಶದ ಕಟ್ಟೆ ಒಡೆದಿದೆ. ಮೃತರನ್ನು ಕೃಷ್ಣಮೂರ್ತಿ(45) ಎಂದು ಗುರುತಿಸಲಾಗಿದ್ದು, 18 ದಿನಗಳ ಹಿಂದೆಯಷ್ಟೇ ಇವರ ಗೃಹಪ್ರವೇಶ ಕಾರ್ಯಕ್ರಮ ನಡೆದಿತ್ತು. ಕುಟುಂಬಸ್ಥರು ಇನ್ನೂ ಆ ಗುಂಗಿನಿಂದ ಹೊರವರುವ ಮೊದಲೇ ಆಘಾತವಾಗಿದ್ದು, ಸಂಬಂಧಿಕರ ಆಕ್ರಂದನ ಮುಗಿಲು ಮುಟ್ಟಿದೆ. ಕಳೆದ ಕೆಲ ದಿನಗಳಿಂದ ಸಂಭ್ರಮದ ವಾತಾವರಣದಲ್ಲಿದ್ದ ಮನೆಯನ್ನೀಗ ನೀರವ ಮೌನ ಆವರಿಸಿದೆ.
ಇನ್ನು ಕಾಡಾನೆ ದಾಳಿ ವೇಳೆ ಮತ್ತೊಬ್ಬ ರೈತ ಶ್ರೀನಿವಾಸ್ ಎಂಬವರು ಕೂದಲೆಳೆ ಅಂತದರದಲ್ಲಿ ಬಚಾವ್ ಆಗಿದ್ದಾರೆ. ತನ್ನ ಕಣ್ಣೆದುರೇ ಕೃಷ್ಣಮೂರ್ತಿ ಮೇಲೆ ಕಾಡಾನೆ ದಾಳಿ ಮಾಡಿತು. ನಾನು ಓಡಿ ಬಂದೆ ಎಂದ ಹೆನ್ನಂಗಿ ಗ್ರಾಮದ ರೈತ ಶ್ರೀನಿವಾಸ್ ಘಟನೆಯ ಇಂಚಿಂಚು ಮಾಹಿತಿಯನ್ನು ಬಿಚ್ಚಿಟ್ಟಿದ್ದಾರೆ. ಇಷ್ಟು ದಿನ ಕಾಡಾನೆ ಕಾಣಿಸಿರಲಿಲ್ಲ ಎಂದೂ ಅವರು ಮಾಹಿತಿ ನೀಡಿದ್ದಾರೆ.
ಇದನ್ನೂ ಓದಿ: ಕಾಡಾನೆ ದಾಳಿಗೆ ರೈತ ಬಲಿ: ಅರಣ್ಯಾಧಿಕಾರಿಗಳ ವಿರುದ್ಧ ಸಿಡಿದ ಅನ್ನದಾತರು; ಎನ್.ಆರ್.ಪುರ ಪಟ್ಟಣ ಸ್ತಬ್ಧ
ಹಾಸನ ಜಿಲ್ಲೆಯಿಂದ ಭದ್ರಾ ಅಭಯಾರಣ್ಯಕ್ಕೆ ಕಾಡಾನೆಗಳ ಸ್ಥಳಾಂತರ ಮತ್ತು ರೈತ ಕೃಷ್ಣಮೂರ್ತಿ ಮೃತಪಟ್ಟಿರುವ ವಿಚಾರವಾಗಿ ಅರಣ್ಯ ಇಲಾಖೆ ವಿರುದ್ದ ರೈತರ ಪ್ರತಿಭಟನೆ ತೀವ್ರಗೊಂಡಿದೆ. ಎನ್.ಆರ್.ಪುರ-ಬಾಳೆಹೊನ್ನೂರು ರಸ್ತೆ ತಡೆದು ಹೋರಾಟ ನಡೆಸಲಾಗಿದ್ದು, ನ.25ರವರೆಗೆ ಕಾಡಾನೆಗಳನ್ನು ಭದ್ರಾ ಅಭಯಾರಣ್ಯಕ್ಕೆ ಬಿಡುವುದಿಲ್ಲ ಎಂದು ಶೃಂಗೇರಿ ಶಾಸಕ ರಾಜೇಗೌಡ ಭರವಸೆ ನೀಡಿದ ಬಳಿಕ ಪ್ರತಿಭಟನೆ ಕೈಬಿಡಲಾಗಿದೆ. ಹಾಸನ ಜಿಲ್ಲೆಯಲ್ಲಿ ಹಿಡಿಯುವ ಕಾಡಾನೆಗಳನ್ನು ಇಲ್ಲಿಗೆ ಬಿಡಲ್ಲ. ಆನೆ ಸೆರೆಯಾದರೆ ಆನೆ ಕ್ಯಾಂಪ್ ಅಥವಾ ಬಂಡೀಪುರಕ್ಕೆ ಶಿಫ್ಟ್ ಮಾಡುವ ಬಗ್ಗೆ ಅರಣ್ಯ ಸಚಿವ ರಾಮಲಿಂಗಾರೆಡ್ಡಿ ಜೊತೆ ಚರ್ಚಿಸಿದ್ದೇವೆ ಎಂದವರು ತಿಳಿಸಿದ್ದಾರೆ. ಮುಂದಿನ ಸಭೆಯವರೆಗೂ ಯಾವುದೇ ಕಾಡಾನೆ ಸ್ಥಳಾಂತರ ಇಲ್ಲ ಎಂದು ಭದ್ರಾ ಹುಲಿ ಸಂರಕ್ಷಿತ ಪ್ರದೇಶದ ಡಿಎಫ್ಒ ಪುಲಕೀತ್ ಮೀನಾ ಕೂಡ ಹೇಳಿದ್ದಾರೆ.
ಮತ್ತಷ್ಟು ಸುದ್ದಿ ಓದಲು ಇಲ್ಲಿ ಕ್ಲಿಕ್ ಮಾಡಿ.
Published On - 3:17 pm, Thu, 19 November 26