ವಿದ್ಯಾರ್ಥಿಗಳ ಆತ್ಮಹತ್ಯೆ ತಡೆಗೆ ವಿನೂತನ ಫ್ಯಾನ್ ಅಳವಡಿಸಿದ ಗುಜರಾತ್ ವಿಶ್ವವಿದ್ಯಾಲಯ; ನಿಜಕ್ಕೂ ಏನಿದರ ಉಪಯೋಗ?

ಸೂರತ್, ಅಕ್ಟೋಬರ್ 23: ಗುಜರಾತ್‌ನ ಸೂರತ್‌ನಲ್ಲಿರುವ ವೀರ್ ನರ್ಮದ್ ಸೌತ್ ಗುಜರಾತ್ ವಿಶ್ವವಿದ್ಯಾಲಯವು ತನ್ನ ಹಾಸ್ಟೆಲ್ ಕೊಠಡಿಗಳಲ್ಲಿ ವಿದ್ಯಾರ್ಥಿಗಳ ಆತ್ಮಹತ್ಯೆ ತಡೆಯುವ ಉದ್ದೇಶದಿಂದ 354 ‘ಆ್ಯಂಟಿ-ಸೂಸೈಡ್ ಸ್ಪ್ರಿಂಗ್ ಲೋಡೆಡ್ ಫ್ಯಾನ್’ಗಳನ್ನು ಅಳವಡಿಸಿದೆ. ಈ ಕ್ರಮವು ಸುರಕ್ಷತಾ ಹಂತವಾಗಿ ಗಮನ ಸೆಳೆದಿದ್ದರೂ, ವಿದ್ಯಾರ್ಥಿಗಳು ಎದುರಿಸುತ್ತಿರುವ ಶೈಕ್ಷಣಿಕ ಒತ್ತಡ ಹಾಗೂ ಮಾನಸಿಕ ಆರೋಗ್ಯದ ಮೂಲ ಸಮಸ್ಯೆಯನ್ನು ಪರಿಹರಿಸದೆ ಬರಿ ಫ್ಯಾನ್‌ಗಳನ್ನು ಬದಲಾಯಿಸುವುದು ಎಷ್ಟು ಸೂಕ್ತ ಎಂಬುದು ಸಾಮಾಜಿಕ ಜಾಲತಾಣಗಳಲ್ಲಿ ತೀವ್ರ ಚರ್ಚೆಗೆ ಗ್ರಾಸವಾಗಿದೆ.

ಗುಜರಾತ್‌ನಲ್ಲಿ ವಿಶ್ವವಿದ್ಯಾಲಯವೊಂದು ಕೈಗೊಂಡ ಇಂತಹ ಮೊದಲ ಉಪಕ್ರಮ ಇದಾಗಿದ್ದು, ಶೈಕ್ಷಣಿಕ ಒತ್ತಡ, ವೃತ್ತಿಜೀವನದ ಅನಿಶ್ಚಿತತೆ ಮತ್ತು ಮಾನಸಿಕ ಖಿನ್ನತೆಯಿಂದ ಸಂಭವಿಸುವ ವಿದ್ಯಾರ್ಥಿಗಳ ಸರಣಿ ಸಾವುಗಳ ಬೆನ್ನಲ್ಲೇ ಈ ನಿರ್ಧಾರ ಕೈಗೊಳ್ಳಲಾಗಿದೆ. ‘ದೈನಿಕ್ ಭಾಸ್ಕರ್’ ವರದಿಯ ಪ್ರಕಾರ, ಪ್ರತಿ ಫ್ಯಾನ್ ಬೆಲೆ ಸುಮಾರು 1,500 ರೂ. ಆಗಿದ್ದು, ಒಟ್ಟು 354 ಫ್ಯಾನ್‌ಗಳಿಗೆ ಸುಮಾರು 5.31 ಲಕ್ಷ ರೂ. ವೆಚ್ಚ ಮಾಡಲಾಗಿದೆ.

ಇದನ್ನೂ ಓದಿ: ಪತ್ನಿಗೆ ವಿಷದ ಇಂಜೆಕ್ಷನ್​ ಕೊಡಿಸಿ ಕೊಲೆ ಯತ್ನ: ಹೆಂಡ್ತಿ ಬದುಕುಳಿಯುತ್ತಿದ್ದಂತೆಯೇ ಪ್ರೇಯಸಿ ಜತೆ ಪತಿ ಆತ್ಮಹತ್ಯೆ

ಈ ಫ್ಯಾನ್ ಹೇಗೆ ಕೆಲಸ ಮಾಡುತ್ತದೆ?:

ಈ ಫ್ಯಾನ್‌ಗಳಲ್ಲಿ ವಿಶೇಷ ಸ್ಪ್ರಿಂಗ್ ಮೆಕ್ಯಾನಿಸಂ ಇರಲಿದ್ದು, ಫ್ಯಾನ್ ಮೇಲೆ 10 ಕೆಜಿಗಿಂತ ಹೆಚ್ಚು ತೂಕ ಬಿದ್ದ ತಕ್ಷಣವೇ ಈ ತಂತ್ರಜ್ಞಾನ ಸಕ್ರಿಯಗೊಳ್ಳುತ್ತದೆ. ಭಾರ ಬಿದ್ದ ತಕ್ಷಣ ಫ್ಯಾನ್‌ನ ವಿದ್ಯುತ್ ಸಂಪರ್ಕ ಕಡಿತಗೊಂಡು, ಫ್ಯಾನ್ ಕೆಳಗೆ ಜಾರುತ್ತದೆ. ಇದರಿಂದಾಗಿ ಫ್ಯಾನ್ ನೇಣು ಬಿಗಿದುಕೊಳ್ಳಲು ಅಗತ್ಯವಿರುವ ತೂಕವನ್ನು ತಡೆಯಲು ಸಾಧ್ಯವಾಗುವುದಿಲ್ಲ.

ಹಾಸ್ಟೆಲ್ ಕೊಠಡಿಯಲ್ಲಿ ಫ್ಯಾನ್‌ಗೆ ಬೆಡ್‌ಶೀಟ್ ಸುತ್ತಿ ತೂಕ ನೀಡುವ ಮೂಲಕ ಈ ವ್ಯವಸ್ಥೆ ಹೇಗೆ ತಕ್ಷಣ ಕೆಳಗಿಳಿಯುತ್ತದೆ ಎಂಬುದನ್ನು ಕುಲಪತಿಗಳು ಪ್ರದರ್ಶಿಸಿದ್ದಾರೆ. ವಿಎನ್‌ಎಸ್‌ಜಿಯು ಕೈಗೊಂಡಿರುವ ಈ ಕ್ರಮವನ್ನು ಗುಜರಾತ್‌ನಾದ್ಯಂತ ಇರುವ ಸರ್ಕಾರಿ ಹಾಗೂ ಖಾಸಗಿ ವಿಶ್ವವಿದ್ಯಾಲಯಗಳು, ಮೆಡಿಕಲ್ ಮತ್ತು ಎಂಜಿನಿಯರಿಂಗ್ ಕಾಲೇಜು ಹಾಸ್ಟೆಲ್‌ಗಳಿಗೂ ಮಾದರಿಯಾಗಿ ಬಿಂಬಿಸಲಾಗುತ್ತಿದೆ. ಆದರೆ, ಈ ಯಾಂತ್ರಿಕ ಸುರಕ್ಷತೆಯು ಕೊಠಡಿಯಲ್ಲಿನ ಅಪಾಯವನ್ನು ತಾತ್ಕಾಲಿಕವಾಗಿ ಕಡಿಮೆ ಮಾಡಬಹುದೇ ಹೊರತು, ವಿದ್ಯಾರ್ಥಿಯ ಮನಸ್ಸಿನಲ್ಲಿರುವ ಭಾವನಾತ್ಮಕ ಮತ್ತು ಶೈಕ್ಷಣಿಕ ಆತಂಕಗಳನ್ನು ನಿವಾರಿಸಲು ಸಾಧ್ಯವಿಲ್ಲ ಎಂಬ ವಾದವೂ ವ್ಯಕ್ತವಾಗಿದೆ.

ಇದನ್ನೂ ಓದಿ: ಗರ್ಭಿಣಿ ಪತ್ನಿಯ ಕೊಲೆಗೂ ಮುನ್ನ ಗೂಗಲ್‌ನಲ್ಲಿ ಆತ್ಮಹತ್ಯೆಯ ಶಿಕ್ಷೆ ಬಗ್ಗೆ ಹುಡುಕಿದ್ದ ಪತಿ!

ಈ ನಿರ್ಧಾರದ ಕುರಿತು ಸಾಮಾಜಿಕ ಜಾಲತಾಣಗಳಲ್ಲಿ ಮಿಶ್ರ ಪ್ರತಿಕ್ರಿಯೆಗಳು ವ್ಯಕ್ತವಾಗಿದ್ದು, ತೀವ್ರ ವ್ಯಂಗ್ಯ ಹಾಗೂ ಟೀಕೆಗಳು ವ್ಯಕ್ತವಾಗಿವೆ. ಸೀಲಿಂಗ್ ಫ್ಯಾನ್‌ಗಳ ಬದಲು ಟೇಬಲ್ ಫ್ಯಾನ್ ಅಥವಾ ಪೆಡೆಸ್ಟಲ್ ಫ್ಯಾನ್‌ಗಳನ್ನು ಬಳಸಬಹುದಿತ್ತು. ವಿದ್ಯಾರ್ಥಿಗಳಿಗೆ ಕೌನ್ಸಿಲಿಂಗ್ ನೀಡಿ ಅವರ ತೊಂದರೆಗಳನ್ನು ಬಗೆಹರಿಸುವ ಬದಲು, ನೇಣು ಬಿಗಿದಾಗ ಮುರಿಯುವ ಫ್ಯಾನ್ ಕಂಡುಹಿಡಿಯುವುದು ಹಾಸ್ಯಾಸ್ಪದ ಎಂದು ಜನರು ಕಿಡಿಕಾರಿದ್ದಾರೆ.

ಪರಿಹಾರವೇ ಅಥವಾ ಮುನ್ನೆಚ್ಚರಿಕೆಯೇ?:

354 ಸ್ಪ್ರಿಂಗ್-ಲೋಡೆಡ್ ಫ್ಯಾನ್‌ಗಳ ಅಳವಡಿಕೆಯು ಹಾಸ್ಟೆಲ್‌ಗಳಲ್ಲಿನ ಭೌತಿಕ ಅಪಾಯವನ್ನು ತಡೆಯುವ ಒಂದು ಸಣ್ಣ ಪ್ರಯತ್ನವಾಗಿರಬಹುದು. ಆದರೆ, ಇದು ವೃತ್ತಿಪರ ಮಾನಸಿಕ ಆರೋಗ್ಯ ತರಬೇತಿ, ಕೌನ್ಸಿಲಿಂಗ್ ಮತ್ತು ಆಪ್ತಸಮಾಲೋಚನೆಗೆ ಪರ್ಯಾಯವಾಗಲು ಸಾಧ್ಯವಿಲ್ಲ. ಮೂಲಸೌಕರ್ಯ ಬದಲಾಯಿಸುವುದರ ಜೊತೆಗೆ ವಿದ್ಯಾರ್ಥಿಗಳ ಮಾನಸಿಕ ಕಷ್ಟಗಳಿಗೆ ಸ್ಪಂದಿಸುವ ವಾತಾವರಣ ನಿರ್ಮಿಸುವುದು ಇಂದಿನ ಅಗತ್ಯವಾಗಿದೆ.

ಇನ್ನಷ್ಟು ರಾಷ್ಟ್ರೀಯ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ