2020ರ ಟ್ವೀಟ್​ ಪರ್ಸನ್ ಟ್ರಂಪ್, ಟಾಪ್​ 10ರಲ್ಲಿ ಬಿಡೆನ್-ಮೋದಿಗೂ ಸ್ಥಾನ

ವಾಷಿಂಗ್​ಟನ್: ಅಮೆರಿಕ ಅಧ್ಯಕ್ಷ ಡೊನಾಲ್ಡ್​ ಟ್ರಂಪ್ ಮತ್ತು ನಿಯೋಜಿತ ಅಧ್ಯಕ್ಷ ಜೋ ಬಿಡೆನ್ ಅವರ ಹೆಸರುಗಳು 2020ರ ಟಾಪ್​-10 ಟ್ವೀಟ್​ಗಳಲ್ಲಿ ಕ್ರಮವಾಗಿ ಮೊದಲ ಮತ್ತು 2ನೇ ಸ್ಥಾನ ಪಡೆದಿವೆ. ಟಾಪ್-10ರ ಪಟ್ಟಿಯಲ್ಲಿ ಪ್ರಧಾನಿ ನರೇಂದ್ರ ಮೋದಿ ಅವರ ಹೆಸರು 7ನೇ ಸ್ಥಾನದಲ್ಲಿದೆ ಎಂದು ಟ್ವಿಟರ್​ನ ವಾರ್ಷಿಕ ಪರಾಮರ್ಶೆ ವರದಿ ತಿಳಿಸಿದೆ.

ಅಮೆರಿಕದ ಉಪಾಧ್ಯಕ್ಷ ಸ್ಥಾನಕ್ಕೆ ನಿಯೋಜಿತರಾಗಿರುವ ಭಾರತ ಮೂಲದ ಕಮಲಾ ಹ್ಯಾರಿಸ್ ಈ ಪಟ್ಟಿಯಲ್ಲಿರುವ ಏಕೈಕ ಮಹಿಳೆ. ಅವರ ಹೆಸರು 10ನೇ ಸ್ಥಾನದಲ್ಲಿದೆ.

ಫೇಸ್​ಬುಕ್ ಮೂಲಕ ಜನರು ವಿಶ್ವ ನಾಯಕರಿಂದ ಬದಲಾವಣೆ ಮತ್ತು ಉತ್ತರದಾಯಿತ್ವಕ್ಕೆ ಒತ್ತಾಯಿಸುತ್ತಿದ್ದಾರೆ. ಚುನಾವಣೆಗೆ ಸಂಬಂಧಿಸಿದಂತೆ 2020ರಲ್ಲಿ ಸುಮಾರು 70 ಕೋಟಿ ಟ್ವೀಟ್​ಗಳು ಬಂದಿವೆ. ಡೊನಾಲ್ಡ್​ ಟ್ರಂಪ್, ಜೋಬಿಡೆನ್, ಬರಾಕ್ ಒಬಾಮ, ನರೇಂದ್ರ ಮೋದಿ ಮತ್ತು ಕಮಲಾ ಹ್ಯಾರಿಸ್​ ಹೆಸರುಗಳು ಜಾಗತಿಕವಾಗಿ ಹೆಚ್ಚು ಬಳಕೆಯಾಗಿವೆ ಎಂದು ಟ್ವಿಟರ್​ನ ಗ್ರಾಹಕ ಸಂವಹನ ವಿಭಾಗದ ಮುಖ್ಯಸ್ಥರಾದ ಟ್ರೇಸಿ ಮೆಕ್​ಗ್ರಾ ಹೇಳಿದ್ದಾರೆ.

2020ರ ಜನಪ್ರಿಯ ಹ್ಯಾಷ್​ಟ್ಯಾಗ್ #COVID19 ಆಗಿತ್ತು. ಇದರ ಜೊತೆಗೆ #StayHome ಹ್ಯಾಷ್​ಟ್ಯಾಗ್ ಹೊತ್ತ ಟ್ವೀಟ್​ಗಳು ಸಹ ಗಮನಾರ್ಹ ಪ್ರಮಾಣದಲ್ಲಿ ಟ್ವೀಟ್ ಆಗಿವೆ. ಕೊರೊನಾ ಸೋಂಕಿಗೆ ಸಂಬಂಧಿಸಿದ ಸುಮಾರು 40 ಕೋಟಿ ಟ್ವೀಟ್​ಗಳು ಪೋಸ್ಟ್ ಆಗಿವೆ. #StayHome ಅತಿಹೆಚ್ಚು ಬಾರಿ ಟ್ವೀಟ್ ಆದ ಹ್ಯಾಷ್​​ಟ್ಯಾಗ್​ಗಳಲ್ಲಿ 3ನೇ ಸ್ಥಾನದಲ್ಲಿದೆ.

2ನೇ ಸ್ಥಾನದಲ್ಲಿರುವ ಹ್ಯಾಷ್​ಟ್ಯಾಗ್ #BlackLivesMatter. ಪೊಲೀಸ್ ದೌರ್ಜನ್ಯದಿಂದ ಜಾರ್ಜ್​ ಫ್ಲಾಯ್ಡ್​ ನಿಧನರಾದ ನಂತರ #BlackLivesMatter ಅಮೆರಿಕ ಸೇರಿದಂತೆ ವಿಶ್ವದ ಹಲವು ದೇಶಗಳಲ್ಲಿ ಪ್ರತಿಭಟನೆಯ ಅಸ್ತ್ರವಾಯಿತು. ಅತಿಹೆಚ್ಚು ಬಾರಿ ಟ್ವೀಟ್ ಆದ ಹೆಸರುಗಳ ಪಟ್ಟಿಯಲ್ಲಿ ಫ್ಲಾಯ್ಡ್​ Floyd 3ನೇ ಸ್ಥಾನದಲ್ಲಿದೆ.