ಚಿನ್ನದ ಸರ, ದುಬಾರಿ ಫೋನ್‌ಗಾಗಿ 1 ತಿಂಗಳ ಹಸುಗೂಸನ್ನೇ ಮಾರಿಕೊಂಡ ಪೋಷಕರು: ಮಹಾರಾಷ್ಟ್ರದಲ್ಲಿ ಬೆಚ್ಚಿಬೀಳಿಸುವ ಘಟನೆ

ಪುಣೆ, ಸೆಪ್ಟೆಂಬರ್ 30: ಮಹಾರಾಷ್ಟ್ರದ ಛತ್ರಪತಿ ಸಂಭಾಜಿನಗರದಲ್ಲಿ ಒಂದು ತಿಂಗಳ ಹಸುಗೂಸನ್ನು ಮಾರಾಟ ಮಾಡಿದ ಆರೋಪದ ಮೇಲೆ ಪೋಷಕರು ಸೇರಿದಂತೆ ಏಳು ಮಂದಿಯನ್ನು ಪೊಲೀಸರು ಬಂಧಿಸಿದ್ದಾರೆ. ಚಿನ್ನದ ಸರ ಮತ್ತು ದುಬಾರಿ ಮೊಬೈಲ್ ಖರೀದಿಸಲು ಹಣದ ಅಗತ್ಯವಿದ್ದ ಕಾರಣ ದಂಪತಿ ಮಗುವನ್ನು ಮಾರಾಟ ಮಾಡಿದ್ದಾರೆ ಎಂದು ಪೊಲೀಸರು ತಿಳಿಸಿದ್ದಾರೆ. ಐಷಾರಾಮಿ ಜೀವನ ನಡೆಸಲು, ಚಿನ್ನದ ಸರ ಮತ್ತು ದುಬಾರಿ ಮೊಬೈಲ್ ಖರೀದಿಸಲು ಲಿವ್-ಇನ್ ಸಂಬಂಧದಲ್ಲಿದ್ದ ಜೋಡಿಯೊಂದು ತಮ್ಮದೇ 1 ತಿಂಗಳ ಹಸುಗೂಸನ್ನು ಮಾರಾಟ ಮಾಡಿದೆ. ತನಿಖೆ ಕೈಗೆತ್ತಿಕೊಂಡ ಪೊಲೀಸರು ಸುಮಾರು 550 ಕಿ.ಮೀ ದೂರದ ತೆಲಂಗಾಣದ ಹೈದರಾಬಾದ್‌ನಲ್ಲಿ ಮಗುವನ್ನು ಸುರಕ್ಷಿತವಾಗಿ ರಕ್ಷಿಸಿದ್ದು, ಹೆತ್ತವರು ಹಾಗೂ ನಕಲಿ ವೈದ್ಯ ಸೇರಿದಂತೆ ಒಟ್ಟು 7 ಮಂದಿ ಆರೋಪಿಗಳನ್ನು ಬಂಧಿಸಿದ್ದಾರೆ.

ದೂರು ನೀಡಲು ಬಂದಾಗ ಪ್ರಕರಣ ಬಯಲು

ಸೆಪ್ಟೆಂಬರ್ 20ರಂದು ಮಹಿಳೆಯೊಬ್ಬರು ತನ್ನ ಲಿವ್-ಇನ್ ಸಂಗಾತಿ ದೈಹಿಕವಾಗಿ ಹಿಂಸೆ ನೀಡುತ್ತಿದ್ದಾನೆ ಎಂದು ಪೊಲೀಸರಿಗೆ ದೂರು ನೀಡಿದ್ದರು. ವಿಚಾರಣೆ ವೇಳೆ ಆಕೆಯ ಒಂದು ತಿಂಗಳ ಮಗು ಮನೆಯಲ್ಲಿ ಇಲ್ಲದಿರುವುದು ಪೊಲೀಸರ ಗಮನಕ್ಕೆ ಬಂದಿದೆ. ಹೆಚ್ಚಿನ ವಿಚಾರಣೆ ನಡೆಸಿದಾಗ ಮಗುವನ್ನು ಮಧ್ಯವರ್ತಿಗಳ ಮೂಲಕ ಮಾರಾಟ ಮಾಡಿರುವ ಮಾಹಿತಿ ಹೊರಬಂದಿದೆ.

ಮೊದಲ ಮಾರಾಟ: ಹೆತ್ತವರು ಮಗುವನ್ನು ಸೀಮಾ ರೇಶ್ವಾಲ್ ಎಂಬ ಮಧ್ಯವರ್ತಿ ಮಹಿಳೆಗೆ 1.2 ಲಕ್ಷ ರೂ.ಗೆ ಮಾರಿದ್ದರು.

ಎರಡನೇ ಮಾರಾಟ: ಸೀಮಾ ಆ ಮಗುವನ್ನು ಪಡೆಗಾಂವ್‌ನ ಸಂಗೀತಾ ಅವ್ಹಾದ್ ಎಂಬಾಕೆಗೆ 2.7 ಲಕ್ಷ ರೂ.ಗೆ ಮಾರಾಟ ಮಾಡಿದ್ದಳು.

ಮೂರನೇ ಮಾರಾಟ: ಸಂಗೀತಾ ಆ ಮಗುವನ್ನು ಸುರೇಶ್ ಗುಂಟುಕಾ ಎಂಬ ನಕಲಿ ವೈದ್ಯನಿಗೆ 3.5 ಲಕ್ಷ ರೂ.ಗೆ ಹಸ್ತಾಂತರಿಸಿದಳು.

ನಾಲ್ಕನೇ ಮಾರಾಟ: ನಕಲಿ ವೈದ್ಯ ಸುರೇಶ್ ಮಗುವನ್ನು ಹೈದರಾಬಾದ್‌ನಲ್ಲಿರುವ ತನ್ನ ಸಂಬಂಧಿ ಉಮಾ ಖಟ್ಕಮ್ ಎಂಬಾಕೆಗೆ ನೀಡಿದ್ದ.

ಪುಂಡ್ಲಿಕ್‌ನಗರ ಪೊಲೀಸ್ ಇನ್ಸ್‌ಪೆಕ್ಟರ್ ವಿವೇಕ್ ಸೋನಾವಾನೆ ನೇತೃತ್ವದ ವಿಶೇಷ ತಂಡವು ತಕ್ಷಣವೇ ಹೈದರಾಬಾದ್‌ಗೆ ಧಾವಿಸಿ ಮಗುವನ್ನು ಸುರಕ್ಷಿತವಾಗಿ ರಕ್ಷಿಸಿದ್ದು, ಮಹಾರಾಷ್ಟ್ರಕ್ಕೆ ಮರಳಿ ತರಲು ಕ್ರಮ ಕೈಗೊಂಡಿದೆ. ಈ ಪ್ರಕರಣದಲ್ಲಿ ಪೋಷಕರು, ಮಧ್ಯವರ್ತಿಗಳು ಮತ್ತು ನಕಲಿ ವೈದ್ಯ ಸೇರಿದಂತೆ ಏಳು ಮಂದಿಯನ್ನು ಪೊಲೀಸರು ಬಂಧಿಸಿದ್ದಾರೆ. ಮಗುವಿನ ಮಾರಾಟದ ಹಿಂದೆ ಇನ್ನಷ್ಟು ಮಂದಿ ಭಾಗಿಯಾಗಿದ್ದಾರೆಯೇ ಎಂಬುದರ ಬಗ್ಗೆ ತನಿಖೆ ಮುಂದುವರೆದಿದೆ.

ಮತ್ತಷ್ಟು ಓದಿ: ಖಾಸಗಿ ಆಸ್ಪತ್ರೆ ಕೈಚೆಲ್ಲಿದ್ದ ಜೀವಕ್ಕೆ ಮರುಜೀವ: ಸಾವಿನ ದವಡೆಯಿಂದ ಗರ್ಭಿಣಿಯನ್ನು ಪಾರು ಮಾಡಿದ ಮಂಗಳೂರಿನ ಸರ್ಕಾರಿ ವೈದ್ಯರು

ಮಕ್ಕಳನ್ನು ಹಣಕ್ಕಾಗಿ ಮಾರಾಟ ಮಾಡುವುದು ಕಾನೂನುಬಾಹಿರವಾಗಿದೆ. ಭಾರತದಲ್ಲಿ ಮಗುವನ್ನು ದತ್ತು ಪಡೆಯಲು ಕಾನೂನುಬದ್ಧ ಪ್ರಕ್ರಿಯೆ ಅನುಸರಿಸಬೇಕು. ಪೊಲೀಸರು ಪ್ರಕರಣದ ಸಂಪೂರ್ಣ ಜಾಲದ ಬಗ್ಗೆ ತನಿಖೆ ನಡೆಸುತ್ತಿದ್ದಾರೆ.

ಮಕ್ಕಳ ಕಳ್ಳಸಾಗಣೆ ವಿರುದ್ಧದ ಕಠಿಣ ಕಾನೂನು: ಭಾರತೀಯ ನ್ಯಾಯ ಸಂಹಿತೆ (BNS) ಹಾಗೂ ಬಾಲಾಪರಾಧ ನ್ಯಾಯ (ಮಕ್ಕಳ ರಕ್ಷಣೆ ಮತ್ತು ಪಾಲನೆ) ಕಾಯ್ದೆ-2015 ಸೆಕ್ಷನ್ 81 ರ ಪ್ರಕಾರ, ಮಕ್ಕಳನ್ನು ಮಾರಾಟ ಮಾಡುವುದು ಅಥವಾ ಖರೀದಿಸುವುದು ಗಂಭೀರ ಅಪರಾಧವಾಗಿದ್ದು, ತಪ್ಪಿತಸ್ಥರಿಗೆ 5 ವರ್ಷಗಳವರೆಗೆ ಕಠಿಣ ಜೈಲು ಶಿಕ್ಷೆ ಮತ್ತು 1 ಲಕ್ಷ ರೂ.ವರೆಗೆ ದಂಡ ವಿಧಿಸಲು ಅವಕಾಶವಿದೆ. ಇದರಲ್ಲಿ ಆಸ್ಪತ್ರೆ ಸಿಬ್ಬಂದಿ ಅಥವಾ ವೈದ್ಯರು ಭಾಗಿಯಾಗಿದ್ದರೆ ಶಿಕ್ಷೆಯ ಪ್ರಮಾಣ 7 ವರ್ಷಗಳವರೆಗೆ ವಿಸ್ತರಣೆಯಾಗುತ್ತದೆ.

ಕಾನೂನುಬದ್ಧ ದತ್ತು ಪ್ರಕ್ರಿಯೆಯ ನಿಯಮಗಳು (CARA): ಭಾರತದಲ್ಲಿ ಮಕ್ಕಳಿಲ್ಲದ ದಂಪತಿಗಳು ಕಾನೂನುಬದ್ಧವಾಗಿ ಮಗುವನ್ನು ದತ್ತು ಪಡೆಯಲು ಕೇಂದ್ರ ಸರ್ಕಾರದ ‘ಕೇಂದ್ರೀಯ ದತ್ತು ಸಂಪನ್ಮೂಲ ಪ್ರಾಧಿಕಾರ’ ಮೂಲಕವೇ ನೋಂದಾಯಿಸಿಕೊಳ್ಳಬೇಕು. ಆದರೆ ದೀರ್ಘಾವಧಿ ಕಾಯುವಿಕೆಯನ್ನು ತಪ್ಪಿಸಲು ಹಲವರು ಇಂತಹ ನಕಲಿ ವೈದ್ಯರು ಮತ್ತು ಮಧ್ಯವರ್ತಿಗಳ ಮೂಲಕ ಲಕ್ಷಾಂತರ ರೂಪಾಯಿ ಕೊಟ್ಟು ಅಕ್ರಮವಾಗಿ ಮಕ್ಕಳನ್ನು ಖರೀದಿಸುವ ಅಪಾಯಕಾರಿ ದಂಧೆಗೆ ಇಳಿಯುತ್ತಿದ್ದಾರೆ.

ಅಂತಾರಾಜ್ಯ ಮಕ್ಕಳ ಮಾರಾಟ ಜಾಲದ ಶಂಕೆ: ಬಂಧಿತ ಮಧ್ಯವರ್ತಿಗಳು ಮತ್ತು ನಕಲಿ ವೈದ್ಯ ಈ ಹಿಂದೆಯೂ ಮಹಾರಾಷ್ಟ್ರ ಮತ್ತು ತೆಲಂಗಾಣದ ನಡುವೆ ಮಕ್ಕಳನ್ನು ಅಕ್ರಮವಾಗಿ ಮಾರಾಟ ಮಾಡಿದ್ದಾರೆಯೇ ಎಂಬ ಬಗ್ಗೆ ಮಹಾರಾಷ್ಟ್ರ ಪೊಲೀಸರು ತೀವ್ರ ಶೋಧ ನಡೆಸುತ್ತಿದ್ದಾರೆ. ಬಡ ಅಥವಾ ಲಿವ್-ಇನ್ ದಂಪತಿಗಳನ್ನು ಗುರಿಯಾಗಿಸಿಕೊಂಡು ಹಣದ ಆಮಿಷವೊಡ್ಡಿ ಮಕ್ಕಳನ್ನು ಖರೀದಿಸಿ, ಮಕ್ಕಳಿಲ್ಲದ ಸಿರಿವಂತರಿಗೆ ಲಕ್ಷಾಂತರ ರೂಪಾಯಿಗೆ ಮಾರಾಟ ಮಾಡುವ ಬೃಹತ್ ಸಿಂಡಿಕೇಟ್ ಇದರ ಹಿಂದೆ ಕೆಲಸ ಮಾಡುತ್ತಿರುವ ಸಾಧ್ಯತೆಯಿದೆ.

ರಾಷ್ಟ್ರೀಯ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ