ರಾಮಲೀಲಾ ಮೈದಾನ ಪ್ರತಿಭಟನೆಗೆ ವ್ಯಾಪಾರಿಗಳ ವಿರೋಧ, ರಾಹುಲ್ ಗಾಂಧಿಗೆ ಪ್ರತಿಭಟನೆ ಮುಂದೂಡಲು ದೆಹಲಿ ವರ್ತಕರ ಮನವಿ

ನವದೆಹಲಿ, ಅಕ್ಟೋಬರ್ 24: ಚುನಾವಣಾ ಆಯೋಗದ ‘ವಿಶೇಷ ತೀವ್ರ ಮತದಾರರ ಪಟ್ಟಿ ಪರಿಷ್ಕರಣೆ’ (SIR) ಮತ್ತು ಮುಖ್ಯ ಚುನಾವಣಾ ಆಯುಕ್ತ ಜ್ಞಾನೇಶ್ ಕುಮಾರ್ ಅವರ ವಿರುದ್ಧ ನವೆಂಬರ್ 1 ರಂದು ದೆಹಲಿಯ ಐತಿಹಾಸಿಕ ರಾಮಲೀಲಾ ಮೈದಾನದಲ್ಲಿ ಇಂಡಿ ಬಣ ಆಯೋಜಿಸಿರುವ ಬೃಹತ್ ಪ್ರತಿಭಟನಾ ರ್ಯಾಲಿಯನ್ನು ಮುಂದೂಡುವಂತೆ ಕೋರಿ ದೆಹಲಿ ವ್ಯಾಪಾರಿಗಳ ಪ್ರಮುಖ ಒಕ್ಕೂಟವಾದ ವಾಣಿಜ್ಯ ಮತ್ತು ಕೈಗಾರಿಕಾ ಮಂಡಳಿ (CTI) ಲೋಕಸಭೆಯ ವಿರೋಧ ಪಕ್ಷದ ನಾಯಕ ರಾಹುಲ್ ಗಾಂಧಿ ಅವರಿಗೆ ತುರ್ತು ಪತ್ರ ಬರೆದಿದೆ.

ದೀಪಾವಳಿ ಹಬ್ಬದ ಶಾಪಿಂಗ್ ಉತ್ತುಂಗದಲ್ಲಿರುವ ಸಮಯದಲ್ಲಿ ಈ ರ್ಯಾಲಿ ನಡೆದರೆ ರಾಜಧಾನಿಯ ಸಗಟು ಹಾಗೂ ಚಿಲ್ಲರೆ ಮಾರುಕಟ್ಟೆಗಳಲ್ಲಿ ಬರೋಬ್ಬರಿ 10,000 ಕೋಟಿ ರೂ.ನಷ್ಟು ವ್ಯಾಪಾರ ನಷ್ಟವಾಗುವ ಗಂಭೀರ ಅಪಾಯವಿದೆ ಎಂದು ಸಿಟಿಐ ಅಧ್ಯಕ್ಷ ಬ್ರಿಜೇಶ್ ಗೋಯಲ್ ಕಳವಳ ವ್ಯಕ್ತಪಡಿಸಿದ್ದಾರೆ.

ಪತ್ರದಲ್ಲಿನ ಪ್ರಮುಖ ಆರ್ಥಿಕ ಅಂಶಗಳು
25,000 ಕೋಟಿ ರೂ. ವಹಿವಾಟಿಗೆ ಹೊಡೆತ: ಧಂತೇರಸ್ (ನವೆಂಬರ್ 6), ದೀಪಾವಳಿ (ನವೆಂಬರ್ 8) ಹಾಗೂ ಭಾಯ್ ದೂಜ್ (ನವೆಂಬರ್ 10) ವರೆಗೆ ದೆಹಲಿಯಾದ್ಯಂತ ಬಂಗಾರ-ಬೆಳ್ಳಿ, ಎಲೆಕ್ಟ್ರಾನಿಕ್ಸ್, ವಸ್ತ್ರ, ಗೃಹೋಪಯೋಗಿ ವಸ್ತುಗಳು ಮತ್ತು ಆಟೋಮೊಬೈಲ್ ಸೇರಿದಂತೆ ಒಟ್ಟು 25,000 ಕೋಟಿ ರೂ. ಮೌಲ್ಯದ ವ್ಯಾಪಾರ ನಡೆಯುತ್ತದೆ. ಜನರು ಹಬ್ಬಕ್ಕೆ ವಾರ ಮುಂಚಿತವಾಗಿಯೇ ಖರೀದಿ ಆರಂಭಿಸುವುದರಿಂದ, ನವೆಂಬರ್ 1 ರ ರ್ಯಾಲಿಯು ಗ್ರಾಹಕರ ಸಂಚಾರಕ್ಕೆ ಭಾರೀ ಅಡ್ಡಿ ಉಂಟುಮಾಡಲಿದೆ.

ಇದನ್ನೂ ಓದಿ: ಸಿಇಸಿ ಜ್ಞಾನೇಶ್ ಕುಮಾರ್ ವಿರುದ್ಧ ‘ಇಂಡಿ’ ಬಣದ ಜಂಟಿ ಸಮರ: ಬೀದಿ ಹೋರಾಟ ಹಾಗೂ ಸುಪ್ರೀಂ ಕೋರ್ಟ್ ಮೊರೆ ಹೋದ ವಿಪಕ್ಷಗಳು

ಈಗಾಗಲೇ 3,000 ಕೋಟಿ ರೂ. ನಷ್ಟ: ಅಕ್ಟೋಬರ್ ತಿಂಗಳಲ್ಲಿ ಕನ್ನಾಟ್ ಪ್ಲೇಸ್, ಇಂಡಿಯಾ ಗೇಟ್ ಮತ್ತು ಸೆಂಟ್ರಲ್ ದೆಹಲಿ ಭಾಗದಲ್ಲಿ ನಿರಂತರವಾಗಿ ನಡೆದ ಪ್ರತಿಭಟನೆಗಳು, ಮೆರವಣಿಗೆಗಳು ಮತ್ತು ರಸ್ತೆ ಬ್ಯಾರಿಕೇಡ್‌ಗಳಿಂದಾಗಿ ವ್ಯಾಪಾರಿಗಳು ಈಗಾಗಲೇ 3,000 ಕೋಟಿ ರೂ. ವಹಿವಾಟು ಕಳೆದುಕೊಂಡಿದ್ದಾರೆ ಎಂದು ಪತ್ರದಲ್ಲಿ ಉಲ್ಲೇಖಿಸಲಾಗಿದೆ.

ಮಾರುಕಟ್ಟೆಗಳು ಮತ್ತು ರೈಲು ನಿಲ್ದಾಣಗಳ ಬಂದ್ ಭೀತಿ: ರಾಮಲೀಲಾ ಮೈದಾನದ ಕೇವಲ 5 ಕಿ.ಮೀ ವ್ಯಾಪ್ತಿಯಲ್ಲಿ ಚಾಂದನಿ ಚೌಕ್, ಸದರ್ ಬಜಾರ್, ಕರೋಲ್ ಬಾಗ್, ಕಾಶ್ಮೀರಿ ಗೇಟ್, ಜಾಮಾ ಮಸೀದಿ ಮತ್ತು ಝಂಡೇವಾಲನ್‌ನಂತಹ ದೇಶದ ಅತಿ ದೊಡ್ಡ ಸಗಟು ಮಾರುಕಟ್ಟೆಗಳಿವೆ. ರ್ಯಾಲಿಯಿಂದಾಗಿ ಮೆಟ್ರೋ ನಿಲ್ದಾಣಗಳು ಮತ್ತು ರಸ್ತೆಗಳು ಬಂದ್ ಆದರೆ ಹೊರಗಿನಿಂದ ಬರುವ ಸರಕು ಲಾರಿಗಳು ಹಾಗೂ ಹಳೆ ಮತ್ತು ನವದೆಹಲಿ ರೈಲು ನಿಲ್ದಾಣಗಳ ಮೂಲಕ ಬರುವ ಲಕ್ಷಾಂತರ ಗ್ರಾಹಕರಿಗೆ ತೀವ್ರ ಸಂಕಷ್ಟ ಎದುರಾಗಲಿದೆ.

ಸುಪ್ರೀಂ ಕೋರ್ಟ್ ನೀಡಿದ್ದ ಎಚ್ಚರಿಕೆ ಹಾಗೂ ನ್ಯಾಯಾಲಯದ ನಿಲುವು
ಕಳೆದ ವಾರ (ಅಕ್ಟೋಬರ್ 16) ದೆಹಲಿ ಮಾರುಕಟ್ಟೆಗಳಲ್ಲಿ ಪ್ರತಿಭಟನೆಗಳಿಂದ ಉಂಟಾಗುತ್ತಿರುವ ತೊಂದರೆಯ ಅರ್ಜಿಯ ವಿಚಾರಣೆ ನಡೆಸಿದ್ದ ಸುಪ್ರೀಂ ಕೋರ್ಟ್ ಪೀಠವು ಮಹತ್ವದ ಎಚ್ಚರಿಕೆ ನೀಡಿತ್ತು.

ಸಾಂವಿಧಾನಿಕ ಪರಿಹಾರದ ಎಚ್ಚರಿಕೆ: ಭಾರತದ ಮುಖ್ಯ ನ್ಯಾಯಮೂರ್ತಿ (CJI) ಸೂರ್ಯ ಕಾಂತ್ ಮತ್ತು ನ್ಯಾಯಮೂರ್ತಿ ಜೋಯ್ಮಲ್ಯ ಬಾಗ್ಚಿ ಅವರಿದ್ದ ಪೀಠವು, “ಶಾಂತಿಯುತ ಪ್ರತಿಭಟನೆ ನಡೆಸುವುದು ಸಂವಿಧಾನಬದ್ಧ ಹಕ್ಕೇ ಆದರೂ, ಅದು ವ್ಯಾಪಾರಿಗಳು, ದಿನಗೂಲಿ ನೌಕರರು ಮತ್ತು ಸಾರ್ವಜನಿಕರ ಜೀವನೋಪಾಯದ ಮೂಲಭೂತ ಹಕ್ಕನ್ನು ಕಸಿದುಕೊಳ್ಳಬಾರದು. ಸಾರ್ವಜನಿಕರಿಗೆ ಅಸಮಾನ ನಷ್ಟ ಉಂಟಾದರೆ ನ್ಯಾಯಾಲಯವು ಮಧ್ಯಪ್ರವೇಶಿಸಿ ಸಾಂವಿಧಾನಿಕ ದೌರ್ಜನ್ಯ ನ್ಯಾಯವ್ಯಾಪ್ತಿಯಡಿ ಪರಿಹಾರ ಘೋಷಿಸಬೇಕಾಗುತ್ತದೆ” ಎಂದು ಎಚ್ಚರಿಸಿತ್ತು.ಪ್ರತಿಭಟನಾಕಾರರು ಮತ್ತು ವ್ಯಾಪಾರಿಗಳ ನಡುವೆ ಸಮತೋಲನ ಕಾಯ್ದುಕೊಳ್ಳುವಲ್ಲಿ ಪ್ರಜ್ಞಾವಂತಿಕೆ ಮೇಲುಗೈ ಸಾಧಿಸುತ್ತದೆ ಎಂದು ನ್ಯಾಯಾಲಯ ಆಶಿಸಿತ್ತು.

ವ್ಯಾಪಾರಿಗಳ ಒಕ್ಕೂಟದ ವಿನಂತಿ
ಸಿಟಿಐ ಅಧ್ಯಕ್ಷ ಬ್ರಿಜೇಶ್ ಗೋಯಲ್ ಮತ್ತು ನವದೆಹಲಿ ವ್ಯಾಪಾರಿಗಳ ಸಂಘದ ಅಧ್ಯಕ್ಷ ಅತುಲ್ ಭಾರ್ಗವ ಅವರು, ನಾವು ಪ್ರಜಾಪ್ರಭುತ್ವದ ಪ್ರತಿಭಟನಾ ಹಕ್ಕನ್ನು ಸಂಪೂರ್ಣ ಗೌರವಿಸುತ್ತೇವೆ. ಆದರೆ ನವೆಂಬರ್ 10 ರವರೆಗೆ ಹಬ್ಬದ ಸೀಸನ್ ಮುಗಿಯುವವರೆಗೆ ಯಾವುದೇ ರಾಜಕೀಯ ಪಕ್ಷಗಳು ಇಂತಹ ಬೃಹತ್ ರ್ಯಾಲಿಗಳನ್ನು ನಡೆಸಬಾರದು. ನವೆಂಬರ್ 1 ರಂದು ನಿಗದಿಯಾಗಿರುವ ‘ದೆಹಲಿ ಚಲೋ’ ರ್ಯಾಲಿಯನ್ನು ಹಬ್ಬದ ನಂತರದ ದಿನಗಳಿಗೆ ಮುಂದೂಡಿ ವ್ಯಾಪಾರಿಗಳ ಜೀವನೋಪಾಯವನ್ನು ರಕ್ಷಿಸಬೇಕು” ಎಂದು ರಾಹುಲ್ ಗಾಂಧಿಯವರಿಗೆ ಮನವಿ ಮಾಡಿದ್ದಾರೆ.

ರಾಷ್ಟ್ರೀಯ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ