ಜನಪ್ರತಿನಿಧಿಗಳೇ ಎಚ್ಚರವಿರಲಿ : ..ಹೆಣ್ಣುಮಗುವನ್ನು ಯಾರೋ ಒಂದಿಬ್ಬರು ಕಾಮುಕರು ನಿನ್ನೆ ದಿನ…

Rape : ಗುರುವಾರ ವಿಧಾನಸಭೆಯ ಅಧಿವೇಶನ ನಡೆಯುವ ಸಂದರ್ಭದಲ್ಲಿ ಮಾಜಿ ಸಭಾಧ್ಯಕ್ಷ ಹಾಗೂ ಹಾಲೀ ಕಾಂಗ್ರೆಸ್​ ಮುಖಂಡ ಕೆ.ಆರ್​. ರಮೇಶ್​ ಕುಮಾರ್​ ಅತ್ಯಾಚಾರದ ಬಗ್ಗೆ ಆಡಿದ ಮಾತು ದೇಶಾದ್ಯಂತ ಚರ್ಚೆ ಆಗುತ್ತಿದೆ. ಹಾಲೀ ಸಭಾಧ್ಯಕ್ಷ, ವಿಶ್ವೇಶ್ವರ ಹೆಗಡೆ ಕಾಗೇರಿ ಮಾತನಾಡುತ್ತ, ಸದನ ನಡೆಸಲು ಆಗುವ ತೊಂದರೆ ವಿವರಿಸುತ್ತ, ‘ಎಲ್ಲರೂ ಮಾತನಾಡಬೇಕು, ಎಲ್ಲ ವಿಷಯ ಚರ್ಚೆ ಆಗಬೇಕು ಎನ್ನುತ್ತಾರೆ, ಈಗ ನಾನು ಯಾವ ಹಂತ ತಲುಪಿದ್ದೇನೆ ಎಂದರೆ- Let us enjoy the situation’ ಎಂದರು. ಆಗ ಎದ್ದುನಿಂತು ಮಾತನಾಡಿದ ರಮೇಶ್​ ಕುಮಾರ್​, ‘There is a saying. If rape is inevitable. Women should lie down and enjoy the rape’ ಎಂದು ಹೇಳದರು. ಆಗ ಪೀಠದಲ್ಲಿ ಕುಳಿತಿದ್ದ ಕಾಗೇರಿ ಅವರು ನಕ್ಕು ಸುಮ್ಮನಾದರು. ಇಂದು ಕ್ಷಮೆ ಯಾಚಿಸಿ ಈ ಅಧ್ಯಾಯಕ್ಕೆ ಕೊನೆ ಹಾಡೋಣ ಎಂದು ವಿನಂತಿಸಿದರು. ಆದರೆ, ಇದನ್ನು ಇಷ್ಟಕ್ಕೆ ಬಿಟ್ಟುಬಿಡಬೇಕೆ? ಮಹಿಳೆಯರ ಬಗ್ಗೆ ಇಂತಹ ಮನಃಸ್ಥಿತಿ ಹೊಂದಿದವರು ನಮ್ಮನ್ನು ಪ್ರತಿನಿಧಿಸಬೇಕೆ? ಇಂಥ ಮನಃಸ್ಥಿತಿಗಳ ಬದಲಾವಣೆ ಹೇಗೆ? ಇದು ಚರ್ಚಿಸಲೇಬೇಕಾದ ವಿಷಯ. 

ಟಿವಿ9 ಕನ್ನಡ ಡಿಜಿಟಲ್ ಈ ಹಿನ್ನೆಲೆಯಲ್ಲಿ ‘ಜನಪ್ರತಿನಿಧಿಗಳೇ ಎಚ್ಚರವಿರಲಿ’ ಹೊಸ ಸರಣಿಯನ್ನು ಪ್ರಾರಂಭಿಸಿದೆ. ನಿಮ್ಮ ಪ್ರತಿಕ್ರಿಯಾತ್ಮಕ ಬರಹಗಳನ್ನು ಸುಮಾರು 300 ಪದಗಳಲ್ಲಿ ಕಳಿಸಬಹುದು. ಜೊತೆಗೊಂದು ಭಾವಚಿತ್ರವಿರಲಿ. tv9kannadadigital@gmail.com

*

ಹಾಸನದಲ್ಲಿರುವ ಕವಿ ಜ. ನಾ. ತೇಜಶ್ರೀ ಅವರ ಪ್ರತಿಕ್ರಿಯೆ.

*

ಮಾನ್ಯ ಸಚಿವರಾದ ರಮೇಶ್ ಕುಮಾರ್ ಅವರು ಒಬ್ಬರೇ ವಾಕ್​ ಹೊರಟಿದ್ದಾರೆ. ಯಾರೋ ಒಂದಿಬ್ಬರು ಕಾಮುಕರು ನಡುರಸ್ತೆಯಲ್ಲಿ ಅತ್ಯಾಚಾರ ಎಸಗಲು ಒಂದು ಹುಡುಗಿಯನ್ನು ಎಳೆದಾಡುತ್ತಿದ್ದರು. ದಾಂಡಿಗ ತರುಣರ ಎದುರು ಆ ಹುಡುಗಿ ಚೀರಾಡುತ್ತ, ರೋದಿಸುತ್ತ, ಕೂಗುತ್ತಿದ್ದ ರೀತಿ ಕರುಳು ಇರಿಯುವಂತಿತ್ತು. ಆದರೂ ಈ ಕಾಮುಕರು ಅವಳನ್ನು ಬಿಡಲಿಲ್ಲ. ಅವರಿಂದ ತಪ್ಪಿಸಿಕೊಳ್ಳಲು ಅವಳು ಪ್ರತಿರೋಧ ಮಾಡುತ್ತಿದ್ದಳು, ಹೆಣಗಾಡುತ್ತಿದ್ದಳು. ಆಗ ಅವಳಿಗೆ ದೂರದಲ್ಲಿ ರಮೇಶ್ ಕುಮಾರ್ ಅವರು ತನ್ನತ್ತಲೇ ಬರುತ್ತಿರುವುದು ಕಂಡು ಮುಖದಲ್ಲಿ ಭರವಸೆಯ ನಗು ಸುಳಿಯಿತು. ಓಡೋಡಿ ಬಂದ ರಮೇಶ್ ಕುಮಾರ್ ಅವರು ಅವಳಿಂದ ಅನತಿ ದೂರದಲ್ಲಿ ನಿಂತು ಆ ಹುಡುಗಿಗೆ ಕೂಗಿ ಹೇಳಿದರು: “ತಪ್ಪಿಸಿಕೊಳ್ಳಲು ಸಾಧ್ಯವೇ ಇಲ್ಲದಿದ್ದರೆ ಅತ್ಯಾಚಾರವನ್ನು ಆನಂದಿಸು…” ಅಂತ. ಹುಡುಗಿಯ ಕಣ್ಣು ಕ್ಷಣದಲ್ಲಿ ನಂದಿಹೋಗಿ ಅಲ್ಲಿಂದ ಒಂದು ಹನಿ ಕಣ್ಣೀರು ಉರುಳಿ ನೆಲ ಸೇರಿತು.

ಇದು ಕಳೆದ ರಾತ್ರಿ ನನಗೆ ಬಿದ್ದ ಕನಸೋ ಅಥವಾ ಅಂಥದ್ದೇ ಮತ್ತೇನೋ ಸ್ಪಷ್ಟವಾಗಿ ತಿಳಿಯಲಾರದಂತ ಸ್ಥಿತಿಯಲ್ಲಿ ನಾನಿದ್ದೇನೆ. ಮನಸ್ಸಾಕ್ಷಿಯು ಸತ್ತು ಹೋಗಿರುವ ಈ ಹೊತ್ತಿನ ರಾಜಕಾರಣದ ಸನ್ನಿವೇಶದಲ್ಲಿ ಯಾರನ್ನು ನೆಚ್ಚಿ ನಾವು ಬದುಕುವುದು ಎನ್ನುವುದೇ ತಿಳಿಯದಾಗಿದೆ. ಇದರ ನಡುವೆ ಬಿ.ಎಲ್.ಶಂಕರ್, ಕಿಮ್ಮನೆ ರತ್ನಾಕರ್, ಕಾಗೋಡು ತಿಮ್ಮಪ್ಪ, ಸುರೇಶ್ ಕುಮಾರ್‌ರವರಂತಹ ಕೆಲವೇ ಕೆಲವು ಸಭ್ಯರು ಕ್ಷೀಣವಾಗಿಯಾದರೂ ಮಿನುಗುತ್ತಿರುವ ನಕ್ಷತ್ರಗಳ ಹಾಗೆ ಕಾಣುತ್ತಾರೆ…

ಅದಕ್ಕಾಗಿ… ರಮೇಶ್ ಕುಮಾರ್ ಮತ್ತು ಆ ಹೆಣ್ಣುಮಗಳ ವೃತ್ತಾಂತವು ನಾನು ಕಂಡ ಕನಸಷ್ಟೇ ಆಗಿರಲಿ.. ಮತ್ತು ಅದು ಎಂದೂ ನನಸಾಗದೆ ಇರಲಿ…

ಇದನ್ನೂ ಓದಿ : ಜನಪ್ರತಿನಿಧಿಗಳೇ ಎಚ್ಚರವಿರಲಿ : ಯಾವುದೋ ಗಂಡು ಸುಮ್ಮನೆ ಸವರಿಹೋದರೂ ಸಾಕು ಆ ಅಸಾಧ್ಯ ಸಂಕಟ ನಿಮಗೇನು ಗೊತ್ತು?