ಮೋದಿ ಎಲ್ಲಿಗೂ ಹೋಗಲ್ಲ, ಬನಸ್ಕಾಂತದಲ್ಲಿ ಮೊಳಗಿದ ಘೋಷಣೆ:ಅಭಿವೃದ್ಧಿ ಗುರಿಗಳ ಪಟ್ಟಿ ಮಾಡಿದ ಪ್ರಧಾನಿ

ಬನಸ್ಕಾಂತ, ಅಕ್ಟೋಬರ್ 30: ಮೋದಿ ಎಲ್ಲಿಗೂ ಹೋಗುವುದಿಲ್ಲ ಎಂಬ ಘೋಷಣೆ ಗುಜರಾತ್‌ನ ಬನಸ್ಕಾಂತದಲ್ಲಿ ನಡೆದ ಪ್ರಧಾನಿ ನರೇಂದ್ರ ಮೋದಿ ಅವರ ರ್ಯಾಲಿಯಲ್ಲಿ ಗಮನ ಸೆಳೆಯಿತು. ಭಾರತವನ್ನು ಅಭಿವೃದ್ಧಿ ಹೊಂದಿದ ರಾಷ್ಟ್ರವನ್ನಾಗಿ ಮಾಡುವವರೆಗೆ, ದೇಶವನ್ನು ಸ್ವಾವಲಂಬಿಯಾಗಿಸುವವರೆಗೆ ಮತ್ತು ಜಾಗತಿಕ ಉತ್ಪಾದನಾ ಕೇಂದ್ರವನ್ನಾಗಿ ರೂಪಿಸುವವರೆಗೆ ತಮ್ಮ ಕೆಲಸ ಮುಂದುವರೆಯಲಿದೆ ಎಂಬ ಸಂದೇಶವನ್ನು ಈ ಘೋಷಣೆಯ ಮೂಲಕ ಸಾರಲಾಯಿತು.

ಪ್ರಧಾನಿ ಮೋದಿ ಅವರ ಎರಡು ದಿನಗಳ ಗುಜರಾತ್ ಪ್ರವಾಸದ ವೇಳೆ ಈ ರ್ಯಾಲಿ ನಡೆಯಿತು. ಭಾಷಣದಲ್ಲಿ ಭಾರತದ ಭವಿಷ್ಯದ ಗುರಿಗಳನ್ನು ಒಂದೊಂದಾಗಿ ಪ್ರಸ್ತಾಪಿಸಿದಾಗ, ಜನರು “ಮೋದಿ ಕಹೀಂ ನಹೀ ಜಾಯೇಗಾ” ಎಂದು ಘೋಷಣೆ ಕೂಗಿ ಪ್ರತಿಕ್ರಿಯಿಸಿದರು. ಇದರಿಂದ ಕಾರ್ಯಕ್ರಮದಲ್ಲಿ ಉತ್ಸಾಹದ ವಾತಾವರಣ ನಿರ್ಮಾಣವಾಯಿತು.

ಭಾರತದ ಅಭಿವೃದ್ಧಿಯೇ ಪ್ರಮುಖ ಗುರಿ
ಭಾರತವು ವಿಶ್ವದ ಪ್ರಮುಖ ಆರ್ಥಿಕ ಶಕ್ತಿಗಳಲ್ಲಿ ಒಂದಾಗಬೇಕು. ದೇಶವು ಸ್ವಾವಲಂಬಿಯಾಗಬೇಕು ಮತ್ತು ಜಾಗತಿಕ ಉತ್ಪಾದನಾ ಕೇಂದ್ರವಾಗಿ ಬೆಳೆಯಬೇಕು ಎಂಬ ಗುರಿಗಳನ್ನು ಭಾಷಣದಲ್ಲಿ ಉಲ್ಲೇಖಿಸಲಾಯಿತು. ಅಷ್ಟೇ ಅಲ್ಲದೆ, ಪ್ರತಿಯೊಂದು ಬಡ ಕುಟುಂಬಕ್ಕೂ ಸ್ವಂತ ಮನೆ ಸಿಗಬೇಕು, ದೇಶದಲ್ಲಿ ಬಡತನ ನಿವಾರಣೆಯಾಗಬೇಕು, ಗ್ರಾಮೀಣ ಪ್ರದೇಶದ ಮಹಿಳೆಯರು ಆರ್ಥಿಕವಾಗಿ ಸಬಲರಾಗಬೇಕು ಎಂಬ ಆಶಯವನ್ನೂ ವ್ಯಕ್ತಪಡಿಸಲಾಯಿತು.

ಗ್ರಾಮೀಣ ಮತ್ತು ದೂರದ ಪ್ರದೇಶಗಳಿಗೂ ಅಭಿವೃದ್ಧಿ ಯೋಜನೆಗಳು ತಲುಪಬೇಕು. ವಂಶಪಾರಂಪರ್ಯ ರಾಜಕಾರಣ ಮತ್ತು ತುಷ್ಟೀಕರಣದ ರಾಜಕೀಯ ಕೊನೆಗೊಳ್ಳಬೇಕು. ಭಾರತ ಅಭಿವೃದ್ಧಿ ಹೊಂದಿದ ರಾಷ್ಟ್ರವಾಗಬೇಕು ಎಂಬ ಗುರಿಗಳನ್ನು ಪ್ರಸ್ತಾಪಿಸಲಾಯಿತು.

ಈ ಪ್ರತಿಯೊಂದು ಗುರಿಯ ನಂತರವೂ “ಮೋದಿ ಕಹೀಂ ನಹೀ ಜಾಯೇಗಾ” ಎಂಬ ಘೋಷಣೆ ಮೊಳಗಿತು. ದೇಶದ ಮಕ್ಕಳು ಕೂಡ ಈ ಸಂಕಲ್ಪವನ್ನು ನೆನಪಿನಲ್ಲಿಟ್ಟುಕೊಳ್ಳಬೇಕು ಎಂದು ಕರೆ ನೀಡಲಾಯಿತು.

ಗುಜರಾತ್‌ಗೆ 14 ಸಾವಿರ ಕೋಟಿ ರೂ.ಗೂ ಅಧಿಕ ಯೋಜನೆಗಳ ಕೊಡುಗೆ
ಮೋದಿ ಅವರ ಗುಜರಾತ್ ಪ್ರವಾಸದ ಪ್ರಮುಖ ಉದ್ದೇಶಗಳಲ್ಲಿ ಅಭಿವೃದ್ಧಿ ಯೋಜನೆಗಳಿಗೆ ಚಾಲನೆ ನೀಡುವುದೂ ಒಂದಾಗಿದೆ. ಬನಸ್ಕಾಂಠದಲ್ಲಿ ಕೃಷಿ, ಹೈನುಗಾರಿಕೆ, ಸಾರಿಗೆ, ರಸ್ತೆ ಮತ್ತು ಗ್ರಾಮೀಣ ಮೂಲಸೌಕರ್ಯ ಸೇರಿದಂತೆ ವಿವಿಧ ಕ್ಷೇತ್ರಗಳ 14 ಸಾವಿರ ಕೋಟಿ ರೂ.ಗೂ ಅಧಿಕ ಮೌಲ್ಯದ ಯೋಜನೆಗಳನ್ನು ಉದ್ಘಾಟಿಸಲಾಯಿತು. ಕೆಲವು ಯೋಜನೆಗಳಿಗೆ ಶಂಕುಸ್ಥಾಪನೆಯನ್ನೂ ನೆರವೇರಿಸಲಾಯಿತು.

ಇದನ್ನೂ ಓದಿ: ಹೈನುಗಾರಿಕೆಯಲ್ಲಿ ವಿಜ್ಞಾನ-ತಂತ್ರಜ್ಞಾನದ ಕ್ರಾಂತಿ, ಗುಜರಾತ್‌ನಲ್ಲಿ ಪಶುಸಂತಾನೋತ್ಪತ್ತಿ ಕೇಂದ್ರ

ಸಗಣಿಯಿಂದ ಬಯೋ-ಸಿಎನ್‌ಜಿ: ಹೈನುಗಾರರಿಗೆ ಹೊಸ ಅವಕಾಶ
ಬನಾಸ್ ಡೈರಿಯ ವತಿಯಿಂದ ಥರಾಡ್ ಮತ್ತು ರಾಧನ್‌ಪುರದಲ್ಲಿ ನಿರ್ಮಿಸಿರುವ ಬಯೋ-ಸಿಎನ್‌ಜಿ ಘಟಕಗಳು ಈ ಯೋಜನೆಗಳ ಪ್ರಮುಖ ಭಾಗವಾಗಿವೆ. ಥರಾಡ್ ಘಟಕವು ಪ್ರತಿದಿನ 75 ಟನ್ ಹಾಗೂ ರಾಧನ್‌ಪುರ ಘಟಕವು 100 ಟನ್ ಗೋಮಯವನ್ನು ಸಂಸ್ಕರಿಸುವ ಸಾಮರ್ಥ್ಯ ಹೊಂದಿವೆ. ಜಾನುವಾರುಗಳ ಸಗಣಿಯನ್ನು ಕೇವಲ ತ್ಯಾಜ್ಯವಾಗಿ ನೋಡದೆ, ಅದರಿಂದ ಜೈವಿಕ ಇಂಧನ ಉತ್ಪಾದಿಸುವುದು ಈ ಯೋಜನೆಯ ಉದ್ದೇಶ. ಇದರಿಂದ ತ್ಯಾಜ್ಯ ನಿರ್ವಹಣೆಯ ಜೊತೆಗೆ ಹೈನುಗಾರಿಕೆಗೆ ಹೆಚ್ಚುವರಿ ಆದಾಯದ ಅವಕಾಶವೂ ಸೃಷ್ಟಿಯಾಗಬಹುದು.

ರಾಷ್ಟ್ರೀಯ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ