ಡಿಟರ್ಜೆಂಟ್ ನೀರಿನಲ್ಲಿ ಬಟ್ಟೆಗಳನ್ನು ಎಷ್ಟು ಹೊತ್ತು ನೆನೆಸಿಡಬೇಕು? ಡ್ರೆಸ್‌ ವಾಶ್‌ ಮಾಡುವ ಸರಿಯಾದ ವಿಧಾನವನ್ನು ತಿಳಿಯಿರಿ
ಬಟ್ಟೆಗಳನ್ನು ಒಗೆಯುವ ಮುನ್ನ ಅವುಗಳನ್ನು ಡಿಟರ್ಜೆಂಟ್‌ನಲ್ಲಿ ಒಂದಷ್ಟು ಹೊತ್ತು ನೆನೆಸಿಡುತ್ತೇವೆ. ಹೀಗೆ ಮಾಡುವುದರಿಂದ ಕಲೆಗಳು, ಬೆವರಿನ ವಾಸನೆ ಸುಲಭವಾಗಿ ನಿವಾರಣೆಯಾಗುತ್ತದೆ. ಆದರೆ ಡಿಟರ್ಜೆಂಟ್‌ನಲ್ಲಿ ಬಟ್ಟೆಗಳನ್ನು ನೆನೆಸಿಡುವ, ಬಟ್ಟೆಗಳನ್ನು ಒಗೆಯುವ ಸರಿಯಾದ ವಿಧಾನದ ಬಗ್ಗೆ ಗೊತ್ತಿರದಿದ್ದರೆ, ಬಟ್ಟೆಗಳ ಗುಣಮಟ್ಟ ಹಾಳಾಗುವ ಸಾಧ್ಯತೆ ಇರುತ್ತದೆ. ಆದ್ದರಿಂದ ಬಟ್ಟೆಗಳನ್ನು ಡಿಟರ್ಜೆಂಟ್ ನೀರಿನಲ್ಲಿ ಎಷ್ಟು ಹೊತ್ತು ನೆನೆಸಿಡಬೇಕು ಎಂಬುದನ್ನು ತಿಳಿದುಕೊಳ್ಳಿ.
ಅನೇಕ ಜನರು ಬಟ್ಟೆಗಳ (clothes) ಗುಣಮಟ್ಟ ಹಾಳಾಗುತ್ತದೆ ಅನ್ನೋ ಕಾರಣಕ್ಕೆ ವಾಷಿಂಗ್‌ ಮಷೀನ್ ಬದಲು ಕೈಯಲ್ಲೇ ಬಟ್ಟೆಗಳನ್ನು ಒಗೆಯುತ್ತಾರೆ. ಹೀಗೆ ಕೈಯಲ್ಲಿ ಬಟ್ಟೆ ಒಗೆಯುವ ಮುನ್ನ ಬಟ್ಟೆಗಳನ್ನು ಒಂದಷ್ಟು ಕಾಲ ಡಿಟರ್ಜೆಂಟ್ ನೀರಿನಲ್ಲಿ ನೆನೆಸಿಡುತ್ತಾರೆ. ಇದರಿಂದ ಕೊಳಕು, ಕಲೆಗಳು, ಬೆವರಿನ ವಾಸನೆ ಸುಲಭವಾಗಿ ನಿವಾರಣೆಯಾಗುತ್ತವೆ. ಆದರೆ ಈ ನೀರಿನಲ್ಲಿ ಎಷ್ಟು ಹೊತ್ತು ಬಟ್ಟೆಗಳನ್ನು ನೆನೆಸಬೇಕು, ಬಟ್ಟೆ ಒಗೆಯುವ ಸರಿಯಾದ ವಿಧಾನ ಯಾವುವು ಎಂಬುದು ಹೆಚ್ಚಿನವರಿಗೆ ಗೊತ್ತೇ ಇಲ್ಲ. ಈ ಒಂದು ತಪ್ಪಿನಿಂದ ಬಟ್ಟೆಗಳ ಗುಣಮಟ್ಟ ಹಾಳಾಗುವ, ಕಲೆ-ಕೊಳೆಗಳು ಹೋಗುವ ಸಾಧ್ಯತೆ ಇರುತ್ತದೆ. ಹಾಗಾಗಿ ಡಿಟರ್ಜೆಂಟ್‌ನಲ್ಲಿ ಬಟ್ಟೆಗಳನ್ನು ಎಷ್ಟು ಹೊತ್ತು ನೆನೆಸಿಡಬೇಕು, ಏನೆಲ್ಲಾ ವಿಷಯಗಳನ್ನು ನೆನಪಿಟ್ಟುಕೊಳ್ಳಬೇಕು ಎಂಬುದನ್ನು ತಿಳಿದುಕೊಳ್ಳುವುದು ಮುಖ್ಯ.
ಒಗೆಯುವ ಮುನ್ನ ಬಟ್ಟೆಗಳನ್ನು ಎಷ್ಟು ಹೊತ್ತು ಡಿಟರ್ಜೆಂಟ್ ನೀರಿನಲ್ಲಿ ನೆನೆಸಬೇಕು?
ಸಾಮಾನ್ಯವಾಗಿ, ಬಟ್ಟೆಗಳನ್ನು ಡಿಟರ್ಜೆಂಟ್ ನೀರಿನಲ್ಲಿ 15 ರಿಂದ 30 ನಿಮಿಷಗಳ ಕಾಲ ನೆನೆಸಿದರೆ ಸಾಕು. ಇದು ಬಟ್ಟೆಯಿಂದ ಬರುವ ಸಾಮಾನ್ಯ ಕೊಳಕು ಮತ್ತು ಬೆವರಿನ ಕಲೆಗಳನ್ನು ಸಡಿಲಗೊಳಿಸಲು ಸಹಾಯ ಮಾಡುತ್ತದೆ. ಬಟ್ಟೆಯ ಪ್ರಕಾರಕ್ಕನುಗುಣವಾಗಿ ನೋಡಿದರೆ,
- ಹತ್ತಿ ಬಟ್ಟೆಗಳು: ಇವುಗಳನ್ನು ಸಾಮಾನ್ಯವಾಗಿ 15 ರಿಂದ 30 ನಿಮಿಷಗಳ ಕಾಲ ನೆನೆಸಬಹುದು.
- ಜೀನ್ಸ್ ಮತ್ತು ದಪ್ಪ ಬಟ್ಟೆಗಳು: ಅವು ತುಂಬಾ ಕೊಳಕಾಗಿದ್ದರೆ, ಅವುಗಳನ್ನು ಸುಮಾರು 20 ರಿಂದ 30 ನಿಮಿಷಗಳ ಕಾಲ ನೆನೆಸಿದರೆ ಸಾಕು.
- ಬಣ್ಣದ ಬಟ್ಟೆಗಳು: ಗಾಢ ಬಣ್ಣದ ಬಟ್ಟೆಗಳನ್ನು ಸ್ವಲ್ಪ ಸಮಯದವರೆಗೆ ನೆನೆಸಿ ಮತ್ತು ಇತರ ಬಣ್ಣದ ಬಟ್ಟೆಗಳಿಂದ ಮುಖ್ಯವಾಗಿ ಬಿಳಿ ಬಟ್ಟೆಗಳಿಂದ ಪ್ರತ್ಯೇಕವಾಗಿ ಇರಿಸಿ.
ಬಟ್ಟೆಗಳನ್ನು ಹೆಚ್ಚು ಹೊತ್ತು ಡಿಟರ್ಜೆಂಟ್ ನೀರಿನಲ್ಲಿ ನೆನೆಸುವುದರಿಂದ ಏನಾಗುತ್ತದೆ?
ಕೆಲವೊಮ್ಮೆ ನಾವು ಬಟ್ಟೆಗಳನ್ನು ಗಂಟೆಗಟ್ಟಲೆ ಡಿಟರ್ಜೆಂಟ್ ನೀರಿನಲ್ಲಿ ನೆನೆಸಿಡುತ್ತೇವೆ. ಇದು ಒಳ್ಳೆಯದಲ್ಲ. ಡಿಟರ್ಜೆಂಟ್‌ಗೆ ದೀರ್ಘಕಾಲದವರೆಗೆ ಒಡ್ಡಿಕೊಳ್ಳುವುದರಿಂದ ಕೆಲವು ಬಟ್ಟೆಗಳ ಬಣ್ಣ ಮಸುಕಾಗಬಹುದು. ಈ ಸಮಸ್ಯೆ ವಿಶೇಷವಾಗಿ ಗಾಢ ಬಣ್ಣಗಳು ಮತ್ತು ಪ್ರಿಂಟೆಡ್ ಬಟ್ಟೆಗಳಲ್ಲಿ ಕಂಡುಬರುತ್ತದೆ. ಇದಲ್ಲದೆ, ಸೂಕ್ಷ್ಮವಾದ ಬಟ್ಟೆಯ ನಾರುಗಳ ಮೇಲೂ ಸಹ ಪರಿಣಾಮ ಬೀರಬಹುದು. ಆದ್ದರಿಂದ, ರಾತ್ರಿಯಿಡೀ ಬಟ್ಟೆಗಳನ್ನು ಡಿಟರ್ಜೆಂಟ್ ನೀರಿನಲ್ಲಿ ನೆನೆಸುವುದನ್ನು ತಪ್ಪಿಸುವುದು ಉತ್ತಮ.
ಇದನ್ನೂ ಓದಿ: ತುಳಸಿ ಹೂವುಗಳಿಂದ ತಯಾರಿಸಿ ರಾಸಯನಿಕಮುಕ್ತ ಪರಿಮಳಯುಕ್ತ ಧೂಪ
ಬಟ್ಟೆ ಒಗೆಯುವಾಗ ಈ ವಿಷಯಗಳನ್ನು ನೆನಪಿನಲ್ಲಿಡಿ:
- ಬಿಳಿ, ಬಣ್ಣದ ಮತ್ತು ಗಾಢ ಬಣ್ಣದ ಬಟ್ಟೆಗಳನ್ನು ಒಟ್ಟಿಗೆ ನೆನೆಸಬೇಡಿ.
- ಹೆಚ್ಚು ಡಿಟರ್ಜೆಂಟ್ ಸೇರಿಸುವುದರಿಂದ ನಿಮ್ಮ ಬಟ್ಟೆಗಳು ಸ್ವಚ್ಛವಾಗುವುದಿಲ್ಲ. ಪ್ಯಾಕೇಜ್ ಸೂಚನೆಗಳ ಪ್ರಕಾರ ಡಿಟರ್ಜೆಂಟ್ ಪೌಡರ್‌ ಬಳಸಿ.
- ಬಟ್ಟೆಗಳ ಮೇಲೆ ಚಹಾ, ಎಣ್ಣೆ ಅಥವಾ ತರಕಾರಿ ಕಲೆಗಳಿದ್ದರೆ, ಅವುಗಳನ್ನು ಪ್ರತ್ಯೇಕವಾಗಿ ಸ್ವಚ್ಛಗೊಳಿಸಲು ಪ್ರಯತ್ನಿಸಿ.
- ನೆನೆಸಿದ ನಂತರ, ಬಟ್ಟೆಗಳಲ್ಲಿ ಯಾವುದೇ ಡಿಟರ್ಜೆಂಟ್ ಉಳಿಯದಂತೆ ಶುದ್ಧ ನೀರಿನಿಂದ ಚೆನ್ನಾಗಿ ತೊಳೆಯಿರಿ.
- ಬಟ್ಟೆ ಒಗೆಯುವಾಗ ಬಿಸಿನೀರನ್ನು ಬಳಸುವುದನ್ನು ತಪ್ಪಿಸಿ. ಇದು ಬಣ್ಣ ಬೇಗನೆ ಮಸುಕಾಗಲು ಕಾರಣವಾಗಬಹುದು. ಅಲ್ಲದೆ, ಬಟ್ಟೆಗಳನ್ನು ಬಿಸಿಲಿನಲ್ಲಿ ಹೆಚ್ಚು ಹೊತ್ತು ಒಣಗಲು ಬಿಡುವುದನ್ನು ತಪ್ಪಿಸಿ.
ಜೀವನಶೈಲಿ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ