ಗುಂಡು-ತುಂಡು ಆಯ್ತು, ಈಗ ಜೈಲಲ್ಲಿ ರೌಡಿಶೀಟರ್ ಜತೆ ವಿನಯ್ ಕುಲಕರ್ಣಿ ಕಾಲಹರಣ!

ಬೆಳಗಾವಿ: ಧಾರವಾಡ ಜಿ.ಪಂ. ಸದಸ್ಯ ಯೋಗೇಶ್ ಗೌಡ ಹತ್ಯೆ ಪ್ರಕರಣದಲ್ಲಿ ಜೈಲುಪಾಲಾಗಿರುವ ಮಾಜಿ ಸಚಿವ ವಿನಯ್ ಕುಲಕರ್ಣಿ ಒಂದಾದರ ಮೇಲೆ ಒಂದರಂತೆ ವಿವಾದಕ್ಕೆ ತುತ್ತಾಗುತ್ತಿದ್ದಾರೆ. ಇತ್ತೀಚೆಗಷ್ಟೇ ಅವರು ಜೈಲಿನಲ್ಲಿ ರಾಜಾತಿಥ್ಯ ಪಡೆದುಕೊಳ್ಳುತ್ತಿದ್ದಾರೆ ಎನ್ನುವ ವಿಚಾರ ಸಂಚಲನ ಸೃಷ್ಟಿಸಿದ ಬೆನ್ನಲ್ಲೇ ಈಗ ರೌಡಿಶೀಟರ್​ ಜೊತೆ ಕಾಲಹರಣ ಮಾಡಿ ಎಲ್ಲರ ಕೆಂಗಣ್ಣಿಗೆ ಗುರಿಯಾಗಿದ್ದಾರೆ.

ವಿನಯ್ ಕುಲಕರ್ಣಿಯನ್ನು ಬೆಳಗಾವಿ ಹಿಂಡಲಗಾ ಜೈಲಿನಲ್ಲಿ ಇಡಲಾಗಿದೆ. ಶಾಕಿಂಗ್​ ವಿಚಾರ ಎಂದರೆ ವಿನಯ್ ತಾವಿರುವ ಸೆಲ್​ನಲ್ಲಿ ಮಂಗಳೂರಿನ ರೌಡಿ ಶೀಟರ್​​ ವಿಕ್ಕಿ ಪೂಜಾರಿಯನ್ನು ಕರೆಸಿಕೊಂಡು ಆತನ ಜತೆ ಕಾಲ ಕಳೆಯುತ್ತಿದ್ದಾರೆ. ಆಗಾಗ ವಿನಯ್​ ಸೆಲ್​ಗೆ ವಿಕ್ಕಿ ಪೂಜಾರಿ ಬಂದುಹೋಗುತ್ತಿದ್ದಾನಂತೆ! ವಿನಯ್​ಗೆ ಎಲ್ಲ ರೀತಿಯಲ್ಲೂ ವಿಕ್ಕಿ ಸಹಾಯ ಮಾಡುತ್ತಿದ್ದಾನೆ ಎಂದು ಉನ್ನತ ಮೂಲಗಳು ಟಿವಿ9ಗೆ ತಿಳಿಸಿವೆ.

ಯಾರು ಈ ವಿಕ್ಕಿ?:

ವಿಕ್ಕಿ ಮಂಗಳೂರಿನ ಬಹುದೊಡ್ಡ ರೌಡಿ ಶೀಟರ್​ಗಳಲ್ಲಿ ಒಬ್ಬ. ಅಕ್ರಮ ಶಸ್ತ್ರಾಸ್ತ್ರ ಹೊಂದಿದ್ದ ಆರೋಪದಡಿ ವಿಕ್ಕಿ ಜೈಲು ಸೇರಿದ್ದ. ಸಹಚರರ ಮೂಲಕವೇ ಜೈಲಿನಲ್ಲಿ ಕೊಲೆ ಕೂಡ ಮಾಡಿಸಿದ್ದ. ಹಲವು ವರ್ಷಗಳಿಂದ ರೌಡಿಶೀಟರ್ ವಿಕ್ಕಿ ಜೈಲಿನಲ್ಲೇ ಇದ್ದಾನೆ.

ವಿನಯ್​ ಕುಲಕರ್ಣಿಗೆ ಐಷಾರಾಮಿ ಸವಲತ್ತು:

ಮೂಲಗಳ ಪ್ರಕಾರ ವಿನಯ್ ಕುಲಕರ್ಣಿಗೆ ಜೈಲಿನಲ್ಲಿ ಸಕಲ ಸವಲತ್ತುಗಳನ್ನೂ ಒದಗಿಸಲಾಗುತ್ತಿದೆಯಂತೆ. ಆಯಿಲ್ ಮಸಾಜ್ ಮಾಡೋಕೆ ಇಬ್ಬರು ಕೈದಿಗಳನ್ನ ಬಿಟ್ಟಿದ್ದಾರಂತೆ. ಸಾಲದ್ದಕ್ಕೆ ಇವರಿಗೆ ಮೆತ್ತನೆಯ ಹಾಸಿಗೆ, ದಿನಕ್ಕೊಂದು ಬಗೆಯ ಊಟ, ತಿಂಡಿ, ಧಾರವಾಡ ರೊಟ್ಟಿ, ಚಿಕನ್ ಬಿರಿಯಾನಿ, ಫೇವರೇಟ್ ಬ್ರ್ಯಾಂಡ್ನ ಡ್ರಿಂಕ್ಸ್ ಇತ್ಯಾದಿ ಇತ್ಯಾದಿ ಎಲ್ಲವೂ ಸಿಗುತ್ತಿದೆ ಎನ್ನುವ ಮಾತು ಇತ್ತೀಚೆಗೆ ಕೇಳಿ ಬಂದಿತ್ತು.