ಇಂಡಿಗೋ ವಿಮಾನದ ಆಸನದಡಿಯಲ್ಲಿ ಸಿಕ್ತು ಒಂದು ಕೆಜಿ ಚಿನ್ನ!

ದೆಹಲಿ: ದುಬೈನಿಂದ ದೆಹಲಿಗೆ ಆಗಮಿಸಿದ ಇಂಡಿಗೋ ವಿಮಾನದ ಸೀಟ್​ನ ಅಡಿಯಲ್ಲಿ ಒಂದು ಕೆಜಿಗೂ ಅಧಿಕ ಚಿನ್ನ ಸಿಕ್ಕಿದೆ. ಸದ್ಯ ಇದನ್ನು ತೆರಿಗೆ ಅಧಿಕಾರಿಗಳು ವಶಕ್ಕೆ ಪಡೆದಿದ್ದಾರೆ.

ಇಂಡಿಗೋ ವಿಮಾನ ದುಬೈನಿಂದ ದೆಹಲಿಗೆ ಬಂದಿತ್ತು. ಇದನ್ನು ಪರಿಶೀಲನೆ ಮಾಡುವಾಗ ಅನುಮಾನಾಸ್ಪದ ಬ್ಯಾಗ್​ ಒಂದು ಸಿಕ್ಕಿದೆ. ಇದರಲ್ಲಿ ಚಿನ್ನ ಇರುವ ವಿಚಾರ ಗೊತ್ತಾದ ನಂತರದಲ್ಲಿ ಸುಂಕ ಅಧಿಕಾರಿಗಳಿಗೆ ಮಾಹಿತಿ ನೀಡಲಾಗಿದೆ. ವಿಮಾನದ ಒಳಗೆ ಆಗಮಿಸಿದ ಅಧಿಕಾರಿಗಳು ಚಿನ್ನವನ್ನು ವಶಕ್ಕೆ ಪಡೆದಿದ್ದಾರೆ.

ಸಿಲಿಂಡರ್​ ಆಕಾರದಲ್ಲಿರುವ 31 ಚಿನ್ನದ ರಾಡ್​ಗಳು ಪತ್ತೆ ಆಗಿವೆ. ಇದರ ತೂಕ 1.138 ಕೆಜಿ ಇತ್ತು. ಇದರ ಬೆಲೆ 48,90,250 ರೂಪಾಯಿನಷ್ಟು ಎಂದು ತೆರಿಗೆ ಅಧಿಕಾರಿಗಳು ಹೇಳಿದ್ದಾರೆ.

ದುಬೈನಿಂದ ತರಲಾದ ಈ ಚಿನ್ನದ ಬ್ಯಾಗ್​ ಯಾರಿಗೆ ಸೇರಬೇಕಾಗಿದ್ದು ಎನ್ನುವ ಬಗ್ಗೆ ಪರೀಶಿಲನೆ ನಡೆಸಲಾಗುತ್ತಿದೆ. ಅಂದಹಾಗೆ, ವಿಮಾನ ನಿಲ್ದಾಣದಲ್ಲಿ ಸಿಕ್ಕಿ ಬೀಳುವ ಭಯದಲ್ಲಿ ಇದನ್ನು ಬಿಟ್ಟು ಹೋಗಿರುವ ಸಾಧ್ಯತೆ ಕೂಡ ಇದೆ ಎಂದು ಅಧಿಕಾರಿಗಳು ಅಭಿಪ್ರಾಯಪಟ್ಟಿದ್ದಾರೆ.