ಬೆಗ್ಲಿಹೊಸಹಳ್ಳಿ ಗ್ರಾಮ ಪಂಚಾಯಿತಿಗೆ ಗಾಂಧಿ ಗ್ರಾಮ ಪುರಸ್ಕಾರ: ಈ ಪಂಚಾಯ್ತಿ ಮಾಡಿದ ಕಾರ್ಯಗಳೇನು ಗೊತ್ತಾ?

ಕೋಲಾರ, (ಅಕ್ಟೋಬರ್ 04): ಕೋಲಾರ (KOlar) ತಾಲ್ಲೂಕು ಬೆಗ್ಲಿಹೊಸಹಳ್ಳಿ ಗ್ರಾಮ ಪಂಚಾಯಿತಿಗೆ 2022-23 ನೇ ಸಾಲಿನ ಗಾಂಧಿ ಗ್ರಾಮ ಪುರಸ್ಕಾರ (Gandhi Gram Puraskar) ಲಭಿಸಿದೆ. ಪುರಸ್ಕಾರಕ್ಕೆ ಆಯ್ಕೆ ಮಾಡಲು ಸರಕಾರದ ಮಾರ್ಗಸೂಚಿ ಮಾನದಂಡಗಳ ಆಧಾರದ ಮೇಲೆ ಆಯ್ಕೆ ಮಾಡಲಾಗಿದೆ. ಗಾಂಧಿ  ಪುರಸ್ಕಾರಕ್ಕಾಗಿ 138 ವಿಧದ ಪ್ರಶ್ನೋತರಗಳನ್ನು ಸಮರ್ಪಕವಾಗಿ ಪೂರೈಸಬೇಕಾಗುತ್ತದೆ. ಆಡಳಿತ ಸೇವೆ, ಸಾರ್ವಜನಿಕ ಸೇವೆ, ಸ್ವಚ್ಛತೆ, ಗ್ರಾಮ ಸಭೆ, ದೂರದೃಷ್ಟಿ ಯೋಜನೆ, ಹಾಗೂ ಮಕ್ಕಳ ಸ್ನೇಹಿ, ಜನಜಾಗೃತಿ ಕಾರ್ಯಕ್ರಮಗಳು ಸರ್ಕಾರದ ನಿರ್ದೇಶನದಂತೆ ಹಾಗೂ ಮೇಲಾಧಿಕಾರಿಗಳ ಆದೇಶದಂತೆ ಸರ್ಕಾರದ ಯೋಜನೆಗಳನ್ನು ಜನರಿಗೆ ತಲುಪವಂತೆ ಉತ್ತಮವಾಗಿ ಕಾರ್ಯನಿರ್ವಹಣೆ ಮಾಡಿರುವುದಕ್ಕೆ  ಗಾಂಧಿ ಪುರಸ್ಕಾರಕ್ಕೆ ಆಯ್ಕೆಯಾಗಿ ತಾಲ್ಲೂಕಿಗೆ ಕೀರ್ತಿ ತಂದಿದೆ.

ಮಕ್ಕಳ ಸ್ನೇಹಿ ಪಂಚಾಯಿತಿ:

ಗ್ರಾಮ ಪಂಚಾಯಿತಿ ತಮ್ಮ ನಿತ್ಯದ ಕಾರ್ಯ ಚಟುವಟಿಕೆಗಳಲ್ಲಿ ಸಾಮಾನ್ಯವಾಗಿ ಮಕ್ಕಳನ್ನು ಕಡೆಗಣಿಸುವುದೇ ಹೆಚ್ಚು ಆದರೆ ಬೆಗ್ಲಿಹೊಸಹಳ್ಳಿ ಗ್ರಾಮ ಪಂಚಾಯಿತಿ ತನ್ನ ಯಾವುದೇ ಕಾರ್ಯ ಚಟುವಟಿಕೆಗಳಲ್ಲಿಯೂ ಮಕ್ಕಳನ್ನು ಬಳಸಿಕೊಂಡು ಮಕ್ಕಳ ಮೂಲಕವೇ ಹಿರಿಯರಿಗೆ ವಿವಿಧ ಸರಕಾರಿ ಕಾರ್ಯಕ್ರಮಗಳ ಮೂಲಕ ಜಾಗೃತಿ ಅರಿವು ಮೂಡಿಸಿರುವುದು ಪಂಚಾಯ್ತಿ ಹೆಗ್ಗಳಿಕೆಯಾಗಿದೆ. ಪಂಚಾಯ್ತಿ ವತಿಯಿಂದಲೇ ಮಕ್ಕಳಿಗಾಗಿ ಕಲಿಕಾ ಹಬ್ಬ, ಪ್ರತಿಭಾ ಕಾರಂಜಿ, ಸ್ವಚ್ಛತೆಗಾಗಿ ಮಕ್ಕಳಿಂದ ಓಟ, ಗ್ರಾಮೀಣ ಕ್ರೀಡಾಕೂಟ ಇತ್ಯಾದಿ ವೈವಿಧ್ಯಮಯ ಕಾರ್ಯಕ್ರಮಗಳ ಮೂಲಕ ಮಕ್ಕಳಿಗೂ ಪಂಚಾಯ್ತಿ ಸೇವೆಗಳ ಪರಿಚಯಿಸಿ ಹಿರಿಯರಿಗೆ ಪೋಷಕರಿಗೆ ಅರಿವು ಮೂಡಿಸಿರುವುದು ಪಂಚಾಯ್ತಿ ಹಿರಿಮೆ.

ಗ್ರಾಮ ಸಭೆ:

ಗ್ರಾಮ ಪಂಚಾಯಿತಿಗಳಲ್ಲಿ ಗ್ರಾಮ ಸಭೆಗಳ ಮೂಲಕ ವಿವಿಧ ಸರ್ಕಾರಿ ಯೋಜನೆಗಳ ಕುರಿತು ಅರಿವು ಹಾಗೂ ಸರ್ಕಾರದ ಯೋಜನೆಗಳನ್ನು ವಾರ್ಡ್ ಸಭೆ ಮೂಲಕ ಗ್ರಾಮಗಳಲ್ಲಿ ಆಯ್ಕೆ ಮಾಡಲಾಗುತ್ತದೆ. ಸಾಮಾನ್ಯವಾಗಿ ವಿವಿಧ ಇಲಾಖೆಗಳ ಅಧಿಕಾರಿಗಳು ಕಾರ್ಯಕ್ರಮದಲ್ಲಿ ಭಾಗವಹಿಸಿ ಗ್ರಾಮ ಸಭೆಗಳು ನಡೆಯುತ್ತವೆ. ಆದರೆ ಬೆಗ್ಲಿ ಗ್ರಾಮ ಪಂಚಾಯಿತಿಯಲ್ಲಿ ಕಲಾವಿದರ ಮೂಲಕ ಸಣ್ಣ ನಾಟಕ ಗೋಡೆ ಬರಹಗಳ ಮೂಲಕ ಕಾರ್ಯಕ್ರಮಗಳನ್ನು ಪರಿಚಯಿಸಿ ಸಮಸ್ಯೆಗಳನ್ನು ಪರಿಹರಿಸಿ ತನ್ನ ಪ್ರಸಿದ್ದಿ ಪಡಿದಿವೆ.

ಸ್ವಚ್ಛತಾ ವಾಹಿನಿಗೆ ಮಹಿಳಾ ಚಾಲಕಿ

ಇಡೀ ರಾಜ್ಯದಲ್ಲಿಯೇ ಪಂಚಾಯ್ತಿಗಳಲ್ಲಿ ಘನ ತ್ಯಾಜ್ಯ ವಿಲೇವಾರಿ ಕಾರ್ಯಕ್ರಮದಡಿ ನಡೆಯುತ್ತಿರುವ ಕಸ ಸಂಗ್ರಹಣೆಯ ಸ್ವಚ್ಛತಾ ವಾಹಿನಿಗೆ ಮಹಿಳಾ ಚಾಲಕಿಯನ್ನು ನೇಮಕ ಮಾಡಿಕೊಂಡಿರುವುದು ಬೆಗ್ಲಿ ಪಂಚಾಯ್ತಿ ವಿಶೇಷತೆ. ಬೆಗ್ಲಿ ಪಂಚಾಯ್ತಿ ವ್ಯಾಪ್ತಿಯ ಮಂಜುಳಾ ಎಂಬುವರನ್ನು ಗುರುತಿಸಿ ಅವರಿಗೆ ಸೂಕ್ತ ತರಬೇತಿ, ಪ್ರೋತ್ಸಾಹವನ್ನು ಪಂಚಾಯಿಯಿಂದಲೇ ನೀಡಿ ಸ್ವಚ್ಛತಾ ವಾಹಿನಿ ಚಾಲಕಿಯನ್ನಾಗಿ ಮಾಡಲಾಗಿದೆ. ಇದು ರಾಜ್ಯದ ಗಮನ ಸೆಳೆದು ಸರಕಾರದ ಕಾರ್ಯದರ್ಶಿ ಉಮಾ ಮಹಾದೇವನ್ ಮೆಚ್ಚುಗೆಗೂ ಪಾತ್ರವಾಗಿದೆ.

ಪುಸ್ತಕ ಜೋಳಿಗೆ

ಪಂಚಾಯಿತಿ ಅತ್ಯುತ್ತಮ ಗ್ರಂಥಾಲಯ ಸ್ಥಾಪಿಸಬೇಕೆಂದು ಉದ್ದೇಶದಿಂದ ಕಳೆದ ದೀಪಾವಳಿ ಸಂಧರ್ಭದಲ್ಲಿ ಮಕ್ಕಳನ್ನು ಬಳಸಿಕೊಂಡು ಪುಸ್ತಕ ಜೋಳಿಗೆ ಹಿಡಿದು ದೀಪ ನಿಮಗೆ ಪುಸ್ತಕ ನಮಗೆ ಅಭಿಯಾನದ ಮೂಲಕ ವಿವಿಧ ಪುಸ್ತಕಗನ್ನು ಸಂಗ್ರಹಿಸಲಾಯಿತು. ಹೀಗೆ ಸಂಗ್ರಹಿಸಿದ ಪುಸ್ತಕಗಳಿಂದ ಸ್ಥಾಪನೆಗೊಂಡ ಗ್ರಂಥಾಲಯವನ್ನು ಇದೀಗ ಸಂಪೂರ್ಣ ಡಿಜಟಲೀಕರಣಗೊಳಿಸಲಾಗಿದೆ. ಇದರಿಂದಾಗಿ ಪಂಚಾಯ್ತಿ ವ್ಯಾಪ್ತಿಯಲ್ಲಿರುವ ಗ್ರಂಥಾಲಯಗಳಲ್ಲಯೇ ಬೆಗ್ಲಿಹೊಸಹಳ್ಳಿ ಗ್ರಾಮ ಪಂಚಾಯಿತಿಯನ್ನು ಮೇಲಾಧಿಕಾರಿಗಳು ಗುರುತಿಸಿ ಅತ್ಯುತ್ತಮ ಗ್ರಾಮ ಪಂಚಾಯಿತಿ ಎಂಬ ಹೆಸರು ಪಡಿದಿದೆ.

ಕಸ ವಿಲೇವಾರಿ

ಪಂಚಾಯ್ತಿ ವ್ಯಾಪ್ತಿಯಲ್ಲಿನ ಸ್ವಚ್ಛತೆಗೆ ಪ್ರಮುಖ ಆದ್ಯತೆ ನೀಡಲಾಗಿದೆ. ಪ್ರತಿ ಮನೆಗೂ ಕಸವನ್ನು ಮನೆ ಹಂತದಲ್ಲಿಯೇ ವಿಂಗಡಿಸಿಕೊಳ್ಳಲು ಅನುಕೂಲವಾಗುವಂತೆ ಕಸದ ಬುಟ್ಟಿಗಳನ್ನು ವಿತರಿಸಿಲಾಗಿದೆ. ಕಸವನ್ನು ಸಂಗ್ರಹಿಸಲು ಸ್ವಚ್ಛತಾ ವಾಹನಗಳನ್ನು ಬಳಸಲಾಗುತ್ತದೆ. ಸ್ವಚ್ಛತೆ ಕುರಿತು ವಿವಿಧ ಕಾರ್ಯಕ್ರಮಗಳ ಮೂಲಕ ಅರಿವು ಮೂಡಿಸಲಾಗಿದೆ.

ಕಂದಾಯ ವಸೂಲಿ

ಬೆಗ್ಲಿ ಪಂಚಾಯ್ತಿಯ ಕೇವಲ ಅರಿವು ಜಾಗೃತಿ ಕಾರ್ಯಕ್ರಮಗಳನ್ನು ನಡೆಸಿದೆ. ಜಿಲ್ಲಾ ಪಂಚಾಯಿತಿ, ತಾಲ್ಲೂಕು ಪಂಚಾಯಿತಿ ಆದೇಶ ಸುತ್ತೋಲೆಗಳನ್ನು ಪಾಲಿಸಿದೆ ಪಂಚಾಯಿತಿಯನ್ನು ಆರ್ಥಿಕವಾಗಿಯೂ ಸಮರ್ಥವಾಗಿ ಮುನ್ನಡೆಸಲು ಕಂದಾಯ ವಸೂಲಿಗೂ ಆದ್ಯತೆ ನೀಡಿದೆ. 2022-23ನೇ ಸಾಲಿನಲ್ಲಿ ಗ್ರಾಮ ಪಂಚಾಯಿತಿ ಶೇ 80ಕ್ಕಿಂತಲೂ ಹೆಚ್ಚು ತೆರಿಗೆ ಸಂಗ್ರಹಣೆಯಾಗಿದೆ. ಹೀಗೆ ಮೇಲಿನ ಎಲ್ಲಾ ಮಾನದಂಡಗಳನ್ನು ಸಮರ್ಪಕವಾಗಿ ನಿಭಾಯಿಸಿದ ಹಿನ್ನೆಲೆಯಲ್ಲಿ ಬೆಗ್ಲಿ ಹೊಸಹಳ್ಳಿ ಗ್ರಾಮ ಪಂಚಾಯ್ತಿ ಗಾಂಧಿ ಗ್ರಾಮ ಪುರಸ್ಕಾರ ಪಡೆಯುವಲ್ಲಿ ಯಶಸ್ವಿಯಾಗಿದೆ.

ಈ ಹಿನ್ನೆಲೆ ಅಕ್ಟೋಬರ್-2 ರಂದು ವಿಧಾನಸೌದದ ಬ್ಯಾಂಕ್ವೆಟ್ ಹಾಲ್ ನಡೆದ ಕಾರ್ಯಕ್ರಮದಲ್ಲಿ ಮುಖ್ಯಮಂತ್ರಿ ಸಿದ್ದರಾಮಯ್ಯರವರು ಹಾಗೂ ಗ್ರಾಮೀಣಾಭಿವೃದ್ಧಿ ಮತ್ತು ಪಂಚಾಯತ್ ರಾಜ್ ಸಚಿವರಾದ ಪ್ರಿಯಾಂಕ ಖರ್ಗೆ ಅವರಿಂದ ಪುರಸ್ಕಾರಿಸಿ ಗೌರವಿಸಲಾಗಿದೆ. ಈ ವೇಳೆ ಗ್ರಾಮ ಪಂಚಾಯಿತಿ ಅಧ್ಯಕ್ಷರಾದ ಕಲ್ಲಂಡೂರು ಗ್ರಾಮದ ಡಾ//ದೀಪಿಕಾ ಲೋಕೇಶ್ ಉಪಾಧ್ಯಕ್ಷರಾದ ಪಾರ್ವತಮ್ಮ ಮುನಿಸ್ವಾಮಿ ಪಂಚಾಯಿತಿ ಪಿಡಿಓ ಮಧುಮತಿ. ಉಪಸ್ಥಿತರಿದ್ದರು.

ರಾಜ್ಯದ ಮತ್ತಷ್ಟು ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ