ಸಾವಿನಲ್ಲೂ ಒಂದಾದ ಆತ್ಮೀಯ ಸ್ನೇಹಿತರು: ರಸ್ತೆ ಅಪಘಾತದಲ್ಲಿ ಮೃತಪಟ್ಟ ಹಾವೇರಿ ಯುವಕರ ಅಂತ್ಯಕ್ರಿಯೆ ಒಟ್ಟಿಗೇ ನೆರವೇರಿಸಿದ ಪೋಷಕರು

ಹಾವೇರಿ, ನ.15; ಗಂಡ ಹೆಂಡತಿ, ಅಕ್ಕ-ತಂಗಿ, ಅಣ್ಣ-ತಮ್ಮ, ಪ್ರೇಮಿಗಳು ಸಾವಿನ್ನಲ್ಲೂ ಒಂದಾಗಿರುವ ಘಟನೆಗಳು ಅದೆಷ್ಟೋ ಇದೆ. ಆದರೆ ಜೊತೆಯಲ್ಲೇ ಓಡಾಡುತ್ತಾ, ಸುಖ-ದುಃಖ ಹಂಚಿಕೊಳ್ಳುತ್ತಾ ಅನ್ಯೋನ್ಯವಾಗಿದ್ದ ಇಬ್ಬರು ಆತ್ಮೀಯ ಗೆಳೆಯರು ಭೀಕರ ರಸ್ತೆ ಅಪಘಾತದಲ್ಲಿ ದಾರುಣವಾಗಿ ಮೃತಪಟ್ಟು ಸಾವಿನಲ್ಲೂ ಒಂದಾದ ಮನಮಿಡಿಯುವ ಘಟನೆ ಹಾವೇರಿ ತಾಲೂಕಿನ ಮರೋಳ ಗ್ರಾಮದಲ್ಲಿ ನಡೆದಿದೆ. ಮೃತರನ್ನು ಅಭಿಷೇಕ್ ಮಾಗಡಿ ಹಾಗೂ ಮುತ್ತು ಹುಲಿಕಟ್ಟಿ ಎಂದು ಗುರುತಿಸಲಾಗಿದೆ. ಇಬ್ಬರ ಅಂತ್ಯಕ್ರಿಯೆಯನ್ನು ಪೋಷಕರು ಸ್ವಗ್ರಾಮ ಮರೋಳದಲ್ಲಿ ಒಂದೇ ಕಡೆ, ಒಟ್ಟಿಗೇ ನೆರವೇರಿಸಿದ್ದು, ಇಡೀ ಗ್ರಾಮವೇ ಕಣ್ಣೀರ ಕಡಲಲ್ಲಿ ಮುಳುಗಿತ್ತು.

ಕುಷ್ಟಗಿ-ಗಜೇಂದ್ರಗಡ ರಸ್ತೆಯಲ್ಲಿ ದುರ್ಘಟನೆ: ಮರೋಳ ಗ್ರಾಮದ ನಿವಾಸಿಗಳಾದ ಅಭಿಷೇಕ್ ಮಾಗಡಿ ಮತ್ತು ಮುತ್ತು ಹುಲಿಕಟ್ಟಿ ಬಾಲ್ಯದಿಂದಲೂ ಅತ್ಯಂತ ಆತ್ಮೀಯ ಸ್ನೇಹಿತರಾಗಿದ್ದರು. ಎಂದಿನಂತೆ ವೈಯಕ್ತಿಕ ಕೆಲಸದ ನಿಮಿತ್ತ ಇಬ್ಬರೂ ಒಂದೇ ಬೈಕ್‌ನಲ್ಲಿ ಕುಷ್ಟಗಿಗೆ ತೆರಳಿದ್ದರು. ಕುಷ್ಟಗಿಯಲ್ಲಿ ಕೆಲಸ ಮುಗಿಸಿಕೊಂಡು ಸ್ವಗ್ರಾಮಕ್ಕೆ ವಾಪಸ್ ಬರುತ್ತಿದ್ದ ವೇಳೆ, ಕುಷ್ಟಗಿ-ಗಜೇಂದ್ರಗಡ ರಸ್ತೆಯಲ್ಲಿ ಸಂಭವಿಸಿದ ಭೀಕರ ರಸ್ತೆ ಅಪಘಾತದಲ್ಲಿ ಇಬ್ಬರೂ ಗಂಭೀರವಾಗಿ ಗಾಯಗೊಂಡು ಸ್ಥಳದಲ್ಲೇ ಕೊನೆಯುಸಿರೆಳೆದಿದ್ದಾರೆ.

ಇದನ್ನೂ ಓದಿ: ಅನ್ನದಾತರ ಬದುಕಿನೊಂದಿಗೆ ಚೆಲ್ಲಾಟ: ಹೆಚ್ಚಿನ ಬೆಲೆ ಆಮಿಷವೊಡ್ಡಿ 40ಕ್ಕೂ ಹೆಚ್ಚು ರೈತರಿಂದ ಭತ್ತ ಖರೀದಿಸಿ 1.30 ಕೋಟಿ ರೂ. ವಂಚನೆ ಆರೋಪ

ಒಂದೇ ಕಡೆ ನಡೆದ ಗೆಳೆಯರ ಅಂತ್ಯಕ್ರಿಯೆ: ಕಣ್ಣೀರಿಟ್ಟ ಗ್ರಾಮಸ್ಥರು ಹಾಗೂ ಸ್ನೇಹಿತರು

ಭವಿಷ್ಯದ ಕನಸು ಕಾಣುತ್ತಿದ್ದ ಮಕ್ಕಳ ಅಕಾಲಿಕ ಮರಣದ ಸುದ್ದಿ ತಿಳಿಯುತ್ತಿದ್ದಂತೆ ಎರಡೂ ಕುಟುಂಬಗಳ ಪೋಷಕರ ಆಕ್ರಂದನ ಮುಗಿಲುಮುಟ್ಟಿತ್ತು. ಮೃತದೇಹಗಳು ಸ್ವಗ್ರಾಮ ಮರೋಳಕ್ಕೆ ಬರುತ್ತಿದ್ದಂತೆ ಇಡೀ ಗ್ರಾಮದಲ್ಲಿ ನೀರವ ಮೌನ ಹಾಗೂ ಶೋಕದ ವಾತಾವರಣ ಆವರಿಸಿತ್ತು. ಬದುಕಿದ್ದಾಗ ಸದಾ ಜೊತೆಯಲ್ಲೇ ಇರುತ್ತಿದ್ದ ಅಭಿಷೇಕ್ ಮತ್ತು ಮುತ್ತು ಅವರ ಸ್ನೇಹಕ್ಕೆ ಗೌರವ ಸೂಚಿಸುವಂತೆ, ಪೋಷಕರು ಹಾಗೂ ಗ್ರಾಮಸ್ಥರು ಇಬ್ಬರು ಸ್ನೇಹಿತರ ಶವಸಂಸ್ಕಾರವನ್ನು ಒಂದೇ ಸ್ಥಳದಲ್ಲಿ ಒಟ್ಟಿಗೇ ನೆರವೇರಿಸಿದರು. ಅನ್ಯೋನ್ಯವಾಗಿದ್ದ ಗೆಳೆಯರ ಅಂತಿಮ ದರ್ಶನ ಪಡೆದ ಇತರೆ ಸ್ನೇಹಿತರು ಹಾಗೂ ಗ್ರಾಮಸ್ಥರು ಕಣ್ಣೀರು ಹಾಕುತ್ತಾ ಭಾರವಾದ ಹೃದಯದಿಂದ ವಿದಾಯ ಹೇಳಿದರು.

ವರದಿ: ಅಣ್ಣಪ್ಪ ಬಾರ್ಕಿ

ರಾಜ್ಯದ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ