Fact Check: India Is Doing It ವಿಡಿಯೊ ಲಿಂಕ್ ತೆರೆದರೆ ನಿಮ್ಮ ಫೋನ್ ಹ್ಯಾಕ್; ವಾಟ್ಸ್ಆ್ಯಪ್ನಲ್ಲಿ ಹರಿದಾಡಿದ್ದು ಸುಳ್ಳು ಸಂದೇಶ
WhatsApp Message Fact Check : ಕಳೆದ ವರ್ಷ ಅರ್ಜೆಂಟಿನಾದಲ್ಲಿ ಕೋವಿಡ್ 19 ಪ್ರಕರಣಗಳ ಸಂಖ್ಯೆ ಕಡಿಮೆಯಾಗುತ್ತಿದೆ ಎಂಬ ಸಂದೇಶ ವೈರಲ್ ಆಗಿತ್ತು. ಈಗ ಅದೇ ಸಂದೇಶದಲ್ಲಿ ಅರ್ಜೆಂಟಿನಾ ಬದಲು ಭಾರತ ಎಂದು ಬದಲಿಸಿ ಫಾರ್ವರ್ಡ್ ಮಾಡಲಾಗುತ್ತಿದೆ.
ಭಾರತದಲ್ಲಿ ಕೋವಿಡ್ ಪ್ರಕರಣಗಳ ಸಂಖ್ಯೆ ಕಡಿಮೆಯಾಗುತ್ತಿದೆ ಎಂದು ತೋರಿಸುವ ವಿಡಿಯೊವೊಂದನ್ನು ಅವರು
ವಾಟ್ಸ್ಆ್ಯಪ್ನಲ್ಲಿ ಫಾರ್ವರ್ಡ್ ಮಾಡುತ್ತಿದ್ದಾರೆ. India Is Doing It ಎಂಬ ಶೀರ್ಷಿಕೆಯ ಫೈಲ್ ಅದು. ಅದನ್ನು ತೆರೆದು ನೋಡಬೇಡಿ. ಅದು ನಿಮ್ಮ ಫೋನ್ ನ್ನು 10 ಸೆಕೆಂಡ್ ಗಳಲ್ಲಿ ಹ್ಯಾಕ್ ಮಾಡುತ್ತದೆ. ಇದನ್ನು ಯಾವುದೇ ರೀತಿಯಲ್ಲಿ ತಡೆಯಲು ಸಾಧ್ಯವಿಲ್ಲ. ಈ ಮಾಹಿತಿಯನ್ನು ನೀವು ನಿಮ್ಮ ಕುಟುಂಬ ಮತ್ತು ಸ್ನೇಹಿತರಿಗೆ ಕಳುಹಿಸಿ. ಟಿವಿ ಸುದ್ದಿಯಲ್ಲಿಯೂ ಇದೇ ವಿಷಯ ಬಂದಿದೆ ಎಂಬ ಒಕ್ಕಣೆ ಇರುವ ಸಂದೇಶವೊಂದು ವಾಟ್ಸ್ಆ್ಯಪ್ ನಲ್ಲಿ ಹರಿದಾಡುತ್ತಿದೆ.
ಈ ವೈರಲ್ ಸಂದೇಶದ ಫ್ಯಾಕ್ಟ್ಚೆಕ್ ನಡೆಸಿರುವ ಬೂಮ್ಲೈವ್ ಇದು ಸುಳ್ಳು ಸಂದೇಶ ಎಂದು ಹೇಳಿದೆ. ಕಳೆದ ವರ್ಷ ಅರ್ಜೆಂಟಿನಾದಲ್ಲಿ ಕೋವಿಡ್ 19 ಪ್ರಕರಣಗಳ ಸಂಖ್ಯೆ ಕಡಿಮೆಯಾಗುತ್ತಿದೆ. ಅದರ ವಿಡಿಯೊ ಲಿಂಕ್ ಕ್ಲಿಕ್ ಮಾಡಿ ನೋಡಿದರೆ 10 ಸೆಕೆಂಡ್ಗಳಲ್ಲಿ ಫೋನ್ ಹ್ಯಾಕ್ ಆಗುತ್ತದೆ ಎಂಬ ಸಂದೇಶ ಹರಿದಾಡಿತ್ತು. ಇದೀಗ ಅರ್ಜೆಂಟಿನಾ ಬದಲು ಭಾರತ ಎಂದು ಬದಲಿಸಲಾಗಿದೆ.
ಸುಳ್ಳು ಸಂದೇಶ ಎಂದು ಪತ್ತೆ ಹಚ್ಚುವುದು ಹೇಗೆ
ನಿಮಗೆ ಬಂದಿರುವ ಸಂದೇಶವನ್ನು ಯಾರು ಕಳಿಸಿದ್ದಾರೆ ಎಂಬುದನ್ನು ಮೊದಲು ನೋಡಿಕೊಳ್ಳಿ. ಈ ಸಂದೇಶ ನಿಜವೇ ಎಂದು ಅವರಲ್ಲಿ ಪ್ರಶ್ನೆ ಕೇಳಿ. ಆಗ ಅವರು ನನಗೆ ಹೀಗೊಂದು ಫಾರ್ವರ್ಡ್ ಸಂದೇಶ ಬಂತು ಅದನ್ನೂ ನಿಮಗೂ ಕಳಿಸಿದ್ದಾರೆ ಎಂದು ಹೇಳಿದರೆ ಆ ಸಂದೇಶವನ್ನು ಕಣ್ಣು ಮುಚ್ಚಿ ನಂಬುವಂತಿಲ್ಲ. ಫಾರ್ವರ್ಡ್ ಮೆಸೇಜ್ ಆಗಿದ್ದರೆ ವಾಟ್ಸ್ಆ್ಯಪ್ ನಲ್ಲಿ ಸಂದೇಶ ಫಾರ್ವರ್ಡ್ ಎಂದು ತೋರಿಸುತ್ತದೆ.
ಆ ಸಂದೇಶವನ್ನು ಗೂಗಲಲ್ಲಿ ಹುಡುಕಿ
ನಿಮಗೆ ಬಂದ ಸಂದೇಶದ ವಿಶ್ವಾಸರ್ಹತೆ ಪತ್ತೆ ಹಚ್ಚಲು ಆ ಸಂದೇಶವನ್ನು ಕಾಪಿ ಮಾಡಿ ಗೂಗಲ್ ನಲ್ಲಿ ಹುಡುಕಿ. ಉದಾಹರಣೆಗೆ ಮೇಲಿನ ಸಂದೇಶ India Is Doing It ಎಂಬುದನ್ನು ಗೂಗಲ್ ಮಾಡಿ. ಇದಕ್ಕೆ ಸಂಬಂಧ ಪಟ್ಟ ಸುದ್ದಿಗಳು ನಿಮಗೆ ಸಿಗುತ್ತವೆ. ಈಗಾಗಲೇ ಇದು ಸುಳ್ಳು ಸುದ್ದಿ ಎಂದು ಹೇಳುವ ಫ್ಯಾಕ್ಟ್ಚೆಕ್ ವರದಿಯ ಲಿಂಕ್ ಗಳನ್ನು ನೀವಿಲ್ಲಿ ಕಾಣಬಹುದು.
ಗೂಗಲಲ್ಲಿ ಹೀಗೆ ಹುಡುಕಿ
ರೋಚಕತೆಯ ಸಂದೇಶಗಳನ್ನು ಗಮನಿಸಿ
ಸಾಮಾನ್ಯವಾಗಿ ಸುಳ್ಳು ಸುದ್ದಿ ಅಥವಾ ಸಂದೇಶಗಳು ರೋಚಕತೆಯಿಂದ ಕೂಡಿರುತ್ತವೆ. ನಿಮಗೆ ಗೊತ್ತಾ? ಹಾಗಾಗುತ್ತದೆ ಹೀಗಾಗುತ್ತದೆ ಎಂಬ ಪದಗಳೊಂದಿಗೆ ಇರುವ ಈ ಸಂದೇಶಗಳು ಇದುವೇ ನಿಜ ಸಂದೇಶ ಎಂದು ನಂಬಿಸಲು ಪ್ರಯತ್ನಿಸುತ್ತಿರುತ್ತವೆ. ಅಷ್ಟೇ ಅಲ್ಲದೆ ಇದು ತುಂಬಾ ಪ್ರಧಾನ ಸಂಗತಿ, ಇದನ್ನು ನಿಮ್ಮ ಕುಟುಂಬದವರಿಗೆ, ಗೆಳೆಯರಿಗೆ ಫಾರ್ವರ್ಡ್ ಮಾಡಿ ಎಂಬ ವಿನಂತಿಯ ಸಾಲುಗಳು ಇರುತ್ತವೆ. ಸಿಕ್ಕಾಪಟ್ಟೆ ಅಕ್ಷರ ದೋಷವಿರುವ, ಸುದ್ದಿಯ ಮೂಲ ಯಾವುದು ಎಂದು ತಿಳಿಸದೆ ಫಾರ್ವರ್ಡ್ ಆಗುವ ಸಂದೇಶಗಳ ಬಗ್ಗೆಯೂ ಎಚ್ಚರದಿಂದಿರಿ.
ಇದನ್ನೂ ಓದಿ: Fact Check | ಮಿಯಾ ಖಲೀಫಾ ಪೋಸ್ಟರ್ಗೆ ಕೇಕ್ ತಿನಿಸಿದ ಕಾಂಗ್ರೆಸ್ ಕಾರ್ಯಕರ್ತರು: ಫೋಟೊಶಾಪ್ ಚಿತ್ರ ವೈರಲ್
ಸುಳ್ಳು ಸುದ್ದಿ ಹರಡದಂತೆ ಎಚ್ಚರಿಸಿ
ನಿಮಗೆ ಯಾರಾದರೂ ಸುಳ್ಳು ಸುದ್ದಿ ಅಥವಾ ಸಂದೇಶ ಕಳುಹಿಸಿದ್ದರೆ, ಅದರ ಸತ್ಯಾಸತ್ಯತೆ ತಿಳಿಸುವ ಮಾಹಿತಿಗಳೊಂದಿಗೆ ಅವರ ಸಂದೇಶಕ್ಕೆ ಪ್ರತಿಕ್ರಿಯಿಸಿ. ಸುಳ್ಳು ಸುದ್ದಿಗಳು ಹರಡಬೇಡಿ ಎಂಬ ಕಿವಿಮಾತು ಕೂಡಾ ಹೇಳಿ.