ಹಸುವಿನ ಕುರಿತ ಅಧ್ಯಯನಕ್ಕೆ ಗೋವನ್ನೇ ಸಾಕಿದ ದೆಹಲಿಯ ಹಂಸರಾಜ್​ ಕಾಲೇಜು

ಭಾರತದಲ್ಲಿ ಗೋವಿಗೆ ಪವಿತ್ರ ಸ್ಥಾನವಿದೆ. ದೇವರೆಂದು ಪೂಜಿಸುತ್ತೇವೆ. ಇದೀಗ ದೆಹಲಿಯ ಕಾಲೇಜ್​ವೊಂದರಲ್ಲಿ ಹಸುವಿನ ಬಗ್ಗೆ ಅಧ್ಯಯನ ನಡೆಸಲು ಯೋಜನೆ ರೂಪಿಸಲಾಗಿದೆ. ಇದಕ್ಕಾಗಿ ಗೋ ರಕ್ಷಣೆ ಮತ್ತು ಸಂಶೋಧನಾ ಕೇಂದ್ರವನ್ನು ಸ್ಥಾಪಿಸಲಾಗಿದೆ. ದೆಹಲಿಯ ಹಂಸರಾಜ್​ ಕಾಲೇಜಿನ (Hansraj College) ಕ್ಯಾಂಪಸ್​ನಲ್ಲಿ ಈ ಗೋ ರಕ್ಷಣೆ ಮತ್ತು ಸಂಶೋಧನಾ ಕೇಂದ್ರ (cow protection and research centre) ವನ್ನು ಸ್ಥಾಪಿಸಲಾಗಿದ್ದು, ಅಧ್ಯಯನಕ್ಕಾಗಿ ಒಂದು ಹಸುವನ್ನೂ ಸಾಕಲಾಗಿದೆ. ಈ ಕುರಿತು ಇಂಡಿಯನ್​ ಎಕ್ಸ್​ ಪ್ರೆಸ್​ ಸುದ್ದಿ ಸಂಸ್ಥೆ ವರದಿ ಮಾಡಿದೆ. ಸುದ್ದಿ ಸಂಸ್ಥೆಯೊಂದಿಗೆ ಕಾಲೇಜಿನ ಪ್ರಾಂಶುಪಾಲರಾದ ಡಾ. ರಾಮ ಶರ್ಮಾ (Dr Rama Sharma) ಮಾತನಾಡಿ, ಹಸುವಿನ ವಿವಿಧ ಅಂಶಗಳ ಬಗ್ಗೆ ಸಂಶೋಧನೆ ನಡೆಸುವ ನಿಟ್ಟಿನಲ್ಲಿ ಈ ಗೋ ಸಂರಕ್ಷಣಾ ಕೇಂದ್ರವನ್ನು ಸ್ಥಾಪಿಸಲಾಗಿದೆ. ಈಗಾಗಲೇ ಒಂದು ಹಸುವನ್ನು ಸಾಕಲಾಗಿದೆ. ಅಲ್ಲದೆ ಕಾಲೇಜಿನ ವಿದ್ಯಾರ್ಥಿಗಳಿಗೆ ಶುದ್ಧ ಹಾಲು ಮತ್ತು ತುಪ್ಪವನ್ನು ನೀಡಲಾಗುತ್ತದೆ. ಮುಂದಿನ ದಿನಗಳಲ್ಲಿ ಗೋಬರ್​ಗ್ಯಾಸ್​ಅನ್ನು ಕೂಡ ಸ್ಥಾಪಿಸಲಾಗುವುದು ಎಂದಿದ್ದಾರೆ. 

ಮುಂದುವರೆದು ಮಾತನಾಡಿ, ಒಂದು ಹಸುವಿನಿಂದ ಆರಂಭಿಸಲಾದ ಈ ಯೋಜನೆಯ ಉದ್ದೇಶ, ಅಂದರೆ ಸಂಶೋಧನೆ ಫಲಕಾರಿಯಾದರೆ ಸ್ವಾಮಿ ದಯಾನಂದ ಸರಸ್ವತಿ ಗೋ ಸಂವರ್ಧನ್ ಏವಂ ಅನುಸಂಧಾನ ಕೇಂದ್ರ ಎಂದು ನಾಮಕರಣ ಮಾಡಲಾಗುವುದು. ನಮ್ಮದು ಆರ್ಯ ಸಮಾಜದ ಅಡಿಯಲ್ಲಿ ಬರುವ ದಯಾನಂದ ಆಂಗ್ಲೋ ವೇದಿಕ್ ಟ್ರಸ್ಟ್​ನ ಕಾಲೇಜ್​ ಆಗಿದೆ. ಹೀಗಾಗಿ ಪ್ರತೀ ತಿಂಗಳ ಮೊದಲನೇ ದಿನ ಹವನವನ್ನು ಮಾಡುತ್ತೇವೆ. ಜತೆಗೆ ಆ ತಿಂಗಳಿನಲ್ಲಿ ಹುಟ್ಟುಹಬ್ಬವನ್ನು ಆಚರಿಸಿಕೊಳ್ಳುವವರನ್ನು ಆಹ್ವಾನಿಸುತ್ತೇವೆ. ಇದಕ್ಕಾಗಿ ಪ್ರತೀ ತಿಂಗಳು ಮಾರುಕಟ್ಟೆಗೆ ತೆರಳಿ ತುಪ್ಪ ಮತ್ತು ಬೇಕಾದ ಸಾಮಗ್ರಿಗಳನ್ನು ತರಬೇಕು. ಇದೀಗ ಹಸುವನ್ನು ಸಾಕಿದ ಮೇಲೆ ಅದರಿಂದ ದೊರೆಯುವ ಹಾಲು ಮತ್ತು ತುಪ್ಪವನ್ನು ಬಳಕೆ ಮಾಡುತ್ತೇವೆ ಎಂದಿದ್ದಾರೆ. ಸ್ಟೂಡೆಂಟ್ಸ್ ಫೆಡರೇಶನ್ ಆಫ್ ಇಂಡಿಯಾ ವತಿಯಿಂದ  ಗೋ ಸಂರಕ್ಷಣಾ ಕೇಂದ್ರದ ಸ್ಥಾಪನೆಗೆ ಕಟ್ಟಡವನ್ನು ಮಂಜೂರು ಮಾಡಲಾಗುತ್ತಿದೆ ಎಂದಿದ್ದಾರೆ.

ಇದನ್ನೂ ಓದಿ;

129 ಮಕ್ಕಳ ಜನನಕ್ಕೆ ಕಾರಣವಾದ ಜಗತ್ತಿನ ಆರೋಗ್ಯವಂತ ವೀರ್ಯ ದಾನಿ ಕ್ಲೈವ್ ಜೋನ್ಸ್